¡Allin hamusqan kankichis allin ñanman!

“Kawsaspapas wañuspapas Señorpan kanchis.” (ROM. 14:8.)

1. ¿Imatan Jesús yachachirqan allin ñanmanta?

KAY kawsaypiqa askha ñankunan kan, ichaqa hukllan allin ñanqa, chayta akllakunanchistan Jehová Diosqa munan. Arí, Bibliapi Diospa kamachikuyninkunata kasukuy, Churin Jesucristomantapas yachaymi allin ñanqa. Jesusmi qatikuqninkunata yachachirqan Taytanta espiritupi cheqaq-kaypiwan yupaychanankupaq, chaymantataq kamachirqan: “Runakunata yachachimuychis yachachisqaykuna kanankupaq”, nispa (Mat. 28:19, 20; Juan 4:24). Sichus lliw nisqanta kasukusun chayqa, Jehová Diostan kusichisun paytaq saminchawasun.

2. a) ¿Imatan ñawpaqpi askha runakuna ruwarqanku Reinomanta yachaspanku? b) ¿Imaraykun qallariypi cristianokunamanta nikurqan ‘Ñanmantan’ kanku nispa?

² ‘Wiñay kawsaypaq akllasqa kaqkunan’ Bibliaq yachachisqanpi iñispanku bautizakunku (Hech. 13:48). Chaymi paykunata nisunman: “¡Allin hamusqan kankichis allin ñanman!” nispa. Qallariy siglopiqa askha nacionkunapin waranqanpi runakuna cristianoman tukupuspanku bautizakurqanku Diosta munakusqankuta rikuchinankupaq (Hech. 2:41). Paykunamantan nikurqan ‘Ñanmanta’ kanku, nispa (Hech. 9:2; 19:23, MR). Chaytaqa chanillantan nisharqanku, paykunaqa mosoq kawsaytan qallarisqaku, Jesucristopi iñispa ejemplonta qatikuspan kawsananku karqan (1 Ped. 2:21).

3. a) ¿Imaraykun bautizakurqanchis? b) ¿Hayk’an bautizakurqanku kay qhepa watakunapi?

³ Kay tukukuy p’unchaykunapiqa, iskay pachak kinsa chunka más nacionkunapi territoriokunapi iman runakunata Jesuspa discipulon kanankupaq yachachikushan. Kay qhepa chunka watakunallapin 2.700.000 runakuna bautizakurqanku, 5.000 sapa semana, chaypin rikuchirqanku Jehová Diosman qokusqankuta. Chaytaqa ruwarqanku Diosta munakuspanku payta serviyta munaspankun, chaymantapas Bibliamantan yachanku chayman hinataq kawsanku. Arí, bautizakuyqa may allinmi kawsayninchispi, chhaynapin Jehová Dioswan sumaq amigontin kayta qallarinchis. Chaymantapas, rikuchinmi hunt’aq kananchispaq yanapayninpi confiasqanchista, imaynan ñawpa kamachinkunawan ruwarqan hinata (Isa. 30:21).

 ¿Imaraykun bautizakuna?

4, 5. Willay bautizakuqkuna ima bendicionkuna chaskisqankumanta.

⁴ ¿Qanri? Ñapaschá yachankiña pichus Dios kasqanta, kawsayniykipipas cambiarqankiña hinaspa mana bautizasqa publicador kashanki. Chhayna kaqtinqa, allinpunin chay ruwasqaykiqa. Ichaqa, ¿ñachu oracionpi Jehová Diosman qokuspa bautizakuytaña munashanki? Bibliata estudiaspa yachasqaykiman hina, kawsayninchispiqa manan kikinchispa allinnillanchista maskhaychu nitaq qhapaqkaykuna maskhaychu aswan importante kanan, aswanpas Diosta hatunchaymi (leey Salmo 148:11-13; Lucas 12:15). Chaymantapas sichus bautizakunki chayqa, askha bendicionkunatan chaskinki. ¿Mayqenkunan wakin?

