Manan ima ruwasqa armapas imanawasunpaschu

“Manan ima ruwasqa armapas imanasunkipaschu.” (ISAÍAS 54:17.)

1, 2. ¿Imaynatan Isaías 54:17 texto hunt’akuran Albania iñiqmasinchiskunapi?

UNAY WATAÑAN Albania nacionpi mana Diospi iñiq comunista gobierno tukuy atisqanta ruwaran Diosta serviq cristianokunata qolluchinanpaq, ichaqa manan atiranchu. Chay cristianokunatan sinchita ñak’arichiranku, sinchi sasa llank’aykunapin llank’achiranku, mana kaqtataqmi paykunamanta rimarankupas. Chay cristianokunaqa Jehová Diospa testigonkunan karanku. Sinchi sasaña karan huñunakunankupaq predicanankupaq  ima chaypas, manan hayk’aqpas Dios serviyninkutaqa saqerankuchu. Chay ruwasqankuwanmi allinpaq qhawarichiranku cristiano kayta, Jehová Diospa sutintapas hatuncharanku. 2006 watapi Albania nacionpi sucursal wasi dedicanapaq huñunakuypi, unayña Jehová Diosta serviq iñiqmasinchis niran: “¡Maytaña Satanás atipakuqtinpas manapunin atipanmanchu, Jehová Diosllan atipaqqa!” nispa.

² Chay cristianokunapin hunt’akuran Isaías 54:17 texto, chaypin Dios prometewanchis: “Manan ima ruwasqa armapas imanasunkipaschu, llapa huchachaqniykitapas upallachinkin”, nispa. Ñawpaq tiempokunapi sucedesqanmi sut’ita kayta rikuchin: Saqraq kamachisqan runakuna imataña ruwankuman chaypas, manapunin Jehová Diospa kamachinkunataqa iñiyninkupi waqllichinkumanchu.

Saqraq ruwayninkunaqa yanqapin tukun

3, 4. a) ¿Ima armakunawantaq Satanasri Diospa llaqtan contra sayarin? b) ¿Imaynapin yachanchis Saqraq armankuna yanqapi tukusqanta?

³ Saqraqa imaymana armakunawanmi Diospa kamachinkuna contra hatarin: kamachikuqkunatan yuyaychan huñunakuyninkuta predicayninkutapas hark’anankupaq, millay runakunawan qatiykachachin, carcelkunapi wisq’achin, paykunaq mana allinninpaqtaq leykunatapas llaqtakunapi churachin (Salmo 94:20). Kunanpas kay revistata estudiashananchiskama, wakin nacionkunapiqa iñiqmasinchiskunaq iñiyninkun ‘pruebaman’ churasqa kashan (Apocalipsis 2:10).

⁴ Ejemplopaq, Jehová Diospa testigonkunaq huknin sucursalmanta willaranku, huk watallapis 32 kutita iñiqmasinchiskunata qatiykachasqaku predicashaqtinku. Chaymantapas 59 kutipis guardiakuna iñiqmasinchiskunata hap’isqaku predicashaqtinku. Wakinninkutas suwata hina hap’isqaku, fotokunata horqospa carcelmanpas wisq’asqaku. Wakinninkunatataq k’arakta amenazasqaku. Huk nacionpitaqmi waranqa pachak kutitaraq iñiqmasinchiskunata carcelman wisq’asqaku, yanqamanta multasqaku, sinchitataq maqasqakupas. Jesuspa wañusqan yuyarina p’unchaypi yaqa iskay pachak kutitaraq chaykuna sucedesqa. Chaywanpas Jehová Diosqa chay nacionkunapipas huk nacionkunapipas santo espiritunwanmi llaqtanta yanaparan necesitasqanku rato (Zacarías 4:6). Hark’aqninchiskunaqa manapunin imataña ruwaspapas Diospa llaqtantaqa upallachinqakuchu. Diosqa hunt’anqapunin munayninta, manan ima armapas hunt’anantaqa hark’anmanchu.

