Diosmanta chaskisqanchis qokuykunawan hukkunata servisun

“Wawqe-panantin hinapuni munanakuychis, respetanakuspa hukkuna hukkunawan aswan allinpaq qhawanakuychis.” (ROM. 12:10.)

1. ¿Imatan Diospa Simin Qelqa niwanchis?

DIOSPA Simin Qelqaqa askha kutitan niwanchis llakipi tarikuqtinchis Jehová Dios yanapawananchista. Kaytan niwanchis: “Señor Diosqa llapa urmaqkunatan aysarin, llapa k’umuykachisqakunatan sayarichin”. “Paymi llakiq ñit’isqan sonqoyoqkunata qhaliyachin, k’irinkunatapas wataykun”, nispa (Sal. 145:14; 147:3). Hanaq pachapi Taytanchismi niwanchis: “Ñoqaqa Diosniyki Señor Diosmi kani, paña makiykimantan hap’ishayki, ñoqan niyki: Ama manchakuychu, ñoqan yanapasqayki”, nispa (Isa. 41:13).

2. ¿Imaynatan Jehová Dios serviqninkunata yanapan?

² Jehová Diosqa hanaq pachapitaq kashan chayqa, ¿imaynatataq makinchismanta aysariwasunman llakiq ñit’isqan kashaqtinchis? Imaymanawan yanapawaspanchis. Payqa santo espirituntan qowanchis ‘hatun atiyta’ chaskinanchispaq (2 Cor. 4:7; Juan 14:16, 17). Simin Qelqawanpas kallpachawanchismi (Heb. 4:12). Hukniraymantapas kallpachawallanchistaqmi. Chaypaq t’aqwirisun apóstol Pedroq qelqasqan hukkaq cartata.

‘Diospa imaymana qokuyninkuna’

3. a) ¿Imaniranmi apóstol Pedro sasachakuykunamanta? b) ¿Imanispan apóstol Pedro kallpachan sasachakuypi tarikuqkunata?

³ Apóstol Pedron qelqasqan cartapi hawisqa cristianokunata kallpachan hamuq tiempopi sumaq premio chaskinankumanta kusikunankupaq. Ichaqa nillantaqmi: ‘Huk pisi tiempollapaq imaymana sasachakuyta muchunankumanta’ (1 Ped. 1:1-6). Pedroqa manan huk sasachakuyllamantachu rimashan aswanpas “imaymana” sasachakuymantan. ¿Atinkumanchu cristianokuna llapan sasachakuykuna aguantayta? Apostolmi paykunata nin ima sasachakuypiña tarikuqtinkupas Jehová Dios yanapananta. Chaytaqa yachanchis “tukuy imaymanaq tukukapuyninqa sispaykamushanñan” nisqanpi (1 Ped. 4:7).

4. ¿Imaraykun anchata kallpachawanchis 1 Pedro 4:10?

⁴ Pedron nin: “Sapankaykichismi Diospa qosqan atiy qokuyta chaskirqankichis, chaywan hukkunata serviychis, Diospa imaymana qokuyninkunawan allinta llank’aspa”, nispa (1 Ped. 4:10). Chaypiqa “imaymana” nispan rimallantaq. Chaywanmi Pedro rikuchisharan imaymana sasachakuyña kanman chaypas Diospa khuyapayakuyninpas imaymanamanta rikukusqanta. ¿Imaraykun chaymanta yachay anchata kallpachawanchis? Diosqa ancha khuyapayakuyninpi imayna pruebapiña tarikuqtinchispas yanapawasunmi aguantananchispaq. ¿Repararankichu imaynata Dios yanapawasqanchista? Payqa iñiqmasinchiskunawanmi yanapawanchis.

Hukkuna hukkunawan servinakusun

5. a) ¿Imatan cristianokuna ruwananchis? b) ¿Ima tapuykunatan kutichisun?

⁵ Llapa cristianokunatan Pedro nin: “Aswantaqa  tukuy sonqo munanakuychis”, nispa. Nillantaq: “Sapankaykichismi Diospa qosqan atiy qokuyta chaskirqankichis, chaywan hukkunata serviychis”, nispa (1 Ped. 4:8, 10). Arí, sapankanchismi iñiqmasinchiskunata kallpachananchis. Diosmantaqa sumaq qokuykunatan otaq regalokunatan chaskiranchis. ¿Imataq chay qokuykunari kanman? ¿Imaynatan chaykunawan hukkunata servisunman?

