Kusisqalla kasun sasachakuykunaña kaqtinpas
Kusisqalla kasun sasachakuykunaña kaqtinpas
“Qanman k’askakuqkuna ichaqa kusikuchunku, kusisqallapuni takichunku.” (SAL. 5:11.)
1, 2. a) ¿Imakunan lliw runata hina cristianokunata llakichiwanchis? b) ¿Ima sasachakuytawanmi cristianokuna aguantananchis?
JEHOVÁ DIOSPA testigonkunaqa lliw runakuna hinan imaymana sasachakuypi tarikunchis. Arí, sufrinchismi mana chanin ruwaykuna, guerrakuna, hatun wayrakuna, terremotokuna, wakchayay, onqoykuna, wañuy ima kasqanrayku. Apóstol Pabloq nisqan hina, “yachanchismi Diospa tukuy imaymana kamasqankunaqa kunankama waqasqankuta muchusqankutapas” (Rom. 8:22). Chaymantapas huchayoq kasqanchisraykun sasachakuypi tarikullanchistaq, chayraykun rey David hina nisunman: “Huchallikusqaykunaqa wasapawanñan, llasa q’epi hinan ñit’iykuwan”, nispa (Sal. 38:4).
2 Lliw runa hina sasachakuykunapi tarikusqanchismantapas, cheqaq cristianokunaqa Cristota qatikusqanchisraykun imaymana sasachakuykunawan ‘ñak’arillanchistaq’ (Luc. 14:27). Arí, Yachachiqninchis Jesús hinan cheqnisqa qatiykachasqa kanchis (Mat. 10:22, 23; Juan 15:20; 16:2). Chayrayku, mosoq pachapi bendicionkunata suyakushananchiskama yupinta qatikuyta munanchis chayqa, anchata kallpachakunanchis, aguantananchistaq chay sasachakuykunata (Mat. 7:13, 14; Luc. 13:24).
3. ¿Imaynapin yachanchis Diosqa mana llakikuykunallapichu kawsananchista munasqanta?
3 Ichaqa, ¿chayraykuchu nisunman cristianokunaqa tukuy tiempon llakikuykunallawan kawsananchis nispa? Manapunin. Jehová Diosqa munanmi kay millay pachaq tukukunanta, promesankuna hunt’akunantawan suyakushananchiskama kusisqa kawsananchista. Bibliaqa askha kutipin Dios serviqkuna kusi sonqo kasqankumanta riman (leeychis Isaías 65:13, 14). Ejemplopaq, Salmo 5:11 texton Jehová Diosman hap’ipakuqkunamanta nin: “Qanman k’askakuqkuna ichaqa kusikuchunku, kusisqallapuni takichunku”, nispa. Arí, llakiq ñit’isqanña tarikuspapas atisunmanmi thakpi kusisqa kayta. Qhawarisunchis imaynatan Biblia yanapawasunman kusisqalla sasachakuykunata aguantananchispaq chayta.
Jehová Taytanchisqa ‘kusisqa Diosmi’
4. ¿Imaynan Dios sientekun payta mana kasukuqtinku?
4 Jehová Diospa ejemplonta qhawarisun. Payqa tukuy atiyniyoqmi, universopi munayniyoq, manan imatapas nitaq pitapas necesitanchu. Chhaynaña kaqtinpas, sonqonpi k’irisqachá sientekurqan hanaq pachapi huknin wawan pay contra hatarispa Satanasman tukupuqtinqa, chaymanta huk angelkunapas kaqllatataq ruwaqtinku. Hinaspapas maytachá sonqon nanarqan Hallp’api aswan sumaq kamasqankuna Adanwan Evawan payta mana kasukuqtinku, qhepaman paykunaq miraynin millonninpi runakuna Paylla kamachikunanpaq derechoyoq kasqanta mana reconoceqtinkupas (Rom. 3:23).
5. ¿Imakunan Jehová Diosta llakichin?
5 Kunanqa Saqraq Dios contra hatarisqanqa astawanraqmi rikukun. Soqta waranqa watan Jehová Diosqa rikurqan idolokuna yupaychayta, maqanakuykunata, wañuchinakuykunata, qhelli huchapi kawsaytapas (Gén. 6:5, 6, 11, 12). Chaymantapas aguantarqanmi yanqamanta tumpasqankuta, millayta pay contra rimasqankutapas. Mayninpiqa, kikin serviqninkunapunin llakichirqanku, kay textoq nisqan hina: “¡Hayk’a kutitan ch’inneqpi payta mana kasurqankuchu! ¡Hayk’a kutitan chay ch’inneq cheqaspi payta llakichirqanku! Yapapas-yapan Diostaqa wateqarqanku, Israelpa Ch’uya Diosnintan phiñachirqanku” (Sal. 78:40, 41). Rikusqanchis hina, Diosqa sonqonpi k’irisqan sientekun llaqtan mana kasukuqtin (Jer. 3:1-10). Ichaqa llakikullantaqmi serviqninkunata ima mana allinpas sucedeqtinqa (leeychis Jueces 10:16).
