Qosakuna, Cristo hina munakuq kaychis

WAÑUPUNAN tutan hunt’aq sonqo qatikuqninkunata Jesús niran: “Mosoq kamachikuytan churapuykichis: Qankunapura munanakuychis. Imaynan ñoqapas munakuykichis, ahinata qankunapas munanakuychis. Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:34, 35). Arí, cheqaq cristianokunaqa munanakunankun.

Qhepamantaq apóstol Pablo iñiq qosakunaman kayta qelqaran: “Qosakuna, esposaykichista munakuychis, imaynan Cristopas iglesiata [otaq iñiq t’aqata] munakuspa payrayku wañurqan hinata”, nispa (Efe. 5:25). ¿Imaynatan qosakuna hunt’ankuman chay textopi nisqanta, astawanqa warminku iñiq kaqtin?

¿Imaynatan Cristo iñiq t’aqata qhawariran?

Biblia nin: “Qosakunapas esposankutaqa munakunanku, kikinkuq cuerponkuta hina. Esposanta munakuqqa pay kikintan munakun. Manan pipas pay kikinpa cuerpontaqa hayk’aqpas cheqnikunchu, aswanpas mikhuchispanmi allinta uywan, imaynan Cristopas iglesiapaq ruwan hinata”, nispa (Efe. 5:28, 29). Jesusqa anchatan qatikuqninkunata munakuran, pantaq runakunaña karanku chaypas llamp’u sonqowanmi paykunata qhawariran. Hinaspapas allinkuna ruwasqankutan astawanqa qhawariran manan pantasqankutachu “ancha sumaq iglesiata pay kikinman qayllaykachinanpaq” (Efe. 5:27).

Imaynan Jesucristo qatikuqninkunata munakuran chay hinatan qosakunapas rimayninkupi ruwayninkupi rikuchinanku warminku munakusqankuta. Munakusqa warmiqa manan pisipaqchu qhawarikun kusisqataqmi tiyanpas. Pisichasqa mana sumaq qhawarisqa warmin ichaqa llakisqa tiyan sumaq wasiyoqña imaymanayoqña kashaspapas.

¿Imakunapin cristiano qosa rikuchinman warmin munakusqanta? Hukkunawanña kashanman chaypas respetowanmi rimaykunan, hatunchananmi ima ruwasqanmantapas. Allintan rimanan familianpa allinninpaq warminpa ruwasqanmanta, iskayllanku kaspapas munasqatan rikunan. Yaqapaschá huk qosa pisipaq hina qhawarinman warminwan asirikuyta, makin hap’iykuyta, marq’arikuyta, sumaq simikuna niytapas ichaqa chaykunan warminpa sonqonta kusichinqa.

“Mana p’enqakunchu paykunata ‘wawqe [panaykuna]’ niyta”

Jesucristoqa manan p’enqakuranchu hanaq pachapaq akllasqa qatikuqninkunata ‘wawqe [panaykuna]’ niyta (Heb. 2:11, 12, 17). Cristiana warmiyoq qosakuna, kaytan mana qonqanallaykichistaqchu: warmiykichisqa iñiqmasi panaykichismi. Cristiana kasqanmi aswan importante casarasqa warmi kasqanmantaqa. Arí, casarakusqaykichis qhepataña bautizakuran chaypas, Jehová Diosman qokushaspa paywan compromiso ruwasqanmi aswan importante qanwan compromiso ruwasqanmantaqa. Chaymi huñunakuykunapi kutichiyta munaqtinpas chay huñunakuyta apariq cristiano nin: “Panáy” nispa. Qanpapas panaykin iñiq t’aqa ukhupipas wasiykipipas. Chaymi maypiña kaspapas respetowan munakuywan qhawarinayki.

Iñiq t’aqapi umalli otaq umallikuna yanapaq kasqaykiraykun mayninpiqa tiempo mana aypasunkimanchu familiaykipaq.  Ichaqa umallikunawan otaq yanapakuq wayqekunawan yanapanakunkichis ruwanakunatapas allinta rakinakunkichis chayqa kanqan tiempoyki munasqa panaykita qhawarinaykipaq. Kayta ama qonqaychu, iñiq t’aqa ukhupi ruwanaykikunataqa mayqen iñiqmasinchispas ruwanmanmi, warmiykitan ichaqa qanlla yanapawaq.

Hinaspapas qanmi warmiykiq uman kanki. Biblian kayta nin: “Cristoqa llapa qhariq umanmi, qharitaq esposanpa uman”, nispa (1 Cor. 11:3). ¿Imaynatan hunt’awaq umalli kasqaykita? Munakuywan, manan ninaykichu, umalliykin kani, kasukuwanaykin, nispa. Aswanmi Jesús hina sumaqta qhawarinayki, chay ruwaymi aswan allinqa (1 Ped. 2:21).

“Amigoykunan kankichis”

Amigoykuna, nispan Jesusqa qatikuqninkunata niran. Kayta niran: “Manañan ‘kamachikuna’ nisqaykichischu, kamachiqa manan yachanchu patronninpa ima ruwasqantapas, aswanpas ‘amigoykuna’ nisqaykichismi, Yayaymanta lliw imaymana uyarisqayta qankunaman willasqayrayku”, nispa (Juan 15:14, 15). Paykunaqa sumaqtan parlanakuqku, kuskan imatapas ruwaqku. Huk kutinpas Caná llaqtapi casarakuqpatan riranku (Juan 2:2). Karanmi huñunakunanku cheqaskunapas, hukninmi karan Getsemaní huerta. Bibliaq nisqan hina chaypis “Jesusqa yachachisqankunapiwan sapa kuti huñukullaqpuni” (Juan 18:2).

Warmiqa munanmi qosan ancha munasqa amigata hina qhawarinanta. Chaymi kusikunapaq ruwaykunata kuska ruwanaykichis. Arí, kuska Jehová Diosta serviychis, kuska Bibliata estudiaychis, kuska mikhuychis, purikuq lloqsiychis, parlarikuychis. Ama warmi qhari hinallachu kawsaychis, aswanpas munanakuq amigontin hina kallaychistaq.

‘Tukukuykaman munakurqan’

Jesusqa ‘tukukuykaman munakurqan’ qatikuqninkunata (Juan 13:1). Wakin qosakunaqa manan Jesús hinachu munakuq kanku. Wakintaqmi ‘wayna kashaspa casarakuq-masin warmita’ wikch’unku aswan sipas warmiwan casarakunankupaq (Mal. 2:14, 15).

Wakin qosakunan ichaqa Willi sutiyoq qosa hina kallpachakunku Jesuspa yupinta qatikunankupaq. Paypa warminmi unay wataña onqon, chaymi necesitan allin cuidanata. Chaywanpas Willi kayta nin: “Reqsinakusqaykumantapachan warmichayta rikuni Diospa saminchayninta hina. Chhayna munaytan qhawarini. Hinaspapas soqta chunka wata ñawpaqtaraqmi prometerani allin tiempopipas sasa tiempopipas cuidanaypaq, chaytaqa hunt’asaqmi”, nispa.

Qosakuna, Jesús hina munakuq kaychis, sumaqta qhawariychis warmiykichista..., panaykichista..., amigaykichista.

[20 paginapi foto]

¿Aswan allin amigaykita hinachu warmiykita qhawarinki?

[20 paginapi foto]

‘Esposaykichista munakushallaychis’