¿Imatan ñoqanchismanta mañakuyninchis rikuchin?
¿Imatan ñoqanchismanta mañakuyninchis rikuchin?
“Qanqa mañakusqatan uyarinki, llapa runan hamusunkiku.” (SAL. 65:2.)
1, 2. Diosqa uyarinpunin mañakusqanchista, ¿imaraykun chaymanta mana iskayananchischu?
KAMAQNINCHISQA manan hayk’aqpas serviqninkuna waqyakuqtinqa mana uyariqman tukunmanchu. Payqa uyariwanchispunin. Millonninpiña serviqninkuna kaq tiempollapi mañakunkuman chaypas, sapankankutan uyarin.
2 Jehová Diosqa uyariqpunin Davidpa rogakusqanta, chayta yachaspan payqa takirqan: “Qanqa mañakusqatan uyarinki, llapa runan hamusunkiku”, nispa (Sal. 65:2). Diosqa uyarirqanmi mañakuyninta hunt’aq sonqowan servisqanrayku. Chayraykun tapukunanchis: “¿Rikuchinchu mañakuyniykuna Diospi confiasqayta, payta serviypas aswan importante ñoqapaq kasqanta? ¿Imatan ñoqamanta qhawarichin oracionniykuna?” nispa.
Huch’uyaykukuspa Jehová Diosman asuykusun
3, 4. a) ¿Imaynatan Diosman mañakuypi asuykunanchis? b) ¿Imatan ruwananchis huchaman urmaqtinchis llakikuy ‘yuyaykuykuna’ hamuwaqtinchis?
3 Sichus munanchis Jehová Dios mañakuyninchisman kutichimunanta chayqa, huch’uyaykukuspan payman asuykunanchis (Sal. 138:6). David hinan mañakunanchis sonqonchista Dios t’aqwinanpaq, paymi niran: “Diosníy, t’aqwiriway, sonqoyta reqsiykuway, allinta probaykuway, yuyaykuyniykunata reqsiykuy. Qhawariway, urmachiq ñanpipaschá purishani, wiñay ñanninta pusakuway”, nispa (Sal. 139:23, 24). Ichaqa mañakusqanchismantapas, Bibliapi Diospa lliw niwasqanchistawanmi kasukunanchis. Payqa “wiñay ñanninta[n]” pusawasun, otaq yanapawasun allinta kawsananchispaq chhaynapi wiñay kawsayman aypananchispaq.
4 ¿Imatan ruwasunman hatun huchaman urmaqtinchis llakikuy ‘yuyaykuykuna’ hamuwaqtinchis? (Leeychis Salmo 32:1-5.) Manan conciencianchista ch’innichinanchischu, mana chayqa huchallikusqanchismanta sinchita llakikusqanchiswanmi pisipasunman, imaynan sinchi ruphaywan mana unuyuq t’ika naq’epun hinata. Davidqa sinchitan llakikurqan huchallikusqanmanta, yaqapaschá onqorqanraq. Ichaqa Diosman huchanta willakuqtinmi thak sientekurqan. ¡Maytachá kusikurqan huchanmanta pampachasqa kasqanta yachaspa! Ñoqanchispas thakpin sientekusun sichus huchanchista Diosman willakusun chayqa, ichaqa umalliqkunaq yanapaynintapas necesitanchismi, chhaynapi hukmanta Dioswan allinpi kananchispaq (Pro. 28:13; Sant. 5:13-16).
Diosta rogakusun agradecekusunpas
5. ¿Iman Jehová Diosta rogakuy?
5 Imamantaña llakikunchis chaypas Pabloq yuyaychasqantan kasukunanchis, paymi nirqan: “Ama imamantapas llakikuychischu, aswanpas tukuy ima necesitasqaykichistapas Diosmanta mañakuychis, rogakuywan mañakuspaykichistaq Diosman graciasta qoychis”, nispa (Fili. 4:6). Rogakuyqa “imatapas suplicakuspa otaq huch’uyaykukuspa mañakuymi”. Astawanqa peligropi tarikuspa otaq qatiykachawaqtinchismi Jehová Diosta suplicakunanchis yanapawananchispaq.