6. ¿Imaynatan Jehová Dios sasachakuykunata atiparqan?
6 Jehová Diosmi ichaqa sonqonpi k’irisqa kashaspapas mana chhayna llakisqallachu kasharqan. Ima sasachakuypas kaqtinqa, kasqan ratun allichananpaq imachus necesitakusqanta ruwarqan, chhaynapi chay sasachakuy pisiyananpaq. Chaymantapas ima necesitakusqantan ruwarqan qhepa tiempoman munaynin hunt’akunanpaq. Chaykunatataq ruwarqan chayqa, manañan llakisqachu aswanpas kusisqallan. Payqa kusikuywanmi yuyarayan suyasqan p’unchay chayamunanta, chaypin paylla kamachinanpaq derechoyoq kasqan sut’iman horqosqa kanqa, hunt’aq serviqninkunataq sumaq bendicionkunata chaskinqaku (Sal. 104:31). Millay tratasqaña karqan chaypas, ‘kusisqallan Diosqa’ kashan (1 Tim. 1:11, NM; Sal. 16:11).
7, 8. ¿Imaynatan Diospa ejemplonta qatikusunman sasachakuyninchiskunata allichanapaq?
7 Ñoqanchisqa manaña yachayniyoq Jehová Dios hinachu sasachakuykunata allichasunman chaypas, imaynatachus allichasqantan qatichikusunman. Llakikunapaqmi ima sasachakuypas kaqtinqa, ichaqa manan chhayna llakisqallachu tukuy tiempo kananchis. Diosman rikch’akuq kamasqataq kanchis chayqa, atinchismi yuyaykuyta, yachaywan ima ruwaytapas. Chayraykun sasachakuykunataqa atipasunman.
8 Sasachakuykunata aguantanapaqqa anchatan yanapawasun mana tukuy imapas makinchispichu ruwananchispaq kasqanta yachay. Sichus chaykunapi nishuta yuyaykusunman chayqa, aswantan llakikusun hinaspa manaña kusisqachu Jehová Diosta servisun. Huk sasachakuyta allichanapaq ruwarqanchisña ima necesitakusqanta chayqa, saqepunanchismi chayta hinaspa huk allin ruwaykunapi ocupakunanchis. Chay ruwaymantan Bibliapi askha experienciakunata qhawarisun.
Allin yuyaykuq kasun
9. ¿Imatan Ana allin yuyaywan ruwarqan?
9 Anapi yuyaykusun, payqa profeta Samuelpa mamitanmi karqan. Unay tiempon mana wawayoq kasqa chaymi nishuta llakichiq, chayraykun Elcanaq huknin warmin Peninapas paymanta burlakuq. Mayninpiqa sinchi llakisqa kaspan khuyayta waqaq manataq mikhuqpaschu (1 Sam. 1:2-7). “Llakisqa sonqontin” kaspan huk kutin Dios yupaychana wasiman rispa “sinchita waqaykukuspa Señor Diosmanta mañakurqan” (1 Sam. 1:10). Imayna sientekusqanmanta Jehová Diosman willakusqan qhepatan, uma sacerdote Eliwan rimarqan, paymi kay hinata nispa kachapurqan: “Israelpa Diosninmi tukuy mañakusqaykita qosunki, thak-kaypi ripuy”, nispa (1 Sam. 1:17). Anaqa comprenderqanchá makinpi tukuy ima kaqta ruwasqanta. Mana wawayoq kasqanmantaqa manataq ima ruwaytapas atirqanchu chayqa, mana sinchita llakikuspan allin yuyaywan ruwarqan, Biblian willan: “Kutipuspa mikhurqan, manañataq llakisqañachu karqan”, nispa (1 Sam. 1:18).
10. ¿Imatan Pablo allin yuyaywan ruwarqan sasachakuyninta mana allichayta atispa?
10 Apóstol Pablopas chay hinatan sasachakuyninta aguantarqan. ‘Khiska t’ipasqa hina nanaymi cuerponpi’ karqan, chaymi nishuta llakikurqan, manan yachakunchu ima nanaychus karqan chayqa (2 Cor. 12:7). Pabloqa tukuy atisqantan ruwarqan chayta chinkachinanpaq. Jehová Diostapas rogakurqanmi yanapananpaq. ¿Hayk’a kutitan rogakurqan? Kinsa kutita. Chaymantan Dios willarqan mana chay “nanayta” milagrota ruwaspachu qechunanta. Pabloqa entienderqanmi chayta, chayraykun manaña chaypi yuyaykurqanchu, aswanpas tukuy sonqomantan predicaypi llank’arqan (leeychis 2 Corintios 12:8-10).
