Familiakuna Cristoq ejemplonta qatikuychis

‘Cristota [...] qhawarispanchis yupinta qatikusun.’ (1 PED. 2:21.)

1. a) ¿Imatan Churi ruwaran Taytan imaymanata kamashaqtin? b) ¿Imaynatan Jesús runakunata qhawarin?

JEHOVÁ DIOS hanaq pachata kay pachatawan kamaqtinmi phiwi Churin llank’aysiran. Paymi yanaparan animalkunata, sach’akunata kamaypi, hinallataq Edén huertata ruwaypipas, chaypi runakuna tiyanankupaq. Diospa Churin Jesusqa anchatan ‘runakunata’ munakuran (Pro. 8:27-31; Gén. 1:26, 27).

2. a) ¿Imatan Jehová Dios runakunaman qoran? b) ¿Imapin Bibliapi yuyaychaykuna yanapawasunman?

² Adán Evaq huchallikusqankumantapachan Jehová Diosqa munaranpuni runakunata huchamanta kacharichiyta, chhaynapi  munaynin hunt’akunanpaq. Chayraykun Jehová Diosqa Churinta kachamuran ñoqanchisrayku wañunanpaq (Rom. 5:8). Chaymantapas Diosqa Simin Qelqatan qowanchis, chhaynapi huchayoq runaña kashaspapas sumaq kusikuywan kawsananchispaq (Sal. 119:105). Bibliapi sumaq yuyaychaykunan yanapawanchis familiapi kusisqa kawsanapaq. Qosamanta rimaspan Genésis libro nin: “Warminman hukllachaykakapunqa huk aychallataq kapunqaku”, nispa (Gén. 2:24).

3. a) ¿Imatan Jesús yachachiran casadokunapaq? b) ¿Imakunatan kay estudiopi yachasun?

³ Kay Hallp’api kashaspan Jesús yachachiran casarakuy wiñaypaq kasqanta. Chaymantapas yachachiranmi casado kawsaypi, familiapipas kusisqa kawsanapaq imakuna mana ruwanamanta (Mat. 5:27-37; 7:12). Kay estudiopin qhawarisunchis imaynatas Jesuspa ejemplon yanapanman qosakunata, esposakunata, tayta mamakunata, wawakunatapas kusisqa kawsanankupaq.

Cristianoqa sumaqtan esposanta qhawarin

4. ¿Imapaqmi Jehová qosakunata Jesustapas churaran?

⁴ Diosqa qosatan churaran familiapi uma kananpaq imaynan Jesustapas congregacionpi Uma kananpaq churaran hinata. Apóstol Pablon niran: “Qosaqa warmiq umanmi, imaynan Cristopas llapa iñiq t’aqaq uman hina. Criston llapa iñiq t’aqaq qespichiqninqa, chay iñiq t’aqan paypa cuerpon. Qosakuna, warmiykichista munakuychis, imaynan Cristopas llapa iñiq t’aqata munakuspa paykunarayku wañurqan hinata”, nispa (Efe. 5:23, 25, Edición 1988). Qatikuqninkunata sumaqta tratasqanwanmi Jesusqa allin ejemplota churaran qosakuna esposankuta sumaqta tratanankupaq. Qhawarisunchis imaynas Jesús karan Umalliq kasqanpi.

5. ¿Imaynatan Jesús qatikuqninkunata trataran?

⁵ Jesusqa “llamp’ulla, huch’uyyaykukuq sonqoyoq[mi]” karan (Mat. 11:29). Ima ruwanantapas payqa hunt’aqpunin (Mar. 6:34; Juan 2:14-17). Yuyaychanan kaqtinqa, sumaqllatan qatikuqninkunata yuyaycharan (Mat. 20:21-28; Mar. 9:33-37; Luc. 22:24-27). Ichaqa manan hayk’qpas paykunata pisicharanchu nitaq k’amiranchu. Nitaqmi ima ruwasqanwanpas paykunata mana munakusqantaqa rikuchiranchu, manataqmi yuyaykuranchu kamachikuyninkunata mana hunt’ayta atinankupaq. Aswanpas sumaq runa kasqankuta qhawarispan kallpacharan (Luc. 10:17-21). Munakuq khuyapayakuq kasqanraykun, qatikuqninkunaqa payta respetaranku.

