¿Preparasqachu kashanki Jehová Diospa pʼunchayninpaq?
¿Preparasqachu kashanki Jehová Diospa p’unchayninpaq?
“[Jehová] Diospa hatun p’unchayninqa qayllaykamushanñan, sispaykamushanñan, usqhamushanñan.” (SOFONÍAS 1:14.)
1-3. a) ¿Imaninmi Biblia Jehová Diospa p’unchayninmanta? b) ¿Ima ‘p’unchaymi’ achhuykamushallantaq?
JEHOVÁ DIOSPA hatun p’unchayninqa manan iskay chunka tawayoq horallachu. Aswanpas millay runakunata Diospa wañuchinan tiempon. Millay runakunaqa sinchitapunin manchakunanku. Chay p’unchayqa laqhayaqmi kanqa, rawrarishaq k’arak phiñakuy p’unchaymi kanqa, llaki phutiy manchapakuy p’unchaymi kanqa, thuniy purunyachiy p’unchaytaq kanqapas (Isaías 13:9; Amós 5:18-20; Sofonías 1:15). Profeta Joelmi khaynata niran: “¡Imayna manchakuyraqmi! ¡Señor Diospa muchuchinan p’unchaymi sispaykamushan! ¡Tukuy-atiyniyoqpa thuninan manchay p’unchaymi chayamushan!” nispa (Joel 1:15). Diosmi ichaqa chay tiempopi “chanin sonqoyoqkunata” pakaykunqa (Salmo 7:10).
2 Askha kutipin Diosqa millay runakunaman juicionta chayachimuran, chaytan Bibliaqa sutichan ‘Jehová Diospa p’unchaynin’ nispa. Ejemplopaq, 607 watapi manaraq Jesús hamushaqtinmi Jerusalenpi tiyaqkunaman ‘Jehová Diospa p’unchaynin’ chayaran, chay watapin Babilonia runakuna Jerusalén llaqtata thuniranku (Sofonías 1:4-7). 70 watapipas Diosqa phiñakuyninta judiokunaman chayachiran Cristota mana kasukusqankumanta, chay watapin Roma runakuna judiokunata pasaqta atiparanku (Daniel 9:24-27; Juan 19:15). Bibliaqa rimallantaqmi ‘Jehová Diospa p’unchaynin’ huk kutitawanraq chayamunanmanta, chay tiempopin ‘maqanakunqa llapan suyukunawan’ (Zacarías 14:1-3). Diospa yuyaychasqanmi apóstol Pablo Jehová Diospa p’unchayninta tupanachiran Cristoq qayllaykamuyninwan, chay qayllaykamuynin tiempon qallariran 1914 watapi Jesús hanaq pachapi rey churasqa kaqtin (2 Tesalonicenses 2:1, 2, NM). Jehová Diospa p’unchaynin chayamushanñataq chayqa, allinpunin 2007 watapaq karan Sofonías 1:14, NM texto, chay texton nin: “Jehová Diospa hatun p’unchayninqa qayllaykamushanñan”, nispa.
3 Chay hatun p’unchay chayamunanpaq pisillañataq kashan chayqa, astawanraqmi kallpachakunanchis preparasqa kashananchispaq. ¿Imaynatan chay p’unchaypaq preparakusunman? ¿Imallapipas allinyananchis kashanraqchu?
Preparasqa kashasun
4. ¿Ima hatun pruebapaqmi Jesús preparakuran?
4 Kay millay pacha tukukapunanmanta rimaspan Jesucristoqa qatikuqninkunata niran: “Makilla [otaq preparasqa] kashaychis”, nispa (Mateo 24:44). Kikin Jesuspas preparasqañan kasharan huk hatun pruebapaq: ñoqanchisrayku wañunanpaq (Mateo 20:28). ¿Imaynatan Jesús preparakuran? ¿Imatan chaymanta yachasunman?
5, 6. a) ¿Imaynatan Dios munakuypas runamasi munakuypas yanapawasun Jehová Diospa p’unchayninpaq preparasqa kashananchispaq? b) ¿Ima ejemplotan Jesús saqewaranchis hukkuna munakuymanta?
