Jesús hina valorwan predicasun

“Mana mancharispa Diospa allin willakuyninkunata willarqaykichis.” (1 TES. 2:2.)

1. ¿Imaraykun Reinomanta allin willakuykuna anchata kusikunapaq?

¡ALLIN noticiakunata uyarispaqa anchatan kusikunchis! Jesusqa Reinomanta allin willakuykunatan willaran, chay noticiakuna hinaqa manan ima noticiapas aswan allinqa kanmanchu. Chay noticiakunaqa onqoykuna, nanaykuna, wañuy, tukuy imaymana ñak’ariykuna tukupunanmantan rimashan. Chaymantapas wiñay kawsay suyakuytan qowanchis, yanapawanchismi Diospa munayninmanta yachananchispaq paywan amistadta ruwananchispaqpas. ¡Chayta uyarispaqa lliw runan kusikunman! niwaqpaschá. Ichaqa yaqa llapankun mana kusikunkuchu.

2. ¿Imatan Jesús nisharan “manan thak-kaytachu apamuni” nisqanwan?

² Jesusmi qatikuqninkunata niran: “Ama yuyaychischu kay pachaman hamusqaywan thak-kay kanantaqa. Manan thak-kaytachu apamuni, aswanpas ñoqa hawan espadawan maqanakunqaku. Ñoqaqa hamuni churita taytanwan, ususita mamanwan, qhachunta suegranwan t’aqanachinaypaqmi. Runaq awqankunaqa kikin familiallantaqmi kanqa”, nispa (Mat. 10:34-36). Arí, allin willakuykuna uyarinankumantaqa yaqa llapa runakunan mana uyariyta munankuchu. Wakinqa chay noticiakunamanta willaqkunaq contranpi imaraqmi churakunku, paykunaq familianña kashaspankupas.

3. ¿Imatan necesitanchis mana sayk’uspa predicashanallanchispaq?

³ Kay tiempopi allin willakuykunata predicasqanchisqa kaqllan ñawpaqpi Jesuspa yachachisqanwan, runakunapas kaqllatan chay tiempopi hina willasqanchisman kutichinku.  ¿Imarayku? Jesusmi qatikuqninkunata niran: “Manan kamachiqa patronninmanta kurakchu, [...] Ñoqata qatiykachawarqanku chayqa, qankunatapas qatiykachallasunkichistaqmi”, nispa (Juan 15:20). Yaqa llapa llaqtakunapin mana qatiykachawanchischu ichaqa askha kutipin millayta tratawanchis otaq mana uyariytapas munankuchu. Chayrayku mana sayk’uspa predicashanallanchispaqqa, iñiyta valorta ima necesitanchis (leeychis 2 Pedro 1:5-8).

4. ¿Imaraykun Pablo kallpata hap’inan karan predicananpaq?

⁴ Sichus hayk’aqllapas sasachakuranki predicaq lloqsinaykipaq otaq manchakunki predicayta chayqa, manan qanllachu chhaynata sientekunki, huk allin predicaqkunapas chhaynatan sientekuranku. Apóstol Pablopas experienciayoq allin predicaqmi karan, ichaqa mayninpin chay ruway paypaq sasa karan. Tesalónica cristianokunamanmi kayta qelqaran: “Yachallankichistaqmi ñawpaqta Filipos llaqtapi muchusqaykuta, k’amisqa kasqaykuta, chaywanpas Diosninchismi kallpachawarqanku, hinan qatiykachakuyña kashaqtinpas mana mancharispa Diospa allin willakuyninkunata willarqaykichis”, nispa (1 Tes. 2:2). Arí, chay llaqtapin autoridadkuna Pablota Silastawan k’aspikunawan p’anasqaku, chaymantataq carcelman wisq’aspa cepopi chakinkuta hap’ichisqaku (Hech. 16:16-24). Pablowan Silaswanmi ichaqa kallpata hap’iranku imaña kaqtinpas predicashanallankupaq. ¿Imaynatan ñoqanchis paykunaq ejemplonta qatikusunman? Chay tapuyta kutichinapaq, qhawarisun imas ñawpaq tiempopi Dios serviqkunata yanaparan valorwan Diosmanta rimanankupaq chayta.

