¿Munasqaykiman hinallachu imatapas ruwayta munanki?
¿Munasqaykiman hinallachu imatapas ruwayta munanki?
YAQAPASCHÁ hayk’aqllapas rikuranki wawakunaq pukllasqanta, chaypin paykunaqa llakhi pukllashanku. Chayllamanmi hukninkaqqa pukllaqmasinta nin: “¡Ama llamiychu pukllanaytaqa, chayqa ñoqaqmi!”, nispa. Chhaynapunin runakunaqa kanchis, huch’uychanchismantapachan ñoqallanchispaq imatapas munanchis (Gén. 8:21; Rom. 3:23). Chaychá kay pachapi runakunaqa yaqa llapanku paykunallapaq imatapas munanku, hukkunatapas kallpachankun chhayna kanankupaq. Chayraykun cristianokunaqa kallpachakunanchis ama paykuna hina kananchispaq. Mana chayqa yaqapaschá hukkunata pantachisunman, chaymantapas Jehová Diosmantan karunchakusunman (Rom. 7:21-23).
Apóstol Pablon kallpachawanchis imayna kawsasqanchista allinta qhawarikunanchispaq. Paymi niran: “Runaqa ninmi: Tukuy imatapas munaspaqa ruwallaymanmi, nispa. Arí, hinapunin, ichaqa manan llapanchu allinninchispaq kanman. Runaqa ninmi: Tukuy imatapas munaspaqa ruwallaymanmi, nispa. Arí, hinapunin, ichaqa manan llapanchu iñiypi wiñachin”, nispa. Chayta nisqan qhepallamanmi nillarantaq: “Ama [pitapas] misk’achiychischu”, nispa (1 Cor. 10:23, 32). Chayrayku wakin ruwasqanchiskuna manaña huchachu kanman chaypas, cristianomasinchiskunarayku ¿kallpachakusunmanchu manaña chaykunata ruwananchispaq? Sasaña ima ruway munasqanchista cambiay kanman chaypas, ¿kallpachakusunmanchu Bibliaq nisqanman hina imatapas ruwananchispaq?
¿Imaynatan llank’ananchista akllakunanchis?
Runakunan ninku: “Ima llank’aytapas akllakullaymanmi ñoqaqa, manan chayqa pitapas imananpaschu”, nispa. Ichaqa, ¿chhaynapunichu chay kanman? Chaypaq yachasunchis huk llaqtachapi huk comerciantemanta. Paytaqa qolqepaq 2 Cor. 7:1). Tiempowantaq payqa cristianomasinchiskunawan kuska predicayta munaran, hinan huk umalliq payta munayllata niran: “¿Imaninkin llank’anaykimanta?” nispa. Chay runaqa unaytañan chay llaqtachapi cañamanta alcoholta vendespa llank’asqa. Chay alcoholqa imaymanapaqña allin kanman chaypas, chay llaqtachapiqa refrescowan tuparachispa tragota hina ukyanallankupaqmi rantikuqku.
pukllaqmanta, machaq runamantan reqsiqku. Ichaqa Jehová Diospa testigonkunawan Biblia estudiayta qallariqtinmi Diospa kamachisqanman hina kawsayta qallariran, chhaynapin kawsayninta cambiaran (Hinan chay runaqa sonqollanpi khaynata nisqa: “Sichus kay llaqtapi predicayman, alcoholtataq vendeshallayman chayqa, Jehová Dioswanchá mana allinpichu kayman, llaqtanmantapas manachá allintachu rimankuman”, nispa. Phisqaña wawankuna karan chaypas, payqa saqepuranmi chay llank’ananta, hinaspa huk cosaskunata vendeq kapuran. Chayta ruwasqanraykun paypas, señoranpas, iskay wawankunapas bautizakunkuña, tukuy sonqowantaq allin willakuykunata predicashanku, allin concienciayoqtaq kankupas.
¿Imaynatan amigonchiskunata akllananchis?
Wakin cristianomasinchiskunan ninku: “Manaña kay runa cristianomasiychu chaypas, huñukullaymanmi paywanqa”, nispa. ¿Cheqaqchu kanman chay nisqanku? ¿Imaninmi Biblia chaymanta? Chaypaq yachasunchis huk hermanamanta. Payqa huk fiestamanmi riyta munaran huk jovenwan, chay jovenmi ichaqa mana Jehová Diospa testigonchu karan. Rimapayarankuña chay fiestaman mana rinanpaq chaypas, payqa: “Ñoqamantan chayqa”, nispan mana kasukuspa risqapuni. Chay fiestapin ratulla refrescota payman haywasqaku puñuchiq drogayoqta. Rikch’aruqtinñan reparakusqa chay fiestaman pusaqnin runa payta violasqanta (tupachiy Génesis 34:2 textowan).
Mana iñiq runakunawan huñukuqtinchisqa manapaschá chay hermanata hinachu pasawasunman. Chhaynaña kaqtinpas Biblian niwanchis: “Yachayniyoqkunawan puriqqa yachayniyoqmi kapunqa, mana yuyayniyoqkunawan puriqmi ichaqa waqllipunqa”, nispa (Pro. 13:20). Arí, mana allin amigokunawan huñukuyqa mana allinninchispaqpunin. Chaymi Proverbios 22:3 texto nillantaq: “Yuyayniyoqqa mana allin kaqtan reparan hinaspan pakakun, pisi yuyayniyoqkunan ichaqa pasallanku hinaspan k’irisqa rikukapunku”, nispa. Chay textoq nisqan hina, mana allin runakunawan huñukuyqa Jehová Diosmantan karunchachiwasunman (1 Cor. 15:33; Sant. 4:4).
