1. ¿Imakunan pasanqa Jesucristo waranqa watata kamachikuyta qallariqtin?

 ¡MAY sumaqchá kanqa Jesucristo kay pachata kamachiyta qallariqtinqa! Payqa waranqa watatan kamachikunqa. Llapanchispas maytachá munashanchis wañupuq familianchiskunawan amigonchiskunawanpas jujmanta tupaytaqa. Jehová Diospas maytan munashan chay pasanantaqa (Job 14:15). Imaynataraqchá chay p’unchay chayamuqtinqa kusikusunchis. Ñaupaq yachachikuypi yachasqanchis jina, chanin runakunaq sutinqa kausay libropin qelqasqa kashan, paykunaqa wiñaypaq kausanankupaqmi kausarimpunqaku (Hech. 24:15; Juan 5:29). Yaqachus jina munakusqanchis familianchiskunapas amigonchiskunapas ñaupaqta kay pachapi kausarimunqaku. * Bibliapiqa willallantaqmi mana chanin runakuna juzgasqa kanankupaq kausarimpunankumanta, paykunaqa Jehová Diosta mana allinta reqsispan wañukapurqanku.

2, 3. a) Isaías 11:9, 10 textopi nisqanman jina, ¿iman pasanqa Jesucristo kay pachata kamachimuqtin? b) ¿Imakunamantan kay yachachikuypi yachasunchis?

² Llapa kausarimpuqkunan imaymanata yachananku kanqa (Isa. 26:9; 61:11). Chaymi llapa kausarimpuqkunaman yachachikunan kanqa Jehová Diosmanta munayninmantawan, chhayna yachachikuyqa manan jayk’aqpas karqanchu (leey Isaías 11:9, 10). Mana chanin runakunaqa yachanankun kanqa Jesucristomanta, Diospa gobiernonmanta, Jesucristo noqanchisrayku  wañupusqanmanta, Diospa sutin ch’uyanchasqa kananmanta, paylla kamachikunanpaq derechoyoq kasqanmantapas. Chanin runakunapas yachanankun kanqa Jehová Diospa imakunatachus nisqanmanta. Wakinqa wañupurqanku Biblia manaraq qelqayta tukukushaqtinmi. Chhaynaqa, chanin runakunapas mana chanin runakunapas imaymanatan yachananku kanqa.

³ Kay yachachikuypin kay tapuykunamanta yachasun: ¿Imaynatan jamuq tiempopi llapa runakunaman yachachikunqa? ¿Iman pasanqa chay yachachikuyta kasukuqkunawan? ¿Iman pasanqa chay yachachikuyta mana kasukuqkunawan? Chaykunamanta yachayqa allinpunin kanqa. Daniel librota, Apocalipsis librota leespan yachasun imakunachus kausarimpuy tiempopi pasananmanta. Ñaupaqta qhawarisun Daniel 12:1, 2 textopi imakunachus pasananmanta willasqanta.

4, 5. Daniel 12:1 textopi nisqanman jina, ¿iman tukukuy tiempopi pasanqa?

⁴ (Leey Daniel 12:1). Daniel libropin ordenpi willawashanchis tukukuy p’unchaykunapi imakunachus pasananmanta. Daniel 12:1 textopin rimashan Miguelmanta, payqa Jesucriston, paymi Diospa llaqtanrayku sayarinqa. Chay profeciaqa 1914 watapin junt’akuyta qallarirqan, chay watapin Jehová Diosqa gobiernonpi kamachikunanpaq Jesusta reyta churarqan.

⁵ Chaymantapas Danielqa willarqanmi Jesusqa “sinchi llakikuy tiempopi” Diospa llaqtanrayku sayarinanta, chay p’unchaykuna jinaqa manan jayk’aqpas nacionkunaq kasqanmantapachaqa karqanchu. Chay “sinchi llakikuy tiempomanta” rimaspaqa “manchay ñak’ariy” tiempomantan rimashan, chaymantan willashallantaq Mateo 24:21 textopi. Jesusmi sayarinqa Diospa llaqtanta jark’aykunanpaq, chayqa pasanqa manchay ñak’ariy tiempoq tukukuyninpin, Armagedón guerrapi. Apocalipsis libropipas willashanmi Jesuspa jark’aykusqan runakunamanta, paykunatan ancha askha runakuna nispa nikun, paykunaqa manchay ñak’ariy tiempopin salvakunqaku (Apo. 7:9, 14).