5 Jesusqa tukuy sonqonwanmi munakuran Jehová Diosta, chanin kamachikuyninkunatapas. Hebreos 1:9 Jesusmanta nin: “Chaninkaqtan munakurqanki, mana chaninkaqtataq cheqnikurqanki, chaymi ñoqa Diosniykiqa wakinkunamantapas, hatunchaspa aceitewan hawispa kusichirqayki”, nispa. Jesusqa Taytanpa munasqanman hinapunin imatapas ruwaran payta munakusqanrayku. Sichus ñoqanchispas Jesús hina Jehová Diosta anchata munakusun, kamachikuyninkunatapas kasukusun chayqa, Diosninchismi waqaychawasunchis (Salmo 31:23). Chayta ruwaspan preparasqa kashasun Jehová Diospa hatun p’unchayninpaq.
6 Jesusqa munakullarantaqmi runakunatapas. Payqa “runakunata rikurqan mana michiqniyoq ovejakunata hina wikch’usqata, ch’eqechisqata, chaymi paykunata khuyapayarqan” (Mateo 9:36). Chayraykun allin willakuykunata paykunaman willaran. Ñoqanchispas runakunata munakuspanchismi Diospa Reinonmanta allin willakuykunata willamunchis. Jehová Diosta runamasinchistapas munakusqanchismi yanapawanchis mana pisipaspa predicanapaq, preparallawanchistaq Jehová Diospa hatun p’unchayninpaqpas (Mateo 22:37-39).
7. ¿Imaraykun kusisqa kawsanchis Jehová Diospa p’unchayninta suyaspa?
7 Jesusqa anchatan kusikuran Taytanta kasukuspa (Salmo 40:8). Sichus Jesús hina kasukuq qoykukuq ima kasun chayqa, kusisqan Jehová Diosta servisun (Hechos 20:35). Jehová ‘Diospa kusichiyninmi’ allinta kallpachawanchis, preparallawanchistaq Diospa hatun p’unchayninpaqpas (Nehemías 8:10).
8. ¿Imanaqtinmi Jehová Diosman achhuykunanchis mañakuypi?
8 Tukuy sonqowan Taytanmanta mañakusqanmi Jesusta preparallarantaq hatun pruebakunata aguantananpaq. Juan bautizashaqtinpas Jesusqa Diosmantan mañakusharan, apostolninkunata akllananpaqpas tutantinmi Diosmanta mañakuran (Lucas 6:12-16). Jesuspa wañupunanpaq huk p’unchayllaña kashaqtinmi payqa tukuy sonqo Diosmanta mañakuran, ¿manachu chayta leeqtinchis sonqonchisraq llanllarin? (Marcos 14:32-42; Juan 17:1-26.) ¿Jesús hinachu ñoqanchispas Diosmanta mañakunchis? Tiempota hap’ispan sapa kutilla Jehová Dioswan rimananchis. Santo espiritunta mañakunanchis yanapawananchispaq, yanapayninta reparaspataq kasukunanchis. Diospa hatun p’unchaynin achhuyramushanñataq chayqa, astawanraqmi kay sasa tiempokunapi hanaq pacha Taytanchisman hap’ipakunanchis. Chhaynaqa astawanraq Jehová Diosman achhuykusun mañakuypi (Santiago 4:8).
9. ¿Imanaqtinmi munananchispuni Jehová Diospa sutin ch’uyanchasqa kananta?
9 Jesusqa munaranpunin Jehová Diospa sutin ch’uyanchasqa kananta, chaypas yanapallarantaqmi hatun pruebakunata atipananpaq. Qatikuqninkunatapas yachachiran: “Sutiyki yupaychasqa [otaq ch’uyanchasqa] kachun”, nispa mañakunankupaq (Mateo 6:9). Sichus sonqomantapuni munanchis Diospa sutin ch’uyanchasqa kananta chayqa, manan ima ruwayninchiswanpas sutinta sarunchachisunchu. Chhaynapin allin preparasqa kashallasuntaq Jehová Diospa hatun p’unchayninpaq.
¿Imallapipas allinyananchis kashanraqchu?
10. ¿Imanaqtinmi qhawarikunanchis kawsayninchista?
10 Sichus paqarin Jehová Diospa p’unchaynin chayamunman chayri, ¿preparasqañachu chaypaq kashasunman? Llapanchismi kawsayninchista qhawarikunanchis, yaqapaschá imallapipas pantashanchisraq. Kunan kawsayninchisqa pasaqllan, chaymi sapa p’unchay astawan kallpachakunanchis Jehová Diosman achhuykunanchispaq (Eclesiastés 9:11, 12; Santiago 4:13-15). Chaymi kunan qhawarisunchis imakunapi yaqapas allinyananchisraq kashan chayta.