11. ¿Imaynatan mañakuy yanapawanchis sasachakuykunata atipananchispaq?
11 ¿Chaykunata yachasqanchisraykuchu manaña Jehová Diosman ima llakikuyninchismantapas willananchis? Manapunin (Sal. 86:7). Diospa Simin Qelqan niwanchis: “Ama imamantapas llakikuychischu, aswanpas tukuy ima necesitasqaykichistapas Diosmanta mañakuychis, rogakuywan mañakuspaykichistaq Diosman graciasta qoychis”, nispa. ¿Imaynatan rogakusqanchisman Dios kutichimunman? Biblian kutichin: “Hinan Diosqa thak-kayta qosunkichis runakunaq mana aypay atisqan thak-kayta, chay hinapin sonqoykichistapas yuyayniykichistapas Jesucristopi Diosqa waqaychanqa”, nispa (Fili. 4:6, 7). Diosqa manaña sasachakuyninchista tukuchinmanchu chaypas, mañakusqanchisman kutichimuspan yuyayninchista waqaychan. Chayraykun imakuna llakichiwasqanchismanta Diosman willakuqtinchisqa thakpi sientekunchis, allintataq entiendenchis llakiwan ñit’ichikuy mana allinninchispaq kasqanta.
Q’ochukusunchis Diospa munayninta ruwaspa
12. ¿Imaynapin mana allinninchispaqchu kanman unay tiempo llakisqalla kay?
12 Biblian nin: “Llaki-phutiy p’unchaypichus pisi kallpayanki chayqa, pisi kallpapunin kashanki”, nispa (Pro. 24:10). Chaymantapas rimanmi ‘llakisqa sonqo uyata unphuyachisqanmanta’ (Pro. 15:13). Wakin cristianokunaqa sinchi llakisqa kaspan manaña Bibliata leenkuchu nitaq yuyaymanankuchu. Hinaspapas manañan sonqomantachu mañakunku, iñiqmasikunamantapas t’aqakuytan qallarinku. Chayrayku, unay tiempo llakisqalla kayqa espiritualpi urmachiwasunman (Pro. 18:1, 14).
13. ¿Ima ruwaykunan kusichiwanchis kallpachawanchispas?
13 Ima ruwaytapas allillantapuni qhawariymi ichaqa yanapawanchis allin kaqkunata ruwaspa kusilla kananchispaq. Ejemplopaq, rey Davidmi qelqarqan: ‘Diosníy, [kusikuywanmi] munayniykita ruwani’ , nispa (Sal. 40:8). Chayrayku imapas mana allinchu lloqsiqtinqa, manapuni espiritual ruwayninchiskunata saqenanchischu, chaykunaqa hampi hinan llakikuykunapaq. Sichus Bibliata estudiashallasun chayqa, q’ochukusunmi chaytan Jehová Dios niwanchis (Sal. 1:1, 2; Sant. 1:25). Diospa Simin Qelqata leespa, huñunakuykunaman rispa iman “sumaq rimasqakuna[ta]” t’aqwinchis, chaykunaqa kusichiwanchismi kallpachawanchistaq (Pro. 12:25; 16:24).
14. ¿Jehová Diospa ima promesanmi kusichiwanchis?
14 Diosqa askha razonkunatan q’ochukunanchispaq qowanchis. Ñawpaqtaqa, salvawananchispaqmi prometewanchis (Sal. 13:5). Yachasqanchis hina, imaña kay tiempopi sucedewasun chaypas, sichus tukuy sonqowan servisun chayqa, sumaq premiotan qhepaman chaskisun (leeychis Eclesiastés 8:12). Chaymantan profeta Habacuc sumaqta rimarqan: “Higos sach’aña mana t’ikaqtinpas, uvas yurakunaña mana ruruqtinpas, olivo sach’aña mana ruruqtinpas, chakrakunapiña cosecha mana kaqtinpas, oveja t’aqaña wañurqarichisqa kaqtinpas, uywa kanchakunapiña wakakuna mana kaqtinpas, ñoqaqa Señor Dioswanmi kusikusaq, Qespichiqniy Dioswanmi q’ochukusaq”, nispa (Hab. 3:17, 18).
“¡Kusisamiyoqmi Señor Diosniyoq llaqtaqa!”
