‘Espirituq espadanwan’ allinta yachachisun

“Espirituq espadantapas hap’iychis, chay espadaqa Diospa Simin Qelqan.” (EFE. 6:17.)

1, 2. Askha Reinomanta predicaqkunatataq necesitakushan chayqa, ¿imatan ruwananchis?

JESUSMI askha runata espiritualpi yarqasqata rikurqan, chayraykun qatikuqninkunata nirqan: “Cosechanaqa askhapunin, llank’aqkunataq ichaqa pisilla. Chayrayku, chakrayoqta valekuychis cosechanman llank’aqkunata kachamunanpaq”, nispa. Ichaqa manan rimallarqanchu, aswanpas “chunka iskayniyoq yachachisqankunata waqyaspan” kacharqan Israel llaqtantinpi discipulokunata ‘cosechamunankupaq’ (Mat. 9:35-38; 10:1, 5). Qhepamantaq, qanchis chunkata akllaspa iskay-iskaymanta kacharqan chay llank’ayta aparinankupaq (Luc. 10:1, 2).

² Kay tiempopipas askha Reinomanta predicaqkunatan necesitakushan. 2009 watapin pachantinpi Jesuspa Wañusqanta Yuyarinapaq huñunakuyman riqkuna karqanku 18.168.323, chayqa Jehová Diospa testigonkunamanta chunka millón masraqmi. Chhaynaqa, chakrakunaqa rutunapaqmi poqosqaña kashan (Juan 4:34, 35). Chayraykun Jehová Diosmanta mañakunanchis cosechaman astawan llank’aqkunata kachamunanpaq. Sichus tukuy sonqomanta mañakusun chayqa, kallpachakusunmi askha runakunata yanapananchispaq, chhaynapi paykunapas Jesusta qatikunankupaq (Mat. 28:19, 20; Mar. 13:10).

3. ¿Imaynatan santo espíritu yanapawanchis predicacionpi?

³ Ñawpaq estudiopi qhawarisqanchis hina, espiritun kallpachawanchis ‘mana manchakuspa Diospa siminta willananchispaq’ (Hech. 4:31). Chaymantapas yanapawallanchistaqmi allin predicaq kananchispaq. ¿Imatan ruwananchis aswan allin predicaq kananchispaq? Bibliawanmi allinta yachachinanchis (2 Tim. 3:16). Bibliaqa Diospa santo espiritunwan yuyaychasqataq chayqa, chaymanta predicaqtinchisqa santo espirituq yanapayninwanmi chay llank’ayta hunt’anchis. Ichaqa imaynatachus allin predicaq kasunman chaymanta manaraq rimashaspa, ñawpaqta qhawarisunchis Diospa Simin Qelqa ancha atiyniyoq kasqanmanta.

“Diospa siminqa [...] atiyniyoqmi”

4. ¿Imaynatan huk runata cambianman Bibliapi yachachikuykuna?

⁴ Diospa Simin Qelqaqa otaq yachachikuyninkunaqa ancha atiyniyoqmi (Heb. 4:12). Runakunaq ruwasqan espadamantapas aswan filollañan, chaymi nishu filo kaspa tullukunaq chilinanmanraq chayan. Bibliaq yachachikuyninkunaqa, runaq sonqonmanmi chayan, sut’imanmi horqon yuyaykusqankunata, imayna sientekusqanta, imayna runa kasqantapas. Chaymantapas kawsaynintan cambianman (leey Colosenses 3:10). Arí, ¡Cambiachinanpaq ancha atiyniyoqmi!

5. ¿Imakunapin Biblia kusata yanapawanchis?

⁵ Hinaspapas, Bibliapi yachachikuykuna hinaqa manan maypipas tarikunchu, Bibliallan yanapawanchis kay sasa tiempokunapi allinta kawsananchispaq. Huk lámpara hinan purisqanchista k’anchan otaq tukuy tiempo yanapawanchis (Sal. 119:105). Kusatan yanapawanchis sapa p’unchay kawsayninchispi sasachakuykunata atipananchispaq, hinallataq amigokuna, kusirikuykuna akllaypi, chaymantapas llank’anapi, p’achakuypi ima allinta decidinanchispaq (Sal. 37:25; Pro. 13:20; Juan 15:14; 1 Tim. 2:9). Chaymantapas yanapawanchismi  hukkunawan sumaqta kawsananchispaq (Mat. 7:12; Fili. 2:3, 4). Hinaspapas Bibliaqa k’anchanmi purisqanchis ñanta, ¿imaynapi? Reparachiwanchismi imakuna decidisqanchis qhepaman imaynapi tukunanta (1 Tim. 6:9). Willanmi imatachus qhepaman Dios ruwanqa chayta, chaymi kallpachawanchis munayninman hina kawsananchispaq (Mat. 6:33; 1 Juan 2:17, 18). Arí, Bibliaq yachachisqanman hina kawsanchis chayqa, yachanchismi imapaq kawsasqanchista.

