Imayna runa kasqaykita jujkuna yachanankupaqqa manan sutillaykitachu, nitaq p’achakusqallaykitachu qhawanku, yachaytan munanku imapi creesqaykita, allin runachus kanki manachus chaytapas.

Imayna kasqaykita reqsikusqaykin yanapasunki juj waynakunaq ruwasqanta ama qatikunaykipaq.

Adrianmi nin: “Askha runakunan jujkunaq ruwasqanta qatipakunku, paykuna jinaraqmi p’achakunkupas”, nispa.

Karenmi nin: Sasaña kaqtinpas noqaqa kallpachakunin allin kaqta ruwanaypaq. Allintataqmi amigokunatapas reqsini, chaymi paykunawan kaspaqa mana manchakuspa imatapas parlariyku”, nispa.

BIBLIAPIN NISHAN: “Amataq kay pacha runakuna jinachu kausaychis, aswanpas yuyayniykichista mosoqyachispa imayna kasqaykichista cambiaychis”, nispa (Romanos 12:2).

Imayna runachus kayta munanki chayta yachanaykipaqqa qhawarikunaykin imakunatas allinta ruwashanki, imakunatas mana ruwayta atinkichu, imakunapis creenki chaykunata. Chaypaqqa kaykunatan qhawarinayki:

Imakunatan allinta ruwanki: Yaqapaschá pacienciayoq kanki, imatapas allinta ruwanki, tiempollanpi imatapas ruwanki, allin llank’aq kanki, qoykukuq kanki.

KAYTAN RUWAWAQ: Imayna kasqaykita yachanaykipaqqa tapukuwaqmi tayta-mamaykita otaq amigoykitapas.

BIBLIAPIN NISHAN: “Chayrayku sapanka qhawarikuchun imaynas kashan imapas ruwasqankuna chayta, chhaynapi ama jujwan igualakuspachu kusikunanpaq, aswanpas paypa imachus ruwasqanwan kusikunanpaq”, nispa (Gálatas 6:4).

Imakunatan mana ruwayta atishankichu: ¿Imakunapin allinyanay kashan? ¿Imaynapi tarikuspan facil-llata ima juchamanpas urmayman? ¿Imaynapi tarikuspan ratolla phiñakuni?

BIBLIAPIN NISHAN: “Mana juchayoqmi kayku” nisunmanchus chayqa, noqanchis kikillanchistaqmi engañakushasunman, manataqmi cheqaq kaqqa noqanchispichu kashanman”, nispa (1 Juan 1:8).

Imapin creenki: ¿Ima kamachikuykunatan kasukuni, imaraykun chaykunata kasukuni? ¿Creenichu Diospi? ¿Imaynapin yachani Dios kasqanmanta? ¿Ima ruwaykunatan mana allinpaq qhawarini? Qhawarisqayman jina, ¿imaynan jamuq tiempopi kausay kanqa?

BIBLIAPIN NISHAN: “Chaypachan allin reparayqa waqaychasunki, allin yuyaypas makilla cuidasunki”, nispa (Proverbios 2:11).