Jesús hina munakuywan yachachisun
Jesús hina munakuywan yachachisun
“¡Manan hayk’aqpas chay runa hinaqa pipas rimarqanchu!” (JUAN 7:46.)
1. ¿Imanirankun runakuna Jesuspa yachachisqanta uyarispanku?
¡IMA munaychá karan Jesuspa yachachisqanta uyariyqa! Biblian willawanchis imaynata runakuna Jesuspa yachachisqanta uyarisqankuta. Nazaret runakunamantan Lucas qelqa nin: “Sumaq simikunata rimaqta uyarispan musphaspa [admirakuspa] Jesusmanta llapallanku allinta rimarqanku”, nispa. Orqo Patapi yachachikuyninta uyarisqankumantan Mateo nin: “Runakunaqa yachachikuyninmanta muspharqanku”, nispa. Apóstol Juanpa nisqanman hinan Jesusta presota hap’iyta munaq guardiakunapas kayta nisqaku: “¡Manan hayk’aqpas chay runa hinaqa pipas rimarqanchu!” nispa (Luc. 4:22; Mat. 7:28; Juan 7:46).
2. ¿Imaynatan Jesús yachachiq?
2 Chay guardiakunaqa chanillantan rimasharanku. Tukuy tiempopipas manan pipas Jesús hina allin yachachiqqa karanchu. Payqa entiendey atiyllatan yachachiran, manataqmi pipas yachachisqanmantaqa niranchu manan allintachu yachachishanki nispaqa. Yuyaymanachinanpaq hinan tapuykunata ruwaq, sumaq rikch’anachiykunawantaq yachachiq. Uyariqninkuna entiendenankupaq hinan yachachiq, chhaynapin qhapaqkunaq wakchakunaq sonqonman chayaq. Sasa entiendey yachachikuykunata yachachiqtinpas facilllatan entiendeqku. Ichaqa, ¿chhaynata yachachisqanraykullachu Jesús aswan allin yachachiq karan?
Munakuymi aswan importanteqa
3. ¿Imaraykun Jesús hukniray karan religión umalliq yachachiqkunamanta?
3 Escribakunamanta fariseokunamantapas askhachá karanku yachayniyoq allin yachachiq runakuna. Chhaynaqa, ¿imaraykun Jesús paykunamanta hukniray yachachikuq karan? Ñawpaqkaqpi, chay umalliq religiosokunaqa manan runakunata munakuqkuchu, aswanpas pisichaspankun “ñakasqa” runakunata hina qhawariqku (Juan 7:49). Jesusmi ichaqa anchata runakunata khuyapayaran, paykunatan “rikurqan mana michiqniyoq ovejakunata hina wikch’usqata, ch’eqechisqata”; chaymantapas payqa sumaq sonqo munakuq runan karan (Mat. 9:36). Iskaykaqpi, religión umalliqkunaqa manan Diosta munakurankuchu (Juan 5:42). Jesusmi ichaqa anchata Taytanta munakuran kusikuywantaq munayninta ruwaran. Kinsakaqpi, chay runakunaqa allinninkupaq kallaqtinmi Bibliapi kamachikuykunata hunt’aqku, Jesusmi ichaqa anchata valoraran “Diospa siminta”, chayraykun yachachiran, entiendechiran, respetachiran, chayman hinataq kawsaranpas (Lucas 11:28). Arí, Jesusqa imaymanapin munakuyta rikuchiran: rimasqanpi, runakunata imayna tratasqanpi, imayna yachachisqanpi ima.
4, 5. a) ¿Imaraykun munakuywan yachachinanchis? b) ¿Imaraykun yachachinanchispaq Bibliata entiendenanchis yachananchistaq imayna yachachiyta?
