Diosqa Mesiaswanmi qespichiwanchis
Diosqa Mesiaswanmi qespichiwanchis
“Imaynan Adanpi tukuy wañunku, chay hinallataqmi Cristopipas tukuy kausarichinpusqa kanqaku.” (1 COR. 15:22, MR.)
1, 2. a) ¿Imatan Andreswan Felipewan ruwarqanku Jesusta reqsispanku? b) ¿Imaraykun ñoqanchis qallariypi Jesuspa qatikuqninkunamanta astawanraq nisunman Jesusmi Mesías nispa?
ANDRESQA manan chhikallantapas iskayarqanchu Nazaret llaqtamanta Jesús, Diospa Akllasqan kasqanta. Chayraykun wawqen Pedrota nirqan: “Mesiastan tarimuyku”, nispa. Andrés hina yuyaykuspan Felipepas amigon Natanaelta maskharqan kayta ninanpaq: “Pimantachus Moisesqa kamachikuy simipi qelqarqan, hinallataq profetakunapas qelqarqanku chaytan tarimuyku. Paymi Nazaret llaqtamanta Josepa churin Jesusqa”, nispa (Juan 1:40, 41, 45).
2 Qanrí, ¿segurochu kashanki Jesús prometesqa Mesías, ‘qespikuy ñanninta [...] Pusawaqninchis’ kasqanmanta? (Heb. 2:10.) Kunanqa askha razonkunan kan chayta creenanchispaq, qallariy siglopi discipulokunaq yachasqankumantapas astawanraq. Bibliapi willakuykunata leespan yachanchis imaynata Jesús rikuchirqan nacesqanmantapacha kawsarisqankama paypuni Cristo otaq Mesías kasqanta (leeychis Juan 20:30, 31). Chaymantapas, Bibliaqa sut’itan rikuchin Jesusqa hanaq pachapipas, Mesías hina ruwananta hunt’ashanallanmanta (Juan 6:40; leeychis 1 Corintios 15:22). Chayraykun ñoqanchispas nisunman: ‘Mesiastan tariyku’, nispa. Ichaqa, ¿imaynatan Jesuspa qatikuqninkuna yacharqanku Mesiasta tarisqankuta? Chayta kunan qhawarisunchis.
Mesiasmanta ‘pakasqa yachay’ pisi-pisimanta yachakun
3, 4. a) ¿Iman ñawpa discipulokunata yanaparqan pichus Mesías kasqanta yachanankupaq? b) ¿Imaraykun nisunman, Jesusllapipunin Mesiasmanta profeciakunaqa hunt’akurqan, nispa?
3 ¿Imaraykun qallariy siglopi discipulokuna mana iskayarqankuchu Jesús Mesías kasqanmanta? Jehová Dios Mesiasta reqsinankupaq profetankunawan willachisqanraykun. Chayta rikch’anachisun Bibliata t’aqwiq runaq rimasqanwan, paymi riman mármol rumimanta ruwasqa estatuaq partenkunamanta. Willanmi mana reqsinakuq runakuna huk salapi huñukusqankumanta, paykunas sapankanku rinku chay estatuaq huk pedazonta aparikuspa. Sichus chay pedazokuna cabenman estatuaq armakunankama chayrí, ¿imanisunmantaq? Huk runan chay estatuaq partenkuna imayna tallakunanmanta dibujaspa chay runakunaman sapankankuman apachirqan, nisunmanmi. Mesiasmanta willaq profeciakunapas chay estatuaq partenkuna hinan, sapankan willan pichus Mesías kasqanta yachananchispaq.
4 ¿Yanqallamantachu chay profeciakuna huk runapi hunt’akunman? Huk runan chaymanta nin: “Manapunin Jesusqa yanqallamanta chay profeciakunata hunt’anmanchu karqan”, nispa. Tukurqantaq, “tukuy tiempopipas Jesusmi, Jesusllapunin” Mesiasmanta willaq profeciakunataqa hunt’arqan, nispa.
5, 6. a) ¿Imaynatan Diospa juicion Satanás contra hunt’akunan karqan? b) ¿Imaynatan Dios pisi-pisimanta willarqan ima familiamanta ‘miray’ hamunanta?
