Jehová Diospa gobiernollanmi aswan allinqa
Jehová Diospa gobiernollanmi aswan allinqa
“Ancha hatun Diospa kamachikusqanta llapa runa yachananpaq.” (DAN. 4:17.)
1, 2. ¿Imaraykun runakunaq gobiernon waqllipun?
RUNAKUNAQ kamachisqanqa yanqapin tukun. ¿Imarayku? mana yachayniyoq kasqankurayku. Kunanqa aswan sut’itan rikukun kamachikuq runakuna mana yachayniyoq kasqanku, askhan kanku: “paykuna kikinkuta munakuqkuna, qolqe sonqokuna, alabakuqkuna, hatunchakuqkuna”, “mana reqsikuqkuna”, “mana munakuyniyoqkuna”, “yanqa qasi tumpakuqkuna, aychankuq munaynillanta ruwaqkuna, millay yana alma runakuna, tukuy allinkaqta cheqnikuqkuna, amigonkunata hap’iykachiqkuna, waq’a hina ruwaqkuna, pay-payman tukuqkuna ima” (2 Tim. 3:2-4).
2 Ñawpa tayta-mamanchismi Diospa gobiernonta mana kasukuyta munarqankuchu. Yaqapaschá Diosmanta t’aqakunankupaq yuyaykurqanku, ichaqa “kay pachapi kamachikuq” Satanaspa makinpin urmarqanku. Chay sucedesqanmantaqa soqta waranqa watañan pasarun, Saqraq munaychakusqan pachapin runakunaqa kamachinku, chayraykun sinchi sasachakuykuna kashan (Juan 12:31). Kay tiempomanta rimaspan, Historia Oxford del siglo XX nisqa libro nin: “Kay pachapi sumaq kawsay kananpaq kallpachakuyqa yanqan”, nispa. Chaymantataq willan: “Allin kawsay apamuytaqa manan runakuna atinkuchu, chaypaq kallpachakuyqa hatun llakita, mana allin kamachikuyta, hatun guerrakunata iman apamun”, nispa. Chay libroqa sut’illantan willan runaq waqllisqa kamachikuyninmanta.
3. Adanwan Evawan mana huchallikuqtinku, ¿imaynatan Dios Hallp’ata kamachinman karqan?
3 ¡May llakikuymi chayqa! Adanwan Evawanqa Jehová Diospa sumaq gobiernontan wikch’uykurqanku. Manan allintachu yachanchis imaynatas Dios Hallp’ata kamachinman karqan paykuna kasukuqtinku chayta. Ichaqa munakuywanmi mana pimanpas sayapakuspa runakunata kamachinman karqan (Hech. 10:34; 1 Juan 4:8). Payqa ancha yachayniyoqtaq chayqa,manan pantanmanchu karqan gobierno runakunaq pantasqankuta hinaqa. Diospa kamachikuyninqa “llapa kawsaqkunata munasqankuwan” saksaykachinman karqan (Sal. 145:16). Arí, paypa kamachikuynillanmi aswan allin gobierno kanman karqan (Deu. 32:4). ¡Maytan llakikunchis mana Diospa kamachisqanchu kasqanchismanta!
4. ¿Maykaman Satanaspa atiynin gobiernananpaq?
4 Ichaqa kaytan yuyarinanchis, Jehová Diosqa consentirqanña runakuna kikinkuta gobiernakunankuta chaypas, chaywanqa manan rikuchisharqanchu pay manaña runakunata gobiernananpaq derechoyoq kasqanta. Arí, runakuna ukhupiqa ‘Ancha hatun Diosmi kamachikuq’, chaytan Babiloniapi rey Nabucodonosorpas reconocerqan (Dan. 4:17). Qhepamanqa, Reynowanmi Diospa munaynin hunt’akunqa (Mat. 6:10). Jehová Diosqa huk tiempollan saqerqan Satanás ‘kay pachapi kamachiq dios’ kananta, chhaynapi Diosman churapakusqan hawa sasachaykunata hatarichisqan allichakunanpaq (2 Cor. 4:4; 1 Juan 5:19). Ichaqa kay pacha gobiernaq kaspapas, Saqraqa manan hayk’aqpas munayninman hinallachu kamachirqan aswanpas permitisqankamallan (2 Cró. 20:6; tupachiy Job 1:11, 12; 2:3-6). Chaymantapas, Satanaspa kamachisqan pachapiña kawsashaspapas, askha runakunan Kamaqninkuta kasukunankupaq decidikurqanku.