4 Cristianokunaqa tukuy ruwasqanchispin allin yachachiq Jesucristota qatikunanchis (1 Ped. 2:21). Chayrayku Bibliamanta yachachispaqa mana yachachiyllachu yachachinanchis, kallpachakunallanchistaqmi Jehová Diosman rikch’akunanchispaq, astawanqa munakuyninpi. Askhataña otaq pisitaña Bibliamanta yachasunchis, allin yachachiqña kasunchis otaq manaña chaypas, munakuymi yanapawasun runakunaq sonqonman chayananchispaq. Arí, allin yachachiq kananchispaqqa Jesús hinan munakuywan yachachinanchis.
5 Allin yachachiq kananchispaqqa Bibliamantan yachananchis, chaymantapas yachananchismi imayna yachachiyta. Jesusqa yanaparanmi qatikuqninkunata chay iskaynin ruwaykunata hunt’anankupaq, ñoqanchistataq kay tiempopi Jehová Dios llaqtanwan yanapawanchis (leeychis Isaías 54:13, Lucas 12:42). Chaywanpas, yachachispaqa manan umanchispi yachasqallanchismantachu yachachinanchis, tukuy sonqowanmi yachachinallanchistaq. Sichus Bibliata allinta entiendesun, yachasun imayna yachachiyta, munakuywantaq yachachisun chayqa, ancha allinpin yachachisqanchis tukunqa. Ichaqa, ¿imaynatan munakuywan yachachisunman? ¿Imaynatan Jesuspas qatikuqninkunapas munakuywan yachachiranku?
Jehová Diosta munakuy
6. ¿Imaynatan rimanchis munakusqanchis runamanta?
6 Imatapas valoranchis chayqa kusikuywanmi chaymanta rimanchis, chaytaqa hukkunapas reparankun. Chaymi astawanqa suceden munakusqanchis runamanta rimaqtinchis. Imaynachus chay runa kasqanmanta hukkuna yachanankutan munanchis. Paymanta rimaspaqa allillantapunin rimanchis, pipas paymanta mana allinta rimaqtintaq manan chhaynachu ninchis. Llapanku ñoqanchis hina munakunankutan munanchis.
7. ¿Imatan Jesús ruwaran Diosta munakusqanrayku?
7 Manaraq hukkunaman Jehová Dios munakuyta yachachishaspaqa ñoqanchisraqmi allinta reqsinanchis hinaspa anchata munakunanchis. Hinaspapas Diostaqa yupaychanchis payta munakusqanchisraykun (Mat. 22:36-38). Chaypaqmi Jesús allin ejemplota saqewaranchis, payqa tukuy sonqonwan, almanwan, yuyayninwan, kallpanwan iman Diosta munakuran. Jesusqa waranqa waranqa watan Taytanwan hanaq pachapi tiyaran, chaymi allinta reqsispa anchata munakuran. Pay kikinmi niran: ‘Yayatan munakuni’, nispa (Juan 14:31). Dios munakusqantan rikuchiran tukuy ima rimasqanpi ruwasqanpi ima, chayraykun Diospa munayninman hina kawsaran (Juan 8:29). Chaymantapas Diosta munakusqanraykun iskay uya religiosokunaq mana allin ruwasqankuta sut’iman orqoran. Chaymi kallpachallarantaq Jehová Diosmanta rimananpaq, chayraykun runakunatapas yanaparan Diosta reqsispa payta munakunankupaq.
8. ¿Imatan Jesuspa qatikuqninkuna ruwaranku Diosta munakusqankurayku?
8 Ñawpa cristianokunapas anchatan Jehová Diosta munakuranku, chaymi paykunataqa kallpacharan mana manchakuspa kusikuywan allin willakuykunata predicanankupaq. Anchataña religión umalliqkuna hark’aranku chaypas, Jerusalén llaqtantintan predicaranku. Paykunaqa manan upallakuyta atirankuchu imachus rikusqankumanta uyarisqankumantapas (Hech. 4:20; 5:28). Yacharankun Jehová Diospa yanapasqan kasqankuta bendicionnin chaskinankutapas, chayta yuyaykuspaqa manan pantarankuchu. Jesuspa wañusqanmanta manaraq kinsa chunka wata hunt’akushaqtinmi, apóstol Pablo allin willakuykuna predicakusqanmanta niran: “Kay pachantinpi runakunaman willasqa kashan”, nispa (Col. 1:23).