5 Mesiasmanta profeciakunaqa ‘pakasqa yachaywanmi’ hukllachasqa kashan (Col. 1:26, 27; Gén. 3:15). Chay pakasqa yachayqa Diospa imaymana ruwananmantan riman, chayqa ancha importanten universontinpaq. Hukninmi rimashan “ñawpa mach’aqway” Satanás contra Diospa juicionmanta, paymi huchayoq runakuna huchaman, wañuyman hap’ichisqa kasqankumanta (Apo. 12:9). ¿Iman payta sucedenan karqan? Jehová Diosmi willasqaña ‘warmiq’ ‘miraynin’ ‘mach’aqwayta’ umanpi sarunanmanta, chhaynapi Diosman churapakuyta, onqoykunata, wañuyta ima Paqarichiqta chinkachinanpaq. Ichaqa manaraq chay sucedeshaqtinmi Dios qhawanallan karqan Saqra ‘mirayta’ talonninpi k’irinanta.
6 Pichus ‘miray’ kananmantaqa pisi-pisimantan willakurqan. Qallariypiqa, Abrahamtan Jehová Dios nirqan: “Lliw kay pachapi suyukuna[n] mirayniykiwan saminchasqa kanqaku”, nispa (Gén. 26:4). Tiempowantaq, Moisés willarqan paymanta aswan kuraq ‘profeta’ kananta (Deu. 18:18, 19). Qhepamantaq Dios Davidta nirqan familianmanta Mesías nacenanta, hinaspa rey kananta, kamachikuyninpas wiñaypaq kananta, chaytan qhepaman profetakuna willarqanku (2 Sam. 7:12, 16; Jer. 23:5, 6).
¿Ima pruebakunan kan Jesús Mesías kasqanmanta?
7. ¿Imaynapin Jesús Jehová Diospa ‘warminmanta’ hamurqan?
7 Prometesqa ‘mirayqa’ ‘warmimantan’ hamunan karqan, chay warmiqa hanaq pachapi Diospa llaqtanmi, paykunan kanku angelkuna. Arí, Diospa sapallan Churinmi ñawpaqkaq angelqa, paymi “hanaq pachapi sumaq kawsayninta” saqemurqan mana huchayoq runa nacenanpaq (Fili. 2:5-7, NM; Juan 1:14). Jesusqa “santo [...], Diospa Churin” nisqan karqan, santo espíritu mamitan Mariata ‘llanthunwan’ p’istuykusqanrayku (Luc. 1:35, MR).
8. ¿Ima profeciakunatan Jesús hunt’arqan bautizachikunanpaq Juanman riqtin?
8 Profeciakunan willarqan Mesías Belenmanta hamunanta, chay llaqtapin Jesús nacerqan (Miq. 5:2). Ichaqa willallarqantaqmi hayk’aq rikhurimunanta. Chayraykun qallariy siglopi judío runakunaqa makilla kasharqanku, paykunaqa yacharqankun Mesías rikhurimunanpaqña kashasqanta. Chaymi Bautizaq Juanta rikuspanku, tapukurqanku: “¿Paychu Cristoqa kanman?” nispa. Juantaq kutichirqan: “Hukmi hamushan ñoqamanta aswan atiyniyoq”, nispa (Luc. 3:15, 16). Jesusqa 30 watayoq kashaspan Juanman rirqan bautizachikunanpaq. Ñan 29 wata tukukapunanpaqña kasharqan, profeciakunan willarqan chay watapi Mesías rikhurimunanta (Dan. 9:25). Chay watapin Jesusqa predicayta qallarirqan: “Tiempoqa chayarqamunñan, Diospa qhapaqsuyunpas sispaykamunñan”, nispa (Mar. 1:14, 15).
9. ¿Imamantan Jesuspa qatikuqninkuna mana iskayarqankuchu manaña lliw yachachikuynintachu entienderqanku chaypas?
9 Ichaqa manan Mesiasmanta lliw yuyaykusqankuchu hunt’akurqan. Reyninkuta hinaña Jesusta chaskirqanku chaypas, manan entienderqankuchu qhepa tiempomanña hanaq pachamanta kamachimunanta (Juan 12:12-16; 16:12, 13; Hech. 2:32-36). Chaywanpas, qatikuqninkunaqa yacharqankun pay Mesías kasqanta. Paykunatan tapurqan: “Qankunari, ¿pin niwankichistaq?” nispa, chaymi Pedro mana iskayaspa kutichirqan: “Qanqa kawsaq Diospa Churin Criston kanki”, nispa (Mat. 16:13-16). Chay hinatan kutichillarqantaq Jesuspa huknin yachachikuyninta uyarispa askha runakuna phiñakuspa ripuqtinku (leeychis Juan 6:68, 69).