Kallpatan hap’inanchis hark’awaqninchista atipanapaq

5. ¿Imaraykun Diosta serviqkuna qallariymantapacha mana manchakuq kananku karan?

⁵ Valorwan predicanapaqqa Jesucriston allin ejemplonchis. Ichaqa, qallariymantapachan Jehová Diosta serviqkunaqa mana manchakuq kananku karan. ¿Imarayku? Adán Eva huchallikusqanku qhepaman Diospa profetizasqan hina, cheqninakuymi kanan karan Diosta serviqkunawan Saqrata qatikuqkunawan (Gén. 3:15). Ñawpaqta cheqnisqa tarikuqqa chanin runa Abelmi karan, paytan wayqen Caín wañuchiran. Hunt’aq sonqowan Diosta serviq Enocqa manaraq Millp’uq Para chayashaqtinmi kawsaran, paytapas cheqnikurankun, Diosmi waranqa waranqa angelkunawan hamuspa huchallikuqkunata muchuchinqa nispa profetizaqtin (Jud. 14, 15). Willasqantaqa manan uyariyta munarankuchu. Runakunaqa nishutan Enocta cheqnikuranku, chayrayku sichus Dios mana ‘payta pusakapunmanchu’ karan otaq mana wañuypi samachipunmanchu karan chayqa, wañuchinkumanmi karan. Enocqa ¡ancha allin ejemplon valorwan predicasqanrayku! (Gén. 5:21-24.)

6. ¿Imaraykun Moisés faraonwan rimananpaq mana manchakuq kanan karan?

⁶ Kunanqa yuyaykusun mana manchakuspa Moisés faraonwan rimasqanpi. Chay kamachikuqqa manan dioskunaq representanten hinallachu qhawarisqa karan aswanpas pay kikinmi dios karan, Ra sutiyoq inti diospa churin. Yaqapaschá kay reyqa huk faraonkuna hina kikin rikch’ayninta yupaycharan. Kay atiyniyoq uman oqariq millay reytaqa manan pipas niyta atiranchu ima ruwananta. Tukuy rimasqanmi kasukunapaq karan. Chhayna runamanmi llamp’u sonqo Moisés askha kutita rimaq riran mana invitasqalla. ¿Ima niranmi Moisés faraonta? Millonninpi kamachi Israel runakunata kacharinanpaqmi nimuran, willarantaqmi mana kachariqtinqa Dios Egipto runakunata imaymanawan castigananta. Chaykunata rimananpaqqa, ¡mana manchakuqmi kanan karan! (Núm. 12:3; Heb. 11:27.)

7, 8. a) ¿Ima sasachakuykunapin ñawpaq tiempopi Diosta serviqkuna tarikuranku? b) ¿Iman paykunata yanaparan mana manchakuspa Diospaq llank’anankupaq?

⁷ Chaymanta qhepa tiempomanpas, Diosta hunt’aq sonqowan serviq profetakuna hukkunapas mana manchakuspan cheqaq yupaychaypaq llank’aranku Saqraq munaychakusqan millay pachapi. Paykunamantan Pablo niran: “Wakinkunataq karqanku ch’aqesqa, serruchowan kuchusqa, espadawan wañuchisqa, kayman chayman purirqanku oveja qarawan cabra qarawan p’istuykusqa, mana imayoq, sinchi llakichisqa,  sinchi maqasqa ima”, nispa (Heb. 11:37). ¿Iman paykunata yanaparan hunt’aq sonqowan Diosta servinankupaq? Ñawpaq versiculokunapin Pablo willan imachus Abelta, Abrahamta, Sarata kallpachasqanmanta, kaytan niran: “Iñishaspallan wañukapurqanku Diospa prometesqan kaqkunata manaraq chaskishaspa, ichaqa iñiyniyoq kaspankun karullamanta chaykunata qhawarirqanku, hinaspa kusikurqanku”, nispa (Heb. 11:13). Ñawpaq tiempopi profetakuna, wakin hunt’aq sonqowan Diosta serviqkunapas valorwanmi llank’aranku Jehová Diospaq, paykuna hinan Eliaspas Jeremiaspas confiaranku Diospa promesankuna hunt’akunanpi, chaymi anchata yanaparan aguantanankupaq (Tito 1:2).

