Ruwanaña kaqtinpas kusisqa Diosta servisun

JEHOVÁ DIOSQA munanmi serviqninkuna kusisqa kanankuta (Sal. 100:2). Ichaqa askha ruwananchiskunan kan. Yaqapaschá manaraq bautizakushaqtiykiqa imakuna ruwanaykipaq tiempoyki karqan; kunanmi ichaqa predicayman huñunakuyman ima rinayki kanqa chhaynapi ruwanaykikuna yapakun, chayraykupaschá mayninpi sayk’usqa hina sientekunki. Chaypaschá llakikunki llapa ruwanaykita mana allinta hunt’aspa. Chhaynaqa, ¿imatan ruwanayki ‘Diosta kusisqa’ servishanallaykipaq? (Neh. 8:10.)

Sasa tiempokunapi kawsasqanchisraykun manan tiemponchis aypawanchischu, chayraykun allinpuni kanman horariota ruwakuy. Chaymi apóstol Pablo qelqarqan: “Allintapuni reparakuychis imaynatachus kawsashasqaykichista, ama mana yuyayniyoq hinaqa kawsaychischu, aswanpas yachayniyoq hinapuni kawsaychis. Tiempotaqa ama usuchiychischu, kay p’unchaykuna mana allin kasqanrayku”, nispa (Efe. 5:15, 16).

Ancha allinpuni chay textoq nisqanqa. Chayraykun tapukunanchis: “¿Imakunatan ruwanay sapallaypi Bibliata estudianapaq, familiaywan kuska kanaypaq, predicanaypaq, llank’anaypaq huk ruwaykunapas allinpi tukunanpaq?” nispa.

Yuyarishankichá Diosman qokushaspa bautizakushaspapas kusikusqaykita. ¿Imaraykun kusikurqanki? Jehová Diosmanta ima munasqanmantapas yachasqaykirayku. Chaykunata yachanaykipaqqa unay tiempotachá estudiarqanki, ichaqa manan yanqapaqchu kallpachakurqanki, chay yachasqaykin yanaparqasunki kawsayniykita cambianaykipaq kusisqa kawsanaykipaqpas.

Sichus Bibliata mana leesunchu nitaq estudiasunchu chayqa kusikuyninchismi pisiyapunman. Chhaynaqa, sichus tiempoyki mana aypasunkichu chayta ruwanaykipaq chayqa, horarioykitan allinta allichanayki. P’unchaypi chikallantapas Bibliata estudianki yuyaymananki ima chayqa Jehová Dioswanmi astawan hukllachakunki kusisqataqmi kankipas.

Askha cristianokunan huk ruwayninkumanta tiemponkuta t’aqanku aswan allin ruwaykunata ruwanankupaq. ¿Chaytachu qanpas ruwashanki?  Kaykunata tapukuy: “¿Hayk’a tiempotan periodicota leeni, televisionta qhawani, takikunata uyarini huk ruwaykunatapas ruwani?” nispa. Chay ruwaykunaqa manan huchachu ichaqa allin yuyaywanmi chaykunata ruwana (1 Tim. 4:8). Sichus tiempoyki manapuni aypasunkichu chayqa hukmantan horarioykita allichanayki.

Kinsa wawayoq Adam sutiyoq umalli nin: “Imachus kapuqnillaywanmi kawsani, manataqmi yanqa ruwaykunapichu tiempoyta usuchini nitaq askhachu ima kaqniykunapas. Yaqapaschá wakinqa ninkuman: ‘Manan kusirikuyta tarinchu’, nispa; ichaqa allin yuyaywanmi akllani imakunapi q’ochurikunaykupaq”, nispa.

Diosta serviypi akllakusqanchismanta, ¿manachu tukuy ima ruwasqanchispas allinninchispaq karqan? Chaykunapi yuyaymanasun chayqa, aswan kusisqan kasun, allinpaqmi imatapas qhawarisun. Chaymantan kinsa wawayoq Mariusz umalliqpas nin: “Biblia estudiayta qallarisqaymantapachan allinpaq imatapas qhawarini. Arí, mayninpiqa sasachakuykunapin tarikuni, chaymanta wakintaqa Jehová Diosllan yachan. Ichaqa Diospa yanapayninwanmi kusisqa kawsani”, nispa.

Rikusqanchis hina allinpaqña imatapas qhawarinchis chaypas, manan llakikuyninchistaqa chinkachinqachu, ichaqa yanapawasunmi imatapas allinta ruwanapaq sasachakuyninchiskunata aguantanapaqpas. Biblia nin: “Llakisqa sonqoyoqpaqqa sapa p’unchaypas sasakaman, kusisqa sonqoyoqpaqmi ichaqa sapa p’unchaypas kusikuyllapuni”, nispa (Pro. 15:15). Hinaspapas sichus Jehová Dios munakuwasqanchispi yuyaymanasun chayqa, astawanmi payta munakusunchis kusikuyninchistaq yapakunqa (Mat. 22:37).

Jehová Diospa munayninta ñawpaqta ruwasun chayqa yanapawasunmi familia ukhupi kusisqa kawsananchispaq. Sapankanchispas Bibliaq nisqanman hinapuni kawsasun chayqa, manan phiñachinakuykuna kanqachu, hukllachanakusunmi aswan sumaq kawsaytaq kanqapas. Arí, sumaq thak kawsaymi wasipi kanqa (Sal. 133:1).

