Diospa gobiernonmanta willaqkuna

Kusi kausaytan tarirqan

JESUSQA reqsinmi ovejankunataqa (Juan 10:14). Dios sonqo runaqa thajpi kausaytan munan, manataqmi pitapas mana allintaqa ruwanmanchu, chhaynapin Jesuspa qatikuqninkunaman juñukapun. Chaymantapas yachanmi imapaq kausasqanta, chaymi pasaran Bélgica nacionmanta juj warmiwan. Paymi willakun:

“Jehová Diospa testigonkuna wasiyta takamuqtinkuqa sinchi llakiq ñit’isqanmi kasharqani, wañuchikuytaraqmi munasharqani. Paykunan willawarqanku kay pachapi sasa kausay mejorananta, chaywanqa kusikurqanin, ichaqa Diospa munayninñan chayqa kanqa niwaqtinkuqa manan allinpaqchu chayta qhawarirqani. Noqaqa pusaq watañan mana iglesiamanqa ripurqanichu, chaypi runakuna mana imatapas allintachu ruwasqankurayku. Testigokuna Bibliamanta willawaqtinkun ichaqa cuentata qokurqani, Diosmanta karunchakuspa kausayqa sasa kasqanta.

”Testigokunaqa allintan visitamushawarqanku, chaymantan ichaqa manaña paykunawan tuparqaniñachu. Chaymi jujmanta llaki onqoywan atipachikurqani jinaspan iskay cajetilla cigarrota juj p’unchaypi fumaspa tukuq kani, chaymantapas drogakuq iman kani. abueloy wañupusqanmantan llakikurqani, jinaspan paywan rimayta munaspa layqakunaqta riq kani. ¡Chayqa sinchi millaymi karqan! Tutakuna sapallay kashaqtiymi supaykuna wasiyman jaykumuqku. Chhaynan askha killakuna kasharqani. Chaymi tutayamushaqtinqa sinchita manchakuq kani.

”Juj p’unchaymi paseaq lloqsirqani, ichaqa chay kutipiqa juj ladotañataqmi rirqani, jinan rikurqani munay wasi ruwakushasqanta. Chaypiqa askha runakunan llank’ashasqaku. Astawan qayllaykuspan repararqani Jehová Diospa testigonkuna juñunakunanku wasita ruwashasqankuta. Chaypin yuyarirqani wasiyta visitamuwasqankuta, jinan yuyaykurqani llapa runapas paykuna jina kankuman chayqa, may munaychá kausayqa kanman nispa.

”Maytan munasharqani jujmanta wasiyta jamunankuta, chaymi jujnin llank’aqwan rimarqani. Diosmantan mañakusharqani visitamuwanankupaq, chaymi chunka p’unchay pasaqtin visitamuwarqan rimasqay hermano. Jinaspan niwarqan jujmanta Bibliata estudianaykupaq, kusisqan estudiayta qallarirqani. Chaymantataq juñunakunanku wasiman invitawarqan, chaymanpas rirqanin. ¡Manan jayk’aqpas paykunata jinaqa reqsirqanichu! Unay tiempoñan maskhasharqani chhayna kusisqa munakuq runakunataqa, tarirurqanitaqmi.

”Tarisqaymantapachan juñunakuykunamanqa mana faltayta rirqani. Kinsa semanamantan cigarro fumaytaqa saqepurqani. Wijch’upurqanin layqamanta libroykunata, Satanasmanta musikaykunatapas, chhaynapin manaña supaykunaqa fastidiawarqankuñachu. Jehová Diospa munasqanman jinan kausayta qallaripurqani, kinsa killa pasaqtintaq Diosmanta jujkunaman willayta qallarirqani. Soqta killamantan bautizakapurqani, bautizakusqaymanta iskay p’unchaymantataq precursor auxiliar kapurqani.

”Maytan Jehová Diosta agradecekuni llaqtanman pusamuwasqanmanta. Chayraqmi yachani imapaq kausasqayta, may kusisqataqmi kausani. Yachallarqanitaqmi “Jehová Diospa sutinqa allin perqasqa torre jina” kasqanta chaypi pakakunaypaq (Proverbios 18:10). Salmistaq qelqasqanta jinan noqapas nini: “¡Aswan allinqa patioykipi juj p’unchayllapas kaymi waranqa p’unchay juj ladopi kaymantaqa! Noqapaqqa Diosniypa wasin punkupi kaymi aswan allin millay runakunaq karpanpi tiyaymantaqa”.

Dios sonqo kaspan chay warmiqa sumaq kusi kausayta tarirqan. Chhaynallataqmi pipas allin sonqoyoq runaqa Jehová Diosninchista tarinqa.