¿Munawaqchu hukmanta Diospa llaqtanpi yanapakuyta?

¿SAQEPURANKICHU hayk’aqllapas Diospa llaqtanpi llank’anaykipaq ima saminchay chaskikusqaykitapas? Yaqapaschá karanki umalli, Diospa llaqtanpi yanapakuq (siervo ministerial) otaq imapipas yanapakuranki, chaypi llank’aspaqa kusisqachá karanki.

Chaywanpas kuraqña kasqaykirayku, onqosqaykirayku otaq familiaykiraykupaschá manaña chaykunapi yanapakunkichu. Chhayna kaqtinqa ama llakikuychu (1 Tim. 5:8). Apostolkunaq tiemponpi Felipe sutiyoq cristianopas misioneron karan, chaymantan ichaqa Cesarea llaqtapi qhepakapuran familianta uywananpaq (Hech. 21:8, 9). Davidpas yuyaqña kashaspan kamachiran paypa rantinpi churin Salomón Israel llaqtapi kamachikunanpaq (1 Rey. 1:1, 32-35). Chaywanpas Jehová Diosqa Felipetapas Davidtapas munakushallaranmi. Kunankamapas respetowanmi paykunataqa qhawarinchis.

Ichaqa yaqapaschá imatapas mana allin yuyaywan ruwasqaykirayku otaq familiaykipi sasachakuykuna kasqanrayku umalliqkuna nirasunki ima saminchay chaskikusqaykitapas saqepunaykipaq (1 Tim. 3:2, 4, 10, 12). Yaqapaschá chaykunamanta umalliqkunawan phiñasqaraq kashanki.

Yapamantan imapipas yanapakuwaq

¿Qosunkikumanchu hukmanta ima saminchaytapas? Arí qosunkikumanmi, ichaqa kallpachakunaykin kanqa (1 Tim. 3:1). ¿Iman tanqanasuyki kallpachakunaykipaq? Yuyariy, ¿iman ñawpaqtapas tanqarasunki Diosman qokunaykipaq? Jehová Diosta iñiqmasiykikunatawan munakusqaykin. Sichus kunanpas paykunata munakuspa tukuy sonqo kallpachakunki chayqa, hukmantan chaskikuwaq ima saminchaytapas, ñawpaqpipas kunanpas tukuy yachasqaykiwan yanapakunaykipaq.

Israelitakunaman saminchaykuna qosqanta qechupusqan qhepamanmi Jehová Dios paykunata niran: “Ñoqaqa Señor Diosmi kani, kaqllapunin kashani. Chaymi Jacobpa mirayninkuna mana ch’usaqyachisqachu kankichis”, nispa (Mal. 3:6). Arí, Jehová Diosqa munakushallaranmi israelitakunata, confiaranmi paykunapi. Chhaynatan qantapas qhawarisunki. Diosta servinaykipaqqa manan allin yachaqraqchu kanayki aswanmi Dioswan allinpi kanayki. Chhaynaqa, ¿imatan kunan ruwashawaq? Manaraqtaq Diospa llaqtanpi yanapakushankiraqchu chayqa, Jehová Dioswan allinpi kanaykipaq kallpachakushay.

Allin iñiyniyoq kanaykipaqqa ‘Señor Diosman qayllaykuy, atiyninman hap’ipakuy’ (Sal. 105:4; 1 Cor. 16:13). Chaytaqa ruwawaq tukuy sonqowan Diosmanta mañakuspan. Paywan rimaspaykiqa llapanta willakuy santo espirituntapas mañakuy. Chhaynapin payta astawan munakunki iñiyniykipipas aswan kallpachasqa kanki (Sal. 62:8; Fili. 4:6, 13). Chaymantapas Bibliata estudiay. Manaraqtaq Diospa llaqtanpi ima ruwanaykipas kanraqchu chayqa kallpachakuy sapallaykipi otaq familiaykiwan astawan estudianaykipaq. Sichus ñawpaqpi mana tiempoyki ayparasunkichu chaykunata ruwanaykipaq chayqa, kunan huk horariota ruwakuspa kallpachakuy.

Qanqa Jehová Diospa sutinpiraqmi purishanki paypa Testigonmi kanki (Isa. 43:10-12). ‘Diospa llank’aysiq-masinkuna’ kasqanchismi imamantapas aswan allinqa (1 Cor. 3:9). Runakunaman allin willakuykunata willaspan Jehová Dioswan allinpi kasunchis hukkunatapas kallpachasun.