11. ¿Ima metata churakuranki Biblia leeypi?
11 ‘Hunt’aq kamachin’ kallpachawanchis Bibliata sapa p’unchay leenanchispaq (Mateo 24:45). Yaqapaschá kallpachakusunman huk watallapi hunt’asqata Biblia leenanchispaq, tiempotapas t’aqaspa yuyaymanananchispaq. Sapa p’unchay tawa capitulota hina leespaqa huk watallapin hunt’asqata Bibliata tukusunman leespa 1.189 capitulonkunata. Israel llaqta reykunaqa ‘tukuy kawsasqanku p’unchaymi’ Diospa Kamachikuy Siminta leenanku karan. Chaytapunichá Josuepas ruwaran (Deuteronomio 17:14-20; Josué 1:7, 8). Congregacionpi umalliqkunapas sapa p’unchaymi Diospa Simin Qelqata leenanku. Chhaynapin “cheqaq yachachikuyman” hina yachachinqaku (Tito 2:1).
12. Jehová Diospa p’unchaynin achhuykamushanñataq chayqa, ¿imatan ruwasunman?
12 Jehová Diospa p’unchaynin achhuykamushanñataq chayqa, huñunakuykunamanmi mana saqespa rishanallanchis, atisqanchisman hinataq tapuykunatapas kutichinanchis (Hebreos 10:24, 25). Chhaynapin aswan allinta Diospa Reinonmanta yachachisun allin sonqoyoq runakunaman (Hechos 13:48, NM). Chaymantapas, yanaparisunmanmi congregacionpi kuraqkunata, wayna sipaskunatapas kallpacharisunmanmi. ¡Maytachá kusikusunchis chayta ruwaspaqa!
Hukkunawan sumaqpi kawsasun
13. ¿Imatan tapukusunman mosoq runa kaywan p’achakuymanta?
13 Jehová Diospa p’unchaynin achhuyramushanñataq chayqa, yaqapaschá astawanraq kallpachakunanchis kashan ‘Diosman rikch’akuq kamasqa mosoq runawan p’achallikunanchispaq, chaymi rikuchikun chanin kawsaypi cheqaq ch’uya kawsaypiwan’ (Efesios 4:20-24). Diospa sumaq kasqanman hina kawsasun chayqa, lliwmi rikunqaku ‘santo espirituq munasqanman hina kawsasqanchista’ (Gálatas 5:16, 22-25). ¿Alayrichu kashan qanpas familiaykipas mosoq runa kaywan p’achasqa kasqaykichis? (Colosenses 3:9, 10.) Congregacionpipas llaqtaykipipas, ¿allin ruwayniykikunamantachu reqsisunkiku? (Gálatas 6:10.) Sichus sapa p’unchay Bibliata estudiasun chayqa, Diospa sumaq kayninkunaman hina kawsasunchis, preparasqataq kasunchispas Jehová Diospa p’unchayninpaq.
14. Sichus cuerponchista kamachiyta munanchis chayqa, ¿imanaqtinmi Diosmanta santo espirituta mañakunanchis?
14¿Imatan ruwasunman usqhaylla phiñakuq kaspa? Jehová Diospa santo espirituntan mañakunanchis. Santo espirituq yanapayninwantaq cuerponchista kamachisun. Yuyarisun Jesuspa nisqanta: “Mañakuychis qosunkichismi, maskhaychis tarinkichismi, waqyakuychis kicharimusunkichismi [...]. Qankunapas mana allin kashaspa wawaykichisman allin kaqkunataqa qoyta yachankichismi, chaymantapas astawanraqmi hanaq pachapi kaq Yayaykichisqa mañakuqninkunaman Santo Espiritunta qonqa”, nispa (Lucas 11:9-13).
15. ¿Imatan ruwasunman iñiqmasinchiswan phiñanarukuspanchis?