6, 7. ¿Imakunamantan Diosta agradecekusunman?
6 Ichaqa, ¿imatan ñoqanchismanta rikuchinman imatapas necesitaspalla mañakuqtinchis? Pablon rimarqan mañakuspa ‘Diosman graciasta qonanchismanta’. Arí, imaymanamantan Jehová Diostaqa agradecekunanchis David hina, paymi nirqan: “Qanqa, Señor Diosníy, hatunmi atiyniyoqmi kanki, qanqa manchanataq qhapaqtaq lliphlli-kayniyoqtaq kanki. Qanpan hanaq pachapi kay pachapi tukuy kaqkunapas. Qanmi, Señor Diosníy, munaychakunki, qanmi hatunchasqa Qollanaqa kanki. [...] Chay hinaqa, Diosniyku, graciastan qoykiku, qhapaq qollanan sutiykitataq yupaychay[ku]”, nispa (1 Cró. 29:11-13).
7 Jesusqa mikhunamantan Taytanta gracias niq. Chaymantapas agradecekurqanmi Señorpa Cenanta celebrananpaq t’antamanta, vinomanta ima (Mat. 15:36; Mar. 14:22, 23). Ñoqanchispas chay hinatan agradecekunanchis mikhunamanta, ichaqa “runakunapaq musphana ruwasqankunamantapas: ¡Gracias!” ninanchismi, hinallataq ‘chanin kuskachasqankunamanta [kamachikuyninkunamanta]’, Simin Qelqamantapas (Sal. 107:15; 119:62, 105).
Hukkunapaq mañakusun
8, 9. ¿Imaraykun mañakunanchis iñiqmasinchiskunapaq?
8 Iñiqmasinchiskunapaqpas mañakunallanchistaqmi, wakintaqa manaña reqsinchischu chaypas. Pabloqa manapaschá llapankutachu Colosas cristianokunata reqsirqan, ichaqa nirqanmi: “Qankunapaq mañakuspaykuqa Señorninchis Jesucristoq Yayan Diosmanmi graciasta qollaykupuni, Jesucristopi iñisqaykichismanta, Diospi iñiq llapa wawqe-panakunata munakusqaykichismantawan uyarispayku”, nispa (Col. 1:3, 4). Pabloqa mañakurqanmi Tesalónica cristianokunapaqpas (2 Tes. 1:11, 12). Chhayna mañakuykunan rikuchin imayna runa kasqanchista, imaynatachus iñiqmasinchiskunata qhawarisqanchistapas.
9 Akllasqa cristianokunaña otaq ‘wak ovejakunamantaña’ kaqtinkupas, llapa iñiqmasinchiskunapaq mañakusqanchismi rikuchin Diospa llaqtan ñoqanchispaq importante kasqanta (Juan 10:16). Pablon Éfeso cristianokunata valikurqan payrayku mañakunankupaq, chhaynapi rimaqtin Jehová Dios ‘yanapananpaq’, “allin willakuykunaq pakasqa yachaynintapas” willananpaq (Efe. 6:17-20). Qanrí, ¿mañakunkipunichu iñiqmasiykikunapaq?
10. ¿Imaynatan yanapawasunman hukkunapaq mañakuy?
10 Hukkunapaq mañakuyqa yanapawasunmanmi paykunata allinta qhawarinanchispaq. Sichus mayqen iñiqmasiwanpas mana allinpichu kashanchis chayqa, paypaq mañakusqanchismi yanapawasun sumaqta tratananchispaq (1 Juan 4:20, 21). Rikusqanchis hina, chay hina oracionkunaqa ancha allinpunin huk nisqalla kawsananchispaq. Chaymantapas, Cristo hina munakuyniyoq kasqanchistan rikuchin (Juan 13:34, 35). Chay hina munakuyqa santo espirituq ruruchisqanmi. Chayrayku, ¿mañakunchischu Jehová Diosmanta santo espiritunta? ¿Mañakunchischu yanapayninta chay espirituq rurunta kawsayninchispi rikuchinanchispaq? (Luc. 11:13; Gál. 5:22, 23.) Chhayna kaqtinqa, rimayninchis, ruwayninchis iman rikuchinqa espirituq pusasqanman hina kawsashasqanchista (leeychis Gálatas 5:16, 25).
