Diospa llaqtanpi llank’ayninchista sumaqpaq qhawarisun

“Diosmi churarqan munasqanman hina cuerpoq sapanka miembronkunataqa.” (1 COR. 12:18.)

1, 2. a) ¿Imaraykun Diospa llaqtanpi sapankanchispa llank’asqanchis ancha sumaq? b) ¿Ima tapukuykunamantan kay estudiopi yachasun?

ÑAWPA israelitakunaq tiemponmantapachan Jehová Dios kamachinkunata pusashan espiritual mikhunatapas qoshan. Arí, Hai llaqtata hap’ikapusqanku qhepamanmi Josuepas “kamachikuy qelqata llapallanta leeykurqan, saminchay simikunatapas ñakay simikunatapas [...] llapa Israel qharikunaman, warmikunaman, wawakunaman [ima]” (Jos. 8:34, 35).

² Apostól Pablon umalliq Timoteoman willaran iñiq t’aqakuna ‘Diospa iglesian [otaq wasin]’ kasqanta, ‘cheqaq-kayta takyachiq waqaychaq’ kasqantawan (1 Tim. 3:15). Kay tiempopi ‘Diospa wasinqa’ teqsimuyuntinpi cheqaq cristianokunan kanku. Corinto llaqtapi iñiqkunaman ñawpaqkaq carta qelqasqanpi 12 capitulopin Pablo iñiq t’aqata rikch’anachiran runaq cuerponwan. Diospa yuyaychasqanmi willaran cuerpoq sapanka miembron huk llank’anayoq kasqanta, llapallanku cuerpoq allinninpaq  llank’asqankutawan. Paymi nin: “Diosmi churarqan munasqanman hina cuerpoq sapanka miembronkunataqa”, nispa. Hinaspapas willaranmi ‘cuerpopi mana ancha munasqanchiskunata aswan allinta cuidasqanchista’ (1 Cor. 12:18, 23). Ñoqanchispas cuerpoq miembrokuna hinan sapankanchis imaymanapi ‘Diospa wasinpi’ llank’anchis, ichaqa manan hukkunaq ruwasqanmanta aswan allinchu nitaq aswan pisichu. ¿Imaynatan yachasunman Diospa llaqtanpi imapi llank’ananchis kasqanta, chay llank’ananchista sumaqpaq qhawarisqanchistapas? ¿Imamantan kanqa Diospa llaqtanpi imapi llank’ananchispas? ¿Imatan ruwananchis ‘iñiypi wiñasqanchista lliwpas sut’ita rikunankupaq’? (1 Tim. 4:15).

Diospa llaqtanpi llank’asqanchista sumaqpaq qhawarisun

3. ¿Imaynatan yachasunman Diospa llaqtanpi imapi llank’ananchis kasqanta, chay llank’anata sumaqpaq qhawarisqanchistapas?

³ Diospa llaqtanpi imapi llank’ananchista yachanapaqpas chay llank’anata sumaqpaq qhawarisqanchista rikuchinapaqpas ‘allin yuyayniyoq hunt’aq kamachita’, Umalliq T’aqatawanmi sonqomanta kasukunanchis (leey Mateo 24:45-47). ¿Kasukushanchischu? Chaytan sapankanchis sut’illanta tapukunanchis. Paykunaqa iñiyninchispi allin kananchista munaspan sapa kutillan yuyarichiwashanchis imayna p’achakunanchista, allichakunanchista, ima pukllaykuna akllakunanchista, internetmantapas. ¿Yuyaychawasqanchisman hinachu ruwashanchis? Ura watan kallpachawaranchis familiawan Diosta yupaychanapaq huk tiempota t’aqananchispaq. ¿Kasukushanchischu? ¿Chay t’aqasqanchis tiempopichu familianchiswan estudiashanchis? Solterokuna, ¿t’aqasqaykichis tiempopichu estudiashankichis? Hunt’aq kamachita kasukusun chayqa Jehová Diosmi ñoqanchistapas familianchistapas saminchawasun.

4. ¿Imakunatan ñawpaqta qhawarina imata akllakunapaqpas?

⁴ Wakinqa ninkumanpaschá: “Sapankan akllakunan imayna p’achakunanta, allichakunantapas, imakunapi q’ochukunantapas”, nispa. Diospa llaqtanpi llank’ananta chaninpaq qhawariq cristianon ichaqa mana paypa munasqanman hinachu imatapas akllarin. Aswanmi Jehová Diospa munasqanman hina imatapas ruwan. Arí, Simin Qelqatan ‘purinanchispaq lamparata’ hina qhawarinanchis, ‘ñanninchispaq k’anchayta’ hina (Sal. 119:105). Hinaspapas, ¿imaynatan qhawariwasun predicasqanchis runakuna, iñiq mana iñiq reqsiwaqninchis runakunapas? Chaykunapi iman yuyaykuna imata akllakunapaqpas (leey 2 Corintios 6:3, 4).

