Jesusta qatikunankupaq runakuna yanapayqa kusichiwanchismi

“Rispa [...] runakunata yachachimuychis, yachachisqaykuna kanankupaq.” (MAT. 28:19.)

1-3. a) ¿Imaynan iñiqmasinchiskuna sientekunku runakunata yachachispa? b) ¿Ima tapuykunatan kutichisun?

HUK hermananchismi nin: “Chunka hukniyoq semanañan Pakistán nacionmanta familiaman Bibliamanta yachachishani paykunawanqa sumaq amigontinmi kayku. Weqeyraqmi lloqsimun llaqtankuman kutipunankupi yuyaykuqtiy, ripuqtinkuqa manañan paykunawan tupasaqchu. Maytan kusikurani paykunaman Jehová Diosmanta yachachispay”, nispa, kay hermanaqa Estados Unidospin hindi rimaq runakunata yanapashan Bibliamanta yachachispa.

² Qanrí, ¿hayk’aqllapas kusikurankichu Bibliamanta estudiota qospa? Jesuspas qatikuqninkunapas anchatan kusikuranku runakunata Diosmanta yachachispa. Jesuspa ‘qanchis chunka iskayniyoq [70, NM] kachasqankunan kusisqa kutimpuspa’ payman willaranku imaymana ruwamusqankumanta, Jesustaq ‘santo espirituq hunt’aykusqan kusikuran’  (Luc. 10:17-21). Kunanpas, askha runakunan kusikuywan kay llank’aypi yanapakushanku. Chayraykun 2007 watapiqa sapa killan soqta millón mastaraq Bibliamanta estudiota qokuran.

³ Wakin iñiqmasinchiskunan ichaqa manaraq kusikuyta tarinkuchu Bibliamanta estudiota qospa. Wakintaq unayña mana estudiota qonkuchu. ¿Imakunan hark’awasunman Bibliamanta estudio qonanchista? ¿Imaynatan chaykunata atipasunman? Jesusmi kamachiwaranchis: “Rispa [...] runakunata yachachimuychis, yachachisqaykuna kanankupaq”, nispa, ¿imaraykun chaypaq kallpachakuy ancha allinpuni? (Mat. 28:19.)

¿Imakunan hark’awasunman?

4, 5. a) ¿Imaynatan wakin llaqtakunapi predicasqanchista chaskinku? b) ¿Imaraykun wakin llaqtakunapi mana uyarinkuchu?

⁴ Wakin llaqtakunapiqa sumaqtan qelqanchiskunata chaskinku Bibliatapas estudiaytan munanku. Australiamanta huk casado warmi qharin Zambia nacionpi pisi tiempolla predicasqankumanta niranku: “Willawasqankuqa cheqaqmi kasqa, Zambiapiqa askha runakunan Bibliamanta yachayta munanku. Callekunapi predicaqtiykupas askha runan achhuykamuwanku wakinqa revistakunata imaraqmi mañakuwanku”, nispa. Qayna watakunapiqa iskay pachak waranqa más estudiokunatan chay nacionpi qokuran, sapanka publicadormi huk estudiota qoran wakintaq askha estudiota.

⁵ Wakin llaqtakunapin ichaqa yaqa llapa runakuna mana qelqanchiskunata chaskiyta munankuchu nitaq Bibliatapas estudiayta munankuchu. ¿Imarayku? Predicaspan mana wasinkupi tarinchischu otaq mana munankuchu religionmanta rimayta. Askhan religionpi mana creeq familia ukhupi wiñaranku, wakintaq pantasqa religionpi mana allin ruwaykunata rikuspa religionmanta mana yachayta munankuchu. Hukkunataq llulla pastorkunaq engañasqan kasqankurayku mana michiqniyoq k’irisqa ovejakuna hina tarikunku (Mat. 9:36). Chayraykun paykunaqa phiñakunku pillapas Bibliamanta rimapayaqtin.

6. ¿Ima sasachakuymi kan wakin iñiqmasinchiskunapaq?

⁶ Wakin iñiqmasinchiskunaqa onqosqankurayku otaq kuraqña kasqankuraykun manaña ñawpaqpi hinachu estudiota qonku. Wakintaq yuyaykunkuman: “Manapunin estudio qoytaqa atiymanchu”, nispa. Moisés hinan sientekunku, Jehová Dios Faraonwan rimamunanpaq kamachiqtinmi Moisés kutichiran: “¡Ay, Señor Diosniy! Manan hayk’aqpas allin rimaq runachu kani, ñawpaqpas kunanpas”, nispa (Éxo. 4:10). Mayninpiqa yuyaykusunmanpaschá: “Manataq allintachu yachachiyta atini chayqa, manan pitapas bautizakunanpaq yanapayta atiymanchu”, nispa. Chayrayku nisunman: “Imapaqñataq huk estudiollatapas qallariyman”, nispa. ¿Imaynatan chay sasachakuykunata atipasunman?

