Mana uyariy atiq iñiqmasita munakuy

DIOSPA llaqtanpiqa lliwmi huk familia hinalla kawsanku. Paykunaqa Samuel, David, Sansón, Rahab, Moisés, Abraham, Sara, Noé, Abel hinan hunt’aq sonqo Diospaq kanku. Ichaqa askha iñiqmasinchiskunan mana uyariy atiq kanku. Mongolia nacionpin iskaylla Jehová Diospa testigonkuna karqanku, paykunaqa warmi-qharin karqanku, ichaqa mana uyariy atiqmi karqanku. Rusia nacionpipas mana uyariq wawqe-pananchiskuna Diospaq hunt’aq sonqo kasqankuraykun Tribunal Europeo de Derechos Humanos nisqapi ganakurqan juiciota.

Kay watakunapin “allin yuyayniyoq hunt’aq kamachi” ruwanña videokunata, huñunakuykunata, hatun huñunakuykunatapas makiwan rimay simikunapi (Mat. 24:45). Chaykunan allinta yanapashan mana uyariy atiq runakunata. * Manaraq chay yanapaykuna kashaqtin, ¿imaynatan Jehová Diosmanta yacharqanku, espiritualpipas wiñarqanku? ¿Imaynatan yanapawaq llaqtaykipi tiyaq mana uyariy atiq runakunata?

Manaraq kunan hina yanapaykuna kaqtin

Sichus unay watakunaña Jehová Diosta serviq mana uyariq wawqe-panakunata tapusunman: ¿Imaynatan Diosta reqsirqanki? nispa chayqa, ¿imatan kutichiwasunman? Yaqapaschá niwasunman Diospa sutinta yachaspa imayna sientekusqankumanta, chay yachayllawan kawsayninkuta imaynata cambiasqankuta. Chayllan paykunata yanaparqan unay watakuna Diospaq sonqo kanankupaq, manaraq makiwan rimay simipi videokuna rikhurimushaqtin. Chay videokuwanñan allintaqa Bibliamanta yacharqanku. Chaymantapas willasunkimanchá imaynan sientekurqan huñunakuykunapi mana pipas makiwan rimay simiman t’ikraq kaqtin otaq yachachiq kaqtin. Chay tiempopiqa huk iñiqmasinsi ladonpi tiyaspa papelpi qelqaq huñunakuypi ima yachachikusqanta entiendenanpaq. Huk hermanos chhaynata qanchis wata Bibliamanta yachasqa manaraq pipas makiwan rimay simiman t’ikraq chayamushaqtin.

Kurakña mana uyariq iñiqmasinchiskunan yuyarinku uyariq runakunaman predicay sasa kasqanta. Huknin makinpis hap’iq huk tarjetata imaynata rimay qallarinanpaq qelqasqata, hukninpitaq chayllaraq chayamuq Qhawaq ¡Despertad! revistakunata. Huk mana uyariy atiqman estudio qoyqa sasapunin karqan, qelqasqa librokunallan kaq, chaymi mana mayqenninkupas allintaqa entiendeqkuchu. Chaymantapas wakin mana uyariq iñiqmasinchiskuna yuyarinku mana atinankupaq hina sientekusqankuta Bibliamanta yachachispa, chaymi paykunata hark’arqan Jehová Diosmanta willashanallankupaq. Manaña allintachu wakin yachachikuykunata entienderqanku chaypas, paykunaqa tukuy sonqonkuwanmi Jehová Diosta munakuqku.

Ima sasachakuykunaña karqan mana uyariq wawqe-pananchiskunapaq chaypas, paykunaqa Diospaq hunt’aq sonqon karqanku (Job 2:3). Jehová Diospin suyakurqanku tukuy sonqomanta (Sal. 37:7). Paytaqmi yanapashan mana hayk’aq yuyaykusqankuta hinaraq.

Yuyaymanay huk mana uyariq iñiqmasinchispi, paymi señorayoq wawayoqtaq. Manaraq makiwan rimay simipi videokuna kashaqtinmi  payqa mana saqespa Bibliata estudiaqkuña familianwan. Wawanmi yuyarin: “Qelqasqa librokunallataq karqan chayqa, papayqa sasachakurqanpunin estudiota qowaspanku. Manan allintachu entiendeq chaypi qelqasqata. Ñoqaykuqa sinchi waynallaraqtaq karqayku chayqa, manan yanapayta atiqchu kayku. Mana allinta yachachiwaqtinkuqa, usqhayllan ‘manan chhaynachu’ niq kayku. Chaywanpas papayqa familiapi estudiotaqa qowallaqkupunin, paypaqqa Jehová Dios reqsisqaykun aswan valorniyoq karqan, manaña inglés rimayta allintachu entienderqan chaypas”, nispa.

Kunan rimasun Richard iñiqmasinchismanta, payqa qanchis chunka más watayoqñan, paymi tiyan Brooklyn (Nueva York) llaqtapi. Payqa mana uyariqmi ñawsataq, ichaqa manan faltakunchu mayqen huñunakuykunamanpas. Huñunakuyman rinanpaqmi trenman wichaspa yupan hayk’a paraderota pasaspa uraykunanta yachananpaq. Huk p’unchaymi qasay tiempopi ñishuta rit’i rit’imusqa, chaysi huñunakuyta huk p’unchaypaq ruwanankupaq cambiasqaku. Llapan wawqe-panakunamansi willasqaku, ichaqa Richard mana yachasqachu. Wawqe-panakuna mana payman willasqankuta reparaspas maskhaq risqaku, chaysi tarisqaku Huñunakuna Wasi punkupi sayashaqta, chaypis suyakushasqa punku kichanankuta. Chaysi tapusqaku: “¿Imaraykutaq chhayna tiempo kashaqtin lloqsimurqanki?” nispa; paytaq nisqa: “Jehová Diosta munakusqayraykun”, nispa.

