Ama Saqraq propagandanwan q’otuchikusunchu

“AMA q’otuchikuychischu. Chay Diosniykichisqa manan yanapasunkichischu. Amaña chuchupakuychischu, mana chayqa yachankichismi ima sucedenasuykichista”. Chhaynatan nirqan Jerusalenpi tiyaq runakunata Asiria suyu rey Senaqueribpa kachamusqan oficial. Senaqueribpa soldadonkunaqa Judá suyupiñan kasharqanku, chaymi chay oficialqa judiokunata manchachisharqan pisipaspa entregakunankupaq (2 Rey. 18:28-35).

Asiriokunaqa millay ñak’arichiq runakunan karqanku. Runata imayna ñak’arichisqankuta wañuchisqankuta iman willaqku awqankuna manchakunankupaq. Philip Taylor, asiriokunamanta nin: “Imayna ñak’arichisqankumanta willasqankuwanmi manchachirqanku, kamachikuna mana oqarikunankupaq awqankunataq manchakuymanta khatatatanankupaq”, nispa. Arí, propagandaqa atiyniyoq arma hinan, Taylor nisqan hina: “umamanmi chayan waqllichinanpaq”.

Kay tiempopi cristianokunaqa “manan runawanchu maqanakunchis, aswanpas [...], hanaqkunapi kaq mana allin espiritukunawanmi”, chay espiritukunaqa Diospa contranpin churakurqanku (Efe. 6:12). Satanasmi chay mana allin espiritukunaq umallinqa, paypas propagandawanmi runakunata q’otun q’aqchan ima.

Saqraq nisqanman hinaqa, manan pi runapas Diospaq hunt’aq sonqo kanmanchu. Jobpa p’unchayninkunapin Jehová Diosta nirqanña: “Tukuy imantapas runaqa qoyta atinmi, kawsayninta qespichinanraykuqa”, nispa (Job 2:4). ¿Sut’illantachu Saqra rimasharqan? ¿Cheqaqtachu runa mana wañuyta munaspa, manaña Diospa kamachikuyninkunata kasukunman? Satanasqa chayta creenanchista munan. Chaymi propagandawan mana reparaylla cancer onqoy hina yuyayninchista waqllichinman. Chayraykun, yachasun imakunawan Saqra urmachiy munasqanta, chaykunamanta cuidakunanchispaq.

“Runaqa [...] t’urumanta ruwasqan”

Satanasqa Elifaztan rimachirqan: Runakunaqa manan pruebakunata aguantayta atinkuchu, nispa. Kaytan nirqan: ‘Hallp’amanta ruwasqa runaqa [...] hallp’a patapi t’urumanta ruwasqa wasi hinan, ñit’ispa wañuchina thuta hinan. Runaqa pacha paqarmanta ch’isinkama thuninan, mana piqpa reparasqanmi wañupun’, nispa (Job 4:19, 20).

Bibliapas “t’uru mankakuna” hina kasqanchistan willan (2 Cor. 4:7). Ichaqa Adanmanta hucha heredasqanchisraykun t’uru manka hina p’akikuqlla kanchis (Rom. 5:12). Chaymi sapallanchistaqa Saqra oqoywasunman. Ichaqa Jehová Diosmi cristianokunataqa yanapawanchis chaytaqa manan qonqananchischu. Payqa anchatan valorawanchis pantaq runaña kanchis chaypas (Isa. 43:4). Santo espirituntapas qowanchismi mañakuqtinchisqa (Luc. 11:13). Espíritu santoq ‘hatun atiyninwanmi’ atiyta qowanchis, Satanás sasachaykunapi churawaqtinchis aguantananchispaq (2 Cor. 4:7; Isa. 12:2). Sichus ‘Saqraq contranpi qaqatapuni sayasunchis’ chayqa, Diosmi iñiyninchispi allinta takyachiwasunchis (1 Ped. 5:8-10). Chaymi, ¡Saqrataqa mana manchakunanchischu!