¿Imaynatan p’achakunanchis, allichakunanchis ima?
Runakunaq imayna p’achakuyninqa sapa kutinmi cambiashallan. Biblian ichaqa niwanchis imayna p’achakunanchista imayna allichakunanchistawan, chay nisqanqa manan hayk’aqpas cambianchu. Chaymi apóstol Pablo cristiana warmikunata niran: “Hinallataq munani warmikunapas allinta hap’iq p’achawan churakunankuta, iman 1 Tim. 2:9). Chayta nispaqa manan cristianokuna mana allin p’achawan, nitaq kaq p’achallawan p’achakunankumantachu rimasharan. Aswanpas iman p’achakunata hinalla allin yuyaywan p’achakunamantan payqa rimasharan.
p’achakunata hinalla”, nispa. Chay nisqanqa manan warmikunallapaqchu, qharikunapaqwanmi (Sichus munasqanchisman hinalla mana allin yuyaywan p’achakusunchisman chayqa, ¿nisunmanchu: “Iman p’achakunayta hinallan p’achakushani”, nispa? Imayna p’achakusqanchista rikuspa, ¿iskayankumanchu hukkuna cristiano kasqanchismanta? Ama pitapas pantachinanchispaqqa kasukunanchismi Filipenses 2:4 textoq nisqanta. Chaypin nin: “Ama pipas pay kikinpa allinnillantaqa maskhachunchu, aswanpas hukkunaq allinnintapas maskhallachuntaq”, nispa (2 Cor. 6:3).
¿Imaynatan negocionchista ruwananchis?
Apostolkunaq tiemponpin Corinto llaqtapi kaq wakin cristianokuna imaymana sasachakuykunapi tarikusharanku, chaymi apóstol Pablo niran: “Aswan allinmi mana chanin-kayta muchukuyqa, aswan allinmi qechupakuqkunaman qopuypas”, nispa. Arí, paykunapaqqa aswan allin kanman karan kaqninkunata qechuchikuymi cristianomasinkunata juezkunaman apashanankumantaqa (1 Cor. 6:1-7). Chay textoq nisqantan huk iñiqmasinchis allinta sonqonpi hap’ikuran, payqa Estados Unidos nacionmantan karan. Payqa huk cristianomasinpaqmi llank’aq, ichaqa manan allintachu rimanakusqaku hayk’atachus pagapunan karan chaymanta. Bibliaq nisqanman hinan paykunaqa askha kutita huñukuranku chayta allichapunankupaq, mana atikuqtintaq umalliqkunaman riranku (Mat. 18:15-17).
Chaykunataña ruwaranku chaypas, manapunin allichakuranchu. Chaymi chay llank’apakuq hermanoqa Diosmanta allinta mañakuran hinaspa niran: “Hina kapuchun, aswanpas niwasqanman hinallaña pagapuwachun”, nispa. ¿Imaraykun chayta niran? Pay kikinmi nillarantaq: “Manañan ganaswanñachu Diosta servisharani, Diospa munayninta ruwashanaymantaqa chayllapiñan tiempoytapas usuchisharani”, nispa. Chayta ruwaspañan chay hermanoqa kusisqa Jehová Diosta serviran, chaymantapas reparakuranmi chaykuna ruwasqanmanta Diospa yanapasqanta.
Imataña ruwaspapas hukkunaq allinnintaraqmi qhawarinanchis
Imaña kaqtinpas mana ñoqallanchispichu piensasun chayqa, llapanchispa allinninchispaqmi kanqa. Chaypaq yachasunchis huk hatun huñunakuypi ima pasasqanmanta. Chay huñunakuymanmi tutayllamanta risqa warmi qharintin precursorkuna; huñunakuna wasiman chayaspataq iskayninkupaq tiyanata hap’ikusqaku. Qallarishaqtinmi chayman chayasqaku askha wawakunayoq familia, hinaspan tiyana maskhayta qallarisqaku. Chayta reparaspan chay precursorkunaqa tiyanankumanta hatarisqaku chaypi chay familia tiyananpaq. Chay precursorkuna chayta ruwasqankuraykun chay familiaqa mana ch’eqerisqachu tiyaranku aswanpas huk hawallapi tiyaranku. Iskay kinsa p’unchay hinamantataq chay familiaqa chay precursorkunaman huk cartata apachisqaku. Chaypin nisqaku: “Tardeta chayamusqaykumantan llakisqa kasharayku chay p’unchaypi, ichaqa maytapunin kusikurayku tiyanaykichista qowasqaykichismanta, gracias”, nispa.
Chaypi rikusqanchis hina, imapiña tarikuspapas hukkunaq allin kanankutaraqmi ñawpaqtaqa qhawarinanchis. Arí, sichus mana imapas ñoqallanchispaq “kanantachu muna[sun]” chayqa, sumaqtan kawsakusunchis cristianomasinchiskunawan hinallataq huk runakunawanpas (1 Cor. 13:5). Chaykunamanta astawanqa Jehová Dioswanmi amigollantin kasunchis.
[20 paginapi foto]
¿Munasqanchisman hinallachu p’achakuyta munanchis?
[20, 21 paginakunapi foto]
¿Qowaqchu tiyanaykita hukkunaman?