Espirituwan noviawanmi: “¡Hamuy!” nishallanku
Espirituwan noviawanmi: “¡Hamuy!” nishallanku
‘Santo espirituwan Corderoq esposanwanmi [“novianwanmi”, NM] nishallanku: “¡Hamuy!” nispa. [...] Pipas ch’akichikuqqa hamuchun, kawsay unuta ukyay munaqqa mana qolqellawan ukyachun.’ (APO. 22:17.)
1, 2. ¿Imaynatan kawsayninchispi Diospa Reinonta qhawarinanchis, imanaqtin?
¿IMAYNATAN kawsayninchispi espiritual ruwaykunata qhawarinanchis? Chaymantan Jesús qatikuqninkuta nirqan: “Diospa qhapaqsuyunta [‘reinonta’, NM ], [...] ñawpaqtaqa maskhaychis”, nispa. Chaymantataq prometerqan chayta ruwaqtinkuqa lliw necesitasqankuta Dios qonanta (Mat. 6:25-33). Chaymantapas, chay Reino kawsayninchispi ancha importante kasqanraykun chaniyoq perlawan rikch’anachirqan, chay perlatan huk runa “llapan kaqninkunata vendespa” rantikusqa (Mat. 13:45, 46). Ñoqanchispas, ancha chaniyoqpaqmi qhawarinchis predicayta, runakuna yachachiytapas discípulo kanankupaq.
2 Ñawpa estudiokunapin yacharqanchis santo espíritu kallpachawasqanchismanta mana manchakuspa predicananchispaq Bibliawan sumaqta predicananchispaqpas. Kay estudiopitaq qhawarisun imaynatas espíritu santo yanapawanchis predicashanallanchispaq chayta. ¿Imaynata?
Llapankun invitasqa kashanku
3. ¿Ima unutan llapa runakunaman munachikushan?
3 Santo espirituq yanapayninwanmi lliw runakuna invitasqa kashanchis (leey Apocalipsis 22:17). Llapanchistan niwanchis: “¡Hamuy!” nispa, chhaynapi sumaq unuwan ch’akiyninchista thasnuchinapaq. Chaypiqa manan kawsanapaq sapa p’unchay ukyasqanchis unumantachu rimashan. Aswanpas huk clase unumantan, chaymanta rimaspan Jesús p’uytuq kasqanpi samaritana warmita nirqan: “Ñoqa qosaq chay unuta ukyaqmi ichaqa manaña hayk’aqpas ch’akichikunqachu, aswanmi ñoqa qosaq chay unuqa phullpumuq unu pukyu hina paypi kanqa, wiñay kawsaytataq qonqa”, nispa (Juan 4:14). Rikusqanchis hina, allin unuta ukyananchispaqmi haywawashanchis, chay unuqa wiñay kawsayman apaq unun.
4. ¿Iman kawsachiq unu, imaraykutaq chay unuta necesitakun?
4 ¿Imaraykun necesitakun kawsay unu? Bibliaq nisqan hina, Adanwan Evawanmi Jehová Diospa contranpi churakusqaku (Gén. 2:16, 17; 3:1-6). Chaymi Kamaqninku paykunata Edén huertamanta qarqopusqa. ¿Imarayku? Diosmi nirqan: “Paqtan [Adán] makinta haywarispa kawsay sach’aq rurunta p’itinman, mikhuspataq wiñaypaq kawsanman”, nispa (Gén. 3:22). Adán huchallikusqanraykun llapanchispas wañunchis (Rom. 5:12). Ichaqa Diosmi kasukuq runakunata huchamanta wañuymantawan kacharichinanpaq imakunachus necesitakusqanta ruwarqan, chaymi kawsachiq unu, chhaynapin kay Pacha paraisoman tukuqtin paykunaqa wiñay kawsayta chaskinkuman. Chaypaq iman necesitakusqanta Diospa ruwasqanqa Cristoq sacrificionraykun ruwakun (Mat. 20:28; Juan 3:16; 1 Juan 4:9, 10).