Diosmi Israelpi kamachin
5. ¿Imatan israelitakuna Diosman prometerqanku?
5 Abelpa tiemponmantapacha Israel llaqta paqarinankaman, qharikunapas warmikunapas hunt’aq sonqowan Jehová Diosta yupaycharqanku, kamachikuyninkunatapas kasukurqanku (Heb. 11:4-22). Chaymantataq, Moisespa tiemponpi Dios Jacoqpa mirayninwan rimanakurqanku, chhaynapin Israel llaqtaman tukupurqanku. 1513 watapin Israel runakuna prometerqanku paykunapas miraykninkupas Jehová Diosta Kamachiqninkuta hina kasukunankupaq, nirqankun: “Señor Diospa tukuy kamachikusqantan ruwasaqku”, nispa (Éxo. 19:8).
6, 7. ¿Imaynatan Dios Israel llaqtata kamachirqan?
6 ¿Imarayku Jehová Dios Israel runakunata akllarqan llaqtan kananpaq? (leey Deuteronomio 7:7, 8.) Manan paykunaraykullachu, aswanpas sutinraykun, hinallataq Paylla kamachinanpaq derechoyoq kasqanrayku. Israelitakunaqa testigokunan kananku karqan Jehová cheqaq Dios kasqanmanta (Isa. 43:10; 44:6-8). Chayraykun paykunata nirqan: “Qankunaqa Diosniykichis Señor Diospaq t’aqasqa ch’uya llaqtan kankichis, paymi akllakurqasunkichis kay pachapi tukuy llaqtakunamanta paypa llaqtan kanaykichispaq”, nispa (Deu. 14:2).
7 Diosqa pantaq Israel runakunatan gobiernarqan. Moiseswanmi kamachikuyninkunata qorqan, chaypin rikuchirqan ch’uya, khuyapayakuq, chanin, munakuq kasqanta. Qhepamantaq, Josuepa tiemponpiña Israel llaqtaqa thak-kaypi kawsarqan, espiritualpi bendicionkunatataq chaskirqan Diospa kamachikuyninkunata kasukusqanrayku (Jos. 24:21, 22, 31). Chay tiempopi israelitakunata sucedesqanmi rikuchin Jehová Diospa gobiernollan aswan allin kasqanta.
¡Reyninkupaq runata akllasqankuqa mana allinninkupaqmi karqan!
8, 9. ¿Imatan israelitakuna mañakurqanku, allinninkupaqchu karqan?
8 Israelitakunaqa askha kutipin Diosmanta karunchakurqanku chaymi Diosqa manaña paykunata yanaparqanchu. Paykunaqa rikukuq umalliqtan mañakurqanku, huk runa reyninku kananpaq. Chaymi Jehová Diosqa profetan Samuelta nirqan: “Uyarillay llaqtaq mañakusqasuykitaqa, manan qantachu pisichasunki, aswanpas ñoqatan pisichawanku, manaña paykunaq reynin kanayta munaspanku”, nispa (1 Sam. 8:7). Qorqanña mañakusqankuta chaypas, willarqanmi chay hawa sinchi sasachakuykunapi tarikunankuta (leey 1 Samuel 8:9-18).
9 Tiempoq pasasqanman hinan chay sucedesqanqa rikukurqan. Israelpi reykunaqa hatun sasachaykunatan paqarichirqanku, astawanqa chaykuna sucederqan paykuna mana Diospaq hunt’aqchu kaqtinku. Waranqa-waranqa watakunaq pasasqanman hinan, lliw nacionkunapipas kaqlla kashan, ima gobiernopas Jehová Diosta mana kasukuqtinqa, manan ima ruwasqanpas unaypaqchu. Thak-kayta apamunaypaqmi Dios yanapawanku, ¿niq político runakunari? Paykunaqa manataq Jehová Diospa nisqanman hinachu ruwanku chayqa, manan Diosqa yanapanchu (Sal. 2:10-12).
Diospa kamachisqan mosoq llaqta
10. ¿Imaraykun Jehová Dios Israel llaqtanpa rantinpi huk llaqtata akllarqan?