⁵ Bautizakunki chayqa, Diosta servispan sumaqta kawsanki, anchatataq kusikunki Diospa munaynin ruwasqaykimanta (Rom. 12:1, 2). Santo espiritun yanapasunki sumaq kawsayniyoq, iñiyniyoq kanaykipaq (Gál. 5:22, 23). Diosmi kutichimunqa mañakusqaykiman, Bibliaq nisqanman hina kawsanaykipaq kallpachakusqaykitapas bendecinqa. Aswan kusisqan predicanki tukuy sonqowantaq wiñay kawsay chayamunanta suyakunki. Astawanqa, Jehová Diosman qokuspa bautizakuspaykiqa cheqaqtapuni paypa testigon kay munasqaykitan rikuchinki (Isa. 43:10-12).

6. ¿Imatan rikuchinchis bautizakuspa?

⁶ Bautizakuspaqa lliwmanmi rikuchinchis Jehová Diosman qokusqanchista, paypaña kasqanchistapas. Chaymantan Pablo nirqan: “Manan mayqenninchispas kikillanchispaqchu kawsashanchis, manallataqmi kikillanchispaqchu wañunchispas. Kawsanchischus chayqa Señorpaqmi kawsashanchis, wañupunchischus chaypas Señorpaqmi wañupunchis. Chay hinaqa, kawsaspapas wañuspapas Señorpan kanchis”, nispa (Rom. 14:7, 8). Diosqa kamawarqanchis ñoqallanchismanta imatapas akllananchispaq. Kamachikuyninkunata kasukuspa ñanninpi puriqtinchisqa, munakuyninchistan rikuchinchis anchatataq sonqonta kusichinchis (Pro. 27:11). Bautizakuspaqa Diosman qokusqanchista, pay Reyninchis kasqantan rikuchinchis, kamachinanpaq derechoyoq kasqanpi ladonmanta kashasqanchistapas (Hech. 5:29, 32). Chhaynapin Jehová Diospas ñoqanchiswan kashan (leey Salmo 118:6). Ichaqa kashanraqmi askha bendicionkuna, chaykunatan kunanpas hamuq tiempopipas chaskisunman bautizakusqanchisrayku.

Sumaq bendicionmi Diospa llaqtanpi kayqa

7-9. a) ¿Imatan Jesús qatikuqninkunaman qonan karqan? b) Marcos 10:29,30 textopi Jesuspa promesan, ¿imaynatan kunan hunt’akushan?

⁷ Huk kutinmi, Pedro Jesusta nirqan: “Ñoqaykuqa imaymanaykuta saqemuspaykun qanwan purishayku. ¿Imataq ñoqaykupaqri kanqa?” nispa (Mat. 19:27). Payqa wakin discipulokunawanmi  yachayta munarqanku qhepa tiempopaq ima suyakuy kananta. Paykunaqa imaymanatan saqesqaku Reinomanta predicayman qokunankupaq (Mat. 4:18-22). ¿Imatan Jesús kutichirqan?

⁸ Marcos Evangeliopi willasqanman hina, paykunata nirqan qhepaman askha iñiqmasikunawan sumaq kawsanankuta. Nirqanmi: “Pipas wasintapas, wawqenkunatapas, panankunatapas, taytantapas, mamantapas, wawankunatapas, chakrankunatapas, ñoqarayku Diosmanta allin willakuykunaraykupiwan saqemuqqa, pachak kutitawanraqmi kay tiempopi chaskinqa wasikunata, wawakunata, chakrakunatapas, qatiykachasqaña kaspapas, qhepa tiempopitaq wiñay kawsayta chaskinqa”, nispa (Mar. 10:29, 30). Cristoq profetizasqanman hina, qallariy siglopiqa askha cristianokunan sumaq sonqo karqanku, paykunan Lidia, Áquila, Priscila, Gayo karqanku. Wasinkupin sumaqta chaskirqanku cristianomasinkuta, hinaspa paykunapaq allin ‘wawqekuna, panakuna, mamakuna’ ima karqanku (Hech. 16:14, 15; 18:2-4; 3 Juan 1, 5-8).