5. ¿Pin runakunata waqyan “hamuy” “kawsay unuta” ‘mana qolqellawan ukyay’, nispa? ¿Imaraykun chhaynata kutichinki?
5 ¿Pin runakunata waqyashan hamuspa “kawsay unuta” ‘mana qolqellawan ukyanankupaq? Jehová Diosmi. ¿Imaynapin chayta yachanchis? Apocalipsis iskay chunka iskayniyoq capitulopin rimashan Waranqa Wata Reinomanta, Chay tiempopin runakunaqa allinta beneficiakunku Cristowan wiñay kawsayta qonanpaq Diospa kamachikuyninkunamanta. Chay kamachikuykunatan rikch’anachikun ‘kawsay unuyoq mayuwan’. Chay mayun lloqsimun “Diospa kamachikuy tiyananmanta Corderoq kamachikuy tiyananmantawan” (Apo. 22:1). ¿Imatan chaypi yachanchis? Kawsay unuqa kawsay Qoq Jehová Diosmanta paqarimusqanta (Sal. 36:9). Chay unutan qowanchis ‘Cordero’ Jesucristowan (Juan 1:29). Chay kawsay unuyoq mayuwanmi’ Dios allichanqa Adanpa huchallikusqanrayku imaymana mana allinkuna kasqanta. Chayraykun kikin Jehová Dios: “¡Hamuy!” nispa waqyan.
6. ¿Hayk’aqmantapachan ‘kawsay unu’ lloqsimuyta qallarirqan?
6 Chay ‘kawsay unu mayuqa’ 1914 watamantapachan lloqsimuyta qallarirqan, chay watapin ‘Señorpa p’unchaynin’ qallarirqan ‘Cordero’ hanaq pachapi Rey churasqa kaqtin, Waranqa Wata Gobiernopitaq hunt’akunankama yapakunqa (Apo. 1:10). Chay watamantapachan runakunata yanapakushan Diospa Simin Qelqawan, chaypi tarikuq yachachikuykunaqa ‘unumanmi’ rikch’akun (Efe. 5:26). Señorpa p’unchayninpiqa llapa runakunan allin willakuykunata uyarinkuman, chhaynapitaq kawsachiq unuta chaskinkuman. Ichaqa, ¿pikunan ‘hamuy’ nispa waqyashanku?
Novia nin: “¡Hamuy!” nispa
7. “Señorpa p’unchayninpi”, ¿pikunan waqyayta qallarirqanku, pikunata?
7 Noviaqa akllasqa cristianokunan kanku, paykunan waqyayta qallarirqanku: “¡Hamuy!” nispa. ¿Pikunatan waqyanku? Kay pachapi wiñay kawsayta suyakuq runakunatan, chayqa kanqa ‘Tukuy atiyniyoq Diospa hatun taripay p’unchaynin’ qhepatan (leey Apocalipsis 16:14, 16).
8. ¿Imaynapin yachanchis akllasqa cristianokuna 1918 watamantapacha Jehová Diospa waqyasqanman hina waqyasqankuta?
8 Akllasqa cristianokunaqa 1918 watamantapachan: “¡Hamuy!” nispa waqyashanku. Chay watapin, “Kay tiempopi millonninpi kawsaqkunaqa manapaschá hayk’aqpas wañunqakuchu” nisqa discursowan, rikuchirqanku askha runakuna Armagedón qhepata, paraisopi tiyanankumanta. 1922 watapitaq Estados Unidospi (Cedar Point Ohio llaqtapi) Biblia Estudiaqkuna hatun huñunakuypi kallpachakusqaku Reymanta Reinonmantawan willanankupaq. Chaywanmi akllasqa cristianokuna kallpachakusqaku askha runakunata invitanankupaq. 1929 watapin inglespi lloqsimuq Qhawaq revistapi, kay yachachikuy lloqsimurqan: “Huk sumaq invitación”, nisqa. Chaymi Apocalipsis 22:17 textoq nisqanman hina nirqan: “Hatun Diospa waqyasqanta hina: ‘Hamuy’ nispa, akllasqakunapas waqyashanku. Chay willakuyqa chanin-kaywan cheqaq-kaywan kawsayta munaq runakunamanmi willakunan”, nispa (The Watchtower, 15 de marzo de 1929). Noviaqa kunankamapas waqyashallanmi.
