Wawaykikunata yanapay sasachakuyninkupi

KAY pachapi runakunaqa Satanaspa munayninman hinan imatapas ruwayta munanku, chaymi wawanchiskunaqa askha tentacionkunapi tarikunku, chaymantapas “wayna-kaypa waqllisqa munapayayninkunamanta[n]” ayqenanku (2 Tim. 2:22; 1 Juan 5:19). Paykunaqa tukuy atisqankutan ruwanku ‘Kamaqninkumanta yuyarikunankupaq’, chaymi mana iñiqkunaqa paykunamanta burlakunku, manchachinku, otaq imaymanata ruwanku paykunaq contranpi (Ecl. 12:1). Víctor sutiyoq iñiqmasinchismi escuelaman risqanta yuyarispa nin: “Pillapas karqanpunin turiyawaqniy, sayk’uchiwaqniy, provocawaqniy Testigo kasqayrayku, chaymi mana escuelamanpas ripuyta munaqñachu kani”, nispa. *

Chaymantapas, wawanchiskunaqa munankupaschá compañeronkuna hina kayta,  chaymi paykunapaq sasa kanman sonqonku kamachiy. Katy sutiyoq Testigo sipasmi nin: “Manan allinchu sientekuni hukkuna huknirayta qhawawaqtinku”, nispa. Alan sutiyoq wayna iñiqmasinchispas nillantaq: “Compañeroykunan invitawaq kanku semana tukuyta paykunawan lloqsinaypaq, chaymi riyta munaq kani”, nispa. Wakinkunataq sinchitapuni munanku escuela campeonatokunapi kayta, manataqmi participankuchu mana allin compañerokunamanta cuidakunankurayku. Tania sutiyoq sipas iñiqmasinchismi nin: “Sinchitapunin gustawan deportekuna. Chaymi ñoqapaqqa sasapuni karqan entrenadorkunaman: ‘Manan pukllaymanchu’, niyqa. Paykunataqmi nishutapuni rimapayawaqku equipopi pukllanaypaq”, nispa.

Tayta-mamakuna, qankunatan Jehová Dios kamachisunkichis wawaykichiskunata yachachinaykichispaq, sasachakuyninkunapipas yanapanaykichispaq (Pro. 22:6; Efe. 6:4). Chaypaqmi sonqonkuman churanaykichis Diospa yachachikuyninkunata chhaynapi sonqomanta kasukunankupaq (Pro. 6:20-23). Chhaynapin wawaykichiskunaqa paykunallamanta atipanqaku tentacionkunata.

Sasapunin qolqe tariy, familia uyway, iñiq t’aqapi ruwanakuna atiendeypas. Aswan sasaraqmi mana qosayoq otaq mana esposayoqkunapaqqa, hinallataqmi mana iñiqwan casarasqakunapaqpas. Chaymantapas tayta-mamakunaqa tiempotan hap’inanku wawankuta yachachinankupaq yanapanankupaq ima, chaytan Jehová Diosqa munan. Chhaynaqa, ¿imaynatan yanapawaqchis mana allin compañeronkuq nisqanta, ima tentaciontapas atipanankupaq?

Dioswanmi hukllachakunanku

Wayna-sipaskunaqa “mana rikuna Diosta” rikushankumanpas hinan kawsananku, chaypaqmi ichaqa yanapanata necesitanku (Heb. 11:27). Víctor iñiqmasinchismi nillantaq: “Jehová Dioswan hukllachakunaypaqmi tayta-mamay yachachiwarqanku Diosmanta mañakushanallaypaq. Chayraykun  huch’uychaymantapacha sapa tuta Diosmanta mañakuq kani. Payqa ancha cheqaqmi ñoqapaq karqan”, nispa. Qankunari, ¿wawaykichiskunawan kuskachu mañakunkichis? ¿Uyarinkichischu Diosman mañakusqankuta? ¿Kaqllatachu rimanku mañakuspa? ¿Tukuy sonqowanchu mañakunku? Chaykunatan makilla qhawarina, chhaynapin yachankichis iñiyninkupi wiñarishankuchus chayta.

Chaymantapas sapa p’unchay Biblia leeymi yanapallanqataq Diosta allinta reqsinankupaq. Katy iñiqmasinchismi nillantaq: “Huch’uychallaraq kashaspaymi Bibliata llapanta leerqani, chaymi yanapawarqan Diospi astawan confianaypaq, hukkunaña contraypi kaqtinkupas”, nispa. Chhaynaqa, ¿kanchu wawaykikunaq Biblia estudiananku programa? (Sal. 1:1-3; 77:12.)