⁹ Jesuspa promesanqa kay tiempopin astawanraq hunt’akushan. Askha cristianokunan paykunamanta betelitakuna, siervos internacionales, misionerokuna ima, mana iskayaspa saqepurqanku ‘chakrankuta’ otaq kawsanankupaq ima kaqninkutapas askha nacionkunapi Reinomanta predicacionta yanapanankupaq. Wakinqa wasinkutan saqerqanku hinaspa imachus kaqnillankuwan kawsanku. Uyarillanchismi kusikuywan askha experienciakunata, chaypin yachanchis Jehová Dios cuidashasqanta, paykunataq kusisqa payta servispa sientekusqankuta (Hech. 20:35). Arí, llapa bautizasqa cristianokunan kusikuywan Diospa Reinonta chanin-kaynintawan ñawpaqta maskhayta atinku; pachantinpi iñiqmasinkuwan kuska huk nisqalla kallpachakuspa (Mat. 6:33).

‘Diospa pakaykuwasqanchisqa’ hatun bendicionmi

10, 11. ¿Iman ‘Diospa pakaykusqanpi’ tiyay? ¿Imatan ruwananchis pakaykusqa kanapaq?

¹⁰ Diosman qokuspa bautizakuspaqa huk bendiciontan chaskillanchistaq, ‘Ancha Hatun  Diospa pakaykusqanmi tiyanchis’ (leey Salmo 91:1). Chay ‘Ancha Hatun Diospa pakaykusqanpi tiyayqa’ espiritual peligrokunamanta pakaykuwasqanchismi. Chaytaqa manan yachankuchu espiritualpi ñawsa runakuna paypi mana iñiqkunapas. Sichus qokusqanchisman hina kawsanchis, tukuy sonqotaq paypi confianchis chayqa, nishanchismi: “Qanqa yanapaykuwaqniymi, pukaraymi, hap’ipaykukunay Diosmi kanki”, nispa (Sal. 91:2). Chhaynapin Jehová Diosqa Pakaykuwaqninchis kapun (Sal. 91:9). Mana chhayna kaqtin, ¿maypitaq aswan allin kasunman?

¹¹ “Diospa pakaykusqan” kaytaqa atinchis amigon kasqanchisraykullan. Chay sumaq amistadqa payman qokuspa bautizakuqtinchismi qallarin. Payman astawan asuykunanchispaqtaq Bilbliata estudiana, tukuy sonqowan mañakuna, kasukunanchistaq (Sant. 4:8). Jesusmi aswan allin ejemplonchisqa, payllan astawanqa Jehová Diospa ladonpi kashan. Payqa tukuy tiempon sonqomanta Taytanpi confiarqan (Juan 8:29). Ama hayk’aqpas Diosmantaqa iskayasunchu: payqa atinmi munantaq payman promesa ruwasqanchista hunt’ananchispaq yanapayta (Ecl. 5:4). Espiritualpi cuidawasqanchismi sut’ita rikuchin munakuwasqanchista, hunt’aq sonqowan servinanchista munasqantapas.

Espiritual paraisopi kawsayqa sumaq bendicionmi

12, 13. a) ¿Iman espiritual paraíso? b) ¿Imaynatan mosoqkunata yanapasunman?

¹² Diosman qokuspa bautizakusqanchisqa yanapawallanchistaqmi espiritual paraisopi kawsananchispaq. ¿Imataq chay paraisori? Ñoqanchispura sumaqta kawsasqanchismi, Jehová Dioswanpas iñiqmasinchiskunawanpas thakpin kawsanchis (Sal. 29:11; Isa. 54:13). Kay pachapi ima allin kaqpas manan chaywanqa igualakunmanchu. Chaytan reparakun internacional asambleakunapi, chaypin huñukunku askha nacionkunamanta iñiqmasikuna, imaymana rimaykunamanta, imaymana clase runakuna ima. Chaypiqa thak huk-nisqalla kawsay munanakuy iman rikukun.

