Tukuy sonqowan chaskikusun, tukuy sonqowantaq qosun

BIBLIAQ nisqan hina ancha munakuq Jehová Diosninchisqa allin kananchistan munan (1 Ped. 5:7). Allin kananchista munaspan imaymana yanapaykunata qowanchis paypaq hunt’aq sonqo kananchispaq (Isa. 48:17). Chay yanapaykunatan Jehová Dios qowanchis sasachakuypi otaq llakisqa tarikuqtinchis chaykunawan yanapachikunanchispaq. Qhawarisun imaynatan chayta rikuchiran Kamachikuy Simi qosqanpi.

Jehová Diosmi llaqtanpi runakunata munakuspa kamachikuy Simipi qelqachiran wak llaqtayoqkunata, mana tayta mamayoqkunata, viudakunatapas yanapaykunankupaq (Lev. 19:9, 10; Deu. 14:29). Diosqa yachanmi kay tiempopi wakin kamachinkunapas iñiqmasinkuq yanapaynin necesitasqankuta (Sant. 1:27). Chaymi mayqen iñiqmasinchiswanpas Jehová Dios yanapachiwaqtinchisqa mana wikch’uyukunachu aswanmi sumaq sonqowan chaskikuna.

Ichaqa Biblian llapa cristianokunatapas kallpachawanchis qoykukuq sonqo kananchispaq. Chaypaq yuyarisunchis yupaychana wasipi Jesuspa tarisqan viudamanta (Luc. 21:1-4). Paytaqa Kamachikuy Simipi nisqanman hinachá yanaparanku. Ichaqa wakchaña karan chaypas paytaqa manan chaskisqanmantachu yuyarikun aswanpas tukuy sonqowan qosqanmantan. Chay viudaqa kusisqachá karan qoyukuq sonqo kasqanmanta. Arí, “Aswan kusisamiyoqqa qoqmi chaskiqmantaqa”, nispan Jesuspuni niran (Hech. 20:35). ¿Imakunapin qoykukuq kasunman kusisqa kananchispaq? (Luc. 6:38.)

¿Imaynatan Jehová Diosman kutichipusunman?

Salmistan niran: “¿Imatan Señor Diosman kutichipusaq tukuy allinkunata ruwapuwasqanmanta?”, nispa (Sal. 116:12). ¿Imakunapin Jehová Dios payta yanaparan? ‘Llakipakuypi nanaypi’ tarikushaqtinmi yanapasqa. Arí, ‘wañuymantapas qespichisqan’. Chaykunamantan payqa kutichipuyta munaran. ¿Imaynatan kutichipunman? Payllataqmi niran: “Prometekusqaykunata qopusaq”, nispa (Sal. 116:3, 4, 8, 10-14). Chaypi nisqan hina, payqa Jehová Diosman lliw prometesqanta hunt’ananpaq, kamachikusqankunata kasukunanpaqwanmi decidekusqa.

¿Imaynatan qatikusunman salmistaq ruwasqanta? Jehová Diospa tukuy kamachikusqanta kasukuspan. Chaymi ima ruwananchismantapas Jehová Dios yupaychay ñawpaqpi kanan, santo espiritun pusawasqanchisman hinataq kawsananchispas (Ecl. 12:13; Gál. 5:16-18). Manaña hayk’aqpas tukuy qowasqanchismanta kutichipuyta atisunchu chaypas, tukuy sonqowan paypa  munayninta ruwaspaqa sonqontan kusichisun (Pro. 27:11). ¡Ancha allinpaqmi chay ruwaytaqa rikunanchis!

Yanapakusun Diospa llaqtan wiñashanallanpaq

Llapallanchismi yachanchis Diospa llaqtan imaymanapi yanapawasqanchista. Arí, Jehová Diosmi llaqtanpi espiritual mikhunata askhanpi qowanchis, llaqtanwanmi pantasqa religionmantapas laqhayaq ukhumantapas horqowaranchis (Juan 8:32). Huñunakuykunapi hatun huñunakuykunapipas ‘allin yuyayniyoq hunt’aq kamachiq’ yachachiwasqanchismi yanapawasun Paraisopi wiñaypaq mana imamanta llakikuspa kawsananchispaq (Mat. 24:45-47). Arí, imaymana saminchaykunatañan Diospa llaqtanpi chaskikunchis qhepamanqa imataraqchá mana chaskikusunchu. Ñoqanchisri, ¿imatan ruwasunman Diospa llaqtanpaq?

Apóstol Pablon niran: “Llapa cuerpoqa allin k’askanasqa kashan, sapanka moqokuna allin ch’antasqa, sapankataq ruwananman hina allinta llank’aqtin llapa cuerpo munakuypi aswan-aswanta wiñashan”, nispa (Efe. 4:15, 16). Chaypi nisqan akllasqa cristianokunapaqña karan chaypas llapa cristianokunapaqwanmi qelqakuran. Arí, llapa cristianokunan yanapakusunman Diospa llaqtan wiñashanallanpaq. ¿Imaynatan chayta ruwasunman?

