¿Tʼaqarankiñachu tiempoykita Bibliata estudianaykipaq?
¿T’aqarankiñachu tiempoykita Bibliata estudianaykipaq?
QAYNA watan Umalliq T’aqa huk cartapi willawaranchis iskay p’unchayllaña huñunakuy kananta, chhaynapi familianchiswan Bibliata astawan estudiananchispaq. Qosakuna, chay tiempopin sapa semana familiaykichista necesitasqankuman hina Bibliamanta yachachinaykichis. Solterokunapas chay tiempopin Bibliata estudiananku.
Askha iñiqmasinchiskunan agradecido kashanku familiankuwan Bibliata estudianankupaq tiempo t’aqakusqanmanta. Kevin * sutiyoq umalliqmi niran: “Llapallaykun congregacionpi ancha agradecesqa kashayku. Mayninpin umalliqkuna parlariyku Umalliq Taq’a nisqanman hinapuni familiaykuwan Bibliata estudianaykupaq”, nispa.
Huk umalliqpa warmin, Jenny sutiyoq nillantaq: “Kinsan ususiyku: kuraqmi 15 watayoq, huktaq 11 watayoq, sullk’ataq 2 watayoq. Chayllaraqmi makiwan rimaq t’aqapi yanapakushayku, chaymi huñunakuykunapaq unaypi preparakuyku. Kunanqa astawanmi tiempoyku kanqa familiaykuwan Jehová Diosmanta yachanaykupaq”, nispa.
John, JoAnn casarasqa precursorkunan nillankutaq: “Diospa llaqtanpi imaymana ruwanayoq kasqaykuraykun ñawpaqqa sasachakuq kayku sapa semana Bibliata estudianaykupaq. Chaymi familiapi estudianapaq tiempo t’aqakusqanta Jehová Diospa regalonta hina qhawariyku, ichaqa manan chay tiempota usuchinachu”, nispa.
25 watayoq Tony sutiyoq waynan martes ch’isinta Bibliata estudian, huk p’unchaykunataq huñunakuykunapaq preparakun. Paymi nin: “Yanqallañan suyakuni martes p’unchay chayamunanta, chay ch’isintan Jehová Diospaq t’aqani. Iskay horata hinan estudiani Jehová Diosta astawan munakunaypaq temakunamanta, astawanmi leesqay textokunapipas yuyaymanani”, nispa. ¿Imapin chaykuna yanapan Tony waynata? Pay nin: “Kunanqa sonqoymanmi chayan qelqakunapi leesqay. Qayninpan Perspicacia libropi leerani Davidwan Jonatanwan amigo kasqankumanta, chaypin yacharani Jonatán sumaq runa kasqanmanta. Paymanta yachaspan astawan entienderani imaynan kana allin amigo kanapaq chayta. Sumaq umiñakunata maskhaq hinaraqmi sapa martesta suyakuni mosoq yachaykunata Bibliapi tarinaypaq”, nispa.
Arí, estudianapaq tiempo t’aqakusqanqa llapa Testigokunatan yanapawasun familianchiswan estudiaspa Diosta yupaychanapaq.
[Uranpi willakuy]
^ párr. 3 Wakinpaqa manan sutinpunichu.