¿Qʼemiykushankichu Jehová Diospa kamachikuq kayninta?
¿Q’emiykushankichu Jehová Diospa kamachikuq kayninta?
“Suyukunata niychis: ¡Señor Diosmi kamachikushan! nispa.” (SALMO 96:10.)
1, 2. a) ¿Iman sucederan 29 watapi? b) ¿Imata ruwananpaqmi Jesús yuyaykuran Bautizakusqanmantapacha?
OCTUBRE killapi 29 watapin sucederan mana hayk’aq sucedesqan. Ancha importante kasqanraykun tawantin Evangelio qelqakuna willan. Mateo qelqa khaynata willan: “Jesusqa bautizachikuspaña unumanta lloqsimushaqtintaq hanaq pacha kicharikamurqan, hinan Jesusqa [“Bautizaq Juan”, NM] rikurqan pay pataman Diospa espiritun paloma hina uraykamushaqta. Hanaq pachamantataq huk kunka nimurqan: –Kaymi munakusqay Churiy, paymi anchata kusichiwan”, nispa (Mateo 3:16, 17; Marcos 1:9-11; Lucas 3:21, 22; Juan 1:32-34).
2 Bautizaq Juanpa rikusqanmi Jesús santo espirituta chaskiran, chaypin yachakuran paypuni Hawisqa kasqanta, chay simiqa Mesías otaq Cristo ninanmi (Juan 1:33). ¡Arí, prometesqa ‘miraymi’ rikhurimuran! Satanasmi chay mirayta talonninpi kaninan karan chay miraytaq Jehová Diospa kamachikuq kayninpa awqanta umanpi t’ustunan karan (Génesis 3:15). Bautizakusqanmantapachan Jesús yacharan kaykuna ruwananta: Jehová Diospa kamachikuq kayninta ch’uyanchananta Reinowan Diospa munaynin hunt’anantawan.
3. ¿Imatan Jesús ruwaran ruwananta hunt’ananpaq Jehová Diospa kamachikuq kayninta q’emiykunanpaqpas?
3 Ruwananta hunt’ananpaqmi, ‘Jesús santo espirituwan hunt’a, Jordán mayumanta kutimpurqan, hinan ch’inneqman espirituqa pusarqan’ (Lucas 4:1; Marcos 1:12). Chaypin Jesús tawa chunka p’unchay yuyaymanaran Diospa kamachikuq kayninman Saqraq churapakusqanpi Diospa kamachikuq kayninta imayna q’emiykunanpiwan. Saqraq churapakusqanmi angelkunata runakunatawan sasachakuyman churaran. Chayrayku allinta yachananchis Jesuspa hunt’a sonqowan kawsasqanta, yuyaykunanchistaqmi imaynata ñoqanchispas Jehová Diospa kamachikuq kayninta q’emiykusunman (Job 1:6-12; 2:2-6).
Diospa kamachikuq kayninman churapakun
4. ¿Mayqen wateqaywanmi Satanás Jesusta Diospa kamachikuq kaynin contra urmachiyta munaran?
4 Satanasmi ichaqa mana hinallatachu qhawaran, kaqratopachan Diospa ‘warminpa’ ‘mirayninman’ phawaykuran (Génesis 3:15). Jesustan kinsa kutita wateqaran Taytanpa munayninta qhepanchananpaq munayninman hina ruwananpaqwan. Kinsa kaqpitaq Jehová Diospa kamachikuq kaynin contra urmachiyta munaran. “Kay pacha lliw suyukunata lliw hatun atiyninkunatawan” qhawarichispan Satanás mana p’enqakuspa niran: “Qonqoriykukuspachus yupaychawanki chayqa, lliw kaykunatan qopusqayki”, nispa. Jesusqa yacharanmi ‘kay pacha lliw suyukuna’ Saqraq munaychakusqan kasqanta. Chayraykun mana kasuranchu, chaywanmi rikuchiran Diospa kamachikuq kayninman q’emiykusqanta. Chaymi niran: “Anchhuriy, Satanás, Diospa Simin Qelqan nin, ‘Señor Diosniykitan yupaychanki, pay sapallantataqmi servinkipas’”, nispa (Mateo 4:8-10).
5. ¿Ima sasa ruwaytan Jesús hunt’anan karan?