Wawakunaqa manan llapankuchu kaqllata iñiyninkupi wiñarinku, wakinqa watankuman hinan iñiyninkupi ñawparinku. Chaywanpas yanapashanallan, mana chayqa sasan paykunapaq kanman Jehová Diosman k’askakuy. Chayraykun wawaykichista allinta yachachinaykichis, chhaynapin Diospa munasqanman hinapuni ruwanqaku maypiña tarikuspankupas (Deu. 6:6-9). Chaymantapas wawaykichiskunaqa allintan yachananku paykunapi Dios interesakusqanta.

Sumaq rimanakuymi kanan

Wawakunataqa yanapallasunmantaqmi sumaq rimanakuywanpas, ichaqa manan parlayllachu parlana, aswanmi tapurinanchis pacienciawantaq uyarinanchis kutichiwasqanchista, manaña sonqonchispaq hinachu kanman chaypas. Anne sutiyoq hermananchismi nin: “Iskay wawayoqmi kani. Paykunataqa entiendenaykaman sumaqta tapupayani imachus piensasqankuta, sasachakuyninkutapas”, nispa. Chhaynaqa, ¿tukuy yuyaywanchu wawaykichiskunata uyarinkichis?  Tanian nillantaq: “Tayta-mamayqa allintan uyariwaqku, manataqmi qonqaqkuchu ima willasqaytapas. Yachaqkun compañeroykunaq sutintapas, yuyaqkutaqmi paykunamanta willasqaytapas”, nispa. Chhaynaqa, sumaq rimanakuy kananpaqqa allin uyariq allin yuyariqmi kana.

Askha familiakunan mikhuna horasta sumaqta parlanku. Victormi nin: “Ñoqaykupaqqa ancha importanten karqan mikhunayku horas, chaymi llapallayku kanayku karqan. Mikhunaykukamaqa manan televisionta qhawanaykuchu, radiotapas uyarinaykuchu nitaq imatapas leenaykuchu karqan. Aswanpas sumaqta parlaspan mikhuq kayku. Chaykunan yanapawaq escuelapi sasachakuykunata aguantanaypaq. Parlallaqkutaq karqayku chayqa, mana manchakuspan tayta-mamayman willaq kani sasachakuyniykunata, chhaynapi yanapawanankupaq”, nispa.

Chhaynaqa, ¿semanapi hayk’a kutitan wawaykichiskunawan kuska mikhunkichis? Sichus kallpachakunkichis sapa kuti paykunawan kuska mikhunaykichispaq chayqa, sumaq rimanakuymi kanqa.

Familiantin Diosta Yupaychana Ch’isiqa ancha allinpunin

Familiantin Diosta Yupaychana horapas ancha allinpunin wawakunawan sumaqta rimanakunapaq. Chhaynapin paykuna yachanqaku sasachakuyninkuta imayna atipayta. Alan iñiqmasinchismi nillantaq: “Tayta-mamaykuqa familiantin estudiasqayku horapin sumaqta tapuwaqku allillanchu kasqaykuta, ima sasachakuykunapichus kasqaykutapas. Chayman hinataqmi yachachiwaqku”, nispa. Alanpa mamitanmi nin: “Chay horapin wawaykunawan ensayaq kayku imaynatachus tapukuqninkunaman kutichinankupaq, chaymi paykunata yanaparqan sasachakuyninkuta atipanankupaq”, nispa.

Wawakunaqa manan sapa kuti: “Manan chaytaqa ruwaymanchu”, nispallachu pasapunanku compañeronkuna imatapas niqtinku. Allintan yachananku imayna kutichiyta,  mana chayqa manan Diospa munasqanman hinachu ruwayta atinqaku. Hinallataqmi yachananku compañeronkuna burlakuqtinku imatachus ruwankuman chayta. Chaypaqmi allinpuni Familiantin Diosta Yupaychana horapi ensayay.

18 paginapi kaq recuadron willakushan Familiantin Diosta Yupaychana Ch’isinta imakunamantachus ensayawaqchis chayta. Chay ensayokunapiqa imamantachus paykunata tapunkuman chayman hina tapuy, chhaynapin allin preparasqa kanqaku kutichinankupaq. Chaymantapas allinta estudiallawaqchistaq Bibliapi wakin willakuykunata. Chhaynapin wawaykikunaqa allinta yachanqaku escuelankupi otaq maypiña tarikuspapas sasachakuyninkuta atipayta.

¿Sumaqtachu wasiykichispi kawsankichis?