 ‘Hucha ruwaywan misk’illikuq runa’

“¿Pi runallapas ch’uya kanmanchu? ¿Runamanta paqariqqa chanin kanmanchu?”, nispan Elifaz tapurqan. Hinaspan kutichirqan: “Manan angelninpipas Diosqa confiakunchu, ñawinpaqqa hanaq pachapas manan ch’uyachu. ¡Imayna aswanraqchá millay waqllisqa runaqa! ¡Imayna aswanraqchá hucha ruwaywan misk’illikuq runaqa!”, nispa (Job 15:14-16). Chay rimasqanwanmi Elifazqa Jobta nisharqan Jehová Diosqa mana pi runatapas chaninpaq qhawarisqanta. Yaqapaschá imapipas pantarqanchis hinaspa llakisqa tarikunchis, Saqraqa chayta reparaspan munan aswanta llakikunanchista, mana imapaqpas valeqta hina qhawarikunanchistapas. Chaymantapas payqa munan Diosta mana khuyapayakuqta mana yanapakuqta hina qhawarinanchistan, kamachikuyninkuna kasukuy sasa kananpaq yuyaykunanchistapas.

‘Llapallanchismi huchallikurqanchis, chaymi Diospa k’anchashaq qayllanmanta karupi kashanchis’. Chaymi Jehová Diospa ch’uya kamachikuyninkunata mana hunt’ayta atinchischu (Rom. 3:23; 7:21-23). Chhayna kaqtinchispas Diosqa anchatan valorawanchis. Sumaq Yayanchisqa yuyarinmi “ñut’u hallp’a kasqanchista”, chaymi sumaqta qhawariwanchis ‘manataq sapa kutillachu phiñapayawanchis’ (Sal. 103:8, 9, 14). Yachallantaqmi, “ñawpa mach’aqway, saqra” huchayoq kasqanchisrayku pantachiyta munawasqanchista (Apo. 12:9, 10).

Sichus pipas huchanta saqepuspa Diosman tukuy soqowan kutirikunqa chayqa, ‘pampachanqapunin’ chay runata (Isa. 55:7; Sal. 51:17). “Sansaq-puka hinaña huchaykichis kashan chaypas, rit’ita hinan yuraqyachisaq”, nispa nin Jehová Dios (Isa. 1:18). Chay yachayqa, ¡maytan kallpachawanchis Yayanchispa munayninta ruwananchispaq!

Huchayoq kasqanchisraykun, maytaña kallpachakuspapas ñoqallanchismantaqa mana atisunmanchu Diospa amigon kayta. Adanwan Evawanmi ch’uya-kayninkuta wiñay kawsaytapas chinkachirqanku, chhaynapin ñoqanchispaqpas chinkapurqan (Rom. 6:23). Ichaqa Jehová Diosmi anchata munakuwaspanchis imakunachus nacesitakusqanta ruwarqan huchanchista pampachawananchispaq, chaypaqmi ichaqa Churin Jesucristoq sacrificionpi iñinanchis (Mat. 20:28; Juan 3:16). ¡Chaymá ‘khuyapayakuq’ kayqa! (Tito 2:11.) ¡Huchamanta kacharichisqan kasunman! Chhaynaqa, ¿imaynatan Satanaswan atipachikusunman mana kaqta creechiwananchispaq?

“Pay kikinta llamiykuwaq”

Job onqonqa chayqa Diospaqmi phiñakunqa nirqanmi Satanás. Kaytan Jehová Diosta nirqan: “Pay kikinta llamiykuwaq, chayñayá yachawaq imaynataraqchus uyaykipi ñakasunkiman chayta”, nispa (Job 2:5). Kunanpas Saqraqa mana allintachu sientichiwanchis,  onqoyninchisrayku mana valeqpaq hina qhawarichiwaspanchis.