5 Jesuspaqqa Jehová Diospa kamachikuq kayninta q’emiykuymi aswan importante karan, chaytan kawsayninpi sapa p’unchay rikuchiran. Jesusqa wañunankaman otaq profeciaq nisqan hina warmiq ‘mirayninta’ Satanás talonninpi kaninankama hunt’aq kanan karan, chayta ruwaspallan rikuchinman Jehová Dioslla kamachikuq kananpaq atiyniyoq kasqanta, chaytan Jesusqa allinta yacharan (Mateo 16:21; 17:12). Hinaspapas willananmi karan Diospa Reinon Satanasta ch’usaqyachinanmanta hinantinman thak kawsayta apamunanmantawan (Mateo 6:9, 10). ¿Imaynatan Jesús chay sasa ruwaykunata hunt’anman?
‘Diospa qhapaqsuyunmi sispaykamunña’
6. Diosmi Reinonwan ‘Saqraq ruwasqankunata thunipunqa’, ¿imaynatan Jesús chayta rikuchiran?
6 Ruwananta hunt’ananpaqmi “Jesusqa Galilea provinciaman rispa Diosmanta allin willakuykunata willarqan: –Tiempoqa chayarqamunñan, Diospa qhapaqsuyunpas sispaykamunñan”, nispa (Marcos 1:14, 15). Qhepamanmi Jesús niran: “Huk llaqtakunamanpas Diospa qhapaqsuyunmanta allin willakuykunataqa willamunaymi, chaypaqmi Diosqa kachamuwarqan”, nispa (Lucas 4:18-21, 43). Chaytapunin ruwaran: ‘Diospa qhapaqsuyunmanta allin willakuykunata willaspan’ llapa Israel suyupi puriran (Lucas 8:1). Hinaspapas milagrokunatan ruwaran: askha runakunatan mikhuchiran, hatun wayrakunata sayachiran, onqosqakunata qhaliyachiran, wañusqakunatapas kawsarichiran. Chaykunawanmi Jesús rikuchiran imaynatan Dios Edén huertapi pay contra sayarisqankumantapacha ñak’ariykunaq kasqanta chinkachinqa, chhaynapin ‘Saqraq ruwasqankunata thunipunqa’ (1 Juan 3:8).
7. ¿Imata ruwanankupaqmi Jesús wakichiran qatikuqninkunata? ¿Uyarikurankuchu runakuna?
7 Jesusqa qatikuqninkunatan wakichiran Reinomanta allin willakuykunata askha runakunaman willanankupaq. Ñawpaqtaqa chunka iskayniyoq apostolninkunatan “kacharqan Diospa qhapaqsuyunmanta willamunankupaq” (Lucas 9:1, 2). Chay qhepamantaq qanchis chunka qatikuqninkunatawan kacharan “qankunamanmi Diospa reinonqa sispaykamunña” nispa willamunankupaq (Lucas 10:1, 8, 9, NM). Predicasqankumanta kutinpuspataq Jesusman willaranku askha runakunaq uyarikusqanta, chaymi Jesús paykunata niran: “Ñoqan rikurqani Satanasta rayo hina hanaq pachamanta urmaykamushaqta”, nispa (Lucas 10:17, 18).
8. ¿Imatan Jesús rikuchiran kawsasqanwan?
8 Jesusqa mana samaspan tuta p’unchay Reinorayku llank’aran. Manan necesitasqantaraqchu maskharan. Chaymi niran: “Atoqkunapas t’oqoyoqmi, phalaq animalkunapas q’esayoqmi, Runaq Churinpaqmi ichaqa mana kanchu maypi puñuykunallanpaqpas”, nispa (Lucas 9:58; Marcos 6:31; Juan 4:31-34). Tiempota mana usuchispan predicashallaqpuni. Huk kutinmi Jesús manaraq wañupushaspa Poncio Pilatoman mana manchakuspa kayta niran: ‘Cheqaq-kayta willanaypaqmi [...] kay pachaman hamurqani’, nispa (Juan 18:37). Jesuspa imayna kawsasqanwanmi kayta yachanchis: payqa manan milagrokunata ruwanallanpaqchu, allin yachachiq kanallanpaqchu, nitaq runakunarayku wañunallanpaqchu kay Hallp’aman hamuran. Aswanmi payqa hamuran Jehová Diospa kamachikuq kayninta q’emiykunanpaq Reinowan Diospa munaynin hunt’akunanmanta willananpaqwan (Juan 14:6).
