Escuela de Galaad nisqamanta 125

Lloqsimuq t’aqa misionerokunatan kallpachakun Jeremías hina kanankupaq

ESCUELA Bíblica de Galaad de la Watchtower nisqamanta 125 t’aqapi kaqkunata despedinapaqmi hatun huñunakuypi sumaq discursokunata ruwaranku, chaypin 6.156 iñiqmasinchiskuna huñukuranku 2008 watapi 13 setiembre killapi. Chaypin Umalliq T’aqamanta Geoffrey Jackson sutiyoq iñiqmasinchis llapa chaypi kaqkunata rimapayashaspa niran: “Wayqe panaykuna, manan hayk’aqpas piensaraykuchu kay t’aqakama chayaytaqa”, nispa. ¿Imaraykun chayta niran? Chay t’aqapiqa 56 iñiqmasinchiskunan karanku, paykunawanqa ñan 8.000 masña Galaad nisqa escuelamanta lloqsimuranku “kay pachaq k’uchunkunakamaraq” rinankupaq, chayraykun (Hech. 1:8).

Hermano Jacksonmi qallarichiran chay huñunakuyta, paymi chaypi kaqkunata niran: “Allin predicaqkuna kanaykichispaqqa confianapaq hinan kanaykichis. Chaypaqmi ichaqa tukuy sonqowan imatapas ruwanaykichis, allin ejemplo kanaykichis, ima yachachisqaykichispas Bibliamantapuni kanan, Jehová Diosmanta yachachispallataq kanaykichispas”, nispa.

Comité de Redacción nisqapi llank’aq David Schafer sutiyoq iñiqmasinchismi rimaran: “¿Atiwaqchischu llapanta entiendeyta?” nisqa discursomanta. Chaypin Galaad nisqa escuelamanta lloqsimuqkunata niran: “Sichus Jehová Diosta maskhashallankichis, allin yuyayniyoq hunt’aq kamachitapas kasukushallankichis chayqa, llapantan entiendenkichis allin misionero kanaykichispaq ima ruwanaykichista”, nispa (Pro. 28:5; Mat. 24:45).

Umalliq T’aqamanta John E. Barr iñiqmasinchismi rimaran: “Ama imawanpas t’aqachikusunchu Diospa munakuyninmantaqa”, nisqa discursomanta. Chay escuelamanta lloqsiqkunaqa yaqapaschá manchasqa kasharanku maymanchus kachasqa kanankumanta, chaypi imayna kawsanankumantawan; tayta mamankupas chhaynapaschá kasharanku. Chay discursota uyariqtinkuqa pisiyapuranchá manchakuyninku. Hermano Johnqa munakuq tayta hinan chaypi kaqkunata niran: “Diospa munakuyninpi kasun chayqa, kusisqallan kasun, manataq imapas imanawasunmanpaschu”, nispa. Arí, misionerokuna mana t’aqakunqakuchu Diospa munakuyninmanta chayqa, Diospas paykunataqa munakushallanqan.

Departamento de Escuelas Teocráticas nisqapi llank’aq Sam Roberson sutiyoq iñiqmasinchismi llapa chaypi kaqkunata niran: “Allin p’achamanta aswan munay p’achawan churakuychis”, nispa. Arí, paypa nisqan hina, mosoq misionerokunaqa churakunkumanmi “p’achawan hina Señor Jesucristowan”. ¿Imaynatan chayta ruwankuman? Jesuspa imayna kawsasqanta estudiaspa, yachachisqanman hina kawsaspa ima (Rom. 13:14). Chay qhepamantaq William Samuelson sutiyoq iñiqmasinchis nillarantaq: “Manan runakunaq imayna qhawariwasqanchischu allin respetana runaman tukuchiwanchis, aswanpas Diospa imayna qhawariwasqanchismi”, nispa.

