Allin ‘saphichasqa, teqsipi’ allin takyasqa

¿RIKURANKICHU hayk’aqllapas sinchi wayraq chhaphchisqan sach’ata? Sinchitaña chhaphchin chaypas manan kunpanchu. ¿Imarayku? Allin saphichasqa kasqanrayku. Ñoqanchispas chay sach’a hina kaspaqa atipasunmanmi hatun sasachakuykunata. Arí, allin ‘saphichasqa, teqsipi’ allin t’akyasqa kaspaqa qaqatan sayasun (Efe. 3:14-17). Ichaqa, ¿iman chay ‘teqsi’?

Biblian willan iñiq t’aqapi ‘kikin Jesucristo esquina hap’iq teqsi rumi’ kasqanta (Efe. 2:20; 1 Cor. 3:11). Kallpachawanchistaqmi ‘paywan hukllachasqa kawsanapaq. Paypi saphichasqa kawsanapaq, takyachisqa kanapaq, [...] iñiypi kallpachakunanchispaqwan’. Chay yuyaychayta kasukusun chayqa manan imapas iñiyninchispi urmachiwasunchu, manan ‘sumaq simikunawan q’otuqkunaq’ ‘llulla yachachikuyninkutapas’ kasusunchu (Col. 2:4-8).

“Anchonmanpas, wask’anmanpas, ukhunmanpas, sayayninmanpas”

¿Imaynapin ‘saphichasqapas [...] iñiypi kallpachasqapas’ kasunman? Sonqonchispi Diospa simin saphichakunanpaq hina Bibliata allinta estudiaspan. Jehová Diospunin munan cheqaq yachayta ‘llapa ch’uya runakunawan kuska [...] anchonmanpas, wask’anmanpas, ukhunmanpas, sayayninmanpas’ entiendenanchista (Efe. 3:18). Manan ‘qallariy yachachikuykuna’ yachasqallanchiswanchu kusisqa kaspa hawa-hawallanta estudiananchis (Heb. 5:12; 6:1). Aswanmi ñawpaqpi yachasqanchismanta astawan yachananchis (Pro. 2:1-5).

Ichaqa yachaypi saphichasqa takyachisqa kanapaqqa manan yachayllatachu tarinanchis. Satanaspas allintan yachan Bibliaq yachachisqantaqa. Chaymi ñoqanchisqa ‘Cristoq munakuyninmantawan’ yachananchis, chay yachaymi ‘tukuy yachaymantapas aswan hatunraq’ (Efe. 3:19). Jehová Diosta cheqaq yachaytawan munakuspa Bibliata estudiasun chayqa, yachasqanchismi ­iñiyninchista wiñachinqa (Col. 2:2).

 Qhawariy maykama yachasqaykita

¿Manachu qanpas qhawariwaq qallariy yachaykunata maykama entiendesqaykita? Chaymi tanqarisunkiman Bibliata aswan allinta estudianaykipaq. Chaypaq yanapachikusun Pablo Éfeso llaqtapi cristianokunaman carta qelqasqanwan, chaymi kashan “Éfeso llaqtapi iñiqkunaman” nisqa recuadropi. Chaypi versiculokunata leey, hinaspa qhawariy kinranpamanta qelqasqa simikunata maykama entiendesqaykita. Kunanqa sapankata t’aqwirisun.

Akllasqa kanku “manaraq kay pacha kamasqa kashaqtin”

Qallariypin, Satanás Diospa kamachikuynin contra hatarispa, runakuna kamasqanmanta mana allinta rimaran. Chaymi Jehová Dios yuyaykuran wakin runakunata wawankunata hina adoptaspa hanaq pachaman apapunanpaq, chhaynapi Saqrata lliw ñak’ariytapas chinkachiypi yanapakunankupaq. Chaymantan Pablo iñiqmasinkunata niran: “[Diosmi] ñawpaqmantaña yuyaykurqan Jesucristopi adoptasqa wawankuna kananchispaq”, nispa. Arí, paykunatan Dios akllasqaña Cristowan kuska reykuna sacerdotekuna kanankupaq (Rom. 8:19-23; Apo. 5:9, 10). Ichaqa manan sapanka runatachu akllaran, aswanmi huk t’aqa runakunata akllaran (Apo. 14:3, 4).

Pablon iñiqmasinkunata niran: ‘Manaraq kay pacha kamasqa kashaqtinmi’ akllasqa karanchis, nispa. ¿Ima ninantan chayta nisharan? Manan Hallp’apas runakunapas manaraq kamasqa kasqanku tiempomantachu  rimashan. Chay tiempomanta rimashanman chayqa, Diospa munayninpichá Adanpas Evapas huchallikunkuman karan. Chhayna kaqtinqa manachá chaninchu kanman karan paykunata huchachasqan. Chhaynaqa, ¿hayk’aqmi Jehová Dios yuyaykuran kamachikuynin contra sayarisqankuta allichananpaq? Adán Evaq huchallikusqanku qhepamanmi, manaraq wawakunayoq kashaqtinku otaq manaraq kay pachapi huchallikuq runakuna mirayta qallarishaqtin.