6. ¿Iman pasanqa ancha askha runakuna manchay ñak’ariy tiempopi salvakusqanku qhepaman, imaraykun chayta ninchis? (Qhaway “Leeqkunaq tapukusqan” nisqata, chaypin willashan paraisopi kausarimpuy kananmanta).

⁶ (Leey Daniel 12:2). ¿Iman pasanqa ancha askha runakuna manchay ñak’ariy tiempopi salvakusqanku qhepaman? Chay qhepamanqa askha wañupuq runakunan kausarimpunqaku. Ñaupaqpin nirqanchis Daniel 12:2 textopi kausarimpuyqa juj rijch’anachiylla kasqanta otaq tukukuy p’unchaykunapi jina espiritual cuerpopi kausarimpuy kasqanta. * Kunanmi ichaqa entiendenchis chay textopiqa wañupuq runakuna paraisopi kausarimpunanmanta rimashasqanta. ¿Imaraykun chhaynata kunan entiendenchis? Job 17:16 textopi jinan Daniel 12:2 textopipas rimashan “jallp’aq sonqonpi” puñuqkunamanta otaq “Sepulturapi” kaqkunamanta. Chayraykun ninchis Daniel 12:2 textoq nisqanqa mana juj rijch’anachiyllachu kasqanta aswanpas cheqaqpuni kasqanta. Chay kausarimpuyqa tukukuy p’unchaykuna qhepamanmi pasanqa, Armagedón guerraq pasasqan qhepaman.

7. a) ¿Imaynapin wakin kausarimpuqkuna “wiñay kausaypaq” rijch’arimunqaku? b) ¿Imanaqtinmi chay kausarimpuy aswan allin kanqa?

⁷ ¿Imatan nishan Daniel 12:2 textopi wakinqa “wiñay kausaypaq” rijch’arimunqaku nisqanwan? Waranqa watapi kausarimpuqkunaqa  Jehová Diosmantan yachanqaku, sichus paykuna Jehová Diospa kamachikuyninkunata Jesucristoq kamachikuyninkunata kasukunqaku chayqa, wiñaypaqmi kausanqaku (Juan 17:3). Chaymi chay kausarimpuyqa aswan allin kanqa ñaupaq tiempopi kausarimpuq runakunamantaqa (Heb. 11:35). ¿Imaraykun chayta ninchis? Ñaupaq tiempopi kausarimpuq runakunaqa jujmantan wañupurqanku.

8. ¿Imaynapin wakin kausarimpuq runakuna “wiñaypaq p’enqasqa, pisichasqa kanankupaq” kausarimpunqaku?

⁸ Ichaqa manan llapa kausarimpuq runakunachu Jehová Diosmanta yachachikusqantaqa uyarikunqaku. Danielmi willarqan “wakinqa wiñaypaq p’enqasqa, pisichasqa kanankupaq” kausarimpunankuta. Mana kasukuq kasqankuraykun paykunaq sutinqa mana kausay libropichu qelqasqa kanqa, jinan mana wiñaypaqchu kausanqaku. Chhaynaqa Daniel 12:2 textopiqa willashan kausarimpuq runakunata paraisopi imachus pasananmantan, chayqa kanqa kausarimpusqanku qhepaman imatachus ruwasqankuman jinan (Apo. 20:12). * Wakinmi wiñaypaq kausanqaku, wakintaq wiñaypaq wañupunqaku.

9, 10. a) Daniel 12:3 nisqan jina, ¿iman pasallanqataq manchay ñak’ariy tiempoq pasasqan qhepaman? b) ¿Pikunan kanku “allin reparaq runakuna p’unchaypi cielo jinaraq k’anchariqkuna”?

⁹ (Leey Daniel 12:3). ¿Iman pasallanqataq manchay ñak’ariy tiempoq pasasqan qhepaman? Daniel 12:3 textopin willashallantaq imapiwansi manchay ñak’ariy tiempoq pasasqan qhepaman pasallanqataq chayta.