6. a) ¿Imatan qosakuna yachankuman qatikuqninkunata Jesús imayna tratasqanmanta? b) ¿Imatan Pedro yuyaychan qosakunata?

⁶ Qatikuqninkunata Jesús imayna tratasqanmantan cristianokunaqa yachanku esposankuta mana maltratanankuta. Aswanpas respetowan munakuywanmi tratananku, chaymantapas paykunallapi piensanankumantaqa esposankuq allinnintan ñawpaqta qhawarinanku. Apóstol Pedron qosakunata yuyaycharan, imaynan Jesuspas munakuywan  sumaqta hukkunata trataran ‘kaqllatataq’ paykunapas esposankuta tratanankupaq (leeychis 1 Pedro 3:7). ¿Imaynatan qosa umallinman esposanta mana pisichaspa?

7. ¿Imaynatan huk cristiano esposanta sumaqta tratanman? Willay imaynata chayta ruwanman.

⁷ Cristiano qosaqa esposanta sumaqta tratasqantan rikuchinman esposan imayna yuyaykusqanta imayna sientekusqanta qhawarispa, familianpaq manaraq imatapas decidishaspa. Yaqapaschá chayta ruwanman huk llank’anata maskhanan kaqtin, familian huk wasiman astakunan kaqtinpas. Otaq vacacionpi kaspa mayta rinankupaq, imaymana wichaqtinpas qolqenkuq aypasqanman hinalla imatapas rantinankupaq. Chaykunamanta esposanwan rimanakuspaqa respetasqantan rikuchinqa, chhaynapin qosaqa allinta decidinqa esposantaq sumaqta yanapanqa (Pro. 15:22). Esposanta sumaqta trataq cristianoqa esposanwanmi munachikunqa respetachikunqa ima, astawanqa Jehová Diospa favornintan chaskinqa (Efe. 5:28, 29).

Cristianaqa anchatan qosanta respetan

8. ¿Imaraykun Eva mana allin ejemplochu?

⁸ Jesusqa anchatan Taytanta respetaran, chhaynatan esposakunapas qosankuta respetananku. Evan ichaqa mana kasukuq karan. Payqa manan allin ejemplochu karan llapa warmikunapaq. Jehová Diosqa Adantan churaran familianpi uma kananpaq, paywan kamachikuyninkunata familianman qonanpaqpas. Evan ichaqa Adanman Diospa nisqanta mana kasukuranchu (Gén. 2:16, 17; 3:3; 1 Cor. 11:3). Mach’aqwayña Evata engañaran chaypas, payqa qosantaraqmi ñawpaqta tapukunan karan, chay mach’aqwaypa nisqan cheqaqchus karan icha manachus chayta yachananpaq. Chayta ruwananmantaqa, paymi Adanpa rantinpi decidiran (Gén. 3:5, 6; 1 Tim. 2:14).

9. ¿Imaraykun Jesuspa kasukusqan allin ejemplo?

⁹ Jesusmi ichaqa mana chhaynachu karan, Taytanpa munasqanman hinapunin imatapas ruwaran, chhaynapin allin ejemplota saqewaranchis. Payqa “manan Dioswan igualchu kayta munaran, aswanmi hanaq pachapi sumaq kawsayninta saqespa, runa hina naceran kamachi runa hina kananpaq” (Fili. 2:5-7, NM). Kunanqa Reyña kaspapas huch’uyaykukuspan Taytanta kasukushallan (Mat. 20:23; Juan 5:30; 1 Cor. 15:28).

10. ¿Imaynatan cristiana rikuchinman qosanta kasukusqanta?

¹⁰ Cristianaqa Jesús hinan kanan, qosantan kasukunan (leeychis 1 Pedro 2:21; 3:1, 2). Tayta mama permisota qonanku kaqtin, ¿imatan cristiana ruwanan wawan paymanta permisota mañakuqtin? Wawantan tapunan sichus taytanmanta permisota mañakuranña chayta. Sichus mana mañakuranchu chayqa, cristianaqa qosanwanmi rimanan hinaspa iskayninku decidinanku. Qosanpa nisqanta mana  allinpaqchu qhawariqtintaq iskaynillankun chaymanta rimananku. Manan hayk’aqpas wawanpa ñawpanpiqa qosanpa nisqan contra rimananchu (Efe. 6:4).