¿Imatan ruwawaq?

¿Kanchu mana uyariy atiqkuna tiyasqayki ladopi? Chhaynaqa, ¿manachu makiwan rimayta yachaqawaq? Paykunaqa pacienciawanmi hukkunata yachachinku makiwan rimayta. Sichus predicacionpi mayqen mana uyariy atiqwanpas tupawaq chayqa, ¿imatan ruwawaq? Kallpachakuy paywan dibujokunawan, fotokunawan, atisqaykiman hina makiykiwanpas rimanaykipaq. Manaña yachayta munanmanchu chaypas, huk iñiqmasinchismanmi willasunman chay runawan tupasqanchista. ¿Imaraykun chayta ruwana? Yaqapaschá makiwan rimayta yachaq payta rimapayaqtin astawan Diosmanta yachayta munanman.

Sichus makiwan rimayta yachashanki chay huñunakuykunamanpas rishankiña chayqa, ¿imatawanmi ruwawaq astawan yachanaykipaq? Parlaq iñiqmasiykikunawan rimanaykimantaqa kallpachakuy makiwan rimanaykipaq, ahinapin astawan yachanki makillawan rimayta. Mayninpiqa makiwan rimanaykimanta simiykiwan rimaytapunichá munawaq, ichaqa kallpachakushallay allinta yachanaykikama.

Chhayna makillawan rimaypi kallpachakuqtinchisqa mana uyariy atiq iñiqmasinchiskunata munakusqanchistan respetasqanchistawan rikuchinchis. Paykunaqa maytachá llakikunku llank’aqmasinkuwan otaq escuelapi compañeronkuwanpas mana entiendenakuqtinku. Paykunamanta hukninmi  khaynata nin: “Sapa p’unchay runakunaqa ladoypi rimanku, ichaqa sapaymi rikukuni, chaymi mayninpi phiñakuni, manataq imanakuytapas atinichu”, nispa. Chayraykun kallpachakunanchis huñunakuyninchiskunapi paykunawan sumaqta parlananchispaq, chhaynapin mana yachayllatachu chaypi chaskinqaku (Juan 13:34, 35).

Wakin mana uyariq iñiqmasinchiskunaqa huch’uy grupochallan kanku, rimaq iñiqmasinchiskunawantaq huñunakunkupas; paykunatapas manan qonqananchischu. Chaymi discurso qoqpa yachachikuyninta t’ikrapuna. Chaymantapas paykunaqa ñawpaq tiyanakunapin tiyanku, chhaynapi discurso qoqta yachachisqanta t’ikraqtapas allinta rikunankupaq. Tiempowanqa uyariq iñiqmasinchiskunaqa manañan distraekunkuñachu t’ikraqta qhawaspa. Chhaynallatataqmi t’ikranku hatun huñunakuykunapipas. Makiwan rimayman t’ikraqkunaqa anchatan kallpachakunku allinta t’ikranankupaq, mana uyariqkunaq entiendenanpaq hina. Ancha allinmi chay ruwasqankuqa.

Yaqapaschá huñunakusqaykipi kan makiwan rimaq grupo, otaq chaypi yachachikuykunata t’ikranku mana uyariqkunapaq. Chhayna kaqtinqa, ¿imaynatan rikuchiwaq paykunapi interesakusqaykita? Wasiykimanmi invitawaq otaq atisqaykiman hina makiwan rimayta yachawaq. Kallpachakuy, atillankin paykunapi interesakuyta. Manaña paykunaq rimayninta yachankichu chaypas, maytan kusikunki paykunawan kuska kaspa (1 Juan 4:8). Paykunamantaqa askhatan yachasunman. Paykunamanqa gustanmi rimayta, chaymantapas allin reparaq kanku, kusi sonqotaq kankupas. Huk hermanonchispa tayta-mamanqa mana uyariy atiqmi kanku, paymi nin: “Nacesqaymantapachan chhayna runakunawan kawsarqani. Paykunaqa imaymanatan ñoqarayku ruwarqanku, manan hayk’aqpas chaytaqa pagayta atiymanchu. Mana uyariy atiq iñiqmasinchiskunamantaqa askhatapunin yachasunman”, nispa.

Jehová Diosqa pay sonqo kaqtan munakun, uyariy atiqpas mana uyariy atiqpas kachun. Maytan kallpachawanchis mana uyariy atiq iñiqmasinchiskunaq iñiyninku, allin aguantaq kasqankupas. Chayraykun tukuy sonqowan paykunata munakunanchis.

[Uranpi willakuy]

[31 paginapi foto]

Mana uyariy atiqkunaman paykunaq rimayninpi Diosmanta yachachiqtinchisqa astawanmi yachayta munankuman

[32 paginapi fotokuna]

Huñunakuyninchispiqa allintan kallpachananchis mana uyariy atiqkunata