Wawaykichiskuna escuelamanta lloqsimuspa, ¿usqhayllachu wasiman kutimuyta munanku? Sichus wasiykichispi sumaq kawsay kan chayqa, wawaykichiskunaqa chaypin tarinqaku allin yanapaykunata. Betel wasipi llank’aq hermananchismi nin: “Wasiypiqa sumaq kawsaymi kaq, chaymi yanapawarqan escuelapi kashaqtiy. Sasachakuyña escuelapi karqan chaypas, yacharqanin wasiyman chayaspaqa thak kawsay tarinayta”, nispa. ¿Sumaqtachu wasiykichispi tiyankichis? ¿Kanchu munanakuy, kusikuypas? Icha, ¿k’arakta phiñakuspachu, cheqninakuspachu tiyashankichis? (Gál. 5:19-23.) Sichus mana sumaqtachu kawsashankichis chayqa, kallpachakuychis cambianaykichispaq.

Wawakunataqa yanapallawaqchistaqmi allin amigokunata reqsichispa. Chayrayku, wasiykichisman invitaychis allin iñiqmasinchiskunata. Yaqapaschá watukuq umallita otaq precursorkunata invitawaqchis paykunawan kuska mikhunaykichispaq. Reqsishankichischá misionerokunata otaq Betelpi llank’aqkunatapas, allinmi kanman paykunawan wawaykichiskuna amigota ruwankuman chayqa. Karupi tiyanku chayqa cartanakunkumanmi, otaq telefonopi waqyanakunkuman, otaq Internetpipas. Paykunan yanapankuman allin ñanpi purinankupaq, espiritual metakuna churakunankupaqpas. Apóstol Pablopas allintan yanaparqan wayna Timoteota (2 Tim. 1:13; 3:10). Amigontinmi karqanku, chaymi Timoteota yanaparqan Dios serviyninpi allinta wiñarinanpaq (1 Cor. 4:17).

“Allinpunin, wawalláy”, nispa niy

Sichus wawanchiskuna Saqraq ruwayninkunamanta ayqekuspa allin kaqta ruwanqaku chayqa, Jehová Diospa sonqontan kusichinqaku (Sal. 147:11; Pro. 27:11). Qankunapas anchatachá kusikunkichis allin ñanpi purisqankumanta (Pro. 10:1). Paykuna munakusqaykichista rikuchiychis, sapa kutillataq “allinmi ruwasqaykichis” nispa niychis. Jehová Dios hina wawaykichiskunaman rimaychis. Paymi Jesús bautizakushaqtin nirqan: “Qanmi munakusqay Churiy kanki, qanmi anchata kusichiwanki”, nispa (Mar. 1:11). Maytachá Jesusta chay simikuna kallpacharqan pruebakunata aguantananpaq. Kaqllatataq qankunapas wawaykichiskunata niychis: “Wawalláy, anchatan munakuyki, kusikunitaq allin kaqta ruwasqaykimanta”, nispa.

Yachasqaykichis hina, wawaykichiskunataqa manan tukuy tentacionkunamanta, burlakuqkunamanta, manchachiqkunamantapas cuidayta atinkichischu, chaypas yachachiwaqchismi chaykunata atipanankupaq. Yanapaychis Jehová Dioswan amigontin kanankupaq. Kallpachakuychistaq paykunawan sumaqta parlanaykichispaq. Familiantin estudiasqaykichis horapi allinta yachachiychis, wasiykichispipas sumaqta kawsaychis. Chayta ruwankichis chayqa, wawaykichiskunan allin preparasqa kashanqaku sasachakuyninkuta atipanankupaq.

[Uranpi willakuy]

[18 paginapi foto recuadropiwan]

FAMILIAPI ENSAYAYCHIS

Familiantin Yupaychana Ch’isintaqa kaykunamantan ensayawaqchis:

▸ Huk entrenador ususiykita invitan escuelaq equiponpi pukllananpaq.

▸ Wasiman ripushaqtin huk compañero wawaykiman cigarrota haywan.

▸ Wakin waynakuna wawaykita ninku: “Huktawan predicaqta rikusqaykiku chayqa, maqasqaykikun”, nispa.

▸ Ususiyki predicacionpi punkuta takaqtin, compañeran lloqsirqamun.

▸ Compañeronkunaq qayllanpi profesor ususiykita nin: “Willawayku, ¿imaraykun mana banderata napaykunkichu?” nispa.

▸ Huk wayna sapa kutilla wawaykimanta burlakun Testigo kasqanrayku.

[17 paginapi foto]

¿Kanchu wawaykikunaq Biblia estudiananku programa?

[19 paginapi foto]

¿Waqyankichischu allin iñiqmasikunata kusirikunaykichis horaman?