Yanqa rimasqankutan upallachinchis

5. Ñawpaq siglopi, ¿ima yanqa rimaykunatan rimaranku cristianokunamanta?

⁵ Profeta Isaiaspa willasqan hina, Diospa kamachinkunan upallachinanku karan yanqamanta tumpaqninkunata, llulla kasqankutapas sut’iman horqonanku karan. Ñawpaq siglopi cristianokunatan imaymanata k’amiranku, mana allin kawsaq runakuna nispan suticharankupas. Hechos 16:20, 21 textoq nisqanpi hina paykunamanta kayta niranku: “Kay runakunan [...] llaqtanchista ch’aqwachishanku. Paykunaqa yachachinku kamachikuyninchispa hark’asqan wak costumbrekunatan, ñoqanchisqa Roma llaqtayoq runakunan kanchis, chaymi yachachikuyninkutaqa mana chaskisunmanpaschu ruwasunmanpaschu”, nispa. Huk kutipas judío umallikunan llaqta kamachikuqkunata rimapayaranku Cristo qatikuqkunaq contran hatarinankupaq. Chay umallikuna niranku: “¡Kay pachantinpi tiyaqkunata ch’aqwachiqkunan kaymanpas chayamullantaq [...!] Paykunaqa llapankun Roma rey Cesarpa kamachikuynin contra ruwanku”, nispa (Hechos 17:6, 7). Apóstol Pablomantapas nirankun ‘millay onqoy hinan’ payqa, nispa. Nillarankutaq: ‘Hinantinpi ch’aqwachiqkunaq umallinmi’, nispa (Hechos 24:2-5).

6, 7. ¿Imaynatan cheqaq cristianokuna yanqa tumpawaqninchiskunata ‘upallachinchis’?

 ⁶ Kunanpas contranchispi hatariqkunaqa yanqamantan tumpawanchis k’amiwanchispas. ¿Imaynatan chay yanqa rimaqkunata ‘upallachinchis’? (Isaías 54:17.)

⁷ Sapa kutillanmi allin kawsasqanchiswan sut’iman horqonchis yanqamanta tumpawasqanchista (1 Pedro 2:12). Maypachachus runakuna qhawarinku kamachikuqkuna kasukusqanchista, ch’uya kawsasqanchista, sumaq sonqo kasqanchistapas chayqa, sut’itan reparanku tumpawaqninchiskunaq rimasqan yanqa kasqanta. Allin kawsasqanchiswanmi reqsichikunchis allin runa kasqanchista. Allin ruwasqanchista rikuspankun wakin runakunaqa Jehová Diosninchista hatunchanku, reparankutaq Diospa kamachinkunaq kawsasqan allinpuni kasqanta (Isaías 60:14; Mateo 5:14-16).

8. a) ¿Imaynatan defiendesunman iñiyninchista? b) Jesucristo hina, ¿imaynata upallachinchis yanqa tumpawaqninchiskunata?

⁸ Allinta kawsashaspapas, yaqapaschá mayninpiqa mana manchakuspa kamachikuqkunaq juezkunaq ñawpaqenpi iñiyninchista defendenanchis kanqa (Ester 8:3; Hechos 22:25-29; 25:10-12). Kay pachapi kashaspan Jesusqa mayninpi k’amiqninkunaman mana manchakuspa kutichiran lliw runa uyarishaqtin. Chaytaqa ruwaran yanqa rimasqankuta sut’iman horqonanpaqmi (Mateo 12:34-37; 15:1-11). Jesús hinan ñoqanchispas runakunaman iñiyninchismanta allin sut’inchasqata willananchis maypiña tarikuspapas (1 Pedro 3:15). Mayninpin escuelapi yachaqmasinchiskuna, llank’aqmasinchiskuna, mana iñiq familianchiskunapas asipayawasunman, chaywanpas amapuni Diospa Siminmanta willaytaqa upallakusunchu (2 Pedro 3:3, 4).

Jerusalenqa ‘llasa qaqan’

9. ¿Mayqentaq “llasa qaqa” Jerusalenri? ¿Pikunan kay pachapi chay Jerusalenta representanku?