“Lliwmi tukusqaña”
9. ¿Imaynatan Satanás Diospa warminpa ‘mirayninta’ talonninpi kaniran?
9 Satanasqa sinchitan phiñakuran Reinorayku Jesuspa llank’asqanmanta. Kay pachapi kaq ‘mirayninwanmi’ —kamachikuqkunawan religionpi umalliqkunawan—, Diospa warminpa ‘mirayninta’ wañuchiyta munaran. Paymi qatikuqninkunapiwan Jesusta qatiykacharanku nacesqanmantapacha wañupunankama. Chaymi 33 watapi nisán nisqa killapi (calendario judío) runaq Churinta talonninpi kaniran (Mateo 20:18, 19; Lucas 18:31-33). Evangelio qelqakunaq nisqan hina, Satanasmi runakunata tanqaran —Judas Iscariote , umalli sacerdotekuna, kamachikuy simita yachachiqkuna, romanokuna, hukkunapas— sinchita ñak’arichispa kurkupi Jesusta wañuchinankupaq (Hechos 2:22, 23, NM).
10. ¿Ima allin ruwaykunatan Jesús hunt’aran wañuyninwan?
10 ¿Imapin yuyaykunchis Jesuspa sinchi ñak’ariywan wañusqanta yuyarispa? Llapa huchasapa runakunarayku wañusqanpipaschá (Mateo 20:28; Juan 15:13). Hinaspapas ancha sumaqpaqchá qhawarinchis Jehová Dios ñoqanchista munakuspa Churinta wañunanpaq kachamusqanmanta (Juan 3:16). Otaq Roma soldado hinapaschá nisunman: “Cheqaqtapunin kay runaqa Diospa Churin kasqa”, nispa (Mateo 27:54). Allinmi chaykunapi yuyaykuyqa. Ichaqa Jesuspa nisqanta yuyarisun, wañupunanpaqña kashaqtinmi kayta niran: “Lliwmi tukusqaña”, nispa (Juan 19:30). ¿Iman tukusqaña karan? Jesusqa imaymanatan ruwaran kawsashaspa, wañuyninwanpas chanin kaqkunatan hunt’aran. Ichaqa Jehová Diospa kamachikuq kayninta sut’inchananpaqmi astawan kay Hallp’aman hamuran. Hinaspapas Bibliaq nisqan hina, ‘mirayqa’ Saqraq makinpin ñak’arinan karan Jehová Diospa sutinta ch’uyanchananpaq (Isaías 53:3-7). Jesusqa allintapunin chay ruwaykunata hunt’aran. ¡Arí, atiparanmi!
11. ¿Imatan Jesús ruwanqa Génesis 3:15 textopi profecía hunt’akunanpaq?
11 Jesusqa kawsarichisqan karan kasukuq hunt’aq sonqo kasqanrayku, ichaqa mana runa hinañachu aswanmi “kawsachiq espíritu” hina (1 Corintios 15:45; 1 Pedro 3:18). Jehová Diosmi hatunchasqa Churinta niran: “Paña ladoypi tiyaykuy, awqaykikunata chaki sarunaykiman churanaykama”, nispa (Salmo 110:1). Chay ‘awqakunan’ kanku Satanaswan —Diospa contranpi sayariqkunaq umallin— llapa ‘mirayninpiwan’. Jesucriston Jehová Diospa Reinonpi kamachikuq hina hanaq pachapi kay Hallp’apipas mana kasukuqkunata wañuchiypi umallinqa (Apocalipsis 12:7-9; 19:11-16; 20:1-3, 10). Chhaynapin hunt’akunqa Génesis 3:15 textopi profecía, yayayku mañakuypi Jesuspa khayna nisqanpas: “Qhapaqsuyuyki hamuchun, munayniyki kay pachapi ruwakuchun, imaynan hanaq pachapipas ruwakun hinata” (Mateo 6:10; Filipenses 2:8-11).
Jesuspa yupinta qatikusun
12, 13. a) ¿Uyarikushankuchu Reinomanta allin willakuykunata? b) ¿Imakunatan tapukunanku Cristoq yupinta qatikuqkuna?