Yaqapaschá manaña ñawpaqpi hinachu predicanchis, ¿chaychu Jehová Dios ñoqanchiswan phiñakunman? Manan. ¿Imatan ruwasunman sichus amigonchista maqaspa k’irisqallataña saqenkuman chayri? ¿Phiñakusunmanchu paywan ñawpaqpi hina mana ruwasqanmanta? ¡Manan riki! Kaqllatan munakusunman cuidasunmanpas, astawanqa sichus ñoqanchisrayku k’irisqa karqan chayqa. Chaytan runa ruwanchis, ¿chaychu Jehová Dios mana astawanraq chayta ruwanman? Biblia nin: “Diosqa chaninpunin, payqa manan qonqanchu ruwasqaykichiskunataqa”, nispa (Heb. 6:10).

Biblian willan “huk wakcha” viudamanta, yaqapaschá unay watakunaña Diospa yupaychana wasinpi yanapasharqan. Jesusmi rikusqa alcanciaman “iskay qolqechata” churashaqta, Jesús yuyaykurqanchu: “¿Imapaqtaq chay mana valeq qolqeta churan?”, nispa. ¡Manan! Aswanpas nirqanmi: “Kay wakcha viudan llapankumanta astawanqa churaykun”, nispa (Luc. 21:1-4).

Sichus Diosman k’askakusun chayqa, payqa manan saqewasunchu onqoy ñak’arichiwaqtinchispas, machu-payaña kashaqtinchispas otaq ima sasachaykuna kaqtinpas. Arí, chaykunarayku pisillataña Jehová Diospaq llank’asun chaypas manan pisipananchischu payqa manan saqerpariwasunchu (Sal. 71:9, 17, 18).

Qespichiq “cascowan” churakuychis

¿Imaynatan Satanaspa propagandanmanta pakakusunman? Pabloq yuyaychasqanta kasukuspan: “Señorpi kallpachakuychis paypa atiyniyoq kallpanwan. Diospa qosqan llapallan tupapakuna p’achawan churakuychis, saqraq q’otukuq yuyayninkuna contra qaqata sayanaykichispaq”. Chay espiritual p’achaq huknin kaqqa ‘qespichiq cascon’ (Efe. 6:10, 11, 17). Saqraq propagandanmanta qespisqa kanapaqqa chay cascowanmi purina. Imaynan casco soldadoq umanta pakaykun, chhaynan ‘qespichiwananchis suyakuypas’ casco hina umanchista pakaykun Satanaspa llullakuyninkunamanta (1 Tes. 5:8). Chaymi chay suyakuyninchista kallpachana tukuy sonqowan Bibliata estudiaspa.

¿Iman Jobta yanaparqan Satanaspa ñak’arichisqanta aguantananpaq? Tukuy kallpawan kawsarinpuypi iñisqanmi. Chaymi wañunanña kaqtinpas mana Jehová Diosmanta t’aqakurqanku. Aswanmi nirqan: “Waqyamuwaqtiykiqa kutichimusqaykin, kamasqayki runamanta sonqoykita ch’allaq nirichinki”, nispa (Job 14:15). Payqa yacharqanmi Dios kamachinkunata ancha munakusqanta, chaymi hunt’aq sonqo kasqankurayku wañuqtinkupas kawsarichinanta.

Llapanchismi Job hina Diospi confiananchis. Satanás qatikuqninkunawan tukuy mana allin ruwawasqanchistan Diosqa allichanqa. Chaymi mana hayk’aqpas apóstol Pabloq nisqanta qonqanachu, paymi nirqan: “Chaywanpas Diosqa hunt’aqpunin. Maykamachus pruebata muchuwaqchis chaykamallan Diosqa probachisunkichis [saqesunkichis], chaypin kallpachasunkichis qaqata sayanaykichispaq, ahinapin chaymanta lloqsinkichis”, nispa (1 Cor. 10:13, Edición 1988).

[20 paginapi foto]

Jehová Diosqa chaniyoqpaqmi servisqanchista qhawarin

[21 paginapi dibujo]

Qespichiq cascowanmi purinanchis