Mesiastan uyarinanku karqan
10. ¿Imaraykun Jehová Dios kamachirqan Churinta uyarinankupaq?
10 Hanaq pachapi ancha atiyniyoq kaq Diospa sapallan Churinmi, kay pachapiqa Yayaq representanten karqan ‘Diosmanta hamusqanrayku’ (Juan 16:27, 28). Chaymi nirqan: “Yachachikuyniyqa manan ñoqaqchu, aswanpas kachamuwaqniy Diospan”, nispa (Juan 7:16). Jesuspa rikch’aynin huknirayman tukuqtinmi kikin Jehová Dios nirqan, Jesús paypa Akllasqan kasqanta, kamachirqantaq: “Uyariychis”, nispa (Luc. 9:35). Arí, qatikuqninkunaqa uyarispan kasukunanku karqan. Iñispan allinkaqkunata ruwananku karqan, chayta ruwaspallan Diospa allin qhawarisqanqa kankuman karqan, wiñay kawsaymanpas aypankuman (Juan 3:16, 35, 36).
11, 12. a) ¿Imaraykun askha judío runakuna Jesusta mana chaskiyta munarqankuchu Mesiasta hina? b) ¿Pikunan paypi iñirqanku?
11 Askha pruebakunaña rikuchirqan Jesús Mesías kasqanta chaypas, yaqa llapan judiokunan mana chay hinatachu qhawarirqanku. ¿Imarayku? Ñawpaqmantaña huknirayta yuyaykusqankuraykun. Paykunaqa, Romamanta kacharichisqa kanankupaqmi huk umalliqta suyakusharqanku (leeychis Juan 12:34). Profeciakunan ichaqa willasqaña Mesías pisichasqa, mana allin qhawarisqa kananta, onqoyman nanayman yachasqa kananta, wañuchisqa kananmantawan. ¡Paykunaqa manan hayk’aqpas chhayna runataqa chaskinkumanchu karqan! (Isa. 53:3, 5.) Wakin qatikuqninkunapas manan allinchu sientekurqanku, Jesús Israel nacionta mana kacharichisqanta rikuspanku. Chaywanpas, paykunaqa hunt’aqmi karqanku, qhepamanñan allinta entienderqanku (Luc. 24:21).
12 Chaymantapas askha runakunan Jesuspa yachachikuyninta sasa entiendeyta hina qhawarirqanku, chayraykun mana chaskirqankuchu. Reinoman haykunankupaqqa ‘kikinkutan negakunanku’ karqan, Cristoq cuerpontan ‘mikhunanku’ karqan, yawarninta ‘ukyananku’ karqan, ‘wakmanta nacenanku’ karqan, ‘manataq kay pachamantachu kananku’ karqan (Mar. 8:34; Juan 3:3; 6:53; 17:14, 16). Qhapaqkunapaq, hatunchakuqkunapaq, iskay uyakunapaqpas sasan chay ruwayqa karqan. Huch’uyaykukuq judiokunan ichaqa ratulla payta chaskirqanku prometesqa Mesiasta hina. Chaytan Samariamanta wakin runakunapas ruwarqanku, paykunan nirqanku: “Yachayku payqa cheqaqpuni runakunata Qespichiq Cristo kasqanta”, nispa (Juan 4:25, 26, 41, 42; 7:31).
13. ¿Imaynapin Jesús talonninpi kanisqa karqan?