6. ¿Ima sumaq qokuykunatan Diosmanta chaskinchis?

⁶ Diospa Simin Qelqan nin: “Tukuy allin kaqkunatapas, tukuy chanin kaqkunatapas hanaq pachamantan chaskinchis”, nispa (Sant. 1:17). Diosqa allin kaqkunata qowaspanchismi ancha khuyapayakuq kasqanta rikuchiwanchis. Aswan chaniyoq chaskisqanchis qokuyqa santo espiritun. Chaymi yanapawanchis munakuq, sumaq sonqo, llamp’u sonqo kananchispaq, chhaynapi iñiqmasinchiskunata munakuywan tratananchispaq yanapananchispaq ima. Yachaytapas, yachayniyoq kaytapas santo espirituq yanapayninwanmi chaskinchis (1 Cor. 2:10-16; Gál. 5:22, 23). Tukuy imaymana ruway atisqanchis, yachasqanchis, sumaq sonqo kasqanchispas Diosmanta chaskisqanchis sumaq qokuykunan chaykunawan payta hatunchananchispaq. Diosqa munanmi chay qokuykunawan iñiqmasinchiskunata yanapananchista, chhaynapi paypa ancha khuyapayakuq kasqanta rikuchinanchispaq.

¿Imaynatan Diosmanta chaskisqanchis qokuykunawan hukkunata yanapasunman?

7. a) ¿Imaninmi Pedro Diosmanta sumaq qokuykuna chaskisqanchismanta? b) ¿Imakunatan tapukunanchis, imarayku?

⁷ Apóstol Pedron niran: “Sapankaykichismi Diospa qosqan atiy qokuyta chaskirqankichis, chaywan hukkunata serviychis”, nispa. Arí, llapa cristianokunan rikuchisunman sumaq runa kayta, munakuyta, chaymantapas atisunmanmi ima ruwaytapas. Ichaqa manan llapallanchischu kaqllata chaykunata rikuchisunman otaq ruwayta atisunman. Chaywanpas apostolqa llapanchistan kallpachawanchis chaskisqanchis qokuykunawan hukkuna hukkunawan ‘servinakunanchispaq’. “Chaywan hukkunata serviychis” nispaqa cristianokunatan kamachisharan chayta ruwanankupaq. Chayraykun tapukunanchis: “¿Yanapashanichu Diospa qowasqan qokuykunawan  iñiqmasiykunata?” (tupachiy 1 Timoteo 5:9, 10). “¿Icha qhapaq kayta, allinnillaytachu maskhashani?” nispa (1 Cor. 4:7). Diosqa kusikunmi paymanta chaskisqanchis qokuykunawan hukkuna hukkunawan yanapanakuqtinchis (Pro. 19:17; leeychis Hebreos 13:16).

8, 9. a) ¿Imaynatan cristianokuna iñiqmasinkuta yanapanku? b) ¿Imaynatan congregacionniykipi yanapanakunku?

⁸ Bibliaqa willanmi ñawpaq siglopi cristianokuna iñiqmasinkuta imaymanapi servisqankumanta (leeychis Romanos 15:25, 26; 2 Timoteo 1:16-18). Kunanpas cristianokunaqa tukuy sonqomantan chaskisqanku qokuykunawan iñiqmasinkuta servinku. Qhawarisun imaynatas ruwanku chayta.

⁹ Askha iñiqmasinchiskunan sapa killa askha hora discursonkuta preparakunku, allin yachachikuykunatan maskhanku congregacionpi yachachinankupaq. Chhaynapi allin rimasqankuwan iñiqmasikunata kallpachanku sasachakuykunata aguantanankupaq (1 Tim. 5:17, NM). Wakin iñiqmasinchiskunaqa munakuywan khuyapayaywan hukkunata tratasqankumantan reqsisqa kanku (Rom. 12:15). Wakinqa llakiq ñit’isqan kaqkunaqta rillankupuni watukuq paykunawan kuskataq mañakunku (1 Tes. 5:14). Wakintaq sumaq cartakunata qelqanku sasachakuypi tarikuqkunata kallpachanankupaq . Hukkunaqa onqosqa iñiqmasikunatan huñunakuyman apanku. Waranqanpi iñiqmasinchiskunataq hatun ñak’ariy kaqtin huk iñiqmasinchiskunata yanapanku hukmanta wasinkuta sayarichiypi. Kay cristianokuna tukuy sonqo iñiqmasinkuta yanapasqankuwanmi Diosqa rikuchin imaymanapi ancha khuyapayakuq kasqanta (leeychis 1 Pedro 4:11).