Pipas uyariqqa: “¡Hamuy!” nichun
9, 10. ¿Imaynatan kallpachakurqan ancha askha runakunata: “¡Hamuy!” nispa invitanankupaq?
9 Ichaqa, ¿imanisunmantaq akllasqa cristianokunaq invitasqanta uyariq runakunamantari? Paykunataqa kallpachakunmi chay invitacionta hukkunaman apanankupaq. 1932 watamanta noviembre killa La Torre del Vigía (174 página) revistan nirqan: “Akllasqakuna reinomanta allin willakuykunata lliw predicay munaqkunata kallpachachunku chayta ruwanankupaq. Manan Señorpa akllasqanraqchu kananku predicanankupaqqa. Chaymi Jehová Diospa testigonkunaqa anchata kusikunku runakunaman kawsay unu haywasqankumanta, chhaynapi Armagedonpi qespichisqa kaspa wiñaypaq kawsanankupaq”, nispa.
10 1934 watapin, inglespi lloqsimuq kay revistapi explicarqan novia hina invitaq cristianokuna Jonadadman rikch’akusqankuta, paykunan “Jehuman rikch’akuq akllasqa cristianokunawan purinanku, hinaspa reinomanta allin willakuykunata willananku, manaña [...] hanaq pachapaq Jehová Diospa akllasqan testigonkunachu kanku chaypas”, nispa. (Kay teman españolpi lloqsimurqan enero killa La Torre del Vigía revistapi, 12 paginapi.) 1935 watapitaq sut’inchakurqan paykuna Apocalipsis 7: 9-17 textopi ‘ancha askha runakuna’ kasqankuta. Chay sut’inchasqankun yanaparqan Diospa invitasqanta askha runa kasukunankupaq. Chaymantapachan uyariqkuna askhaman yapakunku, kunantaq qanchis millón masraq kashanku. Paykunaqa allin willakuykunata uyarispan Diosman qokuspa bautizakapunku, noviawan kuskataq lliw runakunata nishanku: “¡Hamuy!”, ‘kawsay unu ukyay munaqqa mana qolqellawan ukyaychis’, nispa.
Espiritun nin: “¡Hamuy!” nispa
11. ¿Imaynatan santo espíritu yanaparqan predicanankupaq Jesuspa tiemponpi?
11 Jesuspa tiemponpin santo espirituqa anchata cristianokunata yanaparqan predicanankupaq. Huk kutinmi Jesús Nazaret sinagogapi predicaspa profeta Isaiaspa qelqan k’uyunpi kay simikunata leerqan: “Señor Diospa Espiritunmi ñoqapi kashan, wakchakunaman allin willakuykunata willanaypaqmi akllawarqan. Payqa kachamuwarqan presokunaman kacharisqa kanankuta willanaypaq, ñawsakunaman qhawarinankuta willanaypaq. Payqa kachamuwarqan sarunchasqakunata kacharinaypaq, Señor Diospa llaqtanta sumaq qhawarinan p’unchaykuna chayamusqanta willanaypaq”. Chaymantataq chay simikuna paypi hunt’akusqanmanta nirqan: “Kunanmi kay leesqay uyarisqaykichis Qelqa hunt’akun”, nispa (Luc. 4:17-21). Hanaq pachaman ripunanña kashaqtintaq yachachisqankunata nirqan: “Qankunaman Santo Espíritu hamuqtinmi ichaqa atiyta chaskinkichis, hinaspan testigoykuna kankichis [...], kay pachaq k’uchunkunakamaraq”, nispa (Hech. 1:8).