9. ¿Imatan ruwasunman Diosta astawan munakunanchispaq?
9 Ñoqanchispas allin yachachiq kananchispaqqa, kallpachakunanchismi sapa p’nchay Jehová Diosta astawan munakunanchispaq. ¿Imaynatan chayta ruwasunman? Mañakuypi sapa kutilla Jehová Dioswan rimaspanchis, Simin Qelqata, huk qelqanchiskunatawan leespa, huñunakuykunaman rispapas. Aswan allinta Diosta reqsispaqa astawanmi munakusunchis. Sichus rimasqanchiswan ruwasqanchiswan Dios munakusqanchista rikuchisun chayqa, hukkunapas reparanqakun chayta, hinaspa paykunapas Diosta reqsiyta munanqaku (leeychis Salmo 104:33, 34).
Valorananchismi yachachisqanchista
10. ¿Imatan ruwan huk allin yachachiq?
10 Allin yachachiqqa kusikuywanmi yachachin; anchatan valoran imatachus yachachisqanta manataqmi chaykunamanta iskayanchu. Chayta rikuspan alumnonkunapas kusikuywan yachanqaku. Payqa yachanmi yachachisqanta mana valoraqtinqa alumnonkunapas mana valoranankuta. Ama hayk’aqpas qonqasunchu Diospa Simin Qelqamanta yachachiqkuna hina allin ejemplota qosqanchispi, Jesusmi niran: “Yachachisqaqa [...] astawan yachaspaqa yachachiqnin hinan kanqa”, nispa (Luc. 6:40).
11. ¿Imaraykun Jesús anchata valoraran yachachisqanta?
11 Jesusqa anchatan valoraran yachachisqanta. Payqa yacharanmi yachachisqan Taytanmanta cheqaq yachachikuy, ‘Diospa siminkuna’, ‘wiñay kawsay simikuna’ kasqanta (Juan 3:34; 6:68). Yachachikuyninqa k’anchay hinan karan allinkaqta mana allinkaqmanta reparanapaq. Saqraq ñak’arichisqan runakunata, umalliq religiosokunaq engañasqan runakunatapas consolaranmi sumaq suyakuytataq qoran (Hech. 10:38). Cheqaq yachachikuyta valorasqanqa manan yachachisqallanpichu rikukuran, chaytaqa tukuy ima ruwasqanpipas rikukuranmi.
12. ¿Imaynatan Pablo qhawariran allin willakuykunata?
12 Imaynan Jesús yachachisqanta valoraran, chhaynatan qatikuqninkunapas Jehová Diosmanta Cristomantawan cheqaq yachachikuyta anchata valoraranku. Chayraykun enemigonkunapas paykunataqa mana upallachiyta atirankuchu. Roma cristianokunamanmi Pablo niran: “Maytapuni munashani allin willakuykunata [...] willayta. Jesucristomanta allin willakuykunamantaqa manan p’enqakunichu. Chay willakuykunaqa Diospa atiyninmi, llapallan iñiqkuna qespichisqa kananpaq”, nispa (Rom. 1:15, 16). Apostolqa ancha allinpaqmi qhawariran allin willakuykuna willayta. Kaytan niran: “Manataqmi imaraykupas kawsayniytaqa ñoqa kikiypaq ancha chaniyoqpaqchu qhawarikuni, aswanpas kayllatan munani: Señor Jesusmanta chaskisqay llank’anata kusikuywan tukuyllatapuni. Kay llank’anaqa Diospa khuyapayakuyninmanta allin willakuykunata willanaymi”, nispa (Hech. 20:24) Nillarantaqmi: ‘Llapa iñiqkunamanta aswan huch’uylla kashaqtiypas ñoqatan Diosqa ancha khuyapayakuyninpi churawaran mana judío runakunaman Cristomanta ancha valorniyoq willakuykunata willanaypaq’, nispa (Efe. 3:8, NM). Pabloqa ancha kusikuywanchá runakunaman Jehová Diosmanta imachus ruway munasqanmantawan yachachiran.