⁸ Paykunaqa llapallankun hamuq tiempopi allin kawsayta suyakuranku. Mosoq pachapiqa mana pantaq runañan kapunqaku “ismuqpaq nisqa kaymantan Diosqa kacharichinqa”, chaytaqa ruwanqa Jesucristo 144.000 cristianokunapiwan sacerdote hina llank’asqankurayku (Rom. 8:21). ¿Iman kallpachallarantaq ñawpaqpi Dios serviqkunata profeta Jeremiasta hina? Jehová Diosmi profetaman kayta prometeran: “Paykunan contraykipi sayarinqaku, ichaqa manan atipasunkikuchu, waqaychanaypaq qanwan kashasqayrayku. Ñoqa Señor Diosmi chayta nini”, nispa (Jer. 1:19). Ñoqanchistapas hamuq tiempopaq Diospa promesankunapi yuyaymanaymi kallpachawanchis, hinallataq paywan allinpi kananchispaq yanapayninpi confiay (Pro. 2:7; leeychis 2 Corintios 4:17, 18).

Munakuymi Jesustaqa yanaparan valorwan predicananpaq

9, 10. ¿Imaynatan Jesús mana manchakuq kasqanta rikuchiran a) religión umalliqkunata nisqanpi, b) guardiakunawan tupaspa, c) uma sacerdote tapuqtin, d) Pilatoq ñawpanpi?

⁹ Jesusqa imaymana ruwasqanpin mana manchakuq kasqanta rikuchiran. Religión umalliqkuna cheqnikurankuña Jesusta chaypas, mana upallakuspan payqa mana allin ruwasqankuta huchacharan. Mana manchakuspan sut’iman orqoran iskay uya kaspa Dios sonqoman tukuq kasqankuta, hinallataq llullakuspa mana kaqta yachachisqankutapas. Jehová Diosqa huchachasqan paykunata, Jesustaq chayta sut’ita uyankupi niran: “¡Ay, qankunamanta iskay uya fariseokuna, kamachikuy simita yachachiqkuna! ¡Qankunaqa iskay uyakunan kankichis! Yuraqwan hawan pintasqa aya t’oqomanmi rikch’akunkichis, hawallanmanmi sumaq rikch’akun, ukhuntaq ichaqa aya tullukunawan qhellikunapiwan hunt’a kashan. Chay hinallataq qankunapas hawaykichismantaqa runakunaman chanin rikhurinkichis, sonqoykichispitaq ichaqa iskay uya huchasapa kankichis”, nispa (Mat. 23:27, 28).

¹⁰ Getsemaní huertapi kashaqtin guardiakuna payta presota apanankupaq hamuqtinkun, Jesusqa mana iskayaspa reqsichikuran (Juan 18:3-8). Chaymantataq Sanedrinman aparanku chaypi uma sacerdote tapumunanpaq. Yacharanña wañuchinankupaq imallatapas tariyta munasqankuta chaypas, mana manchakuspan niran pay Mesías Diospa Churin kasqanta. Chaymantataq niran: “Runaq Churintan rikunkichis atiyniyoq Diospa paña ladonpi tiyashaqta, hanaq pacha phuyupi hamushaqtawan”, nispa (Mar. 14:53, 57-65). Chay qhepamanmi Jesusqa Pilatoq ñawpanpiñataq kasharan, payqa atiranmi Jesusta kacharipuyta. Ichaqa ch’inllan karan imaymanamantaña tumpashaqtinkupas (Mar. 15:1-5). Chaykunata aguantananpaqqa anchatachá kallpachakuran.

11. ¿Iman kallpachawanchis valorwan predicananchispaq?

 ¹¹ Ichaqa kaytan Jesús Pilatota niran: “Cheqaq-kayta willanaypaqmi ñoqaqa nacerqani, chaypaqmi kay pachamanpas hamurqani”, nispa (Juan 18:37). Taytanmi kamachisqa allin willakuykunata predicananpaq, chayraykun Jesusqa Taytanta munakuspa tukuy sonqomanta chayta ruwaran (Luc. 4:18, 19). Jesusqa munakuranmi runakunatapas yacharantaq ima sasachakuykunapi tarikusqankuta. Ñoqanchispas Diosta runakunatawan munakusqanchisraykun valorwan predicanchis (Mat. 22:36-40).