11. ¿Allinchu kanman ñoqanchisrayku mañakunankupaq hukkunata valekuy?
11 Tayta mamakunapas mañakunankun wawankupaq. Ejemplopaq, sichus huk tayta yacharun wawankuna examenta qospanku plajeakuy munasqankuta chayqa, mañakunmanmi paykunapaq, hinaspa Bibliawan qhawarichinman honrado kay importante kasqanta, chayman mana urmanankupaq kallpachakunanku kasqantapas. Pablon Corinto cristianokunata nirqan: “Diosmanta mañakuyku ama ima mana allintapas ruwanaykichispaq”, nispa (2 Cor. 13:7). Huch’uyaykukuspa hukkunapaq mañakuyqa Jehová Diostan kusichin, imayna runa kasqanchistataq rikuchin (leeychis Proverbios 15:8). Ñoqanchispas Pablo hinan hukkunata valekusunman ñoqanchisrayku mañakunankupaq. Paymi qelqarqan: “Ñoqaykupaq Diosmanta mañapuwayku, allintan yachayku allin concienciayoq kasqaykuta, tukuy imaymanapitaqmi allintapuni puriyta munayku”, nispa (Heb. 13:18).
¿Imatawanmi mañakuyninchis ñoqanchismanta rikuchin?
12. ¿Imakunamantan astawanqa mañakunanchis?
12 ¿Rikuchinchu mañakuyninchis tukuy sonqomanta kusikuywan Diosta servisqanchista? Astawanqa mañakunanchis predicacionmanta, Diospa munaynin hunt’akunanmanta, paylla kamachinanpaq derechoyoq kasqanmanta, sutin ch’uyanchasqa kananmanta iman. Jesuspa yachachiwasqanchis mañakuymi kay hinata qallarin: “Yayayku hanaq pachapi kaq, sutiyki yupaychasqa kachun, qhapaqsuyuyki hamuchun, munayniyki kay pachapi ruwakuchun, imaynan hanaq pachapipas ruwakun hinata”, nispa (Mat. 6:9, 10).
13, 14. ¿Imatan ñoqanchismanta rikuchin mañakuyninchis?
13 Mañakuyninchisqa rikuchinmi imakuna munasqanchista, imakunapi interesakusqanchista, ima yuyaywan ruwasqanchistapas. Jehová Diosqa yachanmi imayna runa kasqanchista. Proverbios 17:3 nin: “Crisolpin qolqetaqa ch’uyayachinku, hornopin qoritaqa ch’uyayachinku, Señor Diostaqmi sonqokunata pruebaqqa”, nispa. Arí, payqa qhawanmi imachus sonqonchispi kasqanta (1 Sam. 16:7). Yachanmi imatachus iñiqmasikunamanta, huñunakuykunamanta, predicacionmanta, Cristoq wawqenkunamantapas yuyaykusqanchista (Mat. 25:40). Payqa yachanmi cheqaqtapunichus munanchis mañakusqanchista chaskiyta icha costumbrenchisman hinallachus askha kutita kaq simikunallawan mañakushanchis chayta. Jesusqa nirqanmi: “Mañakushaspaqa ama mana iñiqkuna hina thawtiychischu, paykunaqa warararasqankuwanmi Diospa uyarisqan kayta yuyanku”, nispa (Mat. 6:7).