13. ¿Imaraykun allin willakuykunata ancha valorniyoqpaq qhawarinchis?
13 Bibliapi tarikuq allin willakuykunaqa yanapawanchismi Kamaqninchista reqsinanchispaq paywan amigontin kananchispaqwan. Importante tapuykunamanmi kutichiykunata qowanchis, yanapawanchismi Diospa munasqanman hina kawsananchispaq, sumaq suyakuytan qowanchis, sasachakuykunapi tarikuqtinchispas kallpachawanchismi. Chaymantapas yanapawanchismi wiñay kawsayman aypananchispaq. Chay willakuykunaqa ancha allinmi ima noticiamantapas. Chay regalokunaqa mana precioyoqmi, anchatataqmi kusichiwanchis. ¡Maytan kusikunchis chay sumaq willakuykunata hukkunaman willaspa! (Hech. 20:35.)
14. ¿Imakunatan ruwasunman allin willakuykunata astawan valorananchispaq?
14 ¿Imatan ruwawaq allin willakuykunata astawan valoranaykipaq? Bibliata leeshaspayki kallpachakuy yuyaymananaykipaq. Yuyaymanawaqmi Jesuswan kuska predicashasqaykipi otaq apóstol Pablowan viajashasqaykipi. Yuyaykuy paraisopiñapas kashawaq hinata chaypi ancha sumaq kawsay kasqanpiwan. Chaymantapas yuyaymanay kasukuq kasqaykirayku bendicionkuna chaskisqaykipi. Kayta ama qonqasunchu, allin willakuykunata valorasun chayqa, Bibliata estudiachisqanchiskunan chayta reparanqaku. Chayraykun kallpachakunanchis yachasqanchispi yuyaymanananchispaq imaynatachus yachachishasqanchista qhawarinanchispaqpas (leeychis 1 Timoteo 4:15, 16).
Runakunata munakuy
15. ¿Imaraykun yachachiq munakunan yachachisqankunata?
15 Allin yachachiqqa kallpachakunmi sumaqta yachachinanpaq, chhaynapi alumnonkunapas yachayta munanankupaq imachus piensasqankumanta rimanankupaqpas. Sonqomantan yachachisqankunapi interesakun, entiendesqankuman, necesitasqankuman hinan yachachin, qhawarintaq imaynapi tarikusqankuta. Sichus yachachiq sonqomanta yachachisqankunata munakun chayqa, paykunaqa reparanqakun chayta. Chhaynapin yachachiqqa kusikuywan yachachinqa, yachachisqankunataq kusikuywan yachanqaku.
16. ¿Imaynatan Jesús rikuchiran runakuna munakusqanta?
16 Jesusqa sonqomantan runakunata munakuran. Ancha munakuynintan rikuchiran runakuna qespichisqa kanankupaq wañusqanwan (Juan 15:13). Predicashaspapas rikuchiranmi munakuyninta. Payqa yanaparanmi runakunata imachus necesitasqankupi astawanqa Jehová Diosmantan yachachiran. Payman hamunankuta suyakunanmantaqa karutan puriran allin willakuykunata predicananpaq (Mat. 4:23-25; Luc. 8:1). Chaymantapas pacienciayoq llamp’u sonqon karan. Qatikuqninkuna imatapas mana allinta ruwaqtinkuqa munakuywanmi aconsejaq (Mar. 9:33-37). Jesusqa sut’itan qatikuqninkunaman rikuchiran paykunapas allin predicaq kanankupi confiasqanta, chayqa anchatachá paykunata kallpacharan. Manan hayk’aqpas Jesús hina ancha munakuq yachachiqqa karanchu. Sumaq sonqo kasqanwanmi payqa qatikuqninkunawan munachikuran, kamachikuyninkunata kasukunankupaqpas kallpacharan (leeychis Juan 14:15).