Jesusqa allin ejemplon tayta mamakunapaq

11. ¿Imaraykun Jesús tayta mamakunapaq allin ejemplo?

¹¹ Manaña Jesús casadochu wawayoqchu karan chaypas, allin ejemplon tayta mamakuna wawankuta uywanankupaq. ¿Imarayku? Qatikuqninkunata pacienciawan munakuywan ima yachachisqanrayku. Yachachiranmi imaynata allin willakuykunata predicanankupaq (Luc. 8:1). Imayna tratasqanwanmi yachachiran paykunapura imayna tratanakunankuta (leeychis Juan 13:14-17).

12, 13. ¿Imatan tayta mamakuna ruwananku wawankuq sonqonpi Diospa kamachikuyninta churanankupaq?

¹² Wawakunaqa tayta mamankumantan yachanku allintapas mana allintapas. Chayraykun tayta mamakunaqa tapukunanku: “¿Ima ejemplotan wawanchiskunaman qonchis? ¿Hayk’a tiempon televisionta qhawashanchis kusirikuykunapipas purishanchis? ¿Hayk’a tiempon predicanchis Bibliatapas estudianchis? ¿Imataraqmi ñawpaqta ruwanchis familia hina? ¿Espiritual ruwaykunataraqchu ñawpaqman churanchis? ¿Chaytachu ima decidisqanchispas rikuchin?” nispa. Tayta mamakuna wawankuta Dios kasukuyta yachachinankupaqqa, Dios kasukuymi ñawpaqtaqa paykunaq sonqonpi kanan (Deu. 6:6).

¹³ Sichus tayta mamakuna kallpachakunqaku Bibliaq nisqanta kasukunankupaq chayqa, chaytan wawakuna reparanqaku hinaspa tayta mamankuq nisqanta kasukunqaku. Ichaqa sichus tayta mamakuna mana yachachisqankuman hinachu kawsanqaku chayqa, wawankupas manan chaninpaqchu Bibliaq kamachisqanta qhawarinqaku. Chhaynapin wawakunaqa facilllata mana allin ruwaykunaman urmankuman.

14, 15. ¿Imapaqmi tayta mamakuna wawankuta kallpachananku, imaynatan chayta ruwankuman?

¹⁴ Cristiano tayta mamakunaqa yachankun wawankuta uywanankupaq mana p’achallatachu, mikhunallatachu nitaq qolqellatachu qonankuta. Chayrayku, manan allinchu wawakunata qolqe maskhayllapi purinankupaq kallpachayqa (Ecl. 7:12). Jesusqa qatikuqninkunatan yachachiran Diospa Reinonta ñawpaqta maskhanankupaq (Mat. 6:33). Tayta mamakunaqa Jesuspa yupinta qatikuspan wawankuta kallpachananku Dios serviypi allin metakunata churakunankupaq.

¹⁵ Tayta mamakuna wawaykichismanmi aswan allinta reqsichiwaqchis tukuy tiemponkuwan Diosta serviq hermanokunata. Wayna sipastaqa anchatan kallpachanman precursorkunata, iñiq t’aqata watukuq umalliqta esposantawan aswan allinta reqsiy. Misionerokuna, betelitakuna, huk nacionkunamanta construccionpi llank’aq hermanokunapas ancha kusikuywanmi rimanku Jehová Diosta  servisqankumanta. Imaymanatachá paykunaqa wayna sipaskunaman willankuman. Chay iñiqmasinchiskuna Diosta servinankupaq kallpachakusqankun wayna sipaskunataqa yanapanman allinta imatapas decidinankupaq, espiritual metakunata churakunankupaq, tukuy tiempowan Diosta servinankurayku imata estudianankupaqpas.

Wawakuna Jesuspa ejemplonta qatikuychis

16. ¿Imaynatan Jesús Joseta, Mariata hanaq pachapi Taytantapas respetaran?