Santo espiritun kallpata qowanchis

12. ¿Imamantan kusikuranku qallariy siglopi cristianokuna?

¹² Jesuspa wañupusqan qhepallamanmi Jehová Dios askha runakunata llaqtanman pusamuran, chaywanmi Jesuspa qatikuqninkunaqa kusikuranku. Huk p’unchayllapin 3.000 judiokuna, huk llaqtakunamanta judioman tukupuq runakuna ima bautizakuranku, paykunaqa Pentecostés fiestamanmi Jerusalenman risqaku. Judío runakunaqa mancharikurankuchá religionninkuta saqepuspa chhaytukuy runakuna bautizakusqankumanta. Biblian nin: “Apostolkunan askha milagrokunata señalkunata ima ruwarqanku, chaymi llapa runakuna anchata muspharqanku [mancharikuranku]”, nispa (Hech. 2:41, 43).

13. ¿Imaraykun cristianokuna kallpata Diosmanta mañakuranku, imaynatan chayman Jehová Dios kutichiran?

¹³ Religión umalliqkunaqa sinchita phiñakuspankun Pedrota Juantawan carcelman wisq’achiranku, chaymantataq kamachiranku amaña Jesusmanta rimanankupaq. Carcelmanta lloqsispankutaq iñiqmasikunaman willaranku imachus sucedesqanta. Chayraykun paykunaqa llapanku Jehová Diosmanta mañakuranku: “Kallpachawayku mana manchakuspa simiykita willanaykupaq”, nispa. ¿Kutichiranchu Jehová Dios mañakuyninkuman? Arí, “llapankuman[mi] Santo Espirituqa hunt’aykurqan, chaymi mana manchakuspa Diospa siminta willarqanku” (Hech. 4:24-31).

14. ¿Imaynatan predicacionpi santo espíritu yanapawanchis?

¹⁴ Chay cristianokunataqa Diospa santo espiritunmi kallpacharan mana manchakuspa allin willakuykunata willanankupaq. Kunanpas Jehová Diosmi santo espiritunwan kallpachawanchis mana manchakuspa lliw runawan hark’awaqninchiskunawanpas allin willakuykunata rimananchispaq; chaypaqqa mañakunallanchismi. Arí, Diospa yanapayninwanqa atisunmi hark’aqwaqninchiskuna atipayta (leeychis Salmo 138:3).

Cristianokunaqa mana manchakuspan predicanchis

15. ¿Imaynatan cheqaqkaq runakunata t’aqanachin?

¹⁵ Ñawpaq tiempopi hinan kunanpas cheqaqkaqqa runakunata t’aqanachin. Wakin runakunaqa sumaqtan chaskiwanchis allin willakuykunata apaqtinchis, wakintaq mana uyarinkuchu nitaq respetankuchu Dios yupaychasqanchista. Hukkunataq ñoqanchismanta rimakuwanchis, burlakunku, cheqnikuwanchis ima, Jesuspa profetizasqan hina (Mat. 10:22). Mayninpiqa llullakuspan yanqata ñoqanchismanta willanku, radiopi televisionpipas p’enqaypin qhepachiwanchis mana kaqta rimamuspanku (Sal. 109:1-3). Ichaqa chhaynaña kaqtinpas, Diospa llaqtanqa mana pisipaspan allin willakuykunata Hallp’antinpi predicashanku.

16. ¿Imaynapin yachanchis mana manchakuspa predicasqanchisrayku runakuna yuyaykusqankuta cambiasqankuta?

