Yanapanakuspaqa iñiyninchispin wiñasun

FAMILIAPI yanapanakuyqa ancha allinpunin, chaymi tayta mamatapas wawakunatapas yanapanqa iñiyninkupi wiñanankupaq. Ñawpa warmi qharita kamashasparaqmi Jehová Dios kamachiran yanapanakunankupaq. Arí, Evatan kamachiran qosan Adanta ‘yanapananpaq’ (Gén. 2:18). Chaymi casado warmi qhariqa yanapanakunanku (Ecl. 4:9-12). Hinaspapas Jehová Diospa kamachikusqanta hunt’anankupaqmi llapa familiantin yanapanakunanku.

Familiapi Diosta yupaychanapaq

Barry, Heidi cristianokunan pisqa wawayoq kanku, paykunan qhawarinku familiapi allin estudio aparinapaq yanapanakuy ancha allinpuni kasqanta. Barry nin: “Familiapi estudianapaqmi mayninpi huch’uy wawaykunaman tareata qoni. Mayninpin ¡Despertad! revistata leenankupaq kamachini chaypi tarisqankutataq willawananku. Chaymantapas sapanka wawaykuwanmi preparakuyku predicacionpi imayna rimayta qallarinankupaq”, nispa. Heidin nillantaq: “Sapankaykun huk listata ruwakuyku qhepaman Diospaq ima ruway munasqaykumanta, chaytan mayninpi familiapi estudiashaqtiyku qhawariyku chay munasqaykuman aypashaykuñachus icha manaraqchus chayta yachanaykupaq”, nispa. Chay tayta maman wakin tutakuna televisionta mana hap’ichinkuchu llapanku Bibliata leenankurayku.

Huñunakuykunaman rinapaq

Mike, Denise cristianokunan tawa wawayoq kanku. ¿Imaynatan yanapanakuranku? Mike nin: “Allintaña rimanakushaqtiykupas manan horapichu chayaq kayku huñunakuykunaman, chaymi repararayku llapallayku yanapanakuspaqa atinaykuta”, nispa. Denise willakun: “Wawakuna huch’uyllaraq kashaqtinkun sapankaman tareata qoq kayku. Kim ususiykun wayk’uypi, mesaman platokuna churaypi ima yanapakunan karan”, nispa. Michael wawankun nillantaq: “Sapa martes ch’isintan wasiykupi huñunakuy karan. Chaypaqmi huñunakunayku cuartota allinta limpiaspa tiyanakunata churaq karayku”, nispa. Matthew sutiyoq wawankun nillantaq: “Huñunakunayku tutakunaqa tempranon papayku llank’ananmanta hampuq alistakuypi yanapawanankupaq”, nispa. ¿Imakunapin yanaparan chaykuna ruwasqanku?

Kallpachakuyqa allinpaqmi

Mike willakullantaq: “1987 watapin warmiywan precursor karayku. Chay tiempopiqa kinsa wawaykun wasillaykupiraq kasharan. Iskaymi ñoqayku hina precursor kapuranku iskaytaq Betel wasikuna ruwaypi yanapakuranku. Soqtantiykumantan tawa chunka runakunataña yanapayku Diosman qokuspa bautizakunankupaq. Chaymantapas Diosta yupaychanapaq wasikuna sayarichiypin llapayku yanapakurayku, mayninpiqa huk suyukunapiraqmi chayta ruwaq kayku”, nispa.

Rikusqanchis hina, may allinpunin yanapanakuyqa. ¿Imakunapiwanmi familiaykipi yanapanakuwaqchis? Llapallaykichis yanapanakunkichis chayqa iñiyniykichispin wiñankichis.

[28 paginapi foto]

Ñawpaqmanta preparakuyqa allinta predicanapaqmi yanapakun