5. ¿Imaraykun mana munasqanchisman hinachu imatapas ruwana?

⁵ Wayrapi samay hinan ‘atiyniyoq espíritu [...] kunan kallpachashan Diosta mana kasukuqkunata’ (Efe. 2:2). Chay espiritun (otaq mana allinkuna yuyaykuy) ñoqanchistapas tanqawasunman Diospa llaqtanpi yachachikuykunata mana kasukunanchispaq. Manan pipas munasunmanchu Diótrefes hina kayta, payqa manan apóstol Juanpa cartankunata respetowanchu ‘chaskiq’ (3 Juan 9, 10). Ñoqanchispas manan munasqanchisman hinallachu imatapas ruwana. Manan hayk’aqpas Diospa churasqan runakuna contra rimapakunachu nitaq imatapas ruwanachu (Núm. 16:1-3). Aswanmi sumaqpaq qhawarina hunt’aq kamachiwan llank’asqanchista, kallpachakunanchistaqmi umalliqkunata uyarinapaq kasukunapaqpas (leey Hebreos 13:7, 17).

6. ¿Imapaqmi allinta qhawarinanchis imaynapichus tarikusqanchista?

⁶ ¿Imatawanmi ruwasunman Diospa llaqtanpi llank’ayninchista sumaqpaq qhawarisqanchista rikuchinapaq? Imaynapi tarikusqanchistan allinta qhawarikunanchis, chaypin yachasun Jehová Diosta hatunchanapaq hinachus tukuy atisqanchista ruwashanchis predicay ‘llank’ayninchispi’ chayta  (Rom. 11:13). Wakinqa yaqapaschá precursor regular kasunman. Teqsimuyuntinpin askha cristianokuna llank’anku misionero kaspa, iñiq t’aqakunata watukuspa, Betel wasipi otaq Yupaychana Wasikuna ruwaypi. Manaña llapankuchu chaykunapi yanapakunku chaypas wakinqa kallpachakushankun sapa semana predicaq lloqsinankupaq, yanapashankutaqmi familiankuta Diosta servishanallankupaq (leey Colosenses 3:23, 24). Sichus tukuy sonqowan, tukuy atisqanchisman hinataq Diosta servisun chayqa kusikusunmi Diospa llaqtanpi llank’asqanchiswan.

¿Imamantan kanqa Diospa llaqtanpi ima ruwananchispas?

7. ¿Imapin yanapawasun imaynapi tarikusqanchista qhawarikusqanchis?

⁷ Llapallanchismi qhawarikunanchis imaynapi tarikusqanchista, chayllan yachasun Diospa llaqtanpi imakuna ruway atisqanchista. Arí, manan huk cristianoq ruwananta huk cristiana ruwanmanchu. Hinaspapas wakinqa yuyaqña kanku, onqosqa kashanku otaq imapipas tarikunku. Proverbios 20:29 textopin nin: “Waynakunaq sumaq-kayninqa kallpankun, yuyaq runakunaq sumaq-kaynintaqmi yuraq umanku”, nispa. Arí, wayna sipaskunaqa hunt’asqa kallpayoq kayninkupin astawan Diospa llaqtanpi llank’ankuman, yuyaq cristianokunataq experienciankuwan yachayninkuwan ima yanapakunkuman. Ichaqa manan qonqananchischu lliw ruwasqanchistapas Diospa atiyninwan ruwasqanchista (Hech. 14:26; Rom. 12:6-8).

8. ¿Imamantan kanqa Diospa llaqtanpi imapi llank’ananchispas?

⁸ ¿Imamantan kallanqataq Diospa llaqtanpi imapi llank’ananchispas? Chay tapuyman kutichinapaq yuyaykusun iskay ñañantin cristianakunapi. Iskayninkutan tayta maman kallpachan estudionku tukusqanku qhepaman precursor kanankupaq. Ichaqa 18 watankupi estudionkuta tukuspankun huknin precursora kapun huknintaq ch’isiaqnintin llank’anaman haykupun. ¿Imaraykun iskayninkupas iñiq familiapi wiñashaspa huk-hukta akllakunku? Sapankankupas sonqonkupi chayta munasqankurayku. Ñoqanchispas sonqonchispa munasqantan akllakunchis. Chaymi allinta yuyaykunanchis Diospa llaqtanpi imakuna ruway munasqanchispi. ¿Kallpachakusunmanchu Diospa llaqtanpi astawan llank’ananchispaq?