¹⁶ Ichaqa, mana pisipaspa predicasqanchista rikuspan runakunaqa cambiankuman imayna yuyaykusqankuta. Kirguistán nacionmanta hermanan kayta willawanchis: “Predicacionpi kashaqtiymi huk runa niwaran: ‘Ñoqaqa iñinin Diospi, ichaqa manan cristianokunaq Diosninpichu. ¡Sichus wasiyman kutimunki chayqa, alqoytan kacharimusaq!’ nispa. Qhepanpin cadenawan watasqata huk hatun alqota rikurani. Ichaqa chay p’unchaykunallapin Noticias del Reino núm. 37, ‘¡Se acerca el fin de la religión falsa!’ nisqa tratadota rakikushaqtin, yuyaykurani hukmanta kutinaypaq, yaqapas chay wasipi huk runawan rimamuyman nispa. Ichaqa chay runallataqmi  punkuta kicharamuwan. Kaq rato Diosmanta mañarukuspaymi nirani: ‘Allillanchu, yuyashanin qayninpa rimasqanchista, alqoykitapas yuyashanin ichaqa familiaykimanwanmi kay tratadota saqeyta munarani, ñoqapas sapallan cheqaq Diospin iñini. ¿Yacharankichu pisi tiempollamanta Dios pantasqa religionkunata tukuchinanmanta? Kay tratadon chay temamanta astawan willashan’, nispa. Runataq chaskikullawaran tratadota. Chaymanta lloqsispaytaq huk wasiman rirani. Ichaqa chay qhepallamanmi runataqa tratado hap’iyusqa phawamushaqta rikurani. Ñoqaq kasqayman chayaramuspataq niwaran: ‘Ñan leeruniña, ¿imatan ruwanay Dios ñoqawan mana phiñakunanpaq?’” nispa. Chay runaqa Biblia estudiaytan qallariran huñunakuykunamanpas riranmi.

17. ¿Imaynatan huk iñiqmasinchis mana manchakuq kasqanwan kallpacharan huk estudiantenta?

¹⁷ Mana manchakuspa predicasqanchisqa hukkunatapas kallpachanmanmi. Rusiamanta huk hermanan combipi rishaspa, ladonpi tiyaq warmiman revistata qoshasqa, ichaqa chayllamanmi huk runa asientonmanta hatariruspa qechurusqa, revistata llik’iruspataq pampaman wikch’usqa. Chaymantataq hermanata k’amiyta qallarisqa, direccionninta qonanpaq mañaspataq llaqtapi manaña predicananpaq anyasqa. Iñiqmasinchisqa Jehová Diosmantan mañakusqa, hinaspa yuyarisqa Jesuspa nisqanta: “Ama cuerpoykichis wañuchiqkunataqa manchakuychischu” (Mat. 10:28). Mana phiñakuspalla asientonmanta hatariruspan runata nisqa: “Manan willasaykichu maypi tiyasqayta nitaqmi kay llaqtapi predicaytapas saqesaqchu”, nispa. Chaymantataq carromanta urayapusqa. Kay hermanaqa manan yachasqachu chay combipi paywan Bibliata estudiaq huk señora rishasqanta, payqa manchakuspan mana huñunakuykunaman risqachu. Ichaqa iñiqmasinchis mana manchakuq kasqanta qhawarispan huñunakuykunaman riyta qallarisqa.

18. ¿Iman yanapawasunman Jesús hina mana pisipaspa predicananchispaq?

¹⁸ Diosmanta karunchakuq runakuna ukhupiqa mana manchakuqmi kananchis Jesuspa ejemplonta qatikunanchispaq Reinomanta predicananchispaqpas. ¿Iman chaypaq yanapasunki? Hamuq tiempopaq Diospa promesankunapi yuyaykuy. Chaymantapas astawan Diosta munakuy runakunatapas. Jehová Diosmanta mañakuy kallpata qonasuykipaq. Yuyariytaq mana sapallaykichu kashasqaykita, Jesusqa qanwanmi kashanqa yanapanasuykipaq (Mat. 28:20). Jehová Diosmi bendecisunki, yanapasunki, santo espirituntaq kallpachasunki. Llapallanchismi mana iskayaspa nisunman: “[Jehová Diosmi] yanapaykuwaqniyqa, manan manchakusaqchu. Runari, ¿imanawanqataq?” nispa (Heb. 13:6).

¿Imaynatan kutichiwaq?

• ¿Imaraykun Dios serviqkuna valorta necesitanku?

• ¿Imatan yachanchis . . .

. . . ñawpa tiempopi Diosta serviqkunamanta?

. . . Jesucristomanta?

. . . qallariy siglopi cristianokunamanta?

. . . kay tiempopi iñiqmasinchiskunamanta?

[Tapuykuna]

[21 paginapi dibujo]

Jesusqa mana manchakuspan religión umalliqkunata huchacharan

[23 paginapi foto]

Jehová Diosmi kallpata qowanchis predicananchispaq