⁹ Profeta Zacariasmi willaran imanaqtin llapa nacionkuna cheqaq cristianokunata cheqnikusqankuta. Zacarías 12:3 texton kayta nin: “Chay p’unchaypin Jerusalenta churasaq mana kuyurichiy atina llasa qaqa kananpaq, mayqen suyupas [otaq nacionpas] chay qaqata kuyurichiyta munaqqa k’irisqan kanqa”, nispa. ¿Mayqen Jerusalenmantataq kaypiri rimashan? ‘Hanaq pacha Jerusalenmantan’, chayqa Diospa Reinonmi, chaypin kamachinqaku santo espirituwan hawisqa cristianokuna (Hebreos 12:22). Kay pachapiqa kashanraqmi wakin hawisqa cristianokuna. Paykunan ‘wak ovejakunamanta’ kaqkunapiwan runakunaman yachachimushanku Diospa Reinonta kasukunankupaq tiempo kashaqtinraq (Juan 10:16; Apocalipsis 11:15). ¿Imaynatan nacionkuna Diospa Reinonmanta yachachikuykunata chaskinku? ¿Imaynatan Jehová Dios llaqtanta yanapashan? Kaykunata yachananchispaqmi t’aqwirisunchis Zacarías libropi 12 capitulota. Chayta t’aqwispanchismi allintapuni yachasunchis kayta: ‘Manan ima ruwasqa armapas imananqapaschu’ Diospa hawisqan cristianokunata, wak ovejamanta kaqkunatapas.

10. a) ¿Imanaqtinmi llapa nacionkuna Jehová Diospa llaqtan contra hatarinku? b) ¿Iman sucederan ‘llasa qaqata’ kuyurichiy munaqkunata?

¹⁰ Zacarías 12:3 texto llapa nacionkunamanta nin: ‘K’irisqan kanqaku’, nispa. ¿Imaynapitaq k’irisqari kanku? Diosmi kamachiran Reinomanta allin willakuykuna predicakunanpaq, testigonkunataq tukuy sonqo hunt’ashanku chay kamachikuyta. Paykunaqa predicashanku: Diospa Reinollanmi runaq sasachakuyninkunataqa allichanqa, nispa; chay willakuymi llapa nacionkunapaq “llasa qaqa” hina. Chay llasa qaqata kuyurichiyta munaspankun nacionkunaqa imaymanawan hark’ayta munanku Reinomanta willaqkunata. Ichaqa chayta ruwaspanku sinchi ‘k’irisqa’ rikukushanku. Mana allinpaq kallpachakusqankun qollupuran, chaymi p’enqaypi mana allinpaq qhawarisqa qhepapunku. Manan Dios serviqkunataqa  upallachinkumanchu. Diospa kamachinkunaqa tukuy sonqowanmi predicashanku Reinomanta “wiñay qespikuypaq allin willakuykunata”, manaraq p’uchukay chayamushaqtin (Apocalipsis 14:6). Jehová Diospa kamachinkunaq sinchi ñak’arichisqa kasqankuta rikuspan huk carcel qhawaq runa niran: “Yanqañan kay runakunataqa qatiykachanku. Jehová Diospa testigonkunaqa manan hayk’aqpas Dios serviyninkutaqa saqenkumanchu. Aswanpas yapakushallankun”, nispa.

11. ¿Imaynatan Dios hunt’aran Zacarías 12:4 textopi prometesqanta?