6. ¿Imaynatan Biblia yanapawanchis espiritual maqanakuypi?

⁶ Pabloq rimasqan Bibliaq yachachikuyninkuna otaq ‘espirituq espadanqa’, allin arman espiritual maqanakuypi (leey Efesios 6:12, 17). Chaywanmi Satanaspa makinpi kaq runakunata kacharichisunman, chay espada hinaqa manan ima espadapas kanchu, wañuchinanmantaqa askha runaq vidantan salvan. Chhaynaqa, ¿manachu kallpachakunanchis predicacionpi allinta Bibliata utilizananchispaq?

Bibliawan allinta yachachiy

7. ¿Imaraykun yachananchis ‘espirituq espadanwan’ yachachiyta?

⁷ Guerrapi atipanapaqqa soldadon armankunata reqsinan, hinaspa pasaqta chaywan ensayanan. Chay hinatan ‘espirituq espadanta’ hap’iqkunapas ruwananchis. Apóstol Pabloq yuyaychasqantan kasukunanchis, paymi nirqan: “Diospa ñawpaqenpi allinpaq hap’isqa kanaykipaq kallpachakuy, mana imamantapas p’enqakuyniyoq llank’aq hina, cheqaq-kay simita allinta yachachinaykipaq”, nispa (2 Tim. 2:15).

8, 9. ¿Iman yanapawasun huk textota allinta entiendenanchispaq? Huk ejemplota willay

⁸ ¿Iman yanapawasun predicaspa ‘cheqaq-kay simita allinta yachachinanchispaq’? Sichus Bibliamanta allinta yachachiyta munanchis chayqa, ñoqanchisraqmi sut’ita entiendenanchis. Chaypaqqa contexto nisqatan estudiananchis. ¿Imataq contextori? Huk textoq ñawpaqninpi qatiqninpiwan kaq yachachiykunan, chaykunan yanapawanchis allinta entiendenapaq.

⁹ Rikusqanchis hina, huk textota allinta entiendenapaqqa contextotan allinta estudiananchis. Chayta entiendenapaq Pabloq nisqanta t’aqwisunchis, Gálatas 5:13 textopin nirqan: “Qankunaqa, wawqe-panaykuna, libre kanaykichispaqmi waqyasqa karqankichis, ichaqa ama librekayniykichisqa aychaykichispa millay munaynillanta ruwanaykichispaqchu kachun, aswanpas munanakuspa hukkuna hukkunawan yanapanakuychis”, nispa. ¿Imamantan chay cristianokuna libre karqanku? ¿Huchamanta wañuymantawan? ¿Pantasqa religionmanta? Manan. Ñawpaq versiculokunata t’aqwispan yachanchis Cristoq wañusqanwan ‘Kamachikuy simiq ñakayninmanta’ librasqa kasqankuta (Gál. 3:13, 19-24; 4:1-5). Pikunachus libre kasqankuta valoraqkunaqa munakuywanmi hukkunata servinanku karqan, manataq  ‘qhansanakuspachu’ kawsananku karqan (Gál. 5:15).

10. ¿Imatan yachanallanchistaq Bibliapi textokunata allinta entiendenanchispaq, maypin chaykunata tarisunman?

¹⁰ Contexto simiqa rimallantaqmi imapas hayk’aq, imaynapi sucedesqanmanta. Chayrayku huk textota allinta entiendeyta munanchis chayqa, t’aqwinallanchistaq kaykunata: pin qelqarqan, hayk’aq, imarayku, imaynapi tarikushaspa. Chaymantapas allinmi kanqa, atikusqanman hina, chay tiempopi runakunaq kawsayninkumanta, costumbrenkumanta, religionninkumanta ima yachay. *

11. ¿Imaynatan Bibliapi yachachikuykunata sut’inchananchis?

