¿Yuyaykunkichu santo espirituq contranpi huchallikusqaykita?

“Kanmi wañuyman aysaykuq hucha.” (1 JUAN 5:16.)

1, 2. ¿Imaynapi yachanchis Diospa santo espiritun contra huchallikuy kasqanta?

ALEMANIA llaqtayoq warmi qelqaran: “Ancha llakisqan kashani, santo espirituq contranpipaschá huchallikurani”, nispa. Kay warmi Dios serviqña karan chaypas chhaynatan llakikusharan. ¿Huk cristiano Diospa santo espiritun contra huchallikunmanchu?

² Diospa Simin Qelqaqa willawanchismi Jehová Diospa santo espiritun contra huchallikuymanta. Jesusmi niran: “Diosmi runakunaq ima huchantapas tukuy mana allin rimaywan k’amisqankutapas pampachanqa, pipas Santo Espíritu contra mana allinta rimaspa pisichaqmi ichaqa mana hayk’aqpas pampachasqachu kanqa”, nispa (Marcos 3:28, 29). Bibliaqa willallantaqmi: “Cheqaq-kayta reqsishaspanchisñachus yuyaymantapuni huchallikusunchis chayqa, manan hucha pampachaq sacrificio kanñachu, aswanpas manchay-manchay hatun juiciollañan suyawanchis”, nispa (Hebreos 10:26, 27). Apóstol Juanpas niranmi: “Kanmi wañuyman aysaykuq hucha”, nispa (1 Juan 5:16). ¿Huchaman urmaqchu ninman: Wañuyman aysaykuq huchamanña urmani, nispa?

Huchanchismanta pesapakuspaqa pampachasqan kasun

3. Huchaman urmasqanchismanta khuyayta llakikusqanchis, ¿imatan yaqapas rikuchinman?

³ Jehová Diosmi kay pachantin Juezqa. Llapanchismi payman cuentata qosunchis, payqa chanin kaqtapunin ruwan (Génesis 18:25; Romanos 14:12). Jehová Diosllan nin pikunachus mana pampachana huchaman urmasqanchista, payllan chay huchaman urmasqanchismantapas santo espiritunta qechuwasunman (Salmo 51:11). Sichus huchaman urmasqanchismanta khuyayta llakikushanchis chayqa, cheqaqtan pesapakushanchisman. ¿Imataq cheqaq pesapakuyri?

4. a) ¿Imataq pesapakuyri? b) ¿Imarayku kallpachawanchis Salmo 103:10-14 textoq nisqan?

⁴ Pesapakuyqa huchaman urmasqamanta khuyayta llakikuymi, huchata saqespa Diosman kutirikuymi. Sichus hatun huchaman urmasqanchismanta cheqaqtapuni pesapakuranchis, chay  huchatapas saqeranchistaq chayqa, kallpachawanchismi salmistaq nisqan: “Manan mana chanin ruwasqanchiskunaman hinachu ñoqanchistaqa muchuchiwanchis, manan huchanchiskunaman hinapaschu pagawanchis. Imaynan hanaq pachaqa kay pachamanta aswan wichaypi kashan, ahinatan manchakuqninkunapaq munakuyninta hatunta mast’arimurqan. Imaynan inti lloqsimuyta inti haykuytawan karunchan, ahinatan huchanchiskunata karunchawanchis. Imaynan taytaqa wawankunata khuyayta munakun, ahinatan Señor Diosqa manchakuqninkunata khuyayta munakun. Payqa reqsiwanchismi imayna kasqanchista, yuyarikuwanchismi ñut’u hallp’a kasqanchista”, nispa (Salmo 103:10-14).

5, 6. Pisillapi willay 1 Juan 3:19-22 textoq nisqanta, sut’inchaytaq ima ninanta.

