Familiapi Diosta yupaychaymi yanapawasun qespichisqa kanapaq

‘TUKUY-ATIYNIYOQ Diospa hatun taripay p’unchayninpi hatun maqanakuyqa’ imayna manchakunaraqchá kanqa (Apo. 16:14). Profeta Miqueasmi chay p’unchaymanta rimaspa kaykunawan rikch’anachiran: ‘Wayq’okunan ch’eqtakunqa, orqokunan chullurinqa ninaman churasqa wira hina, qhatata phaqchaykuq unu hina’ (Miq. 1:4). ¿Imaynan kanqaku Jehová Diosta mana yupaychaq runakuna? Wañunqakun. Chaymantan Biblia nin: “Señor Diospa wañurachisqanmi teqsimuyuntinpi wikch’u pampa kanqa”, nispa (Jer. 25:33).

Chaymi llapa tayta mamakuna sapallanku wawankuta uywaqkunapas tapukunanku: “¿Qespichisqachu kanqa wawaykuna Armagedón p’unchaypi?”, nispa. Bibliaq nisqan hina, qespichisqan kanqaku, chaypaqmi ichaqa wiñasqankuman hina iñiyninkupi allin takyasqa kananku (Mat. 24:21).

¿Imaraykun familianchiswan kuska Bibliata estudiananchis?

Tayta mamakuna, tukuy atisqaykichistan ruwanaykichis wawaykichista ‘Señormanta yachachinaykichispaq’ (Efe. 6:4). Wawakunaman Bibliamanta yachachiyqa ancha allinpunin. Filipos llaqtapi cristianokunatan Pablo kallpachaspa niran: “Munakusqaykuna, imaynan kasukurqankichispuni hinata, mana qankunawan kashaqtillaychu aswanpas kunanqa astawanpuniraq karupi kashaqtiypas, k’umuykukuspa manchakuspa ima qespisqa kasqaykichispi wiñaychis”, nispa. Llapallanchismi munanchis wayna sipasninchiskunapas chhayna kasukuq kanankuta (Fili. 2:12, MR).

¿Kasukunchu wawayki Jehová Diosta sapallan kashaspapas? ¿Imaynatan qhawarinku escuelanpi? ¿Imaynatan yachachiwaq maypiña kashaspapas Diosta kasukuy allinninpaq kasqanta?

Familiantin Diosta yupaychasqaykichismi wawaykichista yanapanqa iñiyninkupi allin takyasqa kanankupaq. Chaypaqmi kunan qhawarisun kinsa yanapaykunamanta.

Amapuni saqeychu

Biblian willan Jehová Dios señalasqa tiempopi angelninkunawan huñunakusqanmanta (Job 1:6). Chaytan qanpas ruwawaq. Señalasqa p’unchaypi huk horata t’aqay familiaykiwan estudianaykipaq, hinaspa chay horariota respetay. Hinamanpas t’aqawaqmi chay semanapi huk horatawan imapas karuqtin chaypi estudianaykichispaq.

Ichaqa kaymanta cuidakuy: pisi-pisimanta familiapi estudiota pisipaq qhawarispa yuyarispallaña estudianaykichismanta. Ama qonqaychu, wawaykikunatan Satanasqa astawan urmachiyta munan, chaymi paykunata astawan Bibliamanta yachachinayki (1 Ped. 5:8). Sichus familiaykiwan estudianayki horapi televisiontaraq qhawanki otaq ima ruwaypipas kanki chayqa Satanasmi atipasunki (Efe. 5:15, 16; 6:12; Fili. 1:10).

Necesitasqankuman hina yachachiy

Familiapi estudiayqa manan yachaylla-yachananchispaqchu kanan, aswanmi kawsayninchispi yanapawananchis. ¿Imatan chaypaq ruwawaq? Chay estudiopin mayninqa wawaykikunata yachachiwaq sasachakuykunata atipanankupaq. Yachachiwaqmi  predicacionman lloqsinankupaqpas. Yuyaríy, wayna sipaskunaqa ruway atisqankutan kusisqa ruwanku. Sichus ñawpaqmanta yachachinki imayna predicanankuta, tapuykunaman imayna kutichinankutapas chayqa mana manchakuspan predicanqaku (2 Tim. 2:15).

Hinaspapas wawaykikunatan ensayachiwaq huk wayna sipaskuna mana allin ruwaykunaman tanqayuqtin imayna kutichinankupaq. Chaypaqmi yanapachikuwaq Lo que los jóvenes preguntan. Respuestas prácticas (volumen 2) libropi 15 capitulowan. 132, 133 paginakunapi “Estrategia contra la presión de grupo” nisqa recuadropin allin yanapaykuna kashan. Kashallantaqmi tapuykuna, mana allin ruwaykunayman pipas tanqayuqtin ima ruwananpi yuyaykunanpaq. 133 paginaq tukuyninpin nishan: “Ensaya la escena con un familiar o con un adulto en quien confíes”, nispa. Chaytan mayninpi ruwawaqchis familiapi estudiaspa.

Estudiasqaykichispin wawaykikunata yachachiwaq Jehová Diospaq astawan llank’ay allinninkupaq kasqanta. Los jóvenes preguntan (vol. 2) libropi, 38 capitulopi “¿Qué haré con mi vida?” nisqa temapin chaymanta rimashan. Chaykunawan yanapachikuspa wawaykita entiendechiy Jehová Diosta serviy aswan allin ­kasqanta. Rimapayay precursor kananpaq, Betel wasiman otaq Escuela de Entrenamiento Ministerial nisqaman rinanpaq otaq ima llank’aypipas yanapakunanpaq.