Familiantin kuska Diosta serviypas ancha allinpunin. Mariusz iñiqmasinchismi nillantaq: “Familiaywan kuska kanaypaq tiempota hap’iyqa ancha allinpunin. Esposaypas kusatan yanapawan. Kuskan predicaq lloqsiyku, estadiopi hatun huñunakuykuna ruwakuqtinpas kuskan limpiaq riyku, huk huñunakuypi discurso tupawaqtinpas riysiwanmi. Anchatan kallpachawan yanapaynin”, nispa.

Bibliaqa llapa qosakunatan kamachin familianpa necesitasqanta qonankupaq (1 Tim. 5:8). Ichaqa sinchita llank’anaman qokuqtinchisqa, manan Jehová Dios serviyninchispi kusikuyta tarisunmanchu. Chhayna kaqtinqa Jehová Diospa yanapaynintan mañakuna (Sal. 55:22). Wakinqa Diospaq astawan llank’anankuraykun huk llank’anata maskhanku. Manan mayqen cristianopas askha qolqeta ganananraykuqa Dios serviyninta pisiyachinanchu (Pro. 22:3).

Chhaynapi tarikunki chayqa, yaqapaschá qelqawaq kunan llank’anaykipi otaq maskhasqayki llank’anapi imakuna allin kanman imakunataq mana allinchu chayta. Lliwmi munanchis llank’ananchispi allinta pagawananchista, ichaqa chhayna llank’anayoq kaqtiyki, ¿kanqachu tiempoyki familiaykiwan kuska Diosta servinaykipaq? Chaykunapi allinta yuyaymanaspa Diospa allin qhawarinanpaq hina decidikuy.

Sichus llank’anaykirayku espiritualpi mana wiñashankichu chayqa, manan hinallachu kanayki. Askha cristianokunan ruwasqankuta cambiarqanku astawan Jehová Diosta servinankupaq. Polonia suyupi tiyaq iñiqmasinchismi nin: “Negociopi llank’asqayraykun ñishuta viajani, manan tiempoypas karqanchu Diosta servinaypaq familiaywan kanaypaqpas, chaymi chay llank’anayta saqepurqani”, nispa. Kunanqa manan tukuy tiempochu llank’an.

Hukkunata yanapayqa kusichiwanchismi

Jesusmi nirqan: “Aswan kusisamiyoqqa qoqmi chaskiqmantaqa”, nispa (Hech. 20:35). Llapa cristianokunan chayta yachanchis. Mayninpiqa hukkunatan kusichisunman sumaqta rimapayaspa, napaykuspa otaq imatapas  congregacionpi ruwasqanmanta agradecekuspa. Chhayna ruwayqa ñoqanchistapas kusichiwasunmi.

Apóstol Pablon iñiqmasinkunata khaynata nirqan: “Llakisqakunata kallpachaq hina rimapayaychis ‘pisi kallpakunata kallpachaykuychis’”, nispa (1 Tes. 5:14). Llakisqa sonqoyoqkunaqa manapaschá sapallankumanta sasachakuyninkuta atipayta atinkumanchu. ¿Imaynatan yanapasunman? Sichus huk iñiqmasinchista reparanchis Dios serviyninpi pisi kallpayasqanta chayqa, kallpachananchismi. Ñoqanchispas chayta ruwaspa kallpachakusun. Manaña sasachakuyninta allichayta atisunchu chaypas atisunmi kallpachayta. Kayta yuyarichiy, Jehová Diospi tukuy sonqonwan hap’ipakunqa chayqa manan Diosqa saqerparinqachu (Sal. 27:10; Isa. 59:1).

Chaymantapas paywan kuskan predicaq risunman. Jesuspas 70 qatikuqninkunatan kamachirqan “iskay-iskaymanta” predicaq rinankupaq (Luc. 10:1). Chhaynapin paykuna pura kallpachanakurqanku. Ñoqanchispas iñiyninkupi pisi kallpayaqkunawan predicaq lloqsisun chayqa kallpachanakusunmi.

Kawsayninchispiqa kanpunin llakikuykuna. Ichaqa Pablon nin: “Señorwan hukllachasqa kaspa kusikullaychispuni. Huktawanmi niykichis: ¡Kusikullaychispuni!” nispa (Fili. 4:4). Diosta munakusqanchis, kamachikuyninkunata kasukusqanchis, tukuy sonqomanta predicanapaq kamachiwasqanchista kasukusqanchismi kusichiwanchis. Aswantaqa Jehová Diosmi yanapawanchis sasachakuyninchiskunata atipanapaq (Rom. 2:6, 7).

Iñiyninchis kaqtinmi Diospa prometesqan mosoq pachata suyakushanchis. ¡Maytachá kusikusunchis chaypi kaspaqa! (Sal. 37:34.) Chayrayku ama pisipasunchu. Diospa tukuy imapas qowasqanchista yuyashallasun chayqa ‘Diostan kusisqa’ servisun (Sal. 100:2).

[8 paginapi dibujo]

(Imaynapuni kasqanta yachanaykipaq, qelqata qhaway)

Diosta kusisqa servinapaqqa allintan tiemponchista t’aqananchis

Q’OCHURIKUYPI

FAMILIAPI

LLANK’ANAPI

HUÑUNAKUYPI

BIBLIATA ESTUDIASPA

PREDICACIONPI

[10 paginapi fotokuna]

¿Yanapawaqchu pisi kallpayaq iñiqmasiykita?