¹¹ Leesunchis Zacarías 12:4 textota. Chaypin Jehová Dios prometen: Llapa serviqniykuna contra sayariqkunatan ñawsayachisaq, “q’aqchasaq”, nispa. Jehová Diosqa hunt’aranpunin chay promesanta. Ejemplopaq, huk nacionpi Diospa kamachinkunata hark’asharanku huñunakunankuta, predicanankuta, Bibliamanta qelqakuna chaskinankutapas; hark’ashaqtinkupas paykunaqa chaskishallarankun Bibliamanta qelqakunata. Chaymi huk periodicopi khaynataraq willakuran: Jehová Diospa testigonkunaqa bombillakunapichus hina Bibliamanta qelqakunata llaqtanchisman haykuchimushanku, nispa. Ichaqa manan chhaynachu karan, aswanpas Jehová Diosmi hunt’asharan kay promesanta: ‘Suyukunaq caballontan ichaqa llapallanta ñawsayachisaq’, nispa. Ñawsayachisqa hina kaspan Diospa contranpi hatariqkunaqa mana imanankupaschu Diospa kamachinkunataqa. Jehová Diosqa waqaychanqapunin llaqtanta, allinlla tarikunankupaqpas yanapanqan (2 Reyes 6:15-19).

12. a) ¿Imaynapin Jesús ninata kay pachaman apamuran? b) ¿Imaynatan hawisqa cristianokunapas kay pachapi ninata hap’ichiranku? Chayrayku, ¿imatan runakuna ruwaranku?

¹² Leesun Zacarías 12:5, 6 textota. Chay textopin rimashan ‘Judapi umallikunamanta’. Paykunan representanku kunan tiempo Diospa llaqtanpi hawisqa umalliqkunata. Paykunatan Jehová Diosqa anchata kallpachashan rawrashaq sonqowan Diospa Reinonmanta willakuykunata willamunankupaq. Huk kutinmi Jesús qatikuqninkunata niran: “Ñoqaqa ninatan kay pachaman apamurqani”, nispa (Lucas 12:49). Chaytapunin ruwaran. Rawrarishaq sonqowan predicaspan rikuchiran Diospa Reinonmanta yachay ancha valorniyoq kasqanta. Chay willasqanmi hinantinpi llapa judiokunata ch’aqwachiran (Mateo 4:17, 25; 10:5-7, 17-20). Chay hinallataqmi kunan tiempopi Cristota qatikuqkunapas tukuy sonqo predicasqankuwan ‘llant’a ukhupi nina sansa hina kanku, trigo marq’ay ukhupi rawrashaq nina hina’. Ejemplopaq 1917 watapi The Finished Mystery * (Pakasqa yachay sut’inchakusqan) nisqa libropi iñiqmasinchiskuna mana manchakuspa willaranku cristianon kayku niq religionkunaq llulla kasqankuta. Chayta yachaspankun chay religionkunaq umallinkuna sinchita phiñakuspa iñiqmasinchiskuna contra hatariranku. Qayna watakunalla rakiranchis Noticias del Reino núm. 37 nisqa tratadota, chaypa titulonmi karan “¡Se acerca el fin de la religión falsa!” (¡Pantasqa religionkunaq tukukuynin chayamushanña!) nisqa. Chayta leespankun wakin runakuna Diospa Reinonmanta astawan yachayta munaranku, wakintaq Reinoq contranpi churakuranku.

“Judaq karpankunata” Jehová Dios pakaykun

13. ¿Imatan representan ‘Judaq karpankuna’? ¿Imanaqtintaq Jehová Dios paykunata pakaykunqa?

¹³ Leesun Zacarías 12:7, 8, NM textota. Ñawpa Israel nacionpiqa campokunapin rikukuran karpakunata, chaypitaq michiqkuna chakrapi llank’aqkunapas qorpachakuqku. Mayqen llaqtapas Jerusalén llaqtaman maqanakuq phawaykuqtinqa, campopi kaqkunaraqmi astawanqa necesitankuman karan hark’aykusqa kaytaqa. ‘Judaq karpankunapi’  qorpachakuqkuna hinan hawisqa cristianokunapas mana allin perqasqa llaqtakunapichu tiyanku. Campopipas kashankuman hinan kawsashanku, mana manchakuspataq Diospa Reinonmanta willashanku. Hanaq pacha ejercitokunata umalliq Diosmi “ñawpaqtaqa pakaykunqa Judaq karpankunata”, paykunatan Satanasqa hukpaqkama ch’usaqyachiyta munashan.

14. ¿Imaynatan Jehová Dios ‘Judaq karpankunapi’ kaqkunata pakaykun, imaynatan mana urmanankupaqpas yanapan?

