Tayta-mamakunaqa wawankuman yachachisqankuman jinan paykunapas ruwananku. Sichus pipas punkuykita takamuqtin wawaykita niwaq phaway nimuy “manan chaypichu kashan” nispa chayri, ¿imaynataq wawaykitari niwaq: “Manan llullakunaykichu”, nispa?

Davidmi nin: “Askha runakunan ninku: ‘Imachus nisqaytan ruwanayki’, nispa. Ichaqa wawakunaqa manan chaytachu ruwanku, aswanmi tayta-mamankuq ruwasqanta rikuspa kaqta ruwallankutaq. Sichus wawanchista nisunchis ‘aman kayta ruwankichu’ nispa, noqanchistaq chayta ruwasunchis chayqa, manan kasuwasunchu”, nispa.

BIBLIAPIN NIN: “¿Imanaqtintaq ‘aman suwakunkichu’ nishaspari suwakushanki?”, nispa (Romanos 2:21).

Wawakunaqa imatapas astawanqa yachanku tayta-mamankumantan, manan escuelapi compañeronkumantachu, chhaynaqa tayta-mamakuna, qankunamantan kanqa wawaykichis imayna runa kananpaqqa, astawanqa imachus ruwasqaykichiswanmi wawaykichistaqa yachachinkichis.

Nicol nin: “Jayk’a kutitaña wawaykita niwaq: ‘Aman chaytaqa ruwankichu’ nispa, qantaq chayta ruwashawaq chayqa manan kasukunqachu, paykunaqa lliu imachus ruwasqaykitan qhawashanku”, nispa.

BIBLIAPIN NISHAN: “Janaq pachamanta jamuq yachaymi ichaqa mana iskay uyachu”, nispa (Santiago 3:17).

Kaykunatan tapukunayki: “¿Millaytachu tratani esposayta otaq qosayta wawaykunatapas? ¿Imakunatan televisionpi qhawani? ¿Imaynan amigoykuna kanku? ¿Jujkunata yanapanichu?”, nispa. Imaynachus kanki chay jinan wawaykikunapas kanqaku.

Cristinan nin: “Manaraq wawaykuta imatapas nishaspaykun qosaywan tapukuyku: ‘Noqanchis imachus nisqanchisman jinachu kausashanchis’”, nispa.

Pantaruspaqa “perdonaykuway” ninaykin. Wawakunaqa yachankun juchayoq runa kasqanchista, chaymi impipas pantaruspaqa qosaykita otaq wawaykikunata “perdonaykuway” nispa ninayki. Chhaynapin wawaykichista yachachishankichis k‘umuykukuq honrado kayta.

Roberton nin: “Imapipas pantaruspaqa “perdonaykuway” nispan ninanchis, chhaynapi wawakunapas yachanqaku perdonta mañakuyta”, nispa.