¿Tayta mamaychu religionniyta akllanan?

POLONIA nacionpi askha runakunan Jehová Diospa testigonkunata ninku: “Nacesqay religionnillaypin wañunaykama kasaq”, nispa. Chhayna nisqankuwanmi rikuchinku tayta mamankuq religionnillanta qatikusqankuta. Chhaynatapaschá tiyasqayki llaqtapi runakunapas rimanku. Chhaynata niq runakunamanta askhan costumbreta hinalla qhawarinku religionninkuta. ¿Bibliaq yachachikuyninta tayta mamankumanta otaq abuelonkunamanta yachaq Testigonkunawanri sucedenmanchu chay?

Timoteowanqa manan chayqa sucederanchu. ‘Wawa kasqanmantapachan’ paytaqa maman hatun mamanpiwan Diospa Simin qelqakunamanta yachachiranku, chhaynapi Diosta munakunanpaq iñinanpaqwan; paykuna hinataq allinta repararan cristianokunaq religionnin cheqaq kasqanta. Chhaynapin payqa Jesucristomanta Diospa Simin qelqakunaq nisqanpi ‘iñiran’ (2 Tim. 1:5; 3:14, 15). Chhaynaqa, Tayta mamakunaña wawankuta yanapanku Diosta servinankupaq chaypas, wawakunan kallpachakunanku tukuy sonqowan Diosta servinankupaq (Mar. 8:34).

Allintan asegurakunanchis cheqaq religionpi kasqanchista. Chhaynapin iñiyninchispi qaqata sayasun, Jehová Diostapas tukuy sonqowan servisun imaña kaqtinpas (Efe. 3:17; Col. 2:6, 7).

¿Imatan wawakuna ruwananku?

Albertmanta yachasunchis. * Paypa tayta mamanqa Jehová Diospa testigonmi kanku, chaymi wawachanmantapacha Bibliamanta yachachiranku. Paymi nin: “Yacharanin tayta mamaypa yachachiwasqanqa cheqaq kasqanta; ichaqa manan gustawaqchu imayna kawsanayta niwashanankuta”, nispa. Wayna sipas, chhaynatapaschá qanpas sientekunki, chhayna kaqtinqa kallpachakuy imayna kawsanaykitachus Dios munan chayta yachanaykipaq. Chhaynapin mana sasachakuspalla Diospa munayninta hunt’anki (Sal. 40:8). Albertmi nillantaq: “Qallariypiqa sasan karan Diosmanta mañakuy, chhaynaña kaqtinpas kallpachakuranin mañakushanallaypaq. Pisi tiempollapitaq reparakurani allin kaqta ruwanaypaq kallpachakuqtiyqa Jehová Dios allinta qhawariwananta, chaymi kallpachakurani cambianaypaq”, nispa. Sichus qanpas Dioswan allinpi kanaykipaq kallpachakunki chayqa, tukuy sonqowanmi payta kasukunki (Sal. 25:14; Sant. 4:8).

Yaqapaschá ima pukllaypas gustasunki. Sichus mana yachawaqchu chay imayna pukllakusqanta chayri, ¿gustasunkimanchu? Manan  riki. Chhaynaqa, ima pukllaypas gustawananchispaqqa allintan yachana imayna pukllakusqanta, chaymantataq practicana. Chhaynallataqmi Diosta serviypas. Tukuy sonqowan payta servinaykipaqqa allintan preparakunayki huñunakuykunapaq, chaypi comentanaykipaqpas. Wayna sipasllaraq kanki chaypas, allin ejemploykiwanmi hukkunata kallpachawaq (Heb. 10:24, 25).

Kaqllataqmi kanman predicanapaqpas. Manan kamachisqa hinachu predicanayki, aswanmi Diosta munakusqaykirayku. Chaymi tapukuwaq: “¿Imaraykun Jehová Diosmanta rimayta munani? ¿Imaraykun payta munakunay?” nispa. Jehová Diosqa munakuq tayta hinan, chaymi allinta reqsinayki. Profeta Jeremiaswanmi payqa niran: “Maskhawaspan tariwankichis, tukuy sonqowan maskhawasqaykichisrayku”, nispa (Jer. 29:13, 14). ¿Imatan ruwananchis Diosta tukuy sonqowan maskhananchispaq? Jakubmi nin: “Huch’uychaymantapachan huñunakuyman predicacionmanpas riq kani, ichaqa tayta mamay ruwasqanraykullan. Maypachachus Jehová Diosta allinta reqsirani allinpitaq paywan karani, chayraqmi sonqomanta servirani”, nispa.