15 ¿Imatan ruwasunman iñiqmasinchiswan phiñanarukuspanchis? Tukuy atisqanchista ruwananchis allipunakapunanchispaq, chhaynapin huk nisqalla thakpi iñiqmasinchiskunawan kawsasun (Salmo 133:1-3). Mateo 5:23, 24 otaq Mateo 18:15-17 textokunapi Jesuspa nisqanman hinan ruwananchis. Ama ch’isiyaqqa phiñasqa kasunchu, aswanpas kallpachakusun usqhaylla allipunakapunapaq. Mayninpiqa allipunakapunapaqqa pampachakuq kayllamantan. Apóstol Pablo qelqaran: “Sumaq sonqo kaychis, khuyapayanakuq, pampachaykunakuq, imaynan Diospas Cristopi qankunata pampacharqasunkichis ahinata”, nispa (Efesios 4:25, 26, 32).
16. ¿Imakunapin casadokuna “khuyapayanakuq” kananku?
16 Qosakunapas esposakunapas “khuyapayanakuq” pampachaykuq iman kananku. Sichus casado kawsayniykichispi reparankichis aswan munakuq khuyapayakuq kanaykichista chayqa, Diospa yanapayninta maskhaychis Bibliata estudiaspa. Warmi qhari puñuyniykichispi mana phiñanakuy ni wasanchaypas kananpaq, ¿imallapipas allinyanaykichisraqchu kashan 1 Corintios 7:1-5 nisqanta hunt’anaykichispaq? Kay textoq nisqanta hunt’anaykichispaqqa ‘khuyapayanakuqmi’ kanaykichis.
17. ¿Imakunatan ruwananchis hatun huchaman urmaspa?
17 ¿Imatataq ruwasunman hatun huchaman urmayuspanchisri? Usqhayllan ancianokunaman willananchis yanapawananchispaq. Paykunaqa ñoqanchispaq Diosmanta mañapuwasun, sumaq consejokunatapas qowasun Dioswan allipunakapunanchispaq (Santiago 5:13-16). Chaymantapas, huchallikusqanchismanta khuyayta nanachikuspa Jehová Diosmanta pampachayninta mañakunanchis, mana chayqa sonqonchismi huchachallawasun. Chhaynatan rey Davidpas sientekuran huchanta mana willakusqanrayku; ichaqa maypachachus Jehová Diosman huchanta willakuqtinmi chayraq sonqon thak niran. Pay kikinmi qelqaran: “Kusisamiyoqmi huchallikusqan pampachasqa runaqa, kusisamiyoqmi huchanta pichasqa runaqa. Kusisamiyoqmi Señor Diospa mana huchachasqan runaqa, kusisamiyoqmi mana q’otuq runaqa”, nispa (Salmo 32:1-5). Jehová Diosqa pampachanmi tukuy sonqonwan huchanta saqespa payman kutirikuqtaqa (Salmo 103:8-14; Proverbios 28:13).
Kay pachaq millay ruwayninkunamanta karunchakusun
18. ¿Imaynatan qhawarinanchis kay pachata?
18 Llapanchismi munanchis hanaq pacha Taytanchispa prometewasqanchis mosoq pachapi kawsayta. Ichaqa, ¿allinpaqchu qhawarinchis kay pachapi mana chanin runakunaq kawsayninta? “Kay pachapi kamachikuq” Satanasqa manan atiparanchu Jesustaqa (Juan 12:31; 14:30). Ñoqanchispas manan munanchischu Saqra kamachiwananchista nitaq kay pacha runakunaq kawsasqanman hina kawsaytapas. Chayrayku makilla kasukunanchis apóstol Juanpa kay nisqanta: “Ama kay pachata munakuychischu, amallataq chaypi kaqkunatapas munakuychischu”, nispa. Chayta kasukuyqa allinninchispaqmi, Juanmi nillarantaq: “Kay pachaqa tukukapushanmi, tukuy imaymana mana chanin munayninkunapiwan. Diospa munayninta ruwaqmi ichaqa wiñaypaq kawsanqa”, nispa (1 Juan 2:15-17).
19. ¿Ima metakunata churakunankupaqmi wayna sipaskunata kallpachananchis?