9, 10. ¿Imatan ruwananchis pisita hina Diospaq llank’ashanchis chayqa?

⁹ ¿Mana pipas kallpachawasqanchisrayku pisillata Diospaq llank’ashanchis chayri? Filipos llaqtapi cristianokunaman carta qelqasqanpin Pablo niran: “[Diosmi] allin munayninman hina allinkaq ruwayta munachisunkichis hinaspa ruwachisunkichis”, nispa. Arí, Jehová Diosmi kallpachawasun llaqtanpi astawan llank’ayta munanapaq (Fili. 2:13; 4:13).

¹⁰ ¿Manachu chayta mañakusunman? Davidpas khaynatan mañakuran: “Señor Diosníy, ñanniykikunata rikuchiway, purinaykikunatapas yachachiway. Qan sonqota kawsachikuway yachaykachiway, qanqa Diosniymi Qespichiqniymi kanki, qantaqa p’unchay-ch’isiyaqmi suyakuyki”, nispa (Sal.  25:4, 5). Ñoqanchispas mañakusunmanmi llaqtanpi astawan llank’anapaq kallpachawananchista. Jehová Diospas Churinpas ancha allinpaqmi qhawirinku llaqtanpi llank’asqanchista, chayta yachaq cristianoqa anchatan sonqonpi agradecekun (Mat. 26:6-10; Luc. 21:1-4). Chhayna agradecido kaspataqmi Diosta valekun iñiyninpi astawan wiñananpaq kallpachananta. Arí, Isaías hinan kananchis. Huk kutinmi Jehová Diospa kunkanta uyariran nishaqta: “¿Pitataq kachasaq? ¿Pitaq ñoqanchismanta willaq rinqa?” nispa, hinan Isaías niran: “Ñoqan kaypi kashani, ñoqata kachaway”, nispa (Isa. 6:8).

¿Imatan ruwana iñiyninchispi wiñanapaq?

11. a) ¿Imaraykun qharikuna kallpachakunanku umalli kanankupaq? b) ¿Imatan cristiano qharikuna ruwananku Diospa llaqtanpi huk llank’aykunaman aypanankupaq?

¹¹ 2008 watapin teqsimuyuntinpi 289.678 runakuna bautizakuranku, chaypaqmi necesitakushan aswan askha umalliqkuna. Chhaynaqa, ¿imapaqmi qharikuna kallpachakunanku? Diospa llaqtanpi yanapakuq (siervo ministerial) otaq umalli kanankupaqmi Bibliapi kamachikuykunata hunt’ananku (1 Tim. 3:1-10, 12, 13; Tito 1:5-9). Chay kamachikuykunata hunt’anankupaqqa lloqsishanallankun predicaq, Diospa llaqtanpi llank’ana chaskisqankutan allinta hunt’ananku, huñunakuypi tapuykunaman allinta kutichinanku, munakuywantaqmi iñiqmasinkuta yanapananku. Chaykunata ruwaspaqa Diospa llaqtanpi llank’anankuta sumaqpaq qhawarisqankutan rikuchinqaku.

12. ¿Imatan wayna sipaskuna ruwankuman iñiyninkupi astawan wiñanankupaq?

¹² ¿Imatan wayna sipaskuna ruwankuman iñiyninkupi astawan wiñanankupaq? Diospa Qelqantan allinta reqsinanku ‘espiritualkaq tukuy yachaypi entiendeypi’ wiñanankupaq (Col. 1:9). Chaypaqqa Bibliatan tukuy yuyaywan estudiashanallanku, manataqmi huñunakuymanpas tiyaqllachu rinanku. Hinaspapas precursor kanankupaqmi kallpachakushananku chhaynapi aswan ‘allin llank’ayman’ haykunankupaq (1 Cor. 16:9). Ñawpaqta Diospaq llank’anqaku chayqa kusisqan kanqaku saminchasqataqmi kanqakupas (leey Eclesiastés 12:1).

13, 14. ¿Imakunapin cristianakuna rikuchinkuman Diospa llaqtanpi llank’anankuta sumaqpaq qhawarisqankuta?

¹³ Salmo 68:11 texton cristianakunamanta nin: “Señor Diosmi kamachikurqan, sumaq willakuykunatan askha warmikuna willarqanku”, nispa. Chay profecía paykunapi hunt’akusqanta sumaqpaq qhawarisqankuta rikuchinankupaqqa runakunaman yachachiypin yanapakunanku (Mat. 28:19, 20). Arí, imatapas saqesparaq Diosmanta yachachisqankupin  rikuchinku Diospa llaqtanpi llank’anankuta ancha sumaqpaq qhawarisqankuta.

