Leeqkunaq tapukusqan

¿Huk cristianomasinchis wakmanta bautizakunmanchu?

Arí, kanmanmi chayqa. Sichus huk cristianomasinchis bautizakurqan manaraq chaypaq hina kashaspa, otaq pakallapi ima hatun huchatapas ruwasharqanraq chayqa, manan bautizakunanchu karqan, nitaqmi Diosman servinanpaq prometekunanchu karqan. Chay promesata Dios chaskinanpaqqa saqenanraqmi karqan chay hucha ruwasqanta. Chhayna huchapi kashaspa bautizakuq cristianokunapaqqa allinmi kanman wakmanta bautizakuy.

Ichaqa huk predicaq iñiqmasinchis mana huchapi kashaspa bautizakunman, tiempoq pasasqanwantaq hatun huchata ruwanman, chay hawataq huk comité judicial ruwakunman chayri, ¿ninmanchu pay: “Bautizakushaspayqa manan allintachu entienderqani lliw ruwanaykunata mana ruwanaykunatapas, chayraykun bautizakusqayqa anulakunan”, nispa? Manan. Payqa bautizakusqan p’unchaypin uyarirqan huk discursota, chaypin willakurqan chay decidisqan ancha importante kasqanta. Chaymantapas “arí”, nispan kutichirqan iskay tapuykunata, chay tapuykunan karqan Diosman prometekuymanta bautizakuymantawan. Chay qhepamantaq kikinmanta p’achanta cambiakuspa bautizachikurqan. Chhaynaqa allintan endientenman karqan imatachus ruwasqanta. Chayraykun comité judicial umallikunaqa llapan iñiqkunata hina payta juzgananku, manataqmi iskayrayachinankuchu bautizonmanta nitaq tapunankuchu imachus piensasqanta.

Sichus chay cristiano bautizakusqanmanta iskayrayashanman chayqa, umallikunan ninkuman kay revistakunata leenanpaq: w60-S 15/8 pág. 511; w64-S 15/7 págs. 443–446, chay revistakunapin astawan willashan chay temamanta. Chhaynaqa mayqen cristianopas Bibliaq yachachikuyninkunata mana allinta entiendeshaspa bautizakurqan, chayraykutaq wakmanta bautizakuytapuni munan otaq imaraykupas chayqa, paymantañan kanqa.

¿Imakunatan cristianokuna allinta qhawarinanku huk wasillapi hukkunawan tiyanapaq?

Kunan tiempopiqa askha runakunan mana wasiyoq kanku. Mana qolqeyoq kasqankurayku, saludninkurayku otaq imaraykupas obligasqan rikukunku huk wasillapi huk familiankunawan tiyanankupaq. Wakin nacionkunapitaq askha familiakuna huk cuartollapi tiyanku.

Jehová Diospa llaqtanqa manan tukuy imatachu willanan hayk’achus, pikunachus, huk wasillapi tiyanankuta. Ichaqa willanmi Bibliaq nisqanman hina cristianokuna imakuna qhawarinankuta, chhaynapin paykuna yachankuman Diospaq hinachus ruwashanku icha manachus chayta. ¿Imakunatataq qhawarinankuri?

Allintan qhawarinanku chay tiyaqmasinkuna imaynachus kasqankuta: Diosta serviqchu  kanku, Bibliaq nisqanman hinachu kawsanku chaykunata. Chhaynaqa cuidakunankun paykuna kikinkuta hinallataq iñiyninkutapas. Apóstol Pablon nirqan: “Ama q’otuchikuychischu [...]: ‘Mana allin runakunawan huñukuspaqa samaykachikunkun’”, nispa (1 Cor. 15:33). Chaytan mana hayk’aqpas qonqanankuchu.

Biblian sut’itapuni niwanchis ama wasanchay huchata qhelli huchatapas ruwananchispaq (Heb. 13:4). Jehová Diospaqqa manan allinchu huk solterowan huk solterawan kaq cuartollapi puñunanku. Chaymantapas cristianoqa manan tiyanmanchu qhelli huchapi kawsaq runakunawan kuskaqa.

Hinaspapas Diospa serviqninkunatan Biblia kamachin: “Qhelli huchapi puriymanta ayqeychis”, nispa (1 Cor. 6:18). Chhaynaqa, sichus cristianokuna kaq wasillapi otaq kaq cuartollapi tiyayta piensashanku chayqa, qhawarinankun ima tentacionpas kanmanchus chayta