15, 16. ¿Diospa imakuna qowasqanchiswanmi kay tiempopi kusikunchis?
15 Diosqa munanmi sumaq promesankuna hunt’akunanta suyashananchiskama, imaymana allin kaqkuna qowasqanchiswan kusisqa kawsananchista. Chaymatan Bibliata qelqaq huk runa nirqan: “Ñoqaqa yachanin, kawsashanankamaqa manan aswan allinqa runapaq kanchu, aswanpas kusikunallanmi, allinkaqllatapuni ruwanallanmi. Diospa qowasqallanchistaqmi mikhunchisña, ukyanchisña, tukuy llank’asqanchiswanña q’ochukunchis chaypas”, nispa (Ecl. 3:12, 13). ‘Allinkaqllatapuni ruwayqa’ hukkunatapas yanapaymi. Jesuspa nisqan hina, qospan astawanqa kusikunchis chaskinanchismantaqa (Hech. 20:35). Chayrayku Jehová Diosta kusichisqanmantapas, huk cristianoqa anchata kusikullantaq qosanta otaq esposanta, tayta-mamanta, wawankunata, huk familiankunatapas sumaqta trataspa (Pro. 3:27). Chhaynallataqmi iñiqmasinkunawan sumaq sonqo, qoykukuq, pampachaq kaqtin, predicacionpi llank’ananpaq kallpachakuqtinpas (Gál. 6:10; Col. 3:12-14; 1 Ped. 4:8, 9).
16 Eclesiastés libro leesqanchispin rimashan mikhuymanta ukyaymanta, chaykunawanqa sapa kutillanmi q’ochukunchis. Chaymantan yachanchis sasachakuykunaña kaqtinpas Diospa imaymana qowasqanchiswan q’ochukuy atisqanchista. Chaymantapas gratisllan kusikunchis sumaq tardeyaykuyta, yunkakunata, orqokunata, qochakunata qhawarispa, uña alqochakunaq pukllasqanta rikuspapas. Chaykunapi yuyaykuqtinchisqa, tukuy allin kaqkuna qowaqninchis Jehová Diostan astawan munakunchis.
17. a) ¿Imakunata ruwaspan rikusun sasachakuyninchiskunaq allichakusqanta? b) ¿Iman kay tiempopi consolawanchis?
17 Sichus Diosta munakusun, kamachikuyninkunata kasukusun, Jesuspa sacrificionpitaq iñisun chayqa, ñan lliw sasachakuyninchiskunaq tukupusqanta rikusunña, hinaspa wiñaypaq kusisqa kawsasun (1 Juan 5:3). Chay p’unchay chayamunankamaqa, consolakusun Jehová Diosninchis lliw llakikuyninchiskunamanta yachasqanrayku. Chaymi Davidtapas kallpacharqan, paymi nirqan: “Anchatapunin munakuwanki, chaymi q’ochukuspa kusikusaq. Qanmi muchusqaykunata rikurqanki, llakikusqaykunatapas yacharqanki”, nispa (Sal. 31:7). Arí, Diosqa anchatan munakuwanchis, chayraykun imaymana sasachakuykunamanta librawasunchis (Sal. 34:19).
18. ¿Ima razonkunan kashan Diospa llaqtan q’ochukunanpaq?
18 Diospa lliw promesankuna hunt’akunankamaqa pay hina kusisqa kasun. Amapuni ima llakiwanpas Dios serviyninchispiqa hark’achikusunchu. Yuyaykuq, yachayniyoq kasqanchiswan sasachakuykunata atipasun. Jehová Diospa yanapayninwanqa manan llakisqallachu purisun. Q’ochukusun tukuy ima qowasqanchiswan, rikusqanchis kaqkunawan espiritual kaqkunawanpas. Sichus payman hap’ipakusun chayqa, imaymanamantan kusikusun Salmo 144:15 textopi niwasqanchis hina: “¡Kusisamiyoqmi Señor Diosniyoq llaqtaqa!”
¿Imakunatan yacharqanchis?
• ¿Imaynatan Jehová Dios hina sasachakuykunata atipasunman?
• Sasachakuypi tarikuspa, ¿imaraykun allinpuni allin yuyaykuq kay?
• ¿Ima razonkunan kan sasachakuykunaña kaqtinpas kusisqalla Diosta servinanchispaq?
[Tapuykuna]
[16 paginapi fotokuna]
Diosqa maytan llakikun kay pachapi imaymana mana allinkunata rikuspa
[Fotota horqorqan]
© G.M.B. Akash/Panos Pictures
[18 paginapi fotokuna]
Diosqa imaymanawanmi yanapawanchis kusilla kashananchispaq