“Ancha hatun munakuyninpi”

‘Diospa ancha hatun munakuyninpi [otaq khuyapayakuq kayninpi]’ ruwasqanmantan Pablo rimaran Efesios cartapi qallariy versiculokunapi. ¿Imarayku chayta niran? Kayta rikuchinanpaq: Jehová Diosqa manan kamachisqachu kashan huchasapa runakunata qespichinanpaq.

Manan ñoqallanchismantaqa imata ruwaspapas huchamanta kacharichisqa kasunmanchu. Ichaqa Jehová Diosmi ancha hatun munakuyninpi Churinta kachamuran kacharichiwananchispaq. Pablo nisqan hina, Diospa ancha khuyapayakuq kayninpin huchasapa runakuna kacharichisqa kanchis.

Diospa yuyaykusqanmanta ‘pakasqa yachay’

Qallariypiqa manan Jehová Dios pimanpas willaranchu Saqraq ruwasqankunata imayna allichananta, ‘pakasqa yachaymi’ karan (Efe. 3:4, 5). Ichaqa iñiq t’aqa cristianokuna chayllaraq rikhurimushaqtinmi paykunaman willaran qallariypi runakunapaq Hallp’apaqpas munasqanta imayna hunt’ananmanta. Pablon willaran ‘tiempokuna hunt’akusqan’ qhepaman Jehová Dios ‘yuyaykusqanman’ hina hanaq pachapi kay pachapi kaqkunatapas llapanta huñuykunanmanta.

Ñawpaqtaqa hanaq pachapi kaqkunatan huñuykuran, chaypaqmi Pentecostés p’unchay 33 watamantapacha runakunata akllayta qallariran Cristowan kuska kamachikamunankupaq (Hech. 1:13-15; 2:1-4). Qhepamantaq kay Hallp’api kaqkunata huñuyta qallariran Cristo kamachikamuqtin paraisopi tiyanankupaq (Apo. 7:14-17; 21:1-5). “Yuyaykurqan” nisqa simiqa manan Reinoq ruwananmantachu nishan, Reinoqa 1914 watapiñan takyachisqa karan. Aswanpas Jehová Dios hanaq pachapi kay pachapi kamasqankunata hukllachananpaq tukuy ruwasqanmantan nishan.

‘Yuyaykuyninchispi [...] allin takyasqa runa kasun’

Tiemponchista t’aqaspa Bibliata estudiasun chayqa entiendesunmi “anchonmanpas, wask’anmanpas, ukhunmanpas, sayayninmanpas” Bibliaq yachachikuyninta. Ichaqa Satanasmi imaymana ruwananchiskuna tumpalla estudiananchista qonqachiwasunman otaq saqechiwasunman. Amapuni kasusunchu. Aswanpas Jehová Dios “yuyayta” qowasqanchiswan ‘yuyaykuyninchispi [...] allin takyasqa runa kasun’ (1 Juan 5:20; 1 Cor. 14:20). Allintan imapi iñisqanchismantapas yachananchis chhaynapin tapuwaqninchisman ‘suyakuyniykichismanta [...] allinta kutichisun’ (1 Ped. 3:15).

Pabloq cartanta leekushaqtin chaypi kawaq karan chayri, ¿manachu ‘Diospa Churinta allinta reqsinaykipaq’ ­astawan kallpachakuwaq karan? (Efe. 4:13, 14). Chaytapunichá ruwawaq karan. Chayrayku kallpachakuy astawan estudianaykipaq. Jehová Diosta tukuy sonqowan munakusqayki, Bibliamanta k’apakta yachasqayki iman yanapasunki Cristopi allin ‘saphichasqa, teqsipi’ allin taqyachisqa kanaykipaq. Chayta ruwaspan Satanaspa contranpi qaqata sayanki, kay sasa tiempopi ima sasachakuymanña churasunki chaypas (Sal. 1:1-3; Jer. 17:7, 8).

[27 paginapi dibujo recuadropiwan]

“Éfeso llaqtapi iñiqkunaman”

“Señorninchis Jesucristoq Yayan Dios yupaychasqa kachun, paymi Cristowan huklla kasqanchisrayku Santo Espirituq tukuy saminchayninkunawan hanaq pachapi saminchawanchis. Diosmi Cristopi akllawarqanchis manaraq kay pacha kamasqa kashaqtin, paypa ñawpaqenpi ch’uya mana huchachana kananchispaq. Munakuyninraykun ñawpaqmantaña yuyaykurqan Jesucristopi adoptasqa wawankuna kananchispaq, allin munayninpi yuyaykusqanman hina. Chay hinaqa, payta yupaychasun musphana sumaq sonqo-kayninmanta, munakusqan Churinpi mana imaraykulla chaskiwasqanchismantawan. Diosmi ancha hatun munakuyninpi Churinpa yawar hich’asqanwan kacharichiwarqanchis huchanchiskunata pampachawaspanchis. Chay munakuynintan Diosqa llimp’arichispa tukuy yachayta allin yuyayniyoq-kayta qowarqanchis. Hinallataq allin munayninman hina pakasqa munayninta reqsichiwarqanchis. Chaytan Cristopi hunt’ananpaq yuyaykurqan, chaymi tiempokuna hunt’akuqtinña hanaq pachapi kaqkunatapas kay pachapi kaqkunatapas llapallanta Cristowan huñuykunqa, pay lliwpi uma kananpaq.” (Efe. 1:3-10.)