¹⁶ Wayna sipas, Jesusqa allin ejemplon qanpaqpas. Payqa kasukullaqpunin tayta maman Joseta, Mariatapas (leeychis Lucas 2:51). Huchayoq runaña karanku chaypas Diosmi paykunamanqa encargaran Churinta uywanankupaq, chayraykun Jesusqa paykunata respetaran (Deu. 5:16; Mat. 15:4). Kuraqña kaspataq Jesusqa hanaq pachapi Taytanpa munayninman hinapuni kawsaran, manataqmi hayk’aqpas tentacionkunaman urmaranchu (Mat. 4:1-10). Qanrí, ¿imatan ruwanki tayta mamaykita mana kasunaykipaq sonqoyki aysasuqtiyki? ¿Imaynatan Jesuspa ejemplonta qatikuwaq?

17, 18. a) ¿Ima sasachaypin wayna sipaskuna estudiasqankupi tarikunku? b) ¿Iman paykunata yanapanqa pruebakunata aguantanankupaq?

¹⁷ Estudiaq masiykikunaqa manachá Bibliamanta imatapas yachayta munanqakuchu. Yaqapaschá kallpachasunkiku mana allin ruwaykunata ruwanaykipaq, mana munaqtiykitaq qanmanta burlakunqaku. ¿Imatan ruwanki paykunata mana kasusqaykirayku k’amisuqtiyki? Yuyariy, sichus paykunaq munasqanta ruwanki chayqa, llakichinkin tayta mamaykita, Jehová Diostapas. Chaymantapas, ¿imaynapin tarikuwaq paykunaq ruwasqanta hina ruwaspayki? Munashankipaschá precursor, betelita, siervo ministerial kayta; otaq munashawaq huk llaqtakunapi pisilla predicaqkunaq kasqanpi yanapakuyta. ¿Aypawaqchu chaykunaman compañeroykikunawan amistadta ruwaspa?

¹⁸ Wayna sipas, sichus ima sasachaypas iñiyniykita pruebaman churanqa chayqa, yuyariy Jesuspa ejemplonta. Payqa manan hayk’aqpas mana allinkunaman urmaranchu, aswanpas iñiyninpi qaqa sayaspan allin ruwasqanta respetachiran. Chayta yuyariymi kallpachasunki compañeroykikuna mana allin ruwaykunaman tanqasuqtiyki, manan ninaykipaq. Jesús hina yuyaykuy, Jehová Diosta kasukuspa payta serviqtiykiqa wiñaypaq kusisqa kanaykipi (Heb. 12:2).

¿Iman familiata yanapanman kusisqa kawsananpaq?

19. ¿Imatan ruwananchis familiapi kusisqa kawsananchispaq?

¹⁹ Jehová Dioswan Jesuswanqa runakunaq allinnintan munanku. Huchayoq runakunaña kanchis chaypas, atisunmanmi kusisqa kawsayta (Isa. 48:17, 18; Mat. 5:3). Jesusqa manan kusisqa kawsanapaq imachus necesitakusqallantachu yachachiran, rikuchiranmi imaynatas aswan allinta kawsasunman chaytapas. Payqa allin ejemplotan saqeran Diosta servispa kawsaymanta. Chayrayku familiapiqa lliw qatikunanchis ejemplonta. Chhaynaqa qosakuna, esposakuna, tayta mamakuna, wawakuna, ¡qatikusunchis Jesuspa ejemplonta! Sichus yachachisqanman hina kawsasun ejemplontapas qatikusun chayqa, kusisqan familiapi kawsasunchis.

¿Imaynatan kutichiwaq?

• Familiapi umalliq qosakuna, ¿imaynatan esposankuta tratananku?

• Esposakuna, ¿imaynapin Jesús hina kawaqchis?

• ¿Imatan tayta mamakuna yachankuman Jesús qatikuqninkunata imayna tratasqanmanta?

• Wayna sipaskuna, ¿imatan Jesusmanta yachawaqchis?

[Tapuykuna]

[8 paginapi foto]

¿Imatan qosa ruwanan familianpaq imatapas decidinan kaqtin?

[9 paginapi foto]

¿Imaynatan Cristiana rikuchinman qosanpa nisqanta respetasqanta?

[10 paginapi foto]

Wawakunaqa tayta mamankuq allin ruwasqantan ruwanku