Diosmanta educación chaskisqanchisqa ancha valorniyoqmi

“Tukuy imaymanayoq kaytapas mana valeq q’opata hinan qhawani Señorniy Jesucristota reqsinaypaq.” (FILI. 3:8.)

1, 2. ¿Imatan wakin cristianokuna decidiranku, imaraykun chayta ruwaranku?

ROBERTQA escuelapi kasqanmantapachan allin notakunata orqoq. Pusaq watallayoq kashaqtinmi huknin profesoran wasinman rispa nisqa tukuy ima munasqanta aypay atinanta, nisqataq: “Ñoqaqa maytan munayman médico kanaykita”, nispa. Waynaña kashaqtinqa allin notakunatan colegiopi orqoran, chayraykun payqa atiran aswan allin universidadkunaman haykuyta. Robertmi ichaqa tukuy chaykunata qhepaman churaran, chhaynapi precursor regular kananpaq, chaytapunin payqa munaran.

² Robertta sucedesqan hinan askha cristianokunapaq oportunidad karan kay pachapi ñawparinankupaq, paykunamanta wakinmi ichaqa mana chayta aprovecharankuchu espiritual metakunata aypanankurayku (1 Cor. 7:29-31). ¿Imaraykun chay cristianokuna astawan Diospaq llank’ayta munaranku? Astawanqa Jehová Diosta munakusqankuraykun, chaymantapas yachankun paypa yachachisqan kay aswan valorniyoq kasqanta. Tapukurankichu: “¿Imaynatan kawsashayman karan Bibliamanta cheqaqkaqta mana yachaspay?” nispa. Yuyaymanasun Jehová Diospa educasqan kasqanchisrayku wakin bendicionkuna chaskisqanchispi. Chhaynapin allin willakuykunata astawan valorasun tukuy sonqomantataq predicasunpas.

May sumaqmi Diospa yachachisqan kayqa

3. ¿Imaynatan yachanchis Jehová Dios huchayoq runakunata yachachiy munasqanta?

³ Jehová Diosqa sumaq sonqo kasqanraykun huchayoq runakuna yachachiyta munan. Hanaq pachapaq akllasqa cristianokunamantan Isaías 54:13 nin: “Llapa wawaykikunatan ñoqaqa yachachisaq, paykunataq ancha allintapuni kawsanqaku”, nispa. Chay textoq nisqanqa Cristoq ‘wak ovejankunapaqwanmi’ kallantaq (Juan 10:16). ¿Imaynatan chayta yachanchis? Kay tiempopi hunt’akushaq profeciaq nisqanmantan. Huk rikhuriypin profeta Isaías rikuran Diosta yupaychanankupaq llapa nacionkunamanta askha runakuna hamushaqta. Profeciaq nisqanman hina, paykuna puran ninakuranku: “Hakuchis, Señor Diospa orqonman wichasun, Jacobpa Diosnin yupaychana wasiman wichasun. Paymi ñanninkunata yachachiwasun, chay ñanninkunatataq purisunchis”, nispa (Isa. 2:1-3). Arí, Jehová Diospa yachachisqanmi kananku karan. ¡May sumaqmi chayqa!

4. ¿Imakunan necesitakun Diospa educasqan kananchispaq?

⁴ ¿Imakunan necesitakun Diospa educasqan kananchispaq? Astawanqa llamp’u samp’an kananchis, chaskikunanchistaq yachachikuyta. Salmista Davidmi niran: “Allinpunin chaninpunin Señor Diosqa [...]. K’umuykukuqkunatan allin ñanninta pusan, paykunamanmi chanin kawsayta yachachin”, nispa (Sal. 25:8, 9). Jesuspas niranmi: “Yayalláy, qanmi kanki hanaq pachapipas kay pachapipas munaychakuq. Kay yachaykunatan yachayniyoqkunamanta yuyayniyoqkunamantawan pakarqanki, huch’uykunamantaq sut’incharqanki, chaymantan yupaychayki”, nispa (Luc. 10:21). Huch’uyaykukuqkunata sumaqta qhawariq Diosta munakuyqa manan sasachu (1 Ped. 5:5).

5. ¿Imaynapin Diosta reqsiyta atiranchis?

 ⁵ Nisunmanchu, ¿ñoqallamantan Bibliamanta cheqaqkaqtaqa tarirani, nispa? Manan; kikillanchismantaqa manan hayk’aqpas Diostaqa reqsiyta atisunmanchu karan. Jesusmi niran: “Manan pipas ñoqaman hamuyta atinmanchu, kachamuwaqniy Yaya payta mana pusamuwaqtinqa”, nispa (Juan 6:44). Arí, Jehová Diosmi pusamun allin willakuykunata predicakusqanwan santo espiritunwan ima oveja hina manso runakunata, paykunan kanku ‘llapa nacionkunamanta valorniyoq kaqkuna’ (Ageo 2:7, NM). ¡Maytachá agradecekunki qanta Jehová Dios Churinman pusasqasuykimantaqa! (Leeychis Jeremías 9:23, 24.)

Runakunatan yanapan aswan allinta kawsanankupaq

6. ¿Imaynatan runakunata yanapashan Jehová Diosta ‘reqsisqanku’?

⁶ Isaías libropi tarikuq profecian huk rikch’anachiywan willan imaynata runakuna kay tiempopi kawsayninkuta cambiashasqankumanta. Ñawpaqpi millay maqakuq runakunan kunanqa llamp’u kapunku (leeychis Isaías 11:6-9). Wakinqa wak nacionmanta, ayllumanta, hinallataq wak costumbreyoq kasqankuraykun cheqninakuranku, kunantaq kuska thakpi kawsanku. Rikch’anachiypi nisqanman hina, ‘espadankutapas yapuna rejakuna[man]’ tukuchipunkuman hinan (Isa. 2:4). ¿Imaraykun paykuna cambiaranku? Jehová Diosta ‘reqsisqankuraykun’ hinallataq paymanta yachasqankuman hina kawsasqankurayku. Diosta serviq runakunaqa huchayoqña kanku chaypas, pachantinpin wayqe panantin hina kawsanku. Diospa yachachikuynin ancha valorniyoq kasqanqa rikukun, pachantinpi allin willakuykunata predicakusqanpin, chay willakuykuna runakunaq kawsayninta cambiasqanpi ima (Mat. 11:19).

7, 8. a) Diospa yachachikuyninqa ‘allin pukarakunatan’ thunin, ¿mayqenkunan chaykuna? b) Diospa yachachisqanman hina kawsayqa paytan hatunchan, ¿ima ejemplon chayta rikuchin?

⁷ Cristianokuna runakunaman yachachisqankutan apóstol Pablo rikch’anachiran espiritual maqanakuywan. Paymi qelqaran: “Maqanakunayku armakunaqa manan kay pachaq arman hinachu, aswanpas chaykunaqa Diospa qowasqanku atiyniyoq armakunan, allin pukarakunata thuninapaq. Ahinatan pantasqa yuyaykuykunatapas Diospa yachayninta hark’aq tukuy hatunchakuykunatapas thuniyku”, nispa (2 Cor. 10:4, 5). ¿Ima “allin pukarakunata[n]” Diospa yachachikuynin thunin? Wakinmi pantasqa religionkunaq yachachikuynin, yanqa creenciakuna, runakunaq filosofía yachachikuyninku ima (Col. 2:8). Diospa yachachikuyninmi runakunata yanapan mana allin ruwaykunata saqepuspa paypa sonqonman chayaqta kawsanankupaq (1 Cor. 6:9-11). Chaymantapas yanapanmi familiapi aswan allinta kawsanankupaq, imapaq kawsasqankuta yachaspa suyakuyniyoq kanankupaqpas. Chhayna educaciontan kay tiempopiqa astawan necesitakun.

⁸ Jehová Diospa yanapayninwan runakunaq allin ruwasqanqa huknin honrado kaymi, chaytan rikuchin qatimuqpi willakuy (Heb. 13:18). India nacionpin huk warmi Bibliata estudiayta qallariran hinaspa mana bautizasqa publicadora kapuran. Huk p’unchaymi, Huñunakuy Wasita sayarichiypi yanapakusqanmanta wasinman kutipushaspa, paraderopi qorimanta cadenata tarikusqa. Wakchaña karan, cadenapas 800 dolaresña valeran chaypas, comisariamanmi chay cadenata entregananpaq aparan, paytaqa huk umalliqmi riysiran. Atiendeq policiaqa manan creeytapas atisqachu. Qhepamanmi huk policía payta tapuran imarayku chay cadenata kutichipusqanmanta, hinan payqa niran: “Ñoqataqa Bibliaq yachachikuyninkunan cambiawan, chayraykun kunanqa honrada warmi kani”, nispa. Admirakuspan policiaqa umalliqta niran: “Kay llaqtapiqa 38.000.000 runakunan tiyan. Sichus qan chunka runallatapas yanapawaq kay warmi hina kanankupaq chayqa, may sumaqmi kanman”, nispa. Diospa yachachiyninqa pachantinpin millonninpi runakunata yanapashan aswan allinta kawsanankupaq. ¿Manachu chay huk allin razón Diosta hatunchananchispaq?

9. ¿Imaraykun Bibliata estudiaq runakuna atinku mana allin kawsasqankuta saqepuyta?

⁹ Runakunaqa mana allin kawsasqankuta saqepunku  Jehová Dios espiritunwan yanapasqanraykun, Bibliaq yachachisqanman hina kawsasqankurayku ima, yachachiyninqa atiyniyoqmi runakunata cambiananpaq (Rom. 12:2; Gál. 5:22, 23). Colosenses 3:10 texton yuyaychawanchis: ‘Mosoq runa-kaywan p’achawan hina churakuychis. Kamaqniykichis Diosmi paypa rikch’ayninman hina chay mosoq runata mosoqyachishan payta allinta reqsisqaykichisman hina’, nispa. Bibliaq yachachiyninqa atiyniyoqmi imaynachus runa sonqonpi kasqanta sut’iman orqonanpaq, imayna yuyaykusqanta, sientesqanta cambiananpaqpas (leeychis Hebreos 4:12). Maypachachus huk runa Bibliamanta cheqaqta yachan hinaspa Diospa kamachikuyninkuna kasukuyta qallarin chayqa, atinmanmi Diospa amigon kayta, wiñay kawsay suyakuytapas.

Jehová Diosqa preparawanchismi hamuq tiempopaq

10. a) ¿Imaraykun Jehová Dioslla hamuq tiempopaq allinta preparawasunman? b) ¿Imakunan pachantinpi sucedenanpaqña kashan?

¹⁰ Diosqa yachanmi imakuna pisi tiempollamantaña sucedenanta, chayraykun paylla hamuq tiempopaqqa allinta preparawasunman. Payqa yuyaykunñan qhepaman imaynapi runakuna kawsanankuta (Isa. 46:9, 10). Biblian willan ‘Diospa hatun p’unchaynin qayllaykamushasqanmanta’ (Sof. 1:14). Chay p’unchaypin hunt’akunqa Proverbios 11:4 texto, chaypin nin: “Qhapaq kaykunaqa juicio p’unchaypi manan imapaqpas valenqachu, chanin-kaymi ichaqa wañuymanta qespichin[qa]”, nispa. Satanaspa kamachisqan pachata Dios juzgaqtinqa, paywan allinpi kaymi aswan importanteqa kanqa. Qolqeqa manan imapaqpas valenqachu, Ezequiel 7:19 nisqanman hina, “qolqenkutapas qorinkutapas callekunamanmi q’opata hina wikch’upunqaku”. Chayta yachaymi yanapawanchis imatapas allin yuyaywan decidinanchispaq.

11. ¿Imaynatan Diospa yachachiynin hatun p’unchayninpaq preparawanchis? Hukninmanta willay

¹¹ Diospa yachachiyninqa, hukninpi yanapawanchis aswan allin kaqkunata ñawpaqman churananchispaq, chhaynapin hatun p’unchayninpaq preparawanchis. Pablon Timoteoman qelqaran: “Kay pachapi qhapaqkunata kamachiy ama hatunchakuq kanankupaq, amataq qhapaq kaykunamanpas k’askakunankupaq, aswanpas kawsaq Diosman hap’ipakunankupaq”, nispa. Manaña qhapaqchu kasunman chaypas, chay yuyaychayqa anchatan yanapawasunman. ¿Imarayku? Chaypin niwanchis, qhapaq kaykunata maskhananchispaq kallpachakunanchismantaqa ‘allinkaqta ruwananchispaq’ hinaspa ‘allinkunata ruwaspa t’ikarinanchispaq’. Dios serviyninchista ñawpaqman churasun chayqa, ‘hamuq tiempopaqmi’ asegurakushasun (1 Tim. 6:17-19). Chayta ruwaspaqa allin yuyayniyoq kasqanchistan rikuchisun, Jesuspa nisqan hina, ‘huk runachus kay pachantinpi lliw kaqkunata paylla hap’ikapunman kawsaynintataq chinkachikapunman chayqa, ¿ima allintaq paypaq kanman?’ (Mat. 16:26, 27). Ñataq Diospa p’unchaynin chayamushanña chayqa, sapankanchismi tapukunanchis: “¿Maypin qhapaq kaykunata huñushani?  ¿Diospa kamachinchu kani icha qhapaq kaykunaqchu?” nispa (Mat. 6:19, 20, 24).

12. ¿Imaraykun mana desanimakunanchischu pipas Diospaq llank’ayninchista pisichaqtin?

¹² ‘Allinkunata ruwasqanchismanta’ wakinqa, Reinomanta predicay runakunaman yachachiy iman, chaykunataqa hunt’anchismi importante kasqankurayku (Mat. 24:14; 28:19, 20). Ichaqa, qallariy siglopi hinan wakin runa chay llank’ayninchista pisichanku (leeychis 1 Corintios 1:18-21). Ichaqa manan chayraykuchu allin willakuykunaqa mana valeqman tukupun, nitaqmi chayraykuchu desanimakunchis chay willakuykunata tiempo kashaqtinraq runakunaman willayta (Rom. 10:13, 14). Chaymantapas, sichus runamasinchista yanapasun Diospa educacionninwan aswan allinta kawsanankupaq chayqa, askha bendicionkunatan ñoqanchispas chaskisun.

Diosqa bendecinmi payrayku imaymana saqeqkunata

13. ¿Imakunatan apóstol Pablo saqeran allin willakuykunarayku?

¹³ Apóstol Pabloqa waynacha kasqanmantapachan allin educacionta chaskiran judío runakuna ukhupi t’ikarinanpaq. 13 watallanpin kashanman karan Tarso llaqtanmanta Jerusalenman ripuqtin, chaypi Leyta yachachiq allin reqsisqa Gamalielwan estudiamunanpaq (Hech. 22:3). Pabloqa allin estudianten karan, sichus seguillanman karan chayqa, allin reqsisqa runan kanman karan judío runakuna ukhupi (Gál. 1:13, 14). Ichaqa allin willakuykunata chaskispa chaykunamanta predicayta qallariqtinqa, saqepuranmi tukuy chaykunata. ¿Ñakapakuranchu chay ruwasqanmanta? Manapunin. Paymi niran: “Tukuy imaymanayoq kaytapas mana valeq q’opata hinan qhawani Señorniy Jesucristota reqsinaypaq. Payta reqsiymi may chaniyoqpuniqa. Cristoraykun lliwta saqepuni, hinaspa q’opata hina qhawarini Cristota chaskikuspa”, nispa (Fili. 3:8).

14, 15. ¿Ima bendicionkunatan chaskinchis ‘Diospa llank’aysiq-masinkuna’?

¹⁴ Kunanpas Pablo hinan cristianokunaqa imaymanata saqenchis allin willakuykunarayku (Mar. 10:29, 30). Ichaqa, ¿chayraykuchu necesidadpi tarikusun? Qallariypi rimasqanchis Robertpa imayna sientekusqanta qhawarisun, rimasqanmi rikuchin, pay hina askha hermanokuna sientekusqankuta; paymi niran: “Manan imamantapas ñakapakunichu. Tukuy tiempoywan Diosta servisqayqa anchatan kusichiwan. Chaypin rikurani ‘may sumaqchus Señor Diosqa kasqanta’. Dios serviyninpi churakusqay metakunata aypanaypaq imatapas saqesqaymantaqa, astawanraqmi Jehová Diosqa  kutichipuwan. Chayraykun sientekuni manapas imatapas saqeymanchu karan hinata”, nispa (Sal. 34:8; Pro. 10:22).

¹⁵ Sichus qanpas unayña predicashanki, runamanpas yachachishanki chayqa, rikurankichá Jehová Diosqa sumaq sonqo kasqanta. ¿Hayk’aqllapas repararankichu predicashaqtiyki santo espíritu yanapasqasuykita? ¿Rikurankichu imaynata runakuna kusikuranku allin willakuykunata uyarinankupaq Jehová sonqonkuta kichariqtin? (Hech. 16:14.) ¿Yanaparasunkichu astawan predicanaykipaq ima hark’aqniykitapas atipanaykipaq? ¿Repararankichu ima sasachakuypipas tarikuqtiyki yanapasqasuykita? ¿Kallpacharasunkichu sasachakuykunawan ñit’isqa hina tarikuqtiyki manaña atinaykipaq piensaqtiyki? (Fili. 4:13.) Servicionchispi Diospa yanapayninta rikuqtinchisqa, aswan cheqaqmi pay ñoqanchispaq, astawantaqmi payman k’asqakunchis (Isa. 41:10). May sumaqmi ñoqanchispaqqa, ‘Diospa llank’aysiq-masinkuna’ kaspa runakunaman Bibliamanta yachachiyqa (1 Cor. 3:9).

16. ¿Imatan piensanki Diosmanta runakunaman yachachinaykirayku imaymana saqesqaykimanta?

¹⁶ Askha runakunan munanku ruwasqanku mana hak’aqpas qonqakunanta. Ichaqa yachasqanchis hina, runakunaq ruwasqan ancha allinña kaqtinpas, tiempowanqa qonqasqan kapun. Kay tiempopi sutinta ch’uyanchananpaq Jehová Diospa ruwasqanmi ichaqa mana hayk’aqpas qonqasqachu kanqa (Pro. 10:7; Heb. 6:10). Chhaynaqa, anchata valorasun kay tiempopi Diosmanta runakuna educaypi llank’asqanchista.

¿Imanispan kutichiwaq?

• ¿Imakunan necesitakun Diospa educasqan kananchispaq?

• Diospa yachachiyninqa yanapanmi runakunata aswan allinta kawsanankupaq, ¿imaynatan chayta yachanchis?

• ¿Ima bendicionkunatan chaskinchis Diosmanta yachanankupaq hukkunata yanapasqanchismanta?

[Tapuykuna]

[23 paginapi foto]

Diospa yachachisqan runakunaqa pachantinpin huk nisqalla kawsanku

[24 paginapi foto]

May sumaq bendicionmi ‘Diospa llank’aysiq-masinkuna’ kayqa