19 Tayta mamakuna, ¿yanapashankichischu wawaykichista ‘kay pachaq millay ruwayninkunaman mana chhaqrukunankupaq’? (Santiago 1:27.) Imaynan challwaqkunapas munayllata challwata mikhunachawan hap’inku, chay hinatan Satanaspas wawaykichista imaymanawan hap’iyta munan. Kay pachapi askha organizacionkunan wayna sipaskunata waqllichiyta munanku Satanaspa munayninman hina kawsanankupaq. Ichaqa huk organizacionllan qhepanqa kay pacha huchachasqa kaqtin, chay organizacionpin Jehová Diospa kamachinkunaqa kashanchis. Chayrayku llapallanchis wayna sipasninchiskunata kallpachananchis ‘Señorpa llank’ananpi aswan-aswanta llank’anankupaq’ (1 Corintios 15:58). Tayta mamakuna, qankunan astawanqa wawaykichista yanapanaykichis Jehová Diospa llank’ananpi metakuna churakunankupaq, chhaynapin preparasqa kashanqaku Jehová Diospa p’unchayninpaq. Chayta ruwaspankun kusisqa kawsanqaku Diostapas hatunchanqaku.
Ama Jehová Diospa hatun p’unchayllanpichu yuyaykusun
20. ¿Imanaqtinmi yuyaykushanallanchis wiñay kawsaypi?
20 Sichus Paraisopi wiñay kawsananchista yuyaykushallasunchis chayqa, pacienciawanmi Jehová Diospa p’unchayninta suyasun (Judas 20, 21). Llapanchispas chay sumaq paraisopichá kawsakuyta munashanchis, chaypin wayna sipas kallpallanchispi kasunchis, wiñaypaqtaq kawsasunpas Jehová Diospa munayninta ruwaspa paymanta aswantaraq yachaspa. Manan hayk’aqpas Jehová Diosmantaqa llapanta yachasunchu, kunan yachasqanchispas “manan [...] imapasraqchu” (Job 26:14). ¡Ancha sumaqpunin kanqa Diosmanta wiñaypaq yachashallayqa!
21, 22. ¿Imakunatan kawsarimpuqkuna willawasun? ¿Imakunatan paykunaman yachachisunchis?
21 Paraisopi kawsarimpuqkunaqa lliw ima mana yachasqanchistachá willawasunchis. Chaypichá kashanqa Enocpas, hinaspa willawasunchis imaynatan Diospa juicionkunata mana manchakuspa millay runakunaman willaran chayta (Judas 14, 15). Noepas llapantachá willawasunchis arca ruwasqanmanta. Abrahanpas Sarapas willawasunchá imayna sientekuranku Ur llaqtankuta saqespa karpakunapi tiyasqankumanta. Esterpas llapantachá willawasunchis llaqtamasinkunata mana wañuchinankupaq imaymana ruwasqanta, Hamanpa yuyaykusqanta qolluchisqanmantapas (Ester 7:1-6). Jonaspas willawasunchá hatun challwaq wiksanpi kinsa p’unchay kasqanmanta, Bautizaq Juanpas willawasunchá Jesusta Bautizashaspa imayna sientekusqanta (Lucas 3:21, 22; 7:28). ¡Imakunamantaraqchá yachasunchispas!
22 Waranqa Wata Jesús kamachikushaqtinqa yanapasunchá wakin kawsarimpuqkunata ‘Diosta reqsinankupaq’ (Proverbios 2:1-6). Runakuna Diosmanta yachaspa munayninman hina kawsasqankuta rikuspaqa kusikunchismi. ¡Imaynataraqchá kusikusunchis kawsarimpuqkuna Jehová Diosmanta yachachisqanchisman hina kawsaqtinkuqa!
23. ¿Ima ruwananchispaqmi allinta yuyaykunanchis?
23 Jehová Dios serviqkunaqa askha allinkunatan chaskishanchis, runa kayninchispin mana llapanta yupaytapas ni entiendeytapas atinchischu (Salmo 40:5). Anchatan Jehová Diosta agradecekunchis munayninman hina kawsananchispaq imaymana qowasqanchismanta (Isaías 48:17, 18). Chayrayku, Diospa hatun p’unchaynin chayamunankama tukuy sonqowan Jehová Diosta servishallasun imaynapiña tarikuspapas.
¿Imanispan kutichiwaq?
• ¿Imataq ‘Jehová Diospa p’unchayninri’?
• ¿Imaynatan preparakusunman Jehová Diospa p’unchayninpaq?
• Diospa hatun p’unchaynin achhuykamushanñataq chayqa, ¿imakunapin yaqapas allinyananchisraq kashan?
• Jehová Diospa p’unchaynin pasasqan qhepaman, ¿imakuna ruwayta munawaq?
[Tapuykuna]