⁵ Kallpachallawanchistaqmi apóstol Juanpa nisqan, paymi niran: “Chay hinapin yachanchis cheqaq-kaypi kashasqanchista, chaymi Diospa ñawpaqenpiqa mana manchakusunchischu, sonqonchisña imamanta huchachawaqtinchispas. Diosqa aswanraqmi sonqonchismantaqa, payqa tukuy imaymanatan yachan. Munasqay wawqe-panaykuna, sonqonchischus mana huchachawanchis chayqa, mana manchakuspan Diosman asuykunchis. Ñoqanchisqa kamachikusqankunatan kasukunchis, paypa munasqantataq ruwanchispas, chaymi payqa tukuy ima mañakusqanchista qowanchis”, nispa (1 Juan 3:19-22).

⁶ Ñoqanchisqa wayqe pananchiskunatan munakunchis, manataq huchapichu purinchis, chaymi yachanchis ‘cheqaq-kaypi kashasqanchista’ (Salmo 119:11). Sonqonchis imamantapas huchachawaqtinchisqa, kaytan yuyarinanchis, “Diosqa aswanraqmi sonqonchismantaqa, payqa tukuy imaymanatan yachan”. Payqa yachanmi ‘wayqe-panapura ch’uya sonqowan munanakusqanchista’, huchamanta karunchakusqanchista, munayninta ruwanapaq kallpachakusqanchistapas, chaymi khuyapayawanchis (1 Pedro 1:22). Sichus Jehová Diosman hap’ipakusun, wayqe panantin munanakusun, manataq huchapi purisunchu chayqa, sonqonchisqa mana huchachawasunchu, ahinapin ‘mana manchakuspa’ Diosman asuykusun mañakuypi. Paytaq mañakuyninchista uyarinqa kamachikuyninkunata kasukusqanchisrayku.

Wakin runakuna santo espíritu contra huchallikuranku

7. ¿Imaynapi yachakunman ima huchapas pampachanaraqchus icha manañachus chayta?

⁷ ¿Ima huchakunataq mana pampachana kanman? Chayta yachanapaq Bibliapi ejemplokunata qhawarisun. Chaykunamanta yachaymi kallpachawasunchis sichus hatun huchaman urmasqanchismanta pesapakuspaña sinchitaraq llakikushanchis chayqa. Chaypi kayta yachasunchis: Hucha pampachasqa otaq mana pampachasqa kananpaqqa manan hucha ruwakusqallantachu  qhawarikunan, aswanpas qhawarikunan imarayku runa huchallikusqanta, sonqon imayna kasqanta, maykama huchallikusqantapas.

8. ¿Imaynatan judío umallikuna santo espirituq contranpi huchallikuranku?

⁸ Ñawpaq kaq siglopi Jesuspa contranpi churakuq judío umallikunaqa santo espirituq contranpi huchallikuranku. Jesusqa Diospa espiritunwanmi milagrokunata ruwaran Jehová Diosta hatunchananpaq. Chaywanpas, chay judiokunaqa niranku: Satanaspa atiyninwanmi chay milagrokunata ruwashan, nispa. Jesuspa nisqan hina, Diospa santo espiritun contra mana allinta rimaspa pisichaqkunaqa manan pampachasqachu kanqaku, ‘aswanmi wiñaypaq huchayoq kapunku’ (Marcos 3:22-30).

9. ¿Iman mana allinta rimaspa pisichay, imanirantaq Jesús chaymanta?

⁹ Dios contra otaq runa contra mana allinta rimaspa pisichayqa yanqamanta tumpaymi, k’arak simikunawan k’amiymi. Diosmantataq santo espíritu paqarimun chayqa, chay espíritu contra rimayqa Dios contra rimayllataqmi. Chay huchaman urmaspa mana pesapakuqkunaqa manan pampachasqachu kanqaku. Wakin runakunaqa yuyaypipuni Diospa santo espiritun contra churakuranku, chaymi Jesús rimaran mana pampachana huchamanta. Cristoq awqankunaqa repararankun Jehová Diospa espiritunwan Jesús milagrokuna ruwasqanta, chaywanpas niranku: Saqraq atiyninwanmi ruwashan, nispa. Chhaynapin Diospa santo espiritunta pisicharanku. Jesusmi chaymanta niran: “Pipas Santo Espíritu contra mana allinta rimaspa pisichaqmi ichaqa mana hayk’aqpas pampachasqachu kanqa, aswanmi wiñaypaq huchayoq kapun”, nispa (Marcos 3:20-29).