¹¹ Sichus “cheqaq-kay simita allinta” yachachiyta munanchis chayqa, manan yachachinallanchischu, hinaspapas sumaqllatan llamp’u sonqowan yachachinanchis. Diospa Simin Qelqawanña Jesús hina cheqaqkaqta respetachinchis chaypas, manan Bibliataqa hap’inchis hukkunata manchachinapaqchu, p’enqachinapaqchu nitaq obliganapaqchu (Deu. 6:16; 8:3; 10:20; Mat. 4:4, 7, 10). Aswanpas apóstol Pabloq yuyaychasqantan kasukunchis: “Señorninchismanta pipas tapuqniykichisman allinta kutichinaykichispaqqa wakichisqallapuni kashaychis, hinaspa kutichiychis llamp’u sonqowan respetowan” (1 Ped. 3:15).

12, 13. ¿Ima ‘allin pukarakunatan’ Diospa Simin Qelqawan thunichisunman? Huk experienciata willay.

¹² ¿Imaynatan hukkunata yanapasunman Bibliawan allinta yachachispa? (Leey 2 Corintios 10:4, 5.) Ñawpaqtaqa, Bibliapi yachachikuykunan yanapawanchis “allin pukarakunata thuninapaq”, ¿imaynapi? sut’imanmi horqonchis runakunaq yanqa creencianku, sinchi millaykuna ruwasqanku, filosofía yachachisqanku ima pantasqa kasqanta. Bibliaqa allin arman “Diospa yachayninta hark’aq” pantasqa yachachikuykunata thunichinapaq. Arí, Bibliapi tarikuq yachachikuykunawanmi runakunata yanapasunman imayna yuyaykusqankuta cambianankupaq.

¹³ Qhawarisun huk señoramanta, payqa 93 watanpin kashan India nacionpitaq tiyan. Paymi huk nacionpi tiyaq qhari wawanwan cartapi Biblia estudiayta qallarisqa; estudiasqanman hinan Jehová Diosmanta promesankunamanta ima allinta yachashasqa. Ichaqa huch’uyninmantapachan creerqan wañuq runaq alman huk cuerpokunapi nacesqanta. Chayraykun wañusqakuna imaynapi tarikusqankumanta wawan qelqaqtin payqa kutichisqa: “Manan umayman haykunchu chay textoykikunaq yachachisqan. Llapa religionkunan yachachinku ñoqanchispi huk mana wañuq alma kasqanta. Chhayna kasqanpin ñoqaqa kunankamapas creerqani, cuerpo wañuqtinqa,  chay alman 8.400.000 kutitaraq huk cuerpokunapi nacen. ¿Imaynataq chayri mana cheqaqchu kanman? Chaywan, ¿yaqa llapa religionkunan pantasqata yachachinku nishankichu?”, nispa. Chaypin reparanchis señoraqa chay yachachikuyman nishu hap’ipasqa kasqanta. ¿Atinmanchu espirituq espadan sonqonmanta horqoyta? Semanakuna pasaqtinñan askha textokunata t’aqwispa, qelqarqan: “Chayraqmi wañuymanta Bibliaq yachachisqanta entiendeshani. Maytan kusikuni kawsarimpuy p’unchay chayamuqtin munakusqanchis runakunawan tupananchismanta yachaspa. Ojalachá Diospa Reinon chayamullanmanña”, nispa.

Bibliawan convencey

14. ¿Iman uyariqkunata iñichiy?

¹⁴ Sichus kusata Bibliawan yachachiyta munanchis chayqa, manan textokunallatachu leenanchis. Pablo hinan iñichinanchis (leey Hechos 19:8, 9; 28:23). Griego rimaymanta t’ikrakuq “iñichiy” simiqa, “huk runata imapipas confiananpaq convenceymi”. Chhayna kaqtinqa, ¿imaynatan huk runata convencesunman Bibliaq yachachisqanpi creenanpaq? Bibliapi confiananpaq yanapaspan. ¿Imaynatan uyariqniykikunata convencewaq yachachisqayki cheqaq kasqanmanta?

15. ¿Imaynatan qhawarichisunman Biblia respetana kasqanta?

¹⁵ Bibliaqa respetana kasqanta qhawarichiy. Manaraq huk versiculota leeshaspa, qhawarichiy rimasqaykichismanta Jehová Dios ima yuyaykusqanta. Huk tapuyta ruwaqtiyki kutichisqanta uyarispaykin kay hinata niwaq: “Qhawarisunchis ima ninmi Dios chaymanta” otaq “¿Imatataq Diosri chaymanta yuyaykun?” nispa. Chhaynata textokunata leeyqa Biblia Diospa yuyaychasqan kasqantan rikuchin, hinaspa chay runapas yachachikuyninkunata valoran. Chay ruwayqa allinpunin, astawanqa sichus huk runa Diospi creen ichaqa manataq Bibliamanta yachanchu chayqa (Sal. 19:7-10).