17. ¿Imaynatan Jesuspa qatikuqninkuna rikuchiranku runakuna munakusqankuta?
17 Jesuspa qatikuqninkunapas chhaynatan munakuranku predicasqanku runakunata. Allin willakuykunata predicanankurayku, hukkunata servinankurayku iman listo kasharanku qatiykachaykunata ñak’arinankupaq wañuyta tarinankupaqpas. ¡Maytan munakuranku yanapasqanku runakunata! Chaytan apóstol Pablopas ruwaran, paymi niran: “Qankuna ukhupi llamp’u sonqo karqayku, imaynan mamaqa ñuñuq wawanta sumaqta uywan hinata. Qankunataqa anchatapunin munakuykiku, chayraykun mana Diosmanta allin willakuykunallatachu willayta munarqaykiku, aswanpas kikin kawsayniykutawanmi qoyta munarqayku, ancha munasqa ñoqaykupaq kasqaykichisrayku”, nispa (1 Tes. 2:7, 8).
18, 19. a) ¿Imaraykun kallpachakunchis predicananchispaq? b) ¿Imaynatan yachanchis munakusqanchista runakuna reparasqankuta? Willay ejemplota
18 Kunanpas Jehová Diospa testigonkunaqa pachantinpin allin sonqoyoq runakunata maskhashanchis Diosta reqsispa servinankupaq. 17 watañan mil millones más horakunata sapa watan predicashanchis Bibliamantapas estudiota qoshanchis. Tiemponchista, kallpanchista, kaqninchiskunataña qonchis chaypas, kusikuywanmi chayta ruwanchis. Jehová Taytanchisqa maytan munan wiñay kawsayman apaq yachayta runakuna yachanankuta, chaytan ñoqanchispas Jesús hina yachanchis (Juan 17:3; 1 Tim. 2:3, 4). Munakuq kasqanchisraykun runakunata yanapanchis Diosta reqsinankupaq ñoqanchis hina anchata munakunankupaqpas.
19 Runakunaqa reparankun munakusqanchista. Estados Unidospi tiyaq precursoran, cartakunata qelqaq familianku wañupuqtin llakikuypi tarikuqkunata kallpachananpaq. Huk kutinmi carta qelqasqanmanta kutichiyta chaskisqa, chaypin nisqa: “Qallariypiqa admirakuranin mana reqsisqayki runaman llakikuypi tarikushaqtin kallpachanaykipaq carta qelqasqaykimanta. Ichaqa repararanin runakunata Diosta ima anchata munakusqaykirayku qelqasqaykita”, nispa.
20. ¿Imaraykun kallpachakunanchis munakuywan yachachinanchispaq?
20 Sichus pipas munakuywan imatapas ruwan yachantaq imayna ruwayta chayqa, allinpin ruwasqanqa tukunqa. Yanapananchismi yachachisqanchis runakunata Jehová Diosta allinta reqsinankupaq munakunankupaqpas. Yachasqanchis hina, allin yachachiq kananchispaqqa Diosta runakunata iman munakunanchis, Diosmanta yachachikuykunatapas valorananchismi. Sichus kallpachakusun chaykunata ruwananchispaq predicaspanchispas chayta rikuchisun chayqa, manan hukkunata yanapasqallanchismantachu kusikusun, chaymantapas kusikusunmi Jesús hina allin yachachiq kasqanchismanta Diospa sonqonta kusichisqanchismantapas.
¿Imaynatan kutichiwaq?
• Bibliamanta yachachispa, ¿imaraykun . . .
. . . Diosta munakuna?
. . . yachachisqanchista valorananchis?
. . . runakunata munakunanchis?
[Tapuykuna]
[15 paginapi dibujo]
¿Imaraykun Jesús escribakunamanta fariseokunamantapas aswan allin yachachiq karan?
[18 paginapi foto]
Allin yachachiq kananchispaqqa munakuywanmi sumaqta yachachinanchis