¹³ Kay pachapi runakunan ichaqa mana chhaynatachu kawsanku (leey Isaías 65:13, 14). May kusikuymi ñoqanchispaq predicaspa chay runakunata espiritual paraisonchisman haykumunankupaq yanapayqa. Chaymantapas kusikunchismi mosoqkunata allinta predicanankupaq yanapaspanchis. Sichus umalliqkuna yanapananchispaq niwasunman chayqa yanapasunmanmi, imaynan Áquila, Priscila Apolosman “aswan sut’itapuni Diospa ñanninta yachachirqanku” hinata (Hech. 18:24-26).

Jesusmanta yachashallasun

14, 15. ¿Imaraykun Jesusmanta yachashanallanchis?

¹⁴ Bautizakuspapas, yachashanallan Jesusmanta. ¿Imarayku? Waranqa-waranqa wataña hanaq pachapi Taytanwan llank’aspañan kay pachaman hamurqan (Pro. 8:22, 30). Yacharqanmi payta serviy, cheqaq kaymanta willay allin ñan kasqanta (Juan 18:37). Yachallarqantaqmi chayta ruwasqanrayku ñak’arispa wañunanta (Mat. 20:18, 19; Heb. 4:15). Ichaqa sut’itan yachallarqantaq kawsayninpi huk ruwaykunaman qokuqtinqa allinnillanta maskhayman apananta, chayqa mana imapin tukunman. Ruwasqanwan rimasqanwan iman yachachiwarqanchis imaynatas Diospaq hunt’aq sonqo kasunman chayta.

¹⁵ Bautizakusqan qhepallamanmi Satanasqa Jesusta imaymanawan tentarqan allin ñanta saqenanpaq, ichaqa manan atirqanchu (Mat. 4:1-11). Chaymi yachachiwanchis imataña Saqra ruwaqtinpas llapallanchis Diospaq hunt’aq sonqo kayta atinanchista. Payqa astawanmi urmachiyta munan bautizakunankupaqña kashaqkunata, mosoqkunata ima (1 Ped. 5:8). ¿Imaynatan paykunata urmachinman? Jehová Diospa testigonkunamanta mana allinta yachaq familiankuwanmi yaqapaschá yuyaykunku allinninkupaq hark’akusqankuta. Chhaynapi tarikuspaqa atisunmanmi tapukuyninkuman kutichiyta, iñiyninchismanta willariyta, respetoyoq kayta, allin trataq kayta, huk  allin ruwaykunatawan (1 Ped. 3:15). Chhaynapin uyariwaqninchis runakunaq allinninkupaq kanman (1 Tim. 4:16).

Ama saqesunchu allin ñanta

16, 17. a) Deuteronomio 30:19, 20 textoq nisqanman hina ¿imakunatan ruwana wiñay kawsayta chaskinanchispaq? b) ¿Imanirqankun chaymanta Jesús, Juan, Pablo ima?

¹⁶ Waranqa phisqa pachak wata ñawpaqta manaraq Jesús kay pachaman hamushaqtinmi, Moisés Israel llaqtata yuyaycharqan allinkaq ñanta akllakunankupaq. Nirqanmi: “Kunanmi hanaq pachatapas kay pachatapas chay nisqaykunamanta testigo kananpaq waqyani. Willaykichismi wañuymantapas kawsaymantapas, hinallataq saminchaymantapas ñakaymantapas, akllakuychisyari kawsayta, qankunapas mirayniykichispas kawsanaykichispaq. Apu Señor Diosniykichista munakuychis, payta kasuychis, k’askakuychistaq”, nispa (Deu. 30:19, 20, Edición 1988). Israel llaqtaqa manan Diospaq hunt’aq sonqochu karqan, ichaqa manan chayraykuchu cambiarqan kawsayta chaskinapaq Moisespa rimasqan kinsa ruwaykunaqa. Chaymantaqa Jesuspas qatikuqninkunapas willallarqankutaqmi.