¹⁰ Chay textopin willashan “allin reparaq runakuna p’unchaypi cielo jinaraq k’ancharinankuta”. ¿Pikunataq paykunari kanku? Jesusmi Mateo 13:43 textopi paykunamanta rimallarqantaq. Paymi nirqan: “Chay tiempopiqa chanin runakunan inti jinaraq k’ancharinqaku janaq pacha Taytankuq gobiernonpi”, nispa. Chaypiqa rimasharqan janaq pacha gobiernoq wawankunamantan, paykunaqa kanku Diospa gobiernonpi Jesuswan kuska kamachikamuqkunan (Mat. 13:38). Chhaynaqa Daniel 12:3 textopiqa willasharqan janaq pachaman riq cristianokunamantan, paykunaqa Jesuswanmi waranqa watata kamachimunqaku.

11, 12. ¿Imatan 144.000 cristianokuna ruwanqaku waranqa wata kamachikusqanku tiempopi?

¹¹ Janaq pachaman riq cristianokunaqa askha runakunatan chanin kausayman kutirichinqaku. ¿Imaynatan chayta ruwanqaku? Paykunaqa Jesuswan kuskan llank’anqaku kay pachapi runakuna Jehová Diosmanta munayninmantawan allin yachachisqa kanankupaq, chay yachachikuyqa waranqa watantinmi aparikunqa. 144.000 janaq pachapaq ajllasqa cristianokunaqa manan reykunallachu kanqaku, paykunaqa sacerdotekunan kallanqakutaq (Apo. 1:6; 5:10; 20:6). Chaymi jamuq tiempopiqa kay pachapi tiyaq runakunata yanapanqaku pisi-pisimanta ch’uya mana juchayoq runakuna kanankupaq (Apo. 22:1, 2; Ezeq. 47:12). ¡Maytachá janaq pachapaq ajllasqa cristianokunaqa kusikunqaku chay llank’aypi yanapakusqankumantaqa!

¹² ¿Pikunan kanku chanin kausayman kutirichisqa runakuna? Chay runakunan kanku paraisopi kausarimpuq runakuna, Armagedón guerrapi salvakuqkuna, paraisopi naceq wawakunapas. Waranqa wata tukuypaqqa kay pachapi llapa kausaq runakunaqa ch’uya mana juchayoqmi kapunqaku. Chhaynaqa, ¿jayk’aqtaq paykunaq sutinri kausay libropi qelqasqa kanqa?

13, 14. ¿Imatan rikuchinanku kanqa ch’uya mana juchayoq runakuna wiñay kausayta chaskinankupaq?

¹³ Yachasqanchis jina, juj runa ch’uya mana juchayoqña kanman chaypas, manan chayraykullachu wiñay kausaytaqa chaskinqa. Yuyarisun Adantawan Evatawan, paykunaqa ch’uya runakunan karqanku, ichaqa Diosta kasukusqankutan rikuchinanku karqan, chayraqmi wiñay kausaytaqa chaskinanku karqan. Paykunan ichaqa Diosta mana kasukurqankuchu (Rom. 5:12).

¹⁴ Kaypi yachasqanchis jina, waranqa wata tukuypaqqa kay pachapi llapa kausaq runakunaqa ch’uya mana juchayoqmi kapunqaku. Ichaqa, ¿llapankuchu Jehová Diospa gobiernonta sonqomanta apoyanqaku? Icha, ¿Adán, Eva jinachu ch’uya runaña kashaspapas Diospa contranpi jatarinqaku? Chayta yachakunanpaqmi última prueba kanqa.

15, 16. a) ¿Jayk’aqmi runakuna rikuchinanku kanqa Jehová Diosta sonqomantachus kasukunku icha manachus chayta? b) ¿Iman pasanqa kasukuqkunawanpas mana kasukuqkunawanpas?