¿Mayqenmi aswan allin kanman?

10. a) ¿Ima iskay ruwaytan apóstol Pablo Dios serviyninpi hunt’aran? b) ¿Imatan Pablo hina ruwasunman?

¹⁰ Iñiqmasinchiskunata servinanchispaq Diospa qokuynin chaskisqanchismantapas allin willakuykunata runakunaman willananchispaqmi Dios kamachiwanchis. Apóstol Pabloqa iskaynin ruwaymantan rimaran. Éfeso cristianokunatan niran: “Diosmi ancha khuyapayakuyninpi qankunaq allinniykichispaq llank’anata qowarqan” nispa, chaywanqa nisharan paykunata servinanpaq Dios kamachisqanmantan (Efe. 3:2). Ichaqa nillarantaqmi: “Diosmi allinpaq hap’iwaspanku allin willakuykunata willanaykupaq kamachiwarqanku”, nispa (1 Tes. 2:4). Ñoqanchispas apóstol Pablo hinan yachanchis Reinomanta predicanapaq kamachisqa kasqanchista. Payqa mana sayk’uspan predicaran, ñoqanchispas pay hinan llank’ananchis (Hech. 20:20, 21; 1 Cor. 11:1). Allintan yachanchis predicasqanchiswan runakuna qespichisqa kanankuta, yachallanchistaqmi Pablo hina iñiqmasinchiskunata iñiyninpi kallpachananchistapas (leeychis Romanos 1:11, 12; 10:13-15).

11. ¿Imaynatan qhawarinanchis predicayta iñiqmasinchiskuna kallpachaytapas?

¹¹ ¿Chay iskaynin ruwaymanta mayqenmi aswan allin? Chaywanqa mayqen raphrantan astawan huk urpi necesitan nispapas tapushasunman hinan kanman. Imaynan huk urpi iskaynin raphranwan phawan, chhaynallataqmi ñoqanchispas necesitanchis Dios serviyninchispi iskaynin ruwaykuna hunt’ayta, chhaynapi Diospa kamachiwasqanchista hunt’ananchispaq. Chayrayku, predicayta iñiqmasinchiskuna kallpachaytapas sapaq-sapaqta hina qhawarinanchismantaqa Pedro, Pablo hina qhawarinanchis iskayninta huk ruwayta hinalla. ¿Imaynapitaq hukllari?

12. ¿Imaynapin Diospa makinpi herramienta hina kasunman?

¹² Predicaspaqa kallpachakunchismi runakunata yachachinapaq allin willakuykunawan sonqonkuman chayananchispaqpas. Chhaynapin yanapanchis Jesuspa qatikuqnin kanankupaq. Ichaqa kallpachakullanchistaqmi yachasqanchiswan sumaq  sonqo kasqanchiswan iñiqmasinchiskunata yanapanapaq. Chaykunata ruwaspaqa Jehová Diospa ancha khuyapayakuq kasqantan rikuchishanchis (Pro. 3:27; 12:25). Chhaynapin yanapanchis Cristota qatikushanallankupaq. Predicaypas iñiqmasinchiskunata yanapaypas may allin ruwaykunan, chaykunata ruwaspaqa ancha valorniyoq herramienta hinan Diospa makinpi kanchis (Gál. 6:10).

“Wawqe-panantin hinapuni munanakuychis”

13. ¿Iman pasanman manaña yanapanakuqtinchis?

¹³ Apóstol Pablon wayqe panankunata kallpacharan: “Wawqe-panantin hinapuni munanakuychis, respetanakuspa hukkuna hukkunawan aswan allinpaq qhawanakuychis”, nispa (Rom. 12:10). Iñiqmasinchiskunataqa munakuspan tukuy sonqowan servinchis, chhaynapin Dios sumaq sonqo kasqanta rikuchinchis. Sichus Satanás t’aqanachiwasunman manaña yanapanakunanchispaq chayqa, manañan huk nisqallachu kawsasunman (Col. 3:14). Manañan tukuy sonqowanpaschu predicasunman. Saqraqa urpita hinan huk raphrallanchista k’iriruyta munan Dios serviyninchispi urmachiwananchispaq.