¹⁷ Ñawpaqpiqa hunt’ananchismi: “Señor Diosta munakuychis”, nisqa kamachikuyta, chaypaqqa kasukunanchismi Diospa chanin kamachikuyninkunata (Mat. 22:37). Iskaypi, ‘payta kasunanchis’ otaq kunkanta uyarinanchis. Chaytaqa ruwanchis Bibliata estudiaspan hinaspa yachasqanchisman hina kawsaspa (1 Juan 5:3). Chaymi allinpuni llapan huñunakuykunaman riy, chaypin Bibliamanta yachamunchis (Heb. 10:23-25). Kinsapitaq, Diosman ‘k’askakunanchis’ otaq payman hap’ipakunanchis. Imaña kaqtinpas Diospi iñiyninchistan rikuchinanchis, Wawantataq qatikunanchis (2 Cor. 4:16-18).

18. a) ¿Imanirqanmi kay revista 1914 watapi cheqaq kaymanta? b) ¿Imaynan sientekunchis k’anchaypi purisqanchismanta?

¹⁸ ¡May kusikuymi cheqaqwan kawsayqa! 1914 watapin inglés rimaypi kay revista nirqan: “¿Manachu kusisqa imaymanawan bendesisqa llaqta kanchis? ¿Manachu Diosninchisqa hunt’aq? Sichus pipas kaymanta aswan allin ñanta reqsin chayqa, chayninta richun. Sichus mayqenniykichispas aswan allinta tarinkichis chayqa, willariwayku. Ñoqaykuqa Bibliapi lliw yachasqaykumantaqa manan huk aswan allin yachachikuyta tariykuchu. [...] Manan llapantaqa rimayta tukuykumanchu, kusikuyta sumaq bendicionkunata ima kawsayniykupi Diosmanta cheqaq kaqta yachaspa chaskisqaykumantaqa. Diospa yachaynin, chaninkaynin, atiynin, munakuyninmi sonqoykuman, yuyayniykuman hunt’aykun. Tukuykuñan maskhayta. Manan imapas Bibliamanta yachay hinaqa kanchu”, nispa (The Watch Tower 15 de diciembre de 1914, páginas 377, 378). Cheqaq kaqta yachasqanchismanta agradecekusqanchisqa manan pisiyanchu. Kunanqa astawanraqmi kusikunchis “Señor Diospa k’anchayninpi” purispa (Isa. 2:5; Sal. 43:3; Pro. 4:18).

19. ¿Imaraykun usqhaylla bautizakunanku kamachikuykunata hunt’aqkuna?

¹⁹ Sichus munanki “Señor Diospa k’anchayninpi” puriyta, ichaqa manaraqtaq Diosman qokunkichu nitaq bautizakunkichu chayqa, amaña iskayaychu. Kallpachakuy bautizakunapaq Bibliapi kamachikuykunata hunt’anaykipaq, chayta ruwaspan Jehová Diosman Jesusmanwan rikuchinki qanpaq tukuy ruwasqankumanta agradecekusqaykita. Kawsaynikita Diosman qopuy. Rikuchiy munaynin ruway munasqaykita, Wawan qatikuy munasqaykitapas (2 Cor. 5:14, 15). Manan maypipas chay ñanta hinaqa tarinkichu.

¿Imanispan kutichiwaq?

• ¿Imaraykun ancha allinpuni Jesusmanta yachay?

• ¿Imataq bautizakuyri?

• ¿Ima bendicionkunatan chaskinku Diosman qokuspa bautizakuqkuna?

• ¿Iman yanapawasun kawsay ñanta mana saqenapaq?

[Tapuykuna]

[25 paginapi foto]

Bautizakuspaqa allin ñan akllakusqanchistan rikuchinchis

[26 paginapi fotokuna]

¿Maskharqankiñachu “Ancha Hatun Diospa pakaykusqan” kayta?