13 Jesusqa willasqañan wañunanpaq umalliq sacerdotekuna huchachanankumanta, mana judío runakuna k’aspipi clavanankumanta, kinsakaq p’unchaymantataq kawsarimpunanmanta (Mat. 20:17-19). Pay “Diospa Churin” ‘Cristo’ kasqanmanta judío umallikunaman niqtinmi, ‘Dios contra riman’, nirqanku (Mat. 26:63-66). Qhepaman Pilatoman apaqtinkupas, payqa repararqanmi ‘mana imatapas wañunanpaq hina ruwasqanta’, ichaqa paykunamanmi entregapurqan, judiokuna gobiernoq contranpi hatarisqanmanta tumpasqankurayku (Luc. 23:13-15, 25). Arí, “kawsay qoqta[n]” negarqanku, wañuchinankupaqpas yanqatan imaymanamanta tumparqaku, askha pruebakunataña rikurqanku Diospa Kachamusqan kasqanmanta chaypas (Hech. 3:13-15). Profetizakusqanman hinan, 33 wata Pascua fiesta p’unchaypi “wañuchisqa” karqan (Dan. 9:26, 27; Hech. 2:22, 23). Ñak’arispa wañusqanwanmi hunt’akurqan Génesis 3:15 textopi, “talonninpi kaninki” nisqa profecía.
¿Imaraykun Mesías wañunan karqan?
14, 15. a) ¿Ima iskay razonraykun Jehová consentirqan Churin wañunanta? b) ¿Imatan Jesús ruwarqan kawsarisqan qhepaman?
14 Jehová Diosqa iskay razonkunaraykun Wawan wañunanta consentirqan. Ñawpaqkaqpi, ‘pakasqa yachaymanta’ huknin iskayachiy sut’inchakunanpaq. Jesusqa wañunankama hunt’aq kasqanwanmi rikuchirqan mana huchayoq runa tukuy sonqomanta ‘Dios yupaychay’ atisqanta, paylla kamachinanpaq derechoyoq kasqanta defiendey atisqantapas, Satanasña anchata ñak’arichiqtinpas (1 Tim. 3:16, NM). Iskaykaq razontaqa Jesús kikinmi willarqan, nirqanmi: “Runaq Churinqa [...] hamurqan, [...] askha runa kacharichisqa kananrayku wañunanpaq[mi]”, nispa (Mat. 20:28). Rikusqanchis hina, payqa vidantan entregarqan Adanpa saqewasqanchis huchamanta librawananchispaq. Chaymantapas, sichus Jesusta chaskisun Diospa qowasqanchis qespichiqninchista hina chayqa, wiñay kawsaymanmi aypasun (1 Tim. 2:5, 6).
15 Kawsarisqan qhepatan Jesusqa 40 p’unchay qatikuqninkunaman rikhurirqan kawsashasqanta rikuchinanpaq, huk kamachikuykunata qonanpaqwan (Hech. 1:3-5). Chaymantataq hanaq pachaman ripurqan Jehová Diosman sacrificionpa valorninta haywananpaq. Hinaspataq suyakunan karqan Diospa Reinonpi Rey hina kamachiy qallarinanta. Ichaqa chay tiempo chayamunankamaqa askha ruwanayoqmi karqan.
Mesías ruwananta tukun
16, 17. ¿Imakunatan Mesías ruwashan hanaq pachaman kutipusqanmantapacha?
16 Jesusqa kawsarisqanmantapachan cristiana congregacionta kamachimushan, llank’asqankutapas qhawamushan (Col. 1:13). Ichaqa ñan tiempoña karqan Diospa Reinonpi Rey hina ruwanankunata hunt’ananpaqpas. Bibliapi profeciakuna, kay pachapi imaymana sucedesqankuna iman rikuchin 1914 watapi Jesús kamachiy qallarisqanta, ‘kay tiempoq tukukapuynin’ qallarisqantapas (Mat. 24:3, NM; Apo. 11:15). Chay qhepallamanmi Jesús angelninkunapiwan Satanasta supayninkunatawan hanaq pachamanta qarqomurqanku (Apo. 12:7-10).
17 29 watapi predicaymanta, yachachiymantawan Jesuspa qallarisqan llank’ayqa tukukapunanpaqñan kashan. Pisi tiempollamantañan runakunata juzganqa. Qespichiqninkuta hina chaskiq chanin runakunatan ninqa ‘qhapaqsuyu saminchakunata chaskinankupaq. Chaykunatan Diosqa kay pacha kamasqamantapacha [paykunapaq] wakichirqan’ (Mat. 25:31-34, 41). Payta mana kasukuqkunatan ichaqa wiñaypaq wañuchinqa, chaytan ruwanqa hanaq pacha ejercitonwan kay pachapi millay kawsayta tukuchipuqtin. Hinan Jesusqa Satanasta supayninkunatawan “chinkay-chinkay ukhu[man]” wikch’uykunqa (Apo. 19:11-14; 20:1-3).