16. ¿Imakuna ruwaymi yanapawasun textokuna leesqanchista explicananchispaq?

¹⁶ Ama versiculokunallatachu leey: explicay. Apóstol Pablo hina predicay payqa manan Bibliapi textokunallatachu leeq, aswanpas entiendechiqmi (Hech. 17:3). Textokunaqa hukkunamantapas rimantaq chayqa, ima temamantan rimashanchis chayta apoyaq simikunallatan rimananchis otaq chayta pay kikin tarinanpaq tapuykunata ruwananchis. Qhepamantaq chay textota sut’inchaspa rikuchinanchis imaynapi chay runaq allinninpaq kasqanta.

17. ¿Imatan ruwawaq Bibliamanta yachachispa aswanta convencenaykipaq?

¹⁷ Bibliapi convenceq yachachikuykunawan yachachiy. Pabloqa uyariqnin runakunatan “Diospa Simin Qelqakunamanta” piensachiq, sonqonkuman chayaqtan rimaq (Hech. 17:2, 4). Qanpas sonqonkuman chayaqta rimanaykipaqmi kallpachakunayki. Sichus tapuykunata ruwaspa paypi interesakusqaykita rikuchinki chayqa, imachus sonqonpi kasqantan ‘horqonki’ (Pro. 20:5). Imatapas qanllamanta, chhaynan, ahinan chayqa, ninaykimantaqa Diospa Simin Qelqamanta horqosqa allin yuyaymanasqa, sonqoman chayaq, fácil entiendey yachachikuykunawan yachachiy. Aswan allinmi huk versiculollata leespa explicay askha versiculokunata mana sut’inchaspa leeymantaqa. Chaymantapas, pruebakunata churaspa “rimasqan[chisqa] aswantan creechin” (Pro. 16:23).  Mayninpiqa qelqakunapin maskhananchis kanqa huk yachachiykunatawan. Ñawpaqpi rimasqanchis señoraqa, necesitarqanmi entiendeyta imaraykuchus askha runakuna almapi creenku chayta. Maypachachus entienderqan almamanta yachachikuy imaynapi rikhurisqanta imaynapi yaqa llapa religionkunaman mast’arikusqantapas, chayñan Bibliaq yachachisqanpiqa creerqan. *

Bibliawan allinta yachachishallasun

18, 19. ¿Imaraykun ‘espirituq espadanwan’ allinta yachachishanallanchis?

¹⁸ Bibliaq nisqan hina, “kay pachaq imaynachus kasqan rikusqanchisqa tukukapuqllan”, mana chanin ruwaykunapas aswan aswantan yapakushan (1 Cor. 7:31; 2 Tim. 3:13). Chayraykun kunanqa astawanraq kallpachakunanchis ‘espirituq espadan’ Diospa Simin Qelqawan allin “pukarakunata thuninapaq”.

¹⁹ Ancha kusisqan sientekunchis Diospa Simin Qelqapi imaymana yachasqanchismanta. Bibliawan runakunaq sonqonman chayaspa pantasqa creenciakunata horqosqanchismatapas. Manan ima yachachikuypas, runakunaq sonqonpi allin saphichasqaña kanman chaypas, Bibliapi Diospa yachachikuyninmanta aswan atiyniyoqqa kanchu. Chhaynaqa, tukuy atisqanchistayá kallpachakushallasun Reinomanta llank’ayninchispi espirituq espadanwan allinta yachachinanchispaq.

[Uranpi willakuykuna]

¿Imatan yacharqanchis?

• ¿Imayna atiyniyoqmi Diospa Simin Qelqa?

• ¿Iman yanapasunki “cheqaq-kay simita allinta yachachinaykipaq”?

• ¿Imaynatan Bibliaq yachachikuynin “allin pukarakunata” thunichin?

• ¿Imaynatan predicasqanchispi runakunata convencesunman?

[Tapuykuna]

[12 paginapi foto recuadropiwan]

¿Imaynatan Bibliawan convencesunman?

▪ Bibliaqa respetana kasqanta qhawarichiy

▪ Leesqayki textokunata explicay

▪ Sonqoman chayaq yachachikuykunawan yachachiy

[11 paginapi foto]

Yachananchismi ‘espirituq espadanwan’ allin yachachiyta