12 Jesuspa profetizasqan hina, Reinomanta allin willakuykunan askha suyukunapi willakushan (Mateo 24:14). Chayraykun millonninpi runakuna Diospa munayninta ruwashanku. Anchatan kusikunku Diospa Reinon sumaq saminchaykuna apamunanmanta. Maytan suyakushanku kay Hallp’a paraisoman tukuqtin thakpi kusisqa wiñaypaq kawsayta, chayrayku kusikuywan willanku runakunaman chay suyakuyninkumanta (Salmo 37:11; 2 Pedro 3:13). ¿Qanri willashankichu? Chayta ruwashanki chayqa, allinmi. Llapallanchismi ichaqa kaypi yuyaykunanchis.
13 Apóstol Pedro kayta qelqaran: “Cristopas ñoqanchisraykun muchurqan, muchusqanta qhawarispanchis yupinta qatikunanchispaq”, nispa (1 Pedro 2:21). ¿Imaraykun apóstol Pedro chaypi willan Jesuspa ñak’arisqanmanta manataq tukuy sonqowan predicasqanmantachu nitaq allin yachachiq kasqanmantachu? Apóstol Pedroqa rikuranyá imaynata Cristo ñak’ariran Jehová Diospa kamachikuq kayninta q’emiykunanpaq, Satanás llulla kasqanta rikuchinanpaqwan. Ñoqanchisri, ¿imaynatan Jesuspa yupinta qatikusunman? Kaykunatan tapukunanchis: “¿Maykaman ñak’ariykunata aguantayman Jehová Diospa kamachikuq kayninta q’emiykunaypaq? ¿Rikuchishanichu kawsayniywan predicasqaywanpas Diospa kamachikuq kayninta q’emiykusqayta?” nispa (Colosenses 3:17).
14, 15. a) ¿Imatan Jesús ruwaran Diospa munayninpa contranpi ruwaykunata munachiqtinku rimapayaqtinkupas, imaraykutaq chayta ruwaran? b) ¿Ima iskayachiytan mana qonqananchischu? (“Jehová Diosta q’emiykuranku” nisqa recuadromantawan willay.)
14 Sapa p’unchaymi wateqaykunapi tarikunchis sapa p’unchaytaqmi akllakunanchis ima ruwananchistapas. ¿Imatan ruwananchis chaykunapi tarikuspa? ¿Imatan ruwasunman iñiyninchis wateqaypi tarikuqtin? Amapuni munaychu chay hina sucedenasuykitaqa nispa apóstol Pedro niqtin, ¿imanispan Jesús kutichiran? Niranmi: “¡Satanás, ladoymanta anchhuriy!” nispa. Nillarantaq: “Qanqa manan Dios hinachu yuyaykunki, aswanpas runa hinallan yuyaykunki”, nispa (Mateo 16:21-23). Sichus makinchispi kanman profecionninchispi otaq llank’anapi ñawpaqman astawan puririy Jehová Dios serviynichista qhepanchaspa chayqa ¿Jesús hinachu ruwashanchis? Milagrokuna ruwasqanmanta “reyta churanankupaq hap’irqonankuta yachakuspan” Jesusqa usqhaylla runakunamanta ayqekuran (Juan 6:15).
15 ¿Imarayku Jesús chayta ruwaran chay kutipi huk kutikunapipas? Paypaqqa manan allinninchu nitaq munasqanchu aswan importante karan. Taytanpa munasqantan astawanqa ruwayta munaran kamachikuq kayninta q’emiykuytawan (Mateo 26:50-54). ¿Imatan chaywan yachanchis? Ñoqanchispas manan qonqananchischu Diospa kamachikuq kaynin iskayachisqa kasqanta, mana chayqa Jehová Diospa mana munasqantan ruwasunman. Ñoqanchistapas Satanasqa toqllankunapin urmachiwasunman, payqa kusatan yachan mana allin ruwaykunapi urmayachiyta chaytan Evawanpas ruwaran (2 Corintios 11:14; 1 Timoteo 2:14).
16. ¿Imamanta astawan yachanankupaqmi runakunaman predicananchis?