14 Mañakusqanchisqa rikuchillantaqmi hayk’atachus Diospi confiashanchis chayta. Davidmi Diosta nirqan: “Qanmi pakakunay kanki. Awqamanta qespichiwaqniy ch’ila pukara hinan kanki. Wasiykipi wiñaypaq tiyachiway, raphraykiq llanthunpi pakaykuway”, nispa (Sal. 61:3, 4). Biblian willan Jehová Dios “karpanwan qataykuspa” waqaychawasqanchismanta (Apo 7:15). Arí, Diosqa ‘ñoqanchiswanmi kashan’ ima pruebapiña tarikuqtinchispas, chayta yachaspa paywan parlayqa maytan kallpachawanchis (leeychis Salmo 118:5-9).
15, 16. Sichus munanchis congregacionpi astawan llank’ayta chayqa, ¿imaynatan mañakuy yanapawasunman imarayku imatapas ruwashasqanchista qhawarikunanchispaq?
15 Sonqomanta mañakuymi yanapawasun ima yuyaywanchus imatapas ruwayta munanchis chayta yachananchispaq. Ejemplopaq, sichus munanchis Diospa llaqtanpi umalliq kayta chayqa, yuyaymanananchismi imarayku chayta munasqanchispi, ¿huch’uyaykukuspa sonqomanta yanapakuyta munasqanchisraykuchu, Reinopaqpas astawan llank’ananchisraykuchu? ¿Icha iñiqmasinchiskuna “ukhupi kamachikuq churakuspa” maypipas ñawpaqllapi kayta munaspachu? Diospa llaqtanpiqa manan pipas hatunchakuyta munaspaqa umalliq kayta atinmanchu (leeychis 3 Juan 9, 10; Lucas 22:24-27). Sonqomanta mañakuymi yanapawasun sichus mana allinta yuyaykuspa imatapas ruwayta munashanchis chayqa, qhawarikunanchispaq hinaspa manaraq sonqonchispi saphichakushaqtin cambiananchispaq.
16 Askha hermanakunachá munanku qosanku siervo ministerial kanankuta qhepamantaq umalliq kanankuta. Chaymanta mañakuspapas, paykunaqa allin ejemplo kaspankun qosankuta yanapankuman espiritualpi wiñanankupaq. Chayqa importanten, huk cristianoq familian imatachus riman, ruwan, chayta qhawarispan iñiqmasikunaqa paymanta imatapas yuyaykunku.
Huñunakuykunapi mañakuqtinchis
17. ¿Imaynatan yanapawasun sapallanchis kashaspa mañakuy?
17 Jesusqa maskhaqmi chi’nneq cheqaskunata sapallan orananpaq (Mat. 14:13; Luc. 5:16; 6:12). Ñoqanchispas necesitanchismi sapallanchis orakuyta. Ch’inpi mañakusun chayqa, manan sasachu kanqa Diospa munayninma hina imatapas decidinanchispaq, chaytaq yanapawasun Dios yupaychayninchispi qaqa sayananchispaq. Ichaqa, Jesusqa askha runakunawan kashaspapas mañakurqanmi, chaymi yanapawasun huñunakuykunapi imaynata mañakunapaq.
18. ¿Imakunamantan mana rimanankuchu huñunakuypi mañakuqkuna?
18 Huñunakuyninchiskunapiqa hunt’aq sonqo runakunan mañakunku llapan chaypi kaqkunapaq (1 Tim. 2:8). Chay mañakuykuna tukuqtinqa lliw chaypi kaqkunan ninanku “amén” nispa, chayqa “ahina kachun” ninanmi. Ichaqa chayta ninankupaqqa, acuerdopin kananku imakunatachus nisqanwan. Yayayku mañakuypiqa manan Jesusqa imatapas rimarqanchu hukkunata phiñachinanpaq otaq llakichinanpaq hinaqa (Luc. 11:2-4). Manataqmi sapanka uyariqninpa sasachakuyninmantachu rimaran nitaq ima necesitasqankumantachu. Hukllamanta imapas kaqtaqa sapallanchispi mañakuspan rimananchis manan askha runa ukhupichu. Chaymantapas manan rimananchischu mana willana asuntokunamantaqa.
19. ¿Imakunatan mana ruwananchischu huñunakuykunapi mañakuyta ruwakushaqtin?