Kusisqa predicanaykipaqqa allin amigokunatan maskhanayki. Biblian nin: “Yachayniyoqkunawan puriqqa yachayniyoqmi kapunqa”, nispa (Pro. 13:20). Chhaynaqa, pikunachus kallpachakushanku Dios serviypi astawan ruwanankupaq, kusisqataq payta servishanku, paykunawanmi amigota ruwawaq. Jola sutiyoq cristianan nin: “Ñoqataqa anchatan yanapawaran tukuy sonqowan Diosta serviq wayna sipaskunawan huñukuy, chaymi yanapawaran kusikuywan sapa kuti predicashanallaypaq”, nispa.

¿Imatan ruwananku tayta mamakuna?

Jolan nillantaq: “Anchatan tayta mamayta agradecekuni Jehová Diosta servinaypaq yachachiwasqankumanta”, nispa. Arí, tayta mamakunaqa anchatan wawankuta yanapankuman Dios serviyta akllakunankupaq, chaymi apóstol Pablon qelqaran: “Tayta mamakuna, wawaykichista [...] kasuchikuspa uywaychis, Señormanta yachachispa”, nispa (Efe. 6:4). Chay textoq nisqan hina, tayta mamakunaqa Diospa munasqanman hinan wawankuta uywananku, manataq paykunaq munasqankuman hinachu. Chhaynaqa: “Kaykunatan ruwanayki Dios serviyniykipi”, nispa ninankumantaqa aswanmi kallpachananku Diospa munasqanman hina kawsananpaq.

Ñawpa tiempopi judío tayta mamakunatan Diosqa kamachiran: “Chaykunamanta [wawaykichisman] rimapayallaychispuni wasipi kashaspa, purishaspapas, hinallataq puñuykushaspa, hatarishaspapas”, nispa (Deu. 6:6, 7). Chaytan tayta mamakunaqa ruwananku kay tiempopipas. Ewamanta Ryszardmantawan yachasunchis. Paykunaqa kinsa wawayoqmi kanku. Paykunan ninku: “Wasiykupiqa Diosta tukuy tiempo serviymantan rimallaqpuni kayku”, nispa. ¿Yanaparanchu wawankuta chay ruwasqanku? Arí, chaymi paykuna nillankutaq: “Huch’uyllaraq wawaykuna kashaspankun Bibliamanta Allin Yachachiq Kanapaq Escuelapi matriculakuranku, chaymantan predicayta qallariranku, hinamantataq  bautizakapuranku. Chay qhepamanmi tukuy tiempo Diosta serviyta qallariranku”, nispa.

Tayta mamakunaqa allin ejemplotan qonanku wawankuman. Ryszardmi nillantaq: “Esposaywanmi allinta ninakurayku huñunakuypi kashaspa wasipi kashaspapas Diospaq hinapuni kawsanaykupaq”, nispa. Chaymi tayta mamakuna tapukunanku: “¿Diosmanta mañakusqaypi, Bibliata imayna estudiasqaypi, imayna predicasqaypi, imakunawan q’ochukusqaypi, qolqeta imayna qhawarisqaypi, iñiqmasikunamanta imayna rimasqaypi, ima ruwasqaypipas rikunkuchu wawaykuna Jehová Dios munakusqayta?” nispa (Luc. 6:40). Tayta mamakuna, wawakunaqa ratullan reparanku rimasqaykichisman hinachus imatapas ruwashankichis chayta. Chaytan mana qonqanaykichischu.

Chaymantapas tayta mamakunaqa allintan wawankuman imatapas yachachinanku. Diospa Simin Qelqan nin: “Wawata yachachiy imaynatachus kawsananpaq”, nispa (Pro. 22:6). Chaytan Ewawan Ryszardpiwan ruwaranku, paykunan ninku: “Sapankankuwanmi Bibliata estudiaq kayku”, nispa. Manaña sapaqpichu sapanka wawankuman estudiachinkuman chaypas, tayta mamakunaqa sapanka wawankuq imachus necesitasqanman hinan yachachinanku. Hinallataq kallpachakunanku allin yuyaywan sumaqllata yachachinankupaqpas. “Manan millay takikunataqa uyarinachu”, nispalla ninankumantaqa, Bibliaq nisqanman hinan wawankuta yachachinanku allin kaqta ruwanankupaq.