16 Predicacionpin runakunaman willanchis imaynatan Biblia yanapanman sasachakuyninkuta allichanankupaq, chaytaqmi kallpachan Bibliamanta astawan yachayta munanankupaq. Ichaqa manan Bibliamanta yachanallankupaqchu nitaq Diospa Reinon saminchaykuna apamunanmanta yachanallankupaqchu predicanchis. Astawanqa Jehová Diospa kamachikuq kaynin iskayachisqa kasqanmantan yachanankuta munanchis. ¿Munankuchu cheqaq cristiano kayta? ¿Munankuchu Jesuspa ñak’arisqanta hina ‘ñak’ariyta’, Reinorayku ñak’ariytapas? (Marcos 8:34.) ¿Q’emiykunqakuchu Jehová Diospa kamachikuq kayninta, rikuchinqakuchu Satanás llulla kasqantapas? (Proverbios 27:11.) ¡Ancha sumaq ruwaymi chayqa! Manan ichaqa ñoqallanchischu Jehová Diospa kamachikuq kayninta q’emiykunanchis hukkunatawanmi yanapananchis chayta ruwanankupaq (1 Timoteo 4:16).
Diosmi llapa imaymanapi “payllapuni munaychakunqa”
17, 18. Jehová Diospa kamachikuq kayninta q’emiykusun chayqa ¿ima hatun p’unchaytan suyakusun?
17 Rikuchishallasunpuni kawsayninchiswan predicasqanchiswanpas Diospa kamachikuq kaynin q’emiykusqanchista. Chhaynapin suyakushallasun Jesucristo “Dios Yayaman kamachikunan atiyta” qopunankama. ¿Hayk’aqtaq chayri kanqa? Apóstol Pablo willan: ‘Cristoqa tukuy kamachikuyta, tukuy atiyta, tukuy munaychakuytapas yanqayachipunqa [...]. Cristoqa kamachikunqapunin tukuy awqankunata chaki sarunanman Dios churanankama. [...] Kikin Cristopas Churi kashaspa tukuy imaymanata paywan munaychachiq Dios Yayata kasukunqa. Ahinapin Diosqa llapa imaymanapipas runakunapipas payllapuni munaychakunqa’, nispa (1 Corintios 15:24, 25, 28).
18 Ancha hatun p’unchaymi kanqa ‘llapa imaymanapipas [...] payllapuni munaychakunan’ p’unchay chayamuqtinqa. Diospa tukuy yuyaykusqanmi Reinowan hunt’akunqa. Jehová Diospa kamachikuq kayninman churapakuqkunan wañuchisqa kanqaku, hinan kay pachapipas hanaq pachapipas thak kawsay kanqa. Salmistaq qelqasqan hina llapa kamasqakunan takinqaku: “¡Sutiykiqa Ancha Hatunmi! [...] Suyukunata niychis: ¡Señor Diosmi kamachikushan!” nispa (Salmo 96:8, 10).
¿Kutichiwaqchu?
• ¿Imaynatan Jesús rikuchiran Jehová Diospa kamachikuq kaynin paypaq aswan importante kasqanta?
• ¿Iman astawan sut’inchakuran Jesuspa predicasqanwan wañuyninwanpas?
• ¿Imaynatan ñoqanchispas rikuchisunman Jesús hina Jehová Diospa kamachikuq kayninta q’emiykusqanchista?
[Tapuykuna]
[31 paginapi recuadro]
JEHOVÁ DIOSTA Q’EMIYKURANKU
Corea suyupi huk suyukunapipas tiyaq wayqe pananchiskuna yachasqanku hina, sasachakuykunapi tarikuspaqa entiendenanchismi imarayku chhayna sasachakuykunapi tarikusqanchista.
Huk iñiqmasinchistan ñawpa Unión Soviética nisqa suyupi kamachikuqkuna carcelpi wisq’asqaku, paymi willakun: “Edén huertapi Diospa kamachikuq kaynin iskayachisqa kasqanmanta allinta yachasqaykun yanapawaranku iñiyniykupi qaqata sayanaykupaq. Yacharaykun Jehová Diospa kamachikuyninta q’emiykunaykuta. [...] [Chaymi] kallpachawaranku yanapawarankutaqmi iñiyniykupi qaqata sayanaykupaq”, nispa.
Huk iñiqmasinchismi willakullantaq sinchi sasa llank’ana campokunapi paypas huk Testigokunapas iñiyninkupi qaqa sayasqankumanta. Khaynata willakuran: “Manan hayk’aqpas Jehová Diosqa saqerpariwarankuchu. Sasachakuykunapiña tarikurayku chaypas kallpachakushallaraykun Jehová Diosmanta qaqata hap’ipakunaykupaq. Llapallaykun yuyarichinakurayku Jehová Diospa kamachikuq kaynin iskayachisqa kasqanman q’emiykunaykupaq.”