19 Huñunakuypi oracionta ruwakushaqtinqa, Diosta ‘manchakusqanchista’ otaq ancha respetasqanchistan rikuchinanchis (1 Ped. 2:17). Wakin ruwaykuna allinña kanman chaypas, huñunakuykunapi ruwakuqtinqa manan allin qhawarisqachu kanman (Ecl. 3:1). Sichus oracionta ruwakushaqtin pipas huk t’aqa iñiqmasikuna kallpachanman makinkumanta hap’inakunankupaq chayqa, wakin chaypi kaqkuna visitakunapas ofendekunkumanmi otaq mana tukuy yuyaywanchu mañakuyta uyarinkuman. Yaqapaschá mayqen cristianopas hukkunaq mana reparasqallan makinta esposanman haywarinman, ichaqa sichus oqllaykunman otaq iskaynin makinwan abrazaykunman chayqa, pitapas misk’achinmanmi. Chayta ruwaspaqa paykunapi astawan yuyaykusqantan rikuchinman manataq Jehová Diospichu. Chhaynaqa, Diosta manchakuq, respetaq runa kaspa, “lliwta ruwa[sun] Diosta hatunchanapaq” hinapuni, chhaynapin mana pitapas distraesunchu, phiñachisunchu nitaq misk’achisunchu (1 Cor. 10:31, 32; 2 Cor. 6:3).
¿Imatan mañakunanchis?
20. ¿Imatan entiendenki Romanos 8:26, 27 textomanta?
20 Mayninpiqa manapaschá yachasunmanchu sapallanchis mañakushaqtinchis imamanta rimayta. Pablon niran: “Manan yachanchischu imayna mañakunachus kasqantaqa, ichaqa kikin Santo Espiritun mana rimay atina anchiywan ñoqanchispaq Diosmanta mañapuwanchis. Llapa runaq sonqonta allintapuni reqsiq Diosqa yachanmi imachus Espirituq yuyaynin kasqanta”, nispa (Rom. 8:26, 27). Jehová Diosqa askha mañakuykunatan Bibliapi qelqachiran. Paytaq yuyaycharqan chayqa, yachanmi Biblia qelqaqkuna imaniytachus munarqanku chayta. Chaymantapas allintan reqsiwanchis. Chayrayku, ñoqanchispas rogakushasunman hinata chay mañakuykunata chaskin, chayman hinataq ruwan. Jehová Diosqa uyarinmi mañakusqanchista espíritu ‘ñoqanchispaq [...] mañapuwaqtinchis’. Astawan Bibliamanta yachasunchis chayqa, faciltan yuyayninchisman hamunqa imamanta mañakunanchispaqpas.
21. ¿Imamantan qatimuq estudiopi yachasun?
21 Rikusqanchis hina, mañakuyninchisqa imaymanatan ñoqanchismanta rikuchin. Willanmi imaynachus Dioswan amistadninchis kasqanta, allintachus reqsinchis Simin Qelqata icha manachus chaytapas (Sant. 4:8). Hamuq estudiopin yachasun Bibliapi tarikuq wakin mañakuykunamanta, chaykunan yanapawasun imaynachus mañakuyninchis kashan chaypi yuyaymanananchispaq.
¿Imanispan kutichiwaq?
• ¿Imaynatan Diosman mañakuypi asuykunanchis?
• ¿Imaraykun iñiqmasinchiskunapaq mañakunanchis?
• ¿Imatan mañakuyninchiskuna rikuchin ñoqanchismanta, hinallataq imarayku imatapas ruwasqanchismanta?
• ¿Imaynatan comportakunanchis huñunakuykunapi oracionta ruwakushaqtin?
[Tapuykuna]
[4 paginapi foto]
¿Alabankichu, graciastapas qollankipunichu Jehová Diosman?
[6 paginapi foto]
Huñunakuykunapi mañakuyta ruwakuqtinqa Diosta hatunchananchispaq hinapunin comportakunanchis