¹⁴ Titoman carta apachisqanpin Pablo niran: “Kurak warmikunatapas yachachillaytaq Diospaq t’aqasqa hinapuni kawsanankupaq [...], allinkaqta yachachiq kanankupaq. Ahinapin yachachinqaku sipas warmikunata qosanku munakuyta, wawanku munakuyta, allin yuyaywan puriyta, ch’uya kawsayniyoq-kayta, wasinkupi imallapas ruwakuyta, sumaq sonqo kayta, qosanku kasukuyta, chhaynapi ama pipas Diospa simin contra rimananpaq”, nispa (Tito 2:3-5). Arí, iñiyninkupi poqosqa cristianakunaqa allin kawsayninkuwanmi hukkunata yanapanku. Paykunaqa respetankun umallikunata, allin yuyaywanmi akllarinku imapi kusikunankutapas, allin yuyaywantaqmi p’achakunkupas allichakunkupas. Chhayna kawsayninkuwanmi rikuchinku allin ejemplo kasqankuta, Diospa llaqtanpi ruwanankuta sumaqpaq qhawarisqankutapas.

15. ¿Imatan soltera cristianakuna ruwankuman pisipaq hina qhawarikuspa?

¹⁵ Mayninpin cristiana solterakuna Diospa llaqtanpi pisipaq hina qhawarikunkuman. Huk cristianan nin: “Mayninpin sapay rikukuspa llakikuni”, nispa. ¿Imatan pay ruwan llakikuyninta atipananpaq? Ninmi: “Diosmanta mañakusqaymi Bibliata estudiasqaypiwan yanapawan Diospa llaqtanpi imakuna ruwanay kasqanta yuyarinaypaq. Qelqakunapin maskhani Jehová Dios imayna qhawariwasqanmanta yachanaypaq, hinaspan kallpachakuni hukkunata yanapanaypaq. Chaykunan yanapawan ama ñoqallapi yuyaykunaypaq”, nispa. Jehová Diosmi Davidta niran: “Qantan qhawashayki”, nispa (Sal. 32:8). Arí, Jehová Diosqa sapankanchispin interesakun. Paymi yanapawasun llaqtanpi ima llank’anayoq kasqanchistapas yachanapaq.

Amapuni Diospa llaqtanpi llank’anaykita saqeychu

16, 17. a) ¿Imarayku Jehová Diospa invitawasqanchisman kasukusqanchis ancha allinpuni? b) ¿Imatan ruwananchis Diospa llaqtanpi llank’ayninchista mana saqenapaq?

¹⁶ Jehová Diosmi ancha munakuq kayninpi sapankanchista payman pusawanchis. Chaymantan Jesús niran: “Manan pipas ñoqaman hamuyta atinmanchu, kachamuwaqniy Yaya payta mana pusamuwaqtinqa”, nispa (Juan 6:44). Millonninpi runakuna ukhumantan ñoqanchista invitawaranchis llaqtanman haykunanchispaq. Chay invitacionta kasukusqanchisqa allinninchispaqmi karan, kunanqa aswan allin kawsaytan tarinchis. ¡Ancha kusisqan kashanchis Diospa llaqtanpi sumaq llank’anayoq kasqanchismanta!

¹⁷ Salmistan niran: “Señor Diosníy, tiyasqayki wasitan munakuni [...]. Mana kuyuriqmi sayashani, huñunasqa runakuna qayllapin Señor Diosta saminchasaq”, nispa (Sal. 26:8, 12). Sapankanchistan Jehová Dios llaqtanpi huk llank’anayoqta churawanchis. Sichus umalliqkunata kasukuspa chay llank’anata makilla hunt’asun chayqa manan saqesunchu Diospa llaqtanpi llank’ayninchista.

¿Yuyashankichu?

• Diospa llaqtanpiqa sapankanchismi huk llank’anayoq kanchis, ¿imarayku chayta ninchis?

• ¿Imakunatan ruwananchis Diospa llaqtanpi llank’ayninchista ancha sumaqpas qhawarisqanchista rikuchinapaq?

• ¿Imakunamantan kanqa Diospa llaqtanpi imapi llank’ananchispas?

• ¿Imaynatan wayna sipaskunapas kuraqkunapas rikuchinkuman Diospa llaqtanpi llank’anankuta sumaqpaq qhawarisqankuta?

[Tapuykuna]

[16 paginapi fotokuna]

¿Imatan cristianokuna ruwananku Diospa llaqtanpi huk llank’aykunaman aypanankupaq?

[17 paginapi foto]

¿Imaynatan cristianakuna Diospa llaqtanpi llank’ayninkuta ancha sumaqpaq qhawarisqankuta rikuchinkuman?