12. ¿Imaynatan santo espíritu yanapawanchis predicasqanchispi?
12 ¿Imaynatan santo espíritu yanapawanchis runakunaman invitaypi? Jehová Diosqa espiritunwanmi akllasqakunata yanapan Simin Qelqanta allinta entiendenankupaq. Chaymantapas yanapanmi Paraisopi tiyay munaqkunaman predicaspa cheqaq-kaqta sut’inchanankupaq. Chay runakuna cristianoman tukupuqtinkuqa paykunapas santo espirituq yanapayninwanmi hukkunata invitanku. ‘Santo Espirituq sutinpitaq bautizakunku’ chayqa, chay espirituwanmi yanapachikunku pusachikunku ima (Mat. 28:19). Chaymantapas, Bibliapi Diospa yuyaychasqan mensajetan akllasqakunawan kuska predicanku. Chaykunan rikuchiwanchis espirituq yanapayninwan invitasqanchista. Arí, espiritunmi sapankanchista pusawanchis. ¿Imaynatan chay yachasqanchis yanapawasunman predicayninchispi?
‘Nishallanku: “¡Hamuy!” nispa’
13. ¿Maynillanpichu santo espiritu noviawan ninku: “¡Hamuy!” nispa?
13 ‘Santo espiritupas noviapas’ manan maynillanpichu waqyanku: “¡Hamuy!” nispa. Aswanpas griego rimaypi nisqan hina, sapa kutillan waqyanku. Chaymi rikuchin tukuy tiempo invitasqankuta. Kasukuqkunapas kaqllatan nishanku: “Hamuy”, nispa. Chayrankun ancha askha runakuna ‘tuta-p’unchay yupaychana wasinpi payta [Diosta] servishanku’ (Apo. 7:9,15). ¿Ima ninantaq ‘tuta-p’unchay’ nisqa simiri? Sapa kuti ruwashanalla kallpachakushanalla ninanmi, imaynan profetisa Anapas apóstol Pablopas ruwarqanku hinata (leey Lucas 2:36, 37; Hechos 20:31; 2 Tesalonicenses 3:8).
14, 15. ¿Imaynatan Daniel rikuchirqan Diosta tukuy tiempo servina kasqanta?
14 Profeta Danielpas Diostaqa yupaychashallarqanmi (leey Daniel 6:4-10, 16). Payqa manan imaraykupas espiritual ruwaynintaqa saqeyta munarqanchu, ‘kinsa kutitan p’unchaypi qonqorikurqan Diosmanta mañakunanpaq [...] imaynan ruwallaqpuni hinata’. Leonkunaq t’oqonman wikch’uykusqa kananta yachaspapas manan payqa ni huk killapas ruwasqanta saqeyta munarqanchu. Chayta ruwaspan wiñaymasinkunaman sut’ita rikuchirqan Jehová Diosta tukuy tiempo serviy ancha importante kasqanta (Mat. 5:16).
15 Danielqa leonkunawanmi illarisqa, reytaq tutallamanta leonkunaq t’oqonman phawaylla rispa kunkawan Danielta waqyasqa: “¡Daniel, kawsaq Diospa kamachin! ¿Tukuy sonqo [‘tiempo’, NM] servisqayki Diosniykiqa leonkunamanta qespichisunkichu? nispa. Hinan Danielqa kutichimurqan: ¡Reyníy, wiñaypaqmi kawsanki! Diosniymi angelninta kachamuwan, paymi leonkunaq siminta wisq’aykurqan. Manan Dios contraqa huchallikurqanichu, qan contrapas manan ima mana allintapas ruwarqanichu, chaymi leonkunaqa mana k’iriwanchu”, nispa. Chaymi Jehová Diosqa Danielta bendecisqa tukuy tiempo servisqanmanta (Dan. 6:19-22).