Sonqonchista preparasun

7. ¿Iman Jesuspa sonqonta kuyurichiran predicananpaq?

⁷ Ñawpaqtaqa sonqonchistan preparananchis. Jesusmi niran: ‘Imachus sonqopi hunt’a kashan chaytan simiqa riman’, nispa (Luc. 6:45). ¿Iman Jesuspa sonqonpi karan? Payqa anchatan interesakuran hukkunaq allinninpi. Chaymi sonqonta kuyurichiran predicananpaq. Jesusqa judío llaqtamasinkunatan rikuran Diosmanta karunchasqa kasqankuta, chaymi paykunata khuyapayaspa qatikuqninkunata niran: “Cosechanaqa askhapunin [...]. Chayrayku, chakrayoqta valekuychis cosechanman llank’aqkunata kachamunanpaq”, nispa (Mateo 9:36-38).

8. a) ¿Imapin yuyaykunanchis? b) ¿Imatan yachanchis huk estudianteq nisqanmanta?

⁸ Bibliamanta yachachiwaqninchisqa tiemponta horqospan estudiachiwaranchis, chay ruwasqanqa ancha allinninchispaqmi karan. Chaypi yuyaykuymi yanapawasun allin willakuykuna predicasqanchis runakunaq allinninpaq kasqanta qhawarinanchispaq. Huk warmin tiyasqan llaqtapi Testigokunaq sucursalninman  qelqaran: “Anchatan kusikuni Testigokuna wasiyman hamuspa Bibliamanta yachachiwasqankumanta. Askhan tapuyniykuna, chaymi paykunaqa kallpachakunku kutichiwanankupaq, chayraykun mana quedasqayku tiempollapichu estudiayku. Ichaqa pacienciallawanmi yachachiwanku tukuy yachasqankumanta. Jehová Diosta Jesustawanmi anchata agradecekuni paykuna reqsisqaymanta”, nispa.

9. ¿Imapin Jesús yuyaykuran, imaynatan ñoqanchispas chayta ruwasunman?

⁹ Kaytan yuyarinanchis: Jesuspa predicasqanta uyariqkunaqa manan llapankuchu qatikuqninman tukupuranku (Mat. 23:37). Wakinqa qatikuqninña kashaspankupas yachachikuyninkunata mana chaskiyta munaspan saqepuranku (Juan 6:66). Chaywanpas Jesusqa manan pisipaqchu qhawariran allin willakuykuna predicasqanta. Askha muhu tarpusqanña mana rururanchu chaypas, predicasqanwan ancha allin ruwasqanpin yuyaykuran. Chakrakunatan qhawariran ichhunapaqña otaq rutunapaqña kashasqanta, chaymi anchata kusikuran chayta ruwaspa (leeychis Juan 4:35, 36). Ñoqanchispas Jesús hinan yuyaykunanchis, yaqapaschá mana llapa yachachisqanchis runakunachu Jesuspa qatikuqninman tukupunku, ichaqa chaypi yuyaykunanchismantaqa askha runakuna Diosmanta yachay munasqankupin yuyaykunanchis. ¿Imatan ruwasunman chhayna allin kaqpi yuyaykunanchispaq?

Estudio tariy yuyaywan predicasun

10, 11. ¿Imatan ruwawaq predicasqaykipi kusikuyta tarinaykipaq?

¹⁰ Chakra ruwaqqa allin cosecha hoqariy yuyaywanmi tarpun. Chhaynallatataqmi ñoqanchispas estudiota qallariy yuyaywan predicananchis. Ichaqa kallpachakushaspapas manapaschá askha runatachu predicaspa otaq  revisitata ruwaspa tarisunman. ¿Chayraykuchu manaña predicananchis wasin wasinta? Manapunin. Askha runaraqmi chayllaraq Bibliamanta yachashanku wasin wasinta predicasqanchisrayku.

¹¹ Kusikuywan predicashanallaykipaqqa yaqapaschá hukniraymanta predicawaq. ¿Predicarankichu callekunapi, mercadokunapipas? ¿Kallpachakuwaqchu llank’anaykipi otaq viajaspa predicanaykipaq? Sichus mana sayk’uspa maypi imaynapi tarikuqtinkupas runakunata predicanki chayqa, tarinkin Bibliamanta yachay munaqta chaywanqa ancha kusisqan kanki.