¹⁴ Ñawpaq tiempokunapi sucedesqanmi sut’ita kayta qhawarichiwanchis: Jehová Diosqa pakaykushanmi hawisqa cristianokunata, paykunan ‘karpakunapi’ hina kawsashanku. * Paykunatan Diosqa kallpachan rey David hina mana manchakuspa allin kallpasapa kanankupaq, chhaynapin yanapan mana ‘urmanankupaq’.

15. ¿Imanaqtinmi Jehová Dios llapa ‘nacionkunata wañuchiyta’ munan? ¿Hayk’aqmi chayta ruwanqa?

¹⁵ Kunantaq leesun Zacarías 12:9 textota. ¿Imanaqtinmi Jehová Dios llapa ‘suyukunata otaq nacionkunata wañuchiyta’ munan? Diospa Reinon contra hatarisqankurayku. Paykunaqa wañuypaq nisqaña kashanku Diospa llaqtanta qatiykachasqankumanta, ñak’arichisqankumantawan. Pisi tiempollamantan, Satanaspa kamachisqan runakuna huk kutillatawanña Jehová Diospa kamachinkuna contra hatarinqaku, chaywanmi qallarinqa Bibliaq sutichasqan Armagedón guerra (Apocalipsis 16:13-16). Chay guerrapin Hatun Juez Jehová Diosqa kamachinkunata pakaykunqa, lliw nacionkunaq ñawpaqenpitaq sutintapas ch’uyanchanqa (Ezequiel 38:14-18, 22, 23).

16, 17. a) ¿Imataq ‘Jehová Diospa kamachinkunaq chaskisqanku herenciari’? b) ¿Imatan rikuchinchis Satanaspa qatiykachayninkunata aguantaspa?

¹⁶ Satanaspaqa manan ima armanpas kanchu iñiyninchista waqllichinanpaq, tukuy sonqo llank’ayninchista pisiyachinanpaqpas. Jehová Dios pakaykuwaqninchis kasqanta yachaspan thakpi kawsanchis, chaymi “Jehová Diospa kamachinkunaq chaskisqanku herenciaqa” (Isaías 54:17, NM). Manan pipas thak kayninchista, Dioswan sumaqpi kawsasqanchistapas qechuwasunmanchu (Salmo 118:6). Satanasqa kallpachashallanqan kay pachapi runakunata qatiykachawananchispaq, sasachakuykunaman churawananchispaqpas. Ichaqa kay pachapi runakuna yanqamanta tumpawaqtinchispas Jehová Diospaq hunt’aq sonqo kasun chayqa, rikuchisunmi ñoqanchispi Diospa espiritun kasqanta (1 Pedro 4:14). Pachantinpin willamushanchis Diospa takyachisqan Reinomanta allin willakuykunata. Hark’awaqninchiskunaqa ‘rumikunawanpas’ ch’aqewashasunman hinaraqmi imaymanata ruwashanku contranchispi. Jehová Diospa yanapayninwanmi ichaqa chaykunata aguantanchis (Zacarías 9:15). ¡Manan pipas upallachinqachu hawisqa cristianokunata wak ovejakunamanta yanapaqninkunatapas!

¹⁷ Hamuq tiempopin Saqraqa manaña qatiykachawasunchu, ¡anchatachá kusikusun chay tiempo chayamuqtinqa! Chay tiempo chayamunankamaqa kallpachawanchismi Jehová Diospa kay promesan: “Manan ima ruwasqa armapas imanasunkipaschu, llapa huchachaqniykitapas upallachinkin”, nispa.

[Uranpi willakuykuna]

¿Imanispan kutichiwaq?

• ¿Imaynapin yachanchis Satanaspa armankuna yanqapaq kasqanta?

• ¿Imaynapin hanaq pacha Jerusalén rikch’akun ‘llasa qaqaman’?

• ¿Imaynatan Jehová Dios “Judaq karpankunata” pakaykun?

• Armagedón chayamunankama, ¿ima promesapin confiasunman?

[Tapuykuna]