Chaypaqqa tukuy atisqanchistan ruwananchis iñiqmasinchiskunata kallpachanapaq sonqochanapaq ima (Rom. 14:19). Chaymantapas ‘llapa cuerpo [...] aswan-aswanta wiñashanallanpaqqa’ santo espirituq rurunta ñoqanchispi wiñachishanallanchis chhaynapi iñiqmasinchiskunawan allinta kawsananchispaq (Gál. 5:22, 23). Hinaspapas “atishaspanchisqa lliwpaq allinkaqta ruwasunchis, aswantaqa ruwasun iñiqmasinchiskunapaq” (Gál. 6:10; Heb. 13:16). Pabloq nisqan hina, llapallanchismi munakuywan yanapakusunman Diospa llaqtan wiñashanallanpaq.

Chaymantapas tukuy atisqanchistan ruwasunman predicaypi yanapakunanchispaq. Jesusmi niran: “Gratisllan chaskirqankichis”, nispa. ¿Imatan ñoqanchispas ruwananchis? Paymi nillarantaq: “gratisllataqmi qonkichispas”, nispa (Mat. 10:8). Chayrayku kallpachakushallay Reinomanta predicanaykipaq munaqkunaman yachachinaykipaqpas (Mat. 24:14; 28:19, 20). ¿Mana tukuy munasqaykiman hinachu ruwayta atiwaq chayri? Chayqa yuyariy wakcha viudata. Pisillataña qoran chaypas tukuy atisqantan qoran, chaymi Jesús willaran hukkunamanta aswan askha qosqanta (2 Cor. 8:1-5, 12).

Tukuy sonqowan chaskikusun hukkunaq yanapayninta

Mayninpiqa ñoqanchismi necesitasun cristianomasinchiskunaq yanapayninta. Chaytaqa tukuy sonqowanmi chaskikunanchis, chay yanapaykunawanmi sasachakuykunata atipasun. Chaymantapas Diosmi qowanchis ‘iglesianpi [otaq iñiq t’aqapi] michiq’ runakunata. Paykunan imaña kaqtinpas yanapawasunchis (Hech. 20:28). Michiqkunapas iñiqmasinchiskunapas sonqochawasunmi, pakaykuwasunmi, yanapariwasuntaqmi kanpas (Gál. 6:2; 1 Tes. 5:14).

Ichaqa kallpachakuy allin sonqoyoq kanaykipaq. Agradecekuy iñiqmasiykikunata tukuy yanapay chaskisqaykimanta. Yuyariy, chay yanapaykunaqa Jehová Diosmantan hamun (1 Ped. 4:10). ¿Imarayku chayta ruwananchis? Mana kay pachapi mana agradecekuq runakuna hina kananchispaq.

Allin yuyaywan imatapas ruwasun

Filipos llaqtapi iñiqmasikunaman carta qelqasqanpin Timoteomanta Pablo niran: “Manan pipas Timoteo hina yuyaykuqmasiyqa  kanchu, cheqaqtapuni tukuy sonqowan allin kanaykichista munaqpas”, nispa. Hinaspan nillarantaq: “Lliwpas paykunapaq allin kaqllatan maskhanku, manataqmi Jesucristoq kaqnintaqa”, nispa (Fili. 2:20, 21). Chay nisqanpi yuyaykuspa tapukusun: “¿Imatan ruwayman ama ‘allin kaqllayta maskhanaypaq’?” nispa.

Manan hayk’aqpas iñiqmasinchiskunataqa mat’ipayananchischu tukuy imapi yanapawananchispaq. ¿Imarayku? Kaypi yuyaykusun: onqoruqtinchis, ¿nishasunmanchu qolqeta qowananchispaq? Manan riki. Aswanchá agradecekusunman yanapariwasqanchismanta. Kaqllataqmi kanman imatapas willarikuyta munaqtinchispas, paykunaqa yanapaytan munawanchis ichaqa manan tukuy tiemponkuta qowananchistaraqchu suyananchis nitaq phiñakunanchischu. Arí, ñoqanchisqa munanchis iñiqmasinchiskuna tukuy sonqowan yanapawananchistan manan mat’ipayasqanchisraykulla yanapawananchistachu.

Maytapuni iñiqmasinchiskuna yanapayta munawanchis chaypas mayninpiqa manapaschá tukuypichu yanapawasun. Chhaynaña kaqtinpas Jehová Diosmi yanapawasun imaynan salmistata yanaparan hinata (Sal. 116:1, 2; Fili. 4:10-13).

Jehová Diosqa necesitasqanchis tiempokunapin astawanqa yanapawanchis, chaytan manapuni wikch’uyukunanchischu (Sal. 55:22). Hinaspapas Jehová Diosqa ima chaskikusqanchismantapas tukuy sonqowan agradecekunanchistan munan, qospapas tukuy sonqomanta qonanchista. Chayrayku atisqaykiman hina ‘imaynatachus sonqoykipi’ yuyaykusqaykiman hina yanapakuy (2 Cor. 9:6, 7). Chhaynapin hukkunamanta imatapas chaskikuspaqa tukuy sonqowan chaskikunki, hukkunaman imata qospapas tukuy sonqomanta qonki.

[31 paginapi fotokuna recuadropiwan]

“¿Imatan Señor Diosman kutichipusaq tukuy allinkunata ruwapuwasqanmanta?” (Sal. 116:12).

▪ Kallpachakuy ‘lliwpaq allinkaqta ruwanaykipaq’

▪ Kallpachakuy hukkunata sonqochanaykipaq kallpachanaykipaq ima

▪ Atisqaykiman hina kallpachakuy Bibliamanta hukkunaman yachachinaykipaq