¿Imatan ruwasunman mana uyariyta munaqtinku?

12. ¿Imatan ruwasunman runakuna religionmanta mana yachayta munaqtinku?

¹² ¿Imatan ruwasunman llaqtanchispi runakuna religionmanta mana yachayta munaqtinku? Rimasunmanmi imakuna llakichisqanmanta. Apóstol Pablon Corinto llaqtapi wayqe panankunaman niran: “Judío runakunawan kashaspayqa judío runa hinan ñoqapas kani [...]. Mana kamachikuy simipi kaqkunawan kashaspayqa paykuna hinan kawsani [...]. Lliw runapaqmi paykuna hina kani”, nispa. ¿Imarayku apóstol chayta ruwaran? ‘Imaynallamantapas wakinta Cristopi iñichinanpaq [“qespichinanpaq”, NM].’ (1 Cor. 9:20-22.) Ñoqanchispas rimasunmanmi imachus runakunaman interesan chaymanta. Askhan familiankupi aswan allin kawsayta munanku. Huk runakunataq kusisqa kawsayta munanku. Chayrayku predicaspaqa yachayta munanankupaq hina rimananchis.

13, 14. ¿Imatan ruwasunman predicasqanchispi astawanraq kusikunapaq?

¹³ Wakin llaqtakunapiqa manan uyariyta munankuchu, chaywanpas wakin iñiqmasinchiskunaqa huk hinamanta predicaspan kusikuyta tarinku. ¿Imatan ruwaranku? Huk rimaytan yacharanku. Huk casado iñiqmasinchiskunan soqta chunka más watayoqña kanku, paykunaq tiyasqanku llaqtapin chino simita rimaq askha estudiantekuna familiankuwan kuska tiyasqaku. Hermanonchismi nin: “Rimasqanku rimayta yachanaykupaqmi yuyaykurayku. Sapa p’unchaymi estudianayku karan, chayraykun askha estudiokunata qallarirayku”, nispa.

¹⁴ Manaña yachasunmanchu huk rimayta chaypas, Buenas nuevas para gente de todas las naciones nisqa folletowanmi predicasunman huk rimayta rimaq runakunawan tupaspanchisqa. Chaymantapas chay runakunamanqa apasunmanmi rimasqanku rimaypi kaq qelqakunata. Ichaqa huk rimayta rimaqkunawan, hukniray costumbreyoq kaqkunawanpas rimananchispaqqa kallpachakunanchismi. Ama qonqaychu kayta: ‘Askhata tarpuqqa [...] askhatan hoqarinqa’ (2 Cor. 9:6).

Llapanchismi yanapakunchis

15, 16. a) ¿Imaynatan llapallanchis runakunata yanapanchis Jesusta qatikunankupaq? b) ¿Imaynatan kuraqkuna yanapakunku?

¹⁵ Runakuna Jesusta qatikunankupaqqa manan hukllachu yanapan aswanpas llapanchismi. ¿Imarayku? Jesusmi niran: “Ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:35). Chhayna munanakusqanchistan lliw runakuna huñunakuyman hamuspa reparanku. Huk estudianten niran: “Kusikunin huñunakuyman rispa. ¡Llapankun sumaqta chaskiwanku!” nispa. Jesusqa willaranñan wakin qatikuqninkunata familianku hark’ananta (leeychis Mateo 10:35-37). Ichaqa niranmi Diospa llaqtanpi “wawqekunata, panakunata, mamakunata, wawakunata” tarinanchispaq (Mar. 10:30).

¹⁶ Kuraq iñiqmasinchiskunapas yanapakunkun estudiantekuna ñawparinankupaq. ¿Imaynapi? Manaña wakinqa estudio qoyta atinkuchu chaypas huñunakuypi tapuykunaman kutichispankun kallpachanku mosoqkunaq iñiyninta. Paykunaqa ‘uñayñan kawsashanku chanin runakuna’ hina, chaymi llapanchistapas yanapawanchis, chayta qhawarispan allin sonqoyoq runakunapas hamunku (Pro. 16:31).

 Ama manchakusunchu

17. ¿Imatan ruwasunman estudio qoyta mana atinanchispaq yuyaykuqtinchis?