14. ¿Pikunatan yanapan iñiqmasinchiskunata serviy? Willay huk experienciata.

¹⁴ Iñiqmasinchiskunata servispaqa manan paykunallatachu yanapanchis, chayta ruwayqa ñoqanchistapas yanapawanchismi (Pro. 11:25). Hukkunata serviyqa anchatan yanaparan Ryanta Ronitawan, paykunaqa Illinois (Estados Unidos) llaqtanmanta casado warmi qharin kanku. Katrina sutiyoq hatun wayra pachakninpi iñiqmasikunaq wasinta aparusqanmanta yachaspankun llank’anankuta, wasinkuta saqespa usasqa remolque wasita rantiranku, chayta allichaspan 1.400 kilometrota Luisiana llaqtakama viajaranku, chaytan ruwaranku iñiqmasinkuta munakusqankurayku. Huk wata mastan chay llaqtapi tiyaranku hinaspa tukuy tiemponkuwan, kallpankuwan, kaqninkuwan ima iñiqmasikunata yanaparanku. 29 watanpi kashaq Ryanmi nin: “Chay llank’aypi yanapakuspaymi astawan Diosman achhuykurani. Chaypin rikurani Jehová Dios llaqtanta yanapasqanta. Allin experienciayoq  cristianokunawan llank’ayqa yachachiwaranmi aswan allinta iñiqmasikunata yanapanaypaq. Yachallaranitaqmi Diospa llaqtanpi wayna sipaskuna askha llank’aykunapi yanapakunaykuta”, nispa. 25 watanpi kashaq Roni nin: “Kay llank’aypi hukkunata yanapasqaymantaqa maytan kusikuni. Manan hayk’aqpas chhaynataqa kusikuranichu. Chaypi imaymana yachasqayqa askha watakunatan yanapawanqa”, nispa.

15. ¿Imaraykun kallpachakushanallanchis Diospa qokuyninkunawan hukkunata servinapaq?

¹⁵ Arí, allin willakuykunata predicaypas iñiqmasinchiskunata serviypas llapanchispa allinninchispaqmi. Yanapasqanchis iñiqmasinchiskunaqa kallpatan hap’inku Diosta servishanallankupaq, ñoqanchistaq anchata kusikunchis yanapasqanchismanta (Hech. 20:35). Llapallanchis qhawarinakuspa yanapanakuspaqa, huk nisqallan sumaqta kawsasunchis. Chaymantapas munakuywan yanapanakuspaqa reqsichikunchismi cheqaq cristianokuna kasqanchista. Jesusmi niran: “Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:35). Astawanqa munakuq Jehová Yayanchistan agradecekunchis, paymi llakikuypi tarikuqkunataqa huk serviqninkunawan kallpachan. Chayraykun tukuy atisqanchista ruwananchis Diosmanta chaskisqanchis qokuykunawan hukkuna hukkunawan servinakunanchispaq, chhaynapin Dios ancha khuyapayakuq kasqanta rikuchisun. Qanrí, ¿kallpachakushallankichu chayta ruwanaykipaq? (Leeychis Hebreos 6:10.)

¿Yuyarishankichu?

• ¿Imaynatan Jehová Dios serviqninkunata kallpachan?

• ¿Imatan Diosmanta chaskiranchis?

• ¿Imaynatan iñiqmasinchiskunata servisunman?

• ¿Iman kallpachawasun Diosmanta chaskisqanchis qokuykunawan iñiqmasinchiskunata servishanallapaq?

[Tapuykuna]

[13 paginapi fotokuna]

¿Servishanchischu hukkunata Diosmanta chaskisqanchis qokuykunawan icha allinnillanchistachu maskhashanchis?

[15 paginapi fotokuna]

Allin willakuykunatan predicananchis, iñiqmasinchiskunatapas yanapananchismi

[15 paginapi foto]

Iñiqmasinchiskunata munakuywan yanapaqkunataqa anchatan valorananchis