10 Qhepamanmi rikukurqan israelitakunaqa Diosta manaña serviy munasqankuta. Mesiastapas manataq chaskisqakuchu chayqa, saqerparipurqanmi paykunata, hinaspa rantinpi mosoq llaqtata akllarqan. Chayraykun 33 watapi cristiana congregación paqarirqan akllasqa cristianokunawan. Jehová Diospa kamachisqan mosoq llaqtatan apóstol Pablo suticharqan “Diospa cheqaq Israel [llaqtan]”, nispa (Gál. 6:16).
11, 12. ¿Imakunapin ñawpa Israel llaqta mosoq Israel llaqtawan rikch’anakunku?
11 Ñawpa Israel llaqtaqa imaymanapin ‘cheqaq Israel llaqtanwan’ rikch’akunku, ichaqa manan llapanpichu. Ejemplopaq cristiana congregacionpiqa manan reykunachu kamachin, nitaq animalkunatachu huchankurayku sacrificanku. Ichaqa israelitakuna hinan huk organización kanku, chaypitaq umalliqkuna kan (Éxo. 19:3-8). Chay umalliqkunaqa manan millaytachu congregacionpi ovejakunata tratanku. Aswanpas sumaqtan michinku, allin ejemplotaq kanku espiritual ruwaykunapi. Llapankutan sumaq munakuywan qhawarinku (2 Cor. 1:24; 1 Ped. 5:2, 3).
12 ‘Cheqaq Israelpi’ tarikuq akllasqakunapas ‘wak ovejakunapas’, yuyaymanananchismi Dios ñawpa Israel llaqtata imayna tratasqanmanta. Chhaynapin Diospaq munakuyninchis wiñanqa, hinallataq llaqtanta imayna kamachisqanta ancha allinpaq hap’isun (Juan 10:16). Ñawpa Israelpi umalliqkuna, ¿yanaparqankuchu Israel llaqtata? Wakinpin yanaparqanku wakinpitaq mana. Chay sucedesqanwan, ¿imatan congregacionkunapi umalliqkuna yachanku? Paykunaqa manaña reychu kanku chaypas, allin ejemplon iñiypi kananku (Heb. 13:7).
Kay tiempopi Jehová Diospa gobiernon
13. ¿Iman sucederqan 1914 watapi?
13 Cristianokunaqa teqsimuyuntinpin willashanku runaq kamachikuynin tukukunanmanta. Jehová Diosqa 1914 watapin hanaqpachapi Reinonta takyachirqan, Churinta kamachinan tiyananpi churaspa. Chay watapin “atipaspa lloqsirqan astawan atipananpaq”, chaymantapas ‘enemigonkuna ukhupi kamachinanpaq’ (Apo. 6:2; Sal. 110:2, NM). Sapa kutillanmi nacionkunaqa Diospa gobiernonta mana kasukuyta munankuchu. Chaywanmi nishanku, “manan Diosqa kanchu” nispa (Sal. 14:1).
14, 15. a) ¿Imaynatan kunan Dios gobiernawanchis, ima tapuykunatan tapukunanchis? b) ¿Iman rikuchin mana ima gobiernopas Diospa Reinon hinaqa kasqanta?
14 Jesuspa akllasqa wawqenkunaqa pisillañan kay Hallp’api kashanku. Paykunan “Cristoq rantinpi” churasqa kanku (2 Cor. 5:20). Llapankun kanku allin yuyayniyoq hunt’aq kamachi, paykunan akllasqa cristianokunaman, hinallataq kay Hallp’api tiyanankupaq suyakuq ancha askha runakunaman espiritual mikhunata haywanku (Mat. 24:45-47; Apo. 7:9-15). Chay kamachitaqa Jehová Diosmi bendicen, chaymi espiritualpi sumaqta t’ikarishanchis.