¹⁷ Sichus piensawaq mana estudio qoyta atinaykipaq chayqa, ¿imatan ruwawaq? Yuyariy, Jehová Diosqa yanaparanmi Moisesta santo espiritunwan. Chaymantapas wayqen Aarontan churaran yanapananpaq (Éxo. 4:10-17). Jesuspas prometeranmi Diospa santo espiritun predicasqankupi qatikuqninkunata yanapananpaq (Hech. 1:8). Chaymantapas iskay iskaymantan predicaqta kacharan, chhaynapi yanapanakunankupaq (Luc. 10:1). Chayrayku sichus sasachakunki estudio qoypi chayqa, Diosmanta mañakuy santo espiritunta hinaspa huk experienciayoq iñiqmasinchista maskhay yanapanasuykipaq. Jehová Diosqa ‘kay pachapi pisi kallpapaq qhawasqa runakunatan akllarqan’ munasqanta hunt’anankupaq, chayta yuyariyqa anchatan kallpachawanchis (1 Cor. 1:26-29).

18. ¿Imatan ruwasunman estudianteta mana yanapay atinanchispi yuyaykuspa?

¹⁸ ¿Imatan ruwasunman estudianteta mana yanapayta atinanchispi yuyaykuspa? Yuyarinanchismi, estudiante Jesusta qatikunanpaqqa manan yachachiqllachu yanapan. Manan mikhuyta wayk’uy hinachu, mikhuy sumaq lloqsinanpaqqa wayk’uqllan kallpachakunan. Estudio qoypin ichaqa mana yachachiqllachu kallpachakunan. Jehová Diosmi runakunataqa llaqtanman pusamun, paymi sonqonkuta kuyurichin (Juan 6:44). Ñoqanchispas huk iñiqmasinchiskunapas tukuy atisqanchistan ruwanchis estudianteta yanapanapaq, chhaynapi wiñarinanpaq (leeychis 2 Timoteo 2:15). Estudiantepas kallpachakunanmi Bibliamanta yachasqanman hina kawsananpaq (Mat. 7:24-27). Huk runa manaña Bibliata estudiayta munaqtinqa llakikunchismi, ñoqanchisqa Jehová Diosta servinantan munanchis. Ichaqa “sapankanchismi kikinchismanta Diosman cuentata qosun” (Rom. 14:12).

Estudio qoyqa allinninchispaqmi

19-21. a) ¿Imaynatan yanapawanchis Bibliamanta estudio qoy? b) ¿Imaynatan Jehová Dios qhawarin lliw predicaqkunata?

¹⁹ Estudio qoyqa yanapawanchismi Reinota ñawpaqman churananchispaq. Yanapawallanchistaqmi Bibliamanta cheqaq yachachikuykunata sonqonchispi yuyayninchispi ima churananchispaq. ¿Imaynata? Barak sutiyoq precursormi nin: “Estudio qoyqa yanapasunkin aswan allinta Bibliata estudianaykipaq. Pimanpas yachachispaqa qanraqmi seguro kanayki imapichus creesqaykimanta”, nispa.

²⁰ Sichus mana pimanpas estudiota qonkichu chayri, ¿mana valorniyoqpaqchu Dios servicioykita qhawarin? Manapunin. Jehová Diosqa anchatan valoran payta hatunchananchispaq tukuy ima ruwasqanchista. Lliw predicaqkunaqa “Diospa llank’aysiq-masinkunan” kanchis. Sichus qan estudiota qonki chayqa aswan kusisqan kanki, chhaynapin rikunki tarpusqayki muhuta imaynata Dios wiñachisqanta (1 Cor. 3:6, 9). Amy sutiyoq precursoran nin: “Estudianteykikuna iñiyninpi wiñariqtinkuqa anchatan Diosta agradecekunki Payta reqsinankupaq yanapasqaykimanta, chhaynapi wiñay kawsayman aypanankupaq”, nispa.

²¹ Sichus kallpachakusun Bibliamanta estudiota qonapaq chayqa, manan saqesunchu Dios serviyninchista, hamuq tiempopaq suyakuyninchispas astawanraqmi yapakunqa. Jehová Diospa yanapayninwanqa yaqapaschá uyarikuqkunata yanapasunman qespikunankupaq (leeychis 1 Timoteo 4:16). ¿Kanmanchu chaymanta aswan kusikuy?

¿Yuyarishankichu?

• ¿Imakunan hark’awasunman Bibliamanta estudiota qonapaq?

• ¿Imatan ruwasunman predicasqanchista runakuna mana uyariyta munaqtinku?

• ¿Imaynatan yanapawanchis estudio qoy?

[Tapuykuna]

[9 paginapi fotokuna]

¿Kallpachakunchischu allin sonqoyoq runakunata tarinapaq hukniraymanta predicaspa?