¹⁵ Satanasqa waranqa watantinmi wisq’asqa kashanqa. Chaymi mana pitapas engañayta atinqachu. Ichaqa waranqa wata tukuytan kacharichisqa kanqa, jinaspa askha ch’uya runakunata engañayta munanqa. Chay tiempopin kay pachapi llapa runakuna rikuchinanku kanqa Diospa sutinta respetankuchus  kamachikusqantapas kasukunkuchus icha manachus chayta (Apo. 20:7-10). Imatachus ruwasqankuman jinan sutinku kausay libropi wiñaypaq qelqasqa kanqa otaq manapas.

¹⁶ Yaqapaschá wakinqa paraisopiqa Adán Eva jina Jehová Diospa gobiernon contra sayarinqaku. ¿Imataq paykunawanri pasanqa? Apocalipsis 20:15 textopin nin: “Piqpa sutinchus mana kanchu kausay libropi qelqasqa chay runapas nina rauray qochamanmi wijch’uykusqa karqan”, nispa. Chhaynaqa mana kasukuq runakunaqa wiñaypaqmi wañuchisqa kanqaku. Ichaqa yaqa llapa ch’uya runakunan chay última pruebata atipanqaku, jinaspan sutinku wiñaypaq kausay libropi qelqasqa kanqa.

17. ¿Ima pasanantan Daniel willarqan tukukuy p’unchaykunapi? (Daniel 12:4, 8-10).

¹⁷ ¡Maytan kusikunchis jamuq tiempopi chaykuna pasananmanta yachaspaqa! Ichaqa Diospa angelninqa willallarqantaqmi Danielman tukukuy tiempopi imakunachus pasananmanta (leey Daniel 12:4, 8-10; 2 Tim. 3:1-5). Diospa angelninmi Danielta nirqan: “Chhaynapin cheqaq kaqmanta yachayqa askhayanqa”, nispa. Chhaynaqa Diospa llaqtanqa aswan allintan entiendenan karqan Daniel libropi kashaq profeciakunata. Chaymantapas Diospa angelninqa willarqanmi tukukuy p’unchaykunapi imakunachus pasananmanta. Paymi nirqan: “Millay runakunaqa  mana allin ruwaykunallapin purinqaku, manataqmi mayqenpas entiendenqachu”, nispa.

18. ¿Iman millay runakunawan pisi tiempollamanta pasanqa?

¹⁸ Kay tiempopin millay runakunaqa imachus munasqankuta ruwashanku (Mal. 3:14, 15). Ichaqa pisillamantan Jesusqa cabraman rijch’akuq runakunata juzganqa, jinaspa ovejaman rijch’akuq runakunamanta t’aqanqa (Mat. 25:31-33). Millay runakunaqa manan salvakunqakuchu manchay ñak’ariy tiempopiqa, nitaq mosoq pachapiqa kausarimpunqakuchu. Paykunaq sutinqa manan kausay libropi qelqasqachu kanqa, chay kausay libromantan rimashan Malaquías 3:16 textopi.

19. ¿Imatan kunan ruwananchis kashan, imanaqtinmi chayta ruwananchis? (Malaquías 3:16-18).

¹⁹ Kunanmi rikuchinanchis kashan mana millay runakunachu kasqanchista (leey Malaquías 3:16-18). Jehová Diosmi juñushan chaninpaq qhawarisqan runakunata. Noqanchisqa paykunamanta jujninchá kayta munashanchis.

20. ¿Imatan Jehová Dios Danielman prometerqan, imanaqtinmi chay promesa junt’akunanta munawaq?

²⁰ Kay tukukuy p’unchaykunapi kausashasqanchisqa may allinpunin. Pisillamantan imaymanakuna pasasqanta rikusun. Chayamushanñan millay runakunaq chinkapunan tiempo. Chay qhepamanmi rikusun Danielman prometesqanta Jehová Dios junt’asqanta. Diosmi Danielta nirqan: “Tiempollanpin jatarimpunki imachus tupaqniykita chaskikunaykipaq”, nispa (Dan. 12:13). Qanri, ¿munashankichu Danielpas munakusqayki runakunapas kausarimpunankuta? Chaypaqqa tukuy atisqaykitan kallpachakunayki Diospaq junt’aq sonqo kanaykipaq, jinan sutiykiqa kausay libropi qelqasqa kanqa.