¿Imaynatan sonqopi phiñakuyta atipawaq?

Yaqapaschá llakisqa otaq p’enqasqa kashanki Diospa llaqtanpi manaña yanapakusqaykimanta.  Otaq mana allin ruwasqaykita pakayta munanki imaymanakunata nispa. Otaq umallikunapaq phiñasqa kashanki Diospa llaqtanpi manaña yanapakunaykipaq nisqasuykikumanta. Sichus phiñasqalla kanki umallikunapaq chayqa manan iñiyniykipi astawan wiñarinkichu manataqmi entiendenkichu imarayku Jehová Dios wanachisqasuykitapas. Sonqopi phiñakuyta imayna saqenapaq yachasunchis Jobmanta, Manasesmanta, Josemantawan.

Jobqa hukkunaraykun Jehová Diosmanta mañakuq sacrificiokunatapas haywaq, paymi ayllunpi umalliqpas juezpas karan (Job 1:5; 29:7-17, 21-25). Huk kutinmi ichaqa allin kashaspa qonqaylla wakchayapuran, millay onqoy hap’iran, wawankunapas llapallanmi wañupuran, manataqmi allin runapaq hinachu qhawarirankupas. Jobmi llakisqa niran: “Kunantaq ichaqa ñoqamanta asikunku, ñoqamantapas aswan waynakunaraq”, nispa (Job 30:1).

Jobqa mana pantaq runapaq qhawarikuspan mananchakuran pantasqanmanta (Job 13:15). Arí, sasachakuykunapi tarikushaspan mana allinta yuyaykuran. Ichaqa reparakuranmi chaykunamanta wanachiy necesitasqanta, chaymi Jehová Diospi suyakuran qhepamantaq tukuy imaymanawan Dios samincharan (Job 40:6-8; 42:3,6). Arí, huch’uyaykukuq kasqanraykun wakmanta chaskikuran askha saminchaykunata ñawpaqpi chaskisqanmantaqa aswantaraq (Job 42:10-13).

Qanpas huchaman urmasqaykiraykupaschá manaña Diospa llaqtanpi yanapakunkichu, tapukunkipaschá: “¿Jehová Diospas iñiqmasiykunapas pampachawanqakuchu, qonqanqakuchu pantasqayta?” nispa. Chaypaq yuyarisunchis Judapi kamachikuq Manasesmanta. Payqa “sinchi mana chaninmi karqan, manan Señor Diospa munayninman hinachu karqan, ahinapin Señor Diosta phiñachirqan” (2 Rey. 21:6). Wañupunan p’unchaypin ichaqa Jehová Dios allin kamachikuqta hina qhawariran. ¿Imarayku?

Diospa wanachisqanta chaskikusqanrayku. Manasesqa manan kasukusqachu Jehová Diospa anyasqanta chaymi asirio soldadokunaqa watasqata Babilonia suyuman aparanku. Chaypin Manasesqa “ñawpa taytankunaq Diosnin Señorpa ñawpaqenpi huch’uyyaykukuspa rogaykukurqan”. Ari, Manasesqa tukuy sonqowan Jehová Diosman kutirikuspan allin kaqta ruwaran chaymi Diosqa huchanmanta pampacharan (2 Cró. 33:12, 13).

Pipas Diospa llaqtanpi llank’ananta saqepuran chayqa manan hukpaqkamaqa chaykunata chaskikunmanchu. Aswanmi pisi-pisimanta chaskikunqa. Sichus nisunkiku imapi yanapakunaykipaqpas chayqa allintan chaykunata ruwanayki chhaynapin astawanraq yanapakunki Diospa llaqtanpi. Ichaqa sasan kanqa chaykuna ruway, yaqapaschá mayninpiqa pisipanki. Chaywanpas tukuy sonqowan kallpachakushallanki chayqa allinniykipaqmi kanqa.

Kunan yachasunchis Jacobpa wawan Josemanta. 17 watanpi kashaqtinmi Josetaqa wayqenkuna kamachita hina vendepusqaku (Gén. 37:2, 26-28). Payqa manan yuyaykullaranpaschu wayqenkuna chhaynata tratanankuta. Chhayna sasachakuykunapiña José tarikuran chaypas atisqanman hinan kallpachakushallaran, chaymi Jehová Diospa saminchayninwan “patronnin Egipto runaq wasinpi tukuy imapipas allillanpuni kasharqan” (Gén. 39:2). Chay qhepamanmi carcelpi  wisq’aranku chaywanpas Joseqa kasukushallaranpunin Diosta, chaymi payqa allinpaq qhawariran. Tiempoq pasasqanman hinan Joseqa tiyasqan carcelpi imaymanakunapi yanapakuran (Gén. 39:21-23).

Jehová Diosqa Jacobpa mirayninmanta prometesqa Miray chayamunanraykun hinallata qhawaran Josepa ñak’arisqanta chaytan Joseqa mana yacharanchu. Chaywanpas payqa tukuy atisqanpin allin kaqta ruwananpaq kallpachakuran (Gén. 3:15; 45:5-8). Ñoqanchisqa manapaschá José hinachu imatapas ruwasun ichaqa, ¿imatan chay yachachiwanchis? Josemanta yachasqanchis hina Jehová Diosmantan kanqa llaqtanpi imapi yanapakunanchispaqpas. Chayraykun José hina kallpachakushanallanchis chhaynapin Jehová Diospas llaqtanpi imaymana ruwanakunata qowasun.

¿Imatan yachawaq sasachakuyniykimanta?

Yachasqanchis hina Jobpas, Manasespas, Josepas imaymana sasachakuykunapin tarikuranku. Chhaynaña kaqtinpas paykunaqa aguantarankun chay sasachakuykunata, imaymana allinkunatataqmi yacharankupas. Qanri, ¿imatan yachawaq sasachakuyniykimanta?

Reparay imatan Jehová Dios chaywan yachachiyta munasunki chayta. Jobqa sinchi llakisqa kaspan qonqapuran imachus aswan chaniyoq kasqanta hinaspan payllapi yuyaykuran. Ichaqa Jehová Dios munakuywan yuyaychaqtinmi Jobqa yuyayninman kutispa niran: “Rimasharqani mana ima yachasqaymanta”, nispa (Job 42:3). Sichus phiñasqaraq kashanki manaña Diospa llaqtanpi yanapakusqaykimanta chayqa ‘ama [...] aswan allinpuni kasqaykipi yuyaykuychu, aswanpas [...] imaynachus kasqallaykipi yuyaykuy’ (Rom. 12:3). Manaña kunan allintachu entiendenki chaypas kaypi yuyaykuy: Jehová Diosqa yaqapaschá chaykunawan yanapayta munashasunki aswan allin cristiano kanaykipaq.

Allinpaq qhawariy wanachiyta. Yaqapaschá Manasesqa mana chaninpaqchu qhawariran wanachiy chaskisqanta. Qhepamanmi ichaqa huchallikusqanmanta pesapakuspa mana allin ruwasqanta saqepuran. Imaynataña wanachiyta qhawarinki chaypas ‘Señorpa ñawpaqenpi k’umuykukuy, hinan payqa hatunchasunki’ (1 Ped. 5:6; Sant. 4:10).

Pacienciakuy allin kaqtataq ruway. Joseqa llapa ñak’arichiqninkunata cheqnikuspan paykunamanta vengakunman karan. Ichaqa manan chaytachu ruwaran aswanmi paykunata khuyapayaspa allin yuyaywan imatapas ruwaran (Gén. 50:15-21). Qanpas sonqoykipi k’irisqa kashanki chayqa pacienciakuy, Jehová Diospa yachachiyninta chaskikuspataq allin kaqta ruway.

¿Hayk’aqllapas chaskikurankichu Diospa llaqtanpi llank’anaykipaq ima saminchaytapas? Chaskiranki chayqa huk saminchaykunatan Jehová Dios kunanpas qosunkiman. Chaypaqmi ichaqa Diosta astawan munakunaykipaq kallpachakunayki pacienciakuspa k’umuykukuspataq mana allinkuna yuyaykusqaykita wikch’upunayki. Imallapiña yanapakunaykipaq nisunkikuman chaypas sonqomanta chaskikuy. Amataq qonqaychu kay textoq nisqanta: “Payqa chanin puriqkunataqa munakunmi hatunchanmi, paykunamanqa ima allinkaqtapas qollanpunin” (Sal. 84:11).

[30 paginapi willakuy]

Diosmanta mañakuy allin iñiyniyoq kanaykipaq

[31 paginapi foto]

Runakunaman allin willakuykunata willaspan Jehová Dioswan allinpi kasunchis

[32 paginapi foto]

Suyakuy Jehová Dios llank’anaykipaq huk saminchaykunata qonasuykipaq