Galaad nisqa escuelapi huknin yachachiqmi karan Michael Burnett, paymi wakin mosoq misionerokunata tapuran predicashaqtinku imakunachus pasasqanta willanankupaq. Galaad nisqa escuelaqa Patterson (Nueva York) nisqa llaqtapin kashan, chaypin chay mosoq misionerokunaqa predicaqku escuelallapiraq kashaspanku. Chay llaqtapiqa predicashallankun iñiqmasinchiskunaqa, chhaynaña kaqtinpas tarirankun allin uyarikuq runakunata. Oficina de Asambleas de Distrito nisqapi llank’aq Gerald Grizzle sutiyoq iñiqmasinchispas Escuela para Miembros de Comités de Sucursal nisqapi estudiaqkunamanta kinsa umalliqkunatan  tapuran misionero hina llank’ay imaynachus kasqanta willanankupaq. Chhaynapin chay mosoq misionerokunaqa yacharanku may llaqtamanña kachaqtinkupas imatachus ruwanankuta.

David Splane sutiyoq iñiqmasinchismi lloqsisqa 42 t’aqamanta, paymi kunanqa Umalliq T’aqamanta huknin, paymi rimaran “Jeremías hina kaychis” nisqa discursomanta. Jeremías manchakuranña Diosmanta rimayta chaypas, Jehová Diosmi paytaqa kallpacharan (Jer. 1:7, 8). Chhaynallatataqmi Diosqa kallpachanqa chay mosoq misionerokunatapas. Hermano Davidqa mosoq misionerokunatan niran: “Sichus mayqen hermanowanpas phiñachinarukunkichis chayqa, huk listapi qelqay chunka ima allinkuna ruwasqanchá anchata gustasunki chayta. Manachus chunkakama chayankichis chayqa, manaraqmi allintachu payta reqsinkichis”, nispa.

Jeremiasqa kikinta qonqakusparaqmi Jehová Diosta serviran. Pisipasharanña chaypas, payqa Jehová Diosmantan mañakuran kallpata, paytaqmi yanaparan (Jer. 20:11). Hermano Davidqa nillarantaqmi: “Sichus pisipashankichis chayqa, Jehová Diosman llapanta willakuychis. Chayta ruwaqtiykichisqa mana piensasqaykichista hinaraqmi payqa yanapasunkichis”, nispa.

Chay huñunakuy tukushaqtinmi llapankuta nikuran: “Kay escuelamanta lloqsiq mosoq misionerokunaqa, allintan yacharunku confianapaq hina kanapaq imakuna ruwanankuta”, nispa. Chay yachasqankuqa allintachá yanapanqa may rinanku llaqtapi allin willakuykunata allinta willanankupaq (Isa. 43:8-12).

[22 paginapi recuadro]

MOSOQ MISIONEROKUNAMANTA WILLAKUY

6 nacionkunamantan kanku

21 nacionkunamanmi rinqaku

56 iñiqmasinchiskunan kanku

Yaqa llapankun 32,9 watanpi kashanku

Yaqa llapankun 17,4 wata hinaña bautizasqa kashanku

Yaqa llapankun 13 wataña tukuy tiemponkuwan Diosta servisharanku

[23 paginapi foto]

Escuela Bíblica de Galaad de la Watchtower nisqamanta 125 lloqsimuq t’aqa

Kay listapiqa warmikunaq sutinmi ñawpaqta rikhurin, lloq’emanta pañamanmi yupakun.

1) Hodgson, A.; Wall, A.; Beerens, K.; Hortelano, M.; Newman, L.; De Caso, A. 2) Jenkins, J.; Jarzemski, T.; Méndez, N.; Corona, V.; Canalita, L. 3) Fryer, H.; Savage, M.; Tidwell, K.; Erickson, N.; Dyck, E.; McBeath, R. 4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. 5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. 6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. 7) Corona, M.; Wall, R.; Puse, S.; Méndez, F.; Jarzemski, S.; Savage, T. 8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. 9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.