18, 19. ¿Imatan Mesías ruwanqa? ¿Imaynapin ruwasqan runakunaq allinninpaq kanqa?
18 Waranqa Wata Gobiernopin Jesusqa, “Musphana [...] Yuyaychaq, Atiyniyoq Dios, Wiñay Yaya, Thak-kaypa Qollanan” nisqa titulokunata chaskisqanman hina ruwanqa (Isa. 9:6, 7). Kamachiqtinqa lliw runakunan mana huchayoqman tukupunqaku, kawsarimpuqkunapas (Juan 5:26-29). Kasukuq runakunatan Mesiasqa ‘kawsay unu pukyukunaman’ pusanqa, chaymi paykunataqa yanapanqa Jehová Dioswan allinpi kanankupaq (leeychis Apocalipsis 7:16, 17). Satanasmi ichaqa supayninkunawan qatikuqnin runakunawan ima tukukuy prueba qhepaman “azufreyoq nina qochaman” wikch’uykusqa kanqaku, chhaynapin ‘mach’aqwayqa’ umanpi sarusqa wañunqa (Apo. 20:10).
19 Jesusqa allintapunin Mesías hina ruwanankunata hunt’an. Chayraykun kay pachaqa paraisoman tukupunqa huchamanta librasqa runakuna tiyananpaq, paykunaqa mana onqospan wiñaypaq kusisqa kawsanqaku. Chaymantapas, Diospa sutinmi ch’uyanchakapunqa imaymanawan qhellichasqa kasqanmanta, sut’itaq kapunqa universontinpipas Dioslla kamachinanpaq derechoyoq kasqan. ¡Sumaq kawsaymi kashan Jehová Diospa Akllasqan runata kasukuqkunapaqqa!
Qanrí, ¿tarirqankichu Mesiasta?
20, 21. ¿Imaraykun Mesiasmanta runakunaman willananchis?
20 1914 watamantapachan parousía nisqapi, otaq hanaq pachapi Jesuspa kamachisqan tiempopiña kawsashanchis. Chaytaqa manaña runakuna rikunkuchu chaypas, Bibliapi profeciakunaq hunt’akusqanmi rikuchin cheqaq kasqanta (Apo. 6:2-8). Chaywanpas, yaqa llapa runakunan qallariy siglopi judío runakuna hina pruebakuna kashaqtinpas mana chaymanta yachayta munankuchu. Paykunaqa runakuna ukhumanta rikhuriq kamachikuqtan suyashanku. Ñoqanchismi ichaqa yachanchis Jesús kamachiyta qallarisqantaña. ¿Imaynan sientekurqanchis chayta yachaspa? Qallariypi Jesuspa discipulonkuna hinachá nirqanchis: ‘¡Mesiastan tariyku!’ nispa.
21 Kunanmi astawanqa runakunaman willananchis Mesías hina Jesuspa imakuna ruwasqanmanta. ¿Willashankichu chaymanta? Chayta ruwaspaqa, aswantan valoranki paypa tukuy ima ruwasqanta, allinniykipaq qhepaman imakunatachus ruwanqa chaytapas. Ñachá qanpas Andrés, Felipe hina familiaykikunaman, amigoykikunaman Cristomanta willarqankiña. Arí, Diosqa prometesqa Mesías Jesuswanmi runakunata qespichin, kay estudiopi yachasqaykiqa chaymanta willanaykipaq kallpachanasuykitan munayku.
¿Kutichiwaqchu?
• ¿Imaynatan qallariy siglopi discipulokuna yacharqanku Jesús Mesías kasqanta?
• ¿Ima iskay razonkunaraykun Jesús wañurqan?
• ¿Imatan Mesías qhepaman ruwanqa?
[Tapuykuna]
[21 paginapi dibujokuna]
¿Imaraykun qallariy siglopi judío runakuna yacharqanku Jesús prometesqa Mesías kasqanta?
[23 paginapi foto]
¿Allintachu runakunaman entiendechinchis Mesías hina Jesuspa ruwasqanmanta?