Wakin tayta mamakunaqa wawanku precursor otaq misionero kanallanpiña, Betelman rinallanpiña yuyaykuspan manaña reparankuchu allinkuna ruwasqankuta. Allinpunin wawakunata chaykunapaq kallpachay, ichaqa nishuta chayllamanña tanqanki chayqa sayk’upunkumanmi otaq phiñakapunkuman (Col. 3:21). Ama qhepaman ruwanallankupichu yuyaykuy, kunan allinkuna ruwasqankutapas reparay, “allinta ruwarunki wawáy” nispa kallpachay. Yuyaríy, paykunaqa munakusqankuraykun Diosta servinanku manan qanta kusichiyta munaspachu (Mat. 22:37). Aswanpas yanapay Jehová Diosta munakunanpaq chaymi yanapanqa payllamanta munakuywan servinanpaq.

Kusikunankupaq hina yachachiy

Familiapi allin estudiota aparinapaq kinsa kaq yanapayqa kusikunankupaq hina ­yachachiymi. ¿Imatan chaypaq ruwawaq? Familiantinmi uyariwaqchis Diospa llaqtanpi grabasqa dramata, otaq videota qhawaspa chaymanta parlariwaqchis. Bibliatapas ­leewaqchismi hinaspa sapankankuta niwaq rimaqpa kunkanman hina leenankupaq.

Qhawaq, ¡Despertad! revistakunapin familiapaq sumaq yanapaykuna kashallantaq. ¡Despertad! revistapin 31 paginapi “¿Qué respondería usted?” nisqa tema kashan. Predicanapaq Qhawaq revistapitaq lloqsimun  “Wayna sipaskunapaq” nisqa tema, chaypin tapuykuna kashan t’aqwirinapaq. Kallantaqmi wawakunapaq “Wawaykikunata yachachiy” nisqa tema.

Wayna sipaskunapaqpas kashanmi ¡Despertad! revistapi “Los jóvenes preguntan” nisqa tema, Los jóvenes preguntan (vol. 2) libropas. Chay libropin sapanka capitulota tukuspa tarinki: “Y tú, ¿qué piensas?” nisqa recuadrota. Ama chayta pasarullaychu, chayqa manan yachasqata yuyarinallapaqchu aswanmi tayta mama wawakunawan parlarinankupaq.

Ichaqa ama juez hinaqa wawaykita tapupayaychu. Manan leechinaykichu “Tus reflexiones” nisqa paginapi qelqasqanta otaq libropi huk tapuykunaman kutichisqantapas. 3 paginapin tayta mamakunata nishan: “Wawaykichis sonqonkupi yuyaykusqankuta kay libropi qelqanankuta munankichis chayqa prometenaykichismi qelqasqankuta mana leenaykichispaq. Rimasqaykichista hunt’ankichis chayqa yaqapaschá qhepaman paykunallamanta willasunkichis libropi qelqasqankuta”, nispa.

Sichus kallpachakuspa manapuni estudiota saqenkichu, familiaykiq necesitasqanman hina kusikunankupaq hinataq yachachinki chayqa Jehová Diosmi saminchasunki. Diosta kuska yupaychasqaykichisqa iñiyniykichispi qaqata sayanaykichispaqmi yanapasunkichis.

[31 paginapi recuadro]

Imaymanawan yachachiy

“Wawaykunawan Bibliata estudiaspaykuqa, huñunakuypaqmi preparakuq kayku, hinaspan niq kayku chaypi estudiasqaykumanta huk dibujota ruwanankupaq. Mayninpiqa Bibliamanta horqospan dramata hina ruwaq kayku otaq predicacionpaq demostracionkunata. Wawallaraq kasqankuta qhawarispan kallpachakuq kayku estudiasqayku kusikunankupaq hina yachanankupaq hina kananpaq.” (J. M., Estados Unidos.)

“Huk kutinmi estudiachisqayku warmiq wawanman yachachiyta munarayku ñawpa tiempopi Diospa Simin k’uyukuna imayna kasqanmanta. Chaymi Isaías librota huk k’uyuman tukuchirayku. Chaypaqmi computadorapi llapa capitulokunata versiculokunatawan picharuspa copiata horqorayku. Hojakunata hukllaman k’askarachispataq sapanka ladonta tubokunaman k’askachirayku. Chayta erqechaman qospan nirayku Nazaret llaqtapi Jesuspa ruwasqanta hina ruwananpaq. Lucas 4:16-21 texton willan Jesús Isaías qelqa k’uyuta kicharispa maskhasqan ‘qelqa tarisqanta’ (Isa. 61:1, 2). Ichaqa manan chay textota tariyta atiranchu. Chaypin repararan Jesús allin yachaq kasqanta, chaymi admirasqa niran: ’¡Yáw, Jesusqa yachaysapamá kasqa!’ nispa.” (Y. T., Japón.)

[30 paginapi foto]

Estudiasqaykichispi ensayokuna ruwaymi wawaykichista yanapanqa mana allinkunamanta karunchakunanpaq

[31 paginapi foto]

Kallpachakuy familiapi Jehová Diosta yupaychasqaykichis allinta aparikunanpaq