¿Imaninmi Biblia chaykunamanta?

Hechos 24:15 textopin willashan chanin runakunapas mana chanin runakunapas wañusqa kasqankumanta kausarimpunankuta. Chanin runakunaqa manaraq wañupushaspa Diosta kasukuqkunan kanku, chayraykun paykunaq sutinqa kausay libropi qelqasqa kashan (Mal. 3:16). Mana chanin runakunataq kanku manaraq wañupushaspa Jehová Diosta mana reqsiqkuna, chayraykun paykunaq sutinqa mana qelqasqachu kashan kausay libropiqa.

Juan 5:28, 29 textopin rimashan paraisopi iskay t’aqa runakuna kausarimpunankumanta, chay runakunaqa kaqllan kanku Hechos 24:15 textopi nisqan runakunawan. Jesusmi nirqan: “Pikunachus allin kaqkunata ruwarqanku chaykunan kausaypaq kausarimpunqaku, pikunachus millay kaqkunata ruwarqanku chaykunataq juzgasqa kanankupaq kausarimunqaku”, nispa. Chanin runakunaqa manaraq wañupushaspan allin kaqkunata ruwarqanku chayraykun paykunaqa kausarimpunqaku, sutinkutaq kausay libropi qelqasqalla kashanqa. Mana chanin runakunan ichaqa manaraq wañupushaspa mana allinkunata ruwasqankurayku juzgasqa kanankupaq kausarimpunqaku, paykunaq sutinqa manaraqmi kausay libropiqa qelqasqachu kashan. Mana chanin runakunaqa paraisopi Jehová Diosta kasukunqakuchus icha manachus chayman jinaraqmi juzgasqa kanqaku, chay tiempopin paykunataqa Jehová Diosmanta yachachikunqa. Kasukuqtinkutaq wiñay kausay libropi sutinku qelqasqa kapunqa.

Apocalipsis 20:12, 13 textopin nishan paraisopi llapa kausarimpuqkuna mosoq “qelqa k’uyukunapi” kaq kamachikuykunata kasukunankuta. Chay kamachikuykunan paraisopi tiyaqkunapaq kanqa, chayta mana kasukuqkunaqa mana jayk’aq kausarimpunankupaqmi wañuchisqa kanqaku (Isa. 65:20).

Daniel 12:2 textopin nishan: “Jallp’a sonqopi askha puñuqkunan rijch’arimpunqaku. Paykunamanta wakinmi rijch’arimunqa wiñay kausaypaq, wakintaq wiñaypaq p’enqasqa, pisichasqa kanankupaq”, nispa. Chay textopi nisqan jina, Jesús waranqa wata kamachikamuqtinmi wakin “wiñay kausayta” chaskinqaku, wakintaq “wiñaypaq wañuchisqa” kapunqaku (Apo. 20:15; 21:3, 4).

Chanin runakunamanta mana chanin runakunamanta astawan entiendenanchispaq rijch’anachisun juj nacionpi tiyay munaq runakunawan. Juj nacionman riq runakunamanmi wakinmanqa qonku documentokunata chaypi llank’anankupaq chaypi unay tiempo tiyanankupaq, chhaynapin paykunaqa chay nacionpi runakuna jina imaymana derechoyoq kanku. Chay jinan chanin runakunaqa kanku. Wakin runakunamanmi ichaqa documentokunata qonku juj ratulla chay nacionta visitanankupaq otaq juj tiempolla chaypi tiyanankupaq. Chay nacionpi unay tiempo tiyapunankupaqmi ichaqa juj documentokunatawan orqonanku, chay nacionpi kamachikuykunatapas kasukunanku. Chhaynan kanku mana chanin runakunapas, paykunaqa paraisopi wiñaypaq kausayta munaspaqa Jehová Diospa kamachikuyninkunatan kasukunanku kanqa chayman jinataqmi kausanankupas kanqa. Jinaspapas imayna documentoyoqña jaykurqanku runakuna juj nacionman chaypas chay nacionpi tiyanankupaqqa kamachikuykunatan kasukunanku. Chhaynallataqmi paraisopi kausarimpuqkuna chaninña mana chaninña kanku chaypas Jehová Diospa kamachikuyninkunata kasukunanku kanqa wiñaypaq kausanankupaq.

Jehová Diosqa ancha munakuq Diosmi chanin Diosmi (Deut. 32:4; Sal. 33:5). Chhayna munakuq kasqanraykun payqa chanin runakunatapas mana chanin runakunatapas paraisopi kausarichimpunqa. Paymi ichaqa munan llapa kausarimpuqkuna kamachikuyninkunata llapanta kasukunankuta payta munakunankutapas. Sichus kausarimpuqkuna payta munakunqaku kasukunqaku chayqa wiñaypaqmi paraisopi kay jallp’api tiyapunqaku.