10. ¿Imaraykun Jesús Judasta suticharan ‘chinkananpuni kaq runa’, nispa?

¹⁰ Kunanqa rimasun Judas Iscariotemanta. Judasmanqa qolqe churana cajatan hap’ichiranku, ichaqa suwakullaqpuni kasqa (Juan 12:5, 6). Qhepamantaq Judasqa judío kamachikuqkunawan rimanakuran 30 qolqerayku Jesusta hap’ichinanpaq. Chay ruwasqanmanta sonqonña huchacharan chaypas manapunin pesapakuranchu. Chayraykun Judasqa mana kawsarichisqachu kanqa, chaymi Jesús suticharan ‘chinkananpuni kaq runa’, nispa (Juan 17:12; Mateo 26:14-16).

Espirituq contranpi mana huchallikuqkuna

11-13. ¿Ima huchakunaman David urmaran? ¿Imaynatan kallpachawanchis paykunata Diospa pampachasqanmanta yachay?

¹¹ Huk cristiano hatun huchaman urmasqanmanta willakunña congregacionpi ancianokunaman, paykunataq yanaparanku Diosman kutirikunanpaq, chaywanpas chay cristianoqa sinchitaraq nanachikushan huchallikusqanmanta (Santiago 5:14). Chhaynapi tarikushanchis chayqa, allinmi kanman ñawpaq tiempopi huchaman urmaq runakuna pampachasqa kasqankumanta yachay.

 ¹² Ñawpaqta yachasun Davidmanta, paymi Uriaspa warmin Bat-sebawan wasanchay huchata ruwaran. Davidmi wasi patamanta rikuran sumaq rikch’ayniyoq warmi bañakushaqta, hinaspa kamachiran payman pusaykunankupaq, chay warmiwantaq puñuran. Chay qhepamantaq warmiqa onqoq qheparan, chayta yachaspataq Davidqa huchanta pakayta munaspa Uriasta waqyachimuran Bat-sebawan puñunanpaq. Uriasmi ichaqa mana Bat-sebawan puñuranchu, chaymi Davidqa yuyaykuran Uriasta maqanakuypi wañuchinankupaq. Urías wañuqtintaq Davidqa Bat-sebawan casarakuran, Bat-sebaq wachakusqan wawataq pisi tiempollamanta wañupuran (2 Samuel 11:1-27).

¹³ ¿Imatan Jehová Dios ruwaran Davidta Bat-sebatawan? Diosqa Davidpa pesapakusqanta rikuspa, Reinomanta rimanakusqanta mana p’akiyta munaspanmi Davidta pampacharan (2 Samuel 7:11-16; 12:7-14). Bat-sebapas huchanmanta pesapakunmanmi karan, chaymi payqa Salomonta wachakuran, paypa mirayninmantataq Jesuspas hamuran (Mateo 1:1, 6, 16). Sichus huchallikuranchis chayqa, yuyarinanchismi Jehová Diosqa pesapakuqkunata pampachaq kasqanta.

14. ¿Imaynatan Jehová Dios ancha pampachaykuq kasqanta rikukun Manasesta pampachasqanpi?