16. Danielpa ruwasqanpi yuyaykuspa, ¿imakunatan sapankanchis tapukunanchis predicayninchismanta?
16 Danielqa wañunanña kaqtinpas manan saqerqanchu Dios yupaychayta. Ñoqanchisri, ¿kallpachakunchischu sasachakuykuna kaqtinpas allin willakuykunata predicashanallanchispaq? Arí, manan huk killapas pasananchu Jehová Diosmanta mana rimaspaqa. ¿Manachu atisqanchisman hina sapa semana predicasunman? Yuyaqña otaq nishu onqosqa tarikusunman chayqa, yaqapaschá chunka phisqayoq minutollatapas killantinpi predicasunman, chaytapas informananchismi. ¿Imarayku? Espiritutawan noviatawanmi yanapayta munanchis, chhaynapi ñoqanchispas: “¡Hamuy!” nishanallanchispaq. Chaymi tukuy atisqanchista ruwasun sapa killa predicanapaq informanapaqpas.
17. ¿Maykunapi predicanapaqmi kallpachakusun?
17 May sumaqmi ch’akichikuqta waqyayqa, chhaynapi ‘kawsay unuta [...] mana qolqellapaq ukyananpaq’. Chaymi mana wasin-wasillantachu predicana, maypi tarikuspapas predicananchismi, rantiq rispa, viajashaspa, llank’ananchispi otaq estudiasqanchispipas. Kamachikuqkuna mana predicananchista munaqtinkupas, mana reparachikuspallan predicasunman, yaqapaschá huk wasipi chaymantataq karupiña tarikuq wasipi otaq maypi tarikuspapas.
Waqyashallasun: “¡Hamuy!” nispa
18, 19. ¿Imaynatan Diospa llank’aysiq-masin kasqanchista chaninchasunman?
18 Yaqa isqon chunka soqtayoq watañan espiritupas noviapas kawsay unumanta ch’akichikuqkunata waqyashanku: “¡Hamuy!” nispa. Qanpas, ¿ñachu chay sumaq invitacionta chaskirqankiña? Chhayna kaqtinqa, kallpachaykikun huk runakunatawan invitamunaykipaq.
19 Hayk’aqkamachá ch’akichikuqkunata waqyana kanqa, chaytaqa manan yachanchischu. Ichaqa Diospa llank’aysiq-masin kasqanchistan yachanchis (1 Cor. 3:6, 9). Diospa llank’aysiq-masin kasqanchistan chaninchana, ‘Diosman yupaychay sacrificiota qospa’ chaytaqa ruwasun tukuy tiempo predicaspan (Heb. 13:15). Chaymi, sichus akllasqakunamanta otaq ancha askha runakunamanta kanchis chayqa, mana sayk’uspa waqyashanallanchis: “¡Hamuy!” nispa, ahinapi askha runakuna gratislla kawsay unuta ukyanankupaq.
¿Imatan yacharqanchis?
• ¿Pikunatan waqyakushan: “¡Hamuy!” nispa?
• ¿Imaraykun ninchis Jehová Diosmantan invitacionqa hamun nispa?
• ¿Imaynatan santo espíritu yanapawanchis runakunaman invitaypi?
• ¿Imaraykun kallpachakunanchis predicashanallanchispaq?
[Tapuykuna]
[16 paginapi lista fotokuna dibujokunapiwan]
(Imaynapuni kasqanta yachanaykipaq, qelqata qhaway)
“¡Hamuy!” nishallankun
1914
5.100 predicaqkuna
1918
Paraisopin askha runakuna wiñaypaq kawsanqaku
1922
“Reymanta reinonmantawan willaychis, willaychis, willaychis”
1929
Akllasqakuna: “¡Hamuy!” ninku
1932
Manan akllasqa cristianokunallachu invitanku
1934
Jonadabman rikch’akuq cristianokunata kallpachakun predicanankupaq
1935
‘Ancha askha runakuna’ pikuna kasqankuta yachakun
2009
7.313.173 predicaqkuna