15 Chayraykun sapankanchis tapukunanchis: “¿Hunt’ashanichu congregacionpi llapa ruwanaykunata? ¿Kusisqachu sientekuni Diospa Reinonpaq llank’asqaymanta? ¿Decidisqachu kashani atisqayman hina chay Reinomanta willanaypaq?” nispa. Umalliq T’aqaq kamachisqantan llapa cristianokuna kasukunanchis, hinallataq congregacionpi umalliqkunata. Chhaynapin rikuchisun Jehová Diospa kamachisqan kayta munasqanchista (leey Hebreos 13:17). Diosta kasukusqanchisraykun cristianokunaqa huk nisqalla sumaqta kawsanchis, kay pachapiqa manaña chhaynatachu runakuna kawsanku chaypas. Chhayna kawsasqanchiswanmi Jehová Diosta alabanchis, hinaspapas paylla aswan allin Rey kasqanta rikuchinchis.
Diospa Reinonmi atipan
16. ¿Imatan sapankanchis decidikunanchis?
16 Edén huertapi sasachaykuna rikhurisqanmi hukpaqkama allichakunqaña. Kunanmi sapankanchis decidikunanchis: ¿Jehová Diostachu kasukusun icha runakunaq gobiernonmanchu hap’ipakusun? Cristianokunaqa kusikunchismi allinta decidinankupaq llamp’u sonqo runakunata yanapaspa. Armagedón guerraqa chayamunqañan chaypin runakunaq gobiernonqa tukupunqa (Dan. 2:44; Apo. 16:16). Satanaspa makinpi runakunaq giobiernon chinkapuqtinqa, Diosllan Hallp’antinpi gobierno kapunqa. Chaypin sut’ita rikukunqa Diospa gobiernollan ima gobiernomantapas aswan allin kasqanta (leey Apocalipsis 21:3-5).
17. ¿Iman llamp’u sonqo runakunata yanapanqa aswan allin gobiernota tarinankupaq?
17 Pikunachus manaraq decidikunkuchu Jehová Diospa ladonmanta kayta chayqa, paymanta mañakuspan yuyaykunanku gobiernonwan apamusqan bendicionkunapi. Kay pacha kamachiqkunaqa manan chinkachiyta atinkuchu runaq wañuchinakusqanta terrorismo nisqatapas. Diospa Reinonmi ichaqa lliw millay ruwaq runakunata wañuchinqa (Sal. 37:1, 2, 9). Kunan tiempopi gobiernokunaqa guerrapin huk nacionkunawan kashanku, Diosmi ichaqa “teqsimuyuntinpi awqa-tinkuykunata qolluchin[qa]” (Sal. 46:9). Chaymantapas, runata salqa animalkunatapas allinpin kawsachinqa (Isa. 11:6-9). Tukuchinqan Kamachiqkuna mana ruway atisqankuta, wakcha-kayta yarqaytapas (Isa. 65:21). Lliwmi qhalilla, mana machuyaspa, mana payayaspa, mana wañuspa ima kawsanqaku, chay ruwaytaqa manan mayqen gobiernopas atirqanchu (Job 33:25; Isa. 35:5, 6). Hinaspapas, wañusqakunan kawsarimpunqaku kay pacha paraisoña kapuqtin (Luc. 23:43, NM; Hech. 24:15).
18. ¿Imata ruwaspan rikuchisun Jehová Diospa gobiernollan aswan allin kasqanta?
18 Yachamusqanchis hina, Reinon allichanqa Satanás ñawpa tayta-mamanchista Kamaqninkuta mana kasukunankupaq kallpachasqanmantapacha tukuy mana allinkuna paqarichisqanta. Soqta waranqa watañan Satanasqa mana allin kaqllata ruwashan, ichaqa Jesuswanmi Jehová Dios waranqa watallapi lliwta allichapunqa. ¡Chaymi rikuchin Diospa gobiernollan aswan allin kasqanta! Jehová Diospa testigonkuna nispa sutichakusqanchismi rikuchin pichus Kamachiqninchis kasqanta. Chayraykun sapa p’unchay rikuchinanchis Jehová Diosta yupaychaqkuna, serviqninkuna, testigonkuna ima kasqanchista. Chhaynaqa, ¡tukuy atisqanchistayá ruwasun lliw runaman Diospa gobiernollan aswan allin kasqanta yachachinanchispaq!
¿Imatan Diospa gobiernonmanta kay textokuna yachachiwanchis?
[Tapuykuna]
[29 paginapi dibujokuna]
Jehová Diosqa tukuy tiempon Ancha Hatun Kamachikuq
[31 paginapi foto]
Jehová Diosta gobiernonchista hina kasukuspan, Hallp’antinpi huk nisqalla kawsanchis