¹⁴ Jehová Diospa ancha pampachaq kasqanta rikullanchistaq Judá rey Manasesta pampachasqanpi. Chay reyqa Jehová Diospa ñawpaqenpi sinchi millaykunata ruwaran. Baalpaq altarkunata ruwachiran, “hanaq pachapi kaq llapan ch’askakunatapas” yupaycharan, Dios yupaychana wasiq iskaynin pationpipas altarkunata ruwachiran yanqa dioskunata yupaychanankupaq. Churinkunatapas sacrificiopi ruphachiran, watuytapas layqakuytapas astawan mast’arichiran, chaymantapas Judá runakunata Jerusalenpi tiyaq runakunatapas waqllichiran ‘Señor Diospa wikch’usqan runakunamantapas aswantaraq huchallikunankupaq’. Diospa kachamusqan profetakunatapas manan uyariqpas tukuranchu. Qhepamantaq Asiria reyqa Manasesta presota aparan. Preso kashaspataq Manasesqa huchankunamanta pesapakuran, k’umuykukuspataq yapa yapamanta Diosmanta mañakuran. Chaymi Jehová Diosqa Manasesta pampacharan, Jerusalenmantaq kutichipuran wakmanta rey kananpaq, chaymantapachan Manasesqa llaqtata kallpacharan Jehová Diosta yupaychanankupaq (2 Crónicas 33:2-17).

15. ¿Imaynatan Pedroq kawsayninpi rikukuran Jehová Dios ‘ancha’ pampachaykuq kasqanta?

¹⁵ Unay watakuna qhepatataq apóstol Pedro hatun huchaman urmaran Jesusta negaspa (Marcos 14:30, 66-72). Jehová Diosmi ichaqa Pedrota “anchatapuni” pampachaykuran (Isaías 55:7, NM). ¿Imarayku? Tukuy sonqomanta pesapakusqanrayku (Lucas 22:62). Phisqa chunka p’unchay qhepatan  Pentecostés fiestapi sut’ita rikukuran Jehová Diospa Pedrota pampachasqan, chay p’unchaymi Diosqa Pedrota umallichiran Jesusmanta willananpaq (Hechos 2:14-36). Jehová Dios Pedroq huchanta pampacharantaq chayqa, kunanpas pampachallanqataqmi sonqomanta pesapakuqkunaq huchanta. Salmistan niran: “Señor Diosníy, huchakunatachus yuyashawaq chayqa, ¿pitaq manaqa huchachasqachu kanman? Ichaqa qanmi hucha pampachaykuqqa kanki”, nispa (Salmo 130:3, 4).

¿Imaynatan pisiyachisunman manchakuyninchista?

16. ¿Imata ruwananchis Jehová Dios pampachawananchispaq?

¹⁶ Sichus santo espíritu contra huchallikusqaykita yuyaykunki chayqa, ñawpa ejemplokunan yanapasunkiman manchakuyniykita pisiyachinaykipaq, chaypin rikuranchis Jehová Diosqa huchankumanta pesapakuqkunata pampachaq kasqanta. Tukuy sonqo Diosmanta mañakushallay. Sichus huchallikunchis chayqa, Jehová Diospa pampachayninta mañakusunman Jesuspa yawar hich’arisqanpi hap’ipakuspa, Jehová Diospa khuyapayakuyninpi hap’ipakuspa, huchayoq runa kasqanchista yuyarichispa, ñawpaqpi hunt’aq sonqowan paypaq llank’asqanchista yuyarichispapas. Jehová Dios khuyapayakuqtaq chayqa, mana iskayaspan paymanta mañakusunman pampachawananchista yachaspa (Efesios 1:7).

17. ¿Imatan ruwanan huchaman urmaq cristiano yanapayta necesitaqtin?

¹⁷ ¿Imatan huk cristiano ruwanan, sichus hatun huchaman urmasqanrayku sinchi llakikuypi tarikuspa manaña Diosman mañakuyta atinchu chayqa? Santiagoq nisqantan ruwanan: “Iglesiapi umalli runakunata waqyachikamuchun, paypaq Diosmanta mañapunankupaq, Señorpa sutinpi aceitewan payta hawiykunankupaqwan. Iñiywan Diosmanta mañakuyqa onqosqatan qhaliyachinqa, hinan Señorqa payta sayarichinqa, huchallikunmanña karqan chaypas pampachasqan kanqa”, nispa (Santiago 5:14, 15).

18. ¿Imaraykun congregacionmanta qarqosqa cristianokunaq huchankupas manan mana pampachana nisqañachu?

¹⁸ Wakin cristianokuna Diospa llaqtanmanta qarqochikunku huchankumanta mana pesapakusqankurayku. Chaywanpas huchanqa manan mana pampachana nisqaraqchu kanman. Corinto congregacionpi qarqosqa cristianomantan apóstol Pablo qelqaran: “Qankunaqa yaqa llapaykichis huñukuspan chay runataqa wanachirqankichisña, chayllaña kachun. Kunanqa payta pampachapuychis, hinaspa sonqochaychis, paqtan sinchi llakiq ñit’isqan kanman. Chayrayku valekuykichis wakmanta payta munaykakapunaykichista”, nispa (2 Corintios 2:6-8; 1 Corintios 5:1-5). Huchaman urmaq wakmanta Diosman asuykunanpaqqa chaskinanmi ancianokunaq Bibliawan yanapasqanta, rikuchinantaq pesapakusqanta. Rikuchinallantaq  ‘kawsaynin t’ikrasqa kasqanta’ (Lucas 3:8).

19. ¿Imatan ruwananchis ‘iñiyninchispi allin kananchispaq’?

¹⁹ ¿Imanaqtintaq wakin yuyaykunku santo espíritu contra huchallikusqankuta? Wakinqa chayta yuyaykunku sinchi sayk’usqa kaspanku, otaq nishu askhata ruwayta munaspanku, chhayna kaqtinqa astawan samananchis Diosmantataq mañakunanchispas. Amapuni munasunchu Satanás pisi kallpayachiwananchista, Diosmanta t’aqawananchistapas. Jehová Diosqa manan kusikunchu millay runakunaq wañusqanwan, ¿chaychu munanman kamachinkuna chinkananta? Chayrayku sichus santo espirituq contranpi huchallikusqanchista yuyaspa manchakushanchis chayqa, sapa kutilla Diospa Simin Qelqata leenanchis, astawanqa Salmos qelqapi kallpachaq textokunata, huk textokunatapas. Chaymantapas, rishanallanchispuni huñunakuykunaman, predicaqpas lloqsishanallanchis, chhaynapin ‘iñiyninchispi allin kasunchis’ manataq llakikusunchu: Santo espirituq contranpipaschá huchallikurani, nispaqa (Tito 2:2).

20. ¿Imakunata tapukuspan yachasunman santo espíritu contra mana huchallikusqanchista?

²⁰ Santo espirituq contranpi huchallikusqankuta yuyaykuqkunaqa kaytan tapukunanku: “¿Diospa santo espirituntachu pisicharani? ¿Cheqaqtapunichu huchaman urmasqaymanta pesapakuni? ¿Iñinichu Diospa pampachaykuq kasqanpi? ¿Diospa yachachiyninta pisichaspachu pay contra hatarini?” nispa. Chaykunata tapukuspayki reparankipaschá Diospa santo espiritunta mana pisichasqaykita, reparallankitaq Diospa contranpi mana hatarisqaykitapas. Sichus huchallikusqaykimanta pesapakuranki, Diospa pampachayninpitaq iñinkipas chayqa, manan Diospa santo espiritun contrachu huchallikuranki.

21. ¿Ima tapuykunata kutichisun qatimuq estudiopi?

²¹ ¡Maytan kusikunchis santo espirituq contranpi mana huchallikusqanchista yachaspa! Ichaqa askharaqmi santo espiritumanta tapukuykuna kutichinapaq kashan. Chay tapuykunatan qatimuq estudiopi t’aqwirisun. Wakinmi kaykuna: “¿Diospa santo espiritunpa munasqanman hinachu kawsashani? ¿Santo espirituq rurun sut’itachu kawsayniypi rikukun?”.

¿Imaynatan kutichiwaq?

• ¿Imaynapin yachanchis santo espíritu contra huchallikuy kasqanta?

• ¿Imataq pesapakuyri?

• ¿Jesuspa tiemponpi pikunan santo espirituq contranpi huchallikuranku?

• Sichus yuyaykushanchis mana pampachana huchata ruwasqanchista chayqa, ¿iman manchakuyninchista pisiyachinman?

[Tapuykuna]