Wawaykikunaqa allintapaschá yachanku paykunamanta ima munasqaykita, chayman hinapaschá kawsashankupas; ichaqa asegurakunaykin sonqonman yachanaykipaq. Biblian nin: “Chinkay-chinkay ukhu unu hinan sonqollapi yuyaykusqakunaqa, yuyayniyoq runan ichaqa chaykunata sut’iman horqoyta yachan”, nispa (Pro. 20:5). Chhaynaqa allin reparaqmi kanayki; ima mana allinkunapaschá wawaykikunaq sonqonpi rikhurishanman. Chhayna kaqtinqa usqhayllan chayta allichanayki. ¿Imatan ruwawaq? Mana phiñarikuspallan niwaq paykunamanta llakikusqaykita, hinaspa munayllata tapuwaq. Ichaqa manan nishutachu tapupayanayki. Sichus paykuna reparanqaku paykunamanta llakikusqaykita chayqa, sonqonkumanmi chayanki, chhaynapitaq qanwan yanapachikullanqaku.

 ¿Imatan huk iñiqmasinchiskuna ruwananku?

Wawakuna uywayqa tayta mamaq ruwananmi. Chhaynaña kaqtinpas, huk iñiqmasikunapas yanapankumanmi chay wawakuna Diosmanta yachasqankuta ancha allinpaq qhawarinankupaq, umalliqkunan astawanqa chaypaq yanapankuman. Sichus wawakunaq maman otaq taytan mana Diosta servinchu chayqa, astawanmi paykunata yanapana.

¿Imatan umalliqkuna ruwankuman wayna sipaskuna Jehová Diosta munakunankupaq, hinallataq kusisqa allinpaq qhawarisqa sientekunankupaqpas? Polonia llaqtayoq Mariusz sutiyoq umalliqmi nin: “Umalliqkunaqa rimashanallanchismi wayna sipaskunawan, ichaqa manan sasachakuykuna kaqtillanchu, aswanmi ima ratupas. Paykunawanmi rimasunman predicacionpi, huñunakuy tukuytapas; otaq wasinchisman invitasunman chaypi imallatapas mikhuykuspa rimananchispaq”, nispa. Chaymantapas umalliqkunaqa munayllatan wayna sipaskunata tapunkuman imaynachus sientekusqankuta. Chhaynapin paykunaqa familiankuta hina qhawarinqaku iñiqmasinchiskunata.

Sichus umalliq kanki chayqa, ¿kallpachakushankichu llapan wayna sipaskunata reqsinaykipaq? Ñawpaqpi rimaranchis Albertmanta. Paymi kunan umalliq, paysi wayna kashaspa askha sasachakuykunapi tarikusqa. Chaymi nin: “Huk kutinmi umalliqkuna visitamuwaranku kallpachawanankupaq”, nispa. Wayna sipaskunapi interesakusqanchista rikuchillasunmantaqmi tukuy sonqowan Diosta servinankupaq mañapuspa (2 Tim. 1:3).

Wayna sipaskunataqa huñunakuykunapi imapas ruwaykunapi yanapakunankupaqmi kallpachana. Chhaynapin mana kay pachapi yanqa ruwaykunapichu yuyayninku kanqa. Predicaq lloqsinaykichispaqpas invitawaqmi, chhaynapin amigota ruwawaqchis. Chaymantapas, imatapas kuska ruwanaykichispaq rimawaqchis. Jolan nin: “Huk precursoran ñoqawan rimaran hinaspa yanapawaran, chayraqmi sonqomantapuni predicaq lloqsiyta munarani”, nispa.

Sapankan decidikunan

Wayna sipas, ¿imatan ruwanki? Manaraqchus bautizakuranki chayqa, ¿bautizakuyta munawaqchu? Chhayna kaqtinqa, yuyariy: bautizakunaykiqa Jehová Diosta cheqaqtapuni munakuspan, manan tayta mamayki nisqasuykiraykuchu.

Chhaynaqa kallpachakuy Jehová Dioswan amigontin kanaykipaq, yachachikuyninkunatapas sonqoykipi allinta hap’inaykipaq. Diosmi profeta Isaiaswan niran: “Ama manchakuychu, qanwanmi ñoqaqa kashani, ama pisipaychu, ñoqaqa Diosniykin kani, ñoqan kallpachasqaykipas yanapasqaykipas, ñoqan hap’iykusqaykipas atipachisqaykipas”, nispa (Isa. 41:10).

[Uranpi willakuy]

[4 paginapi foto]

Wawaykiq sonqonpi ima yuyaykusqanta reparay

[6 paginapi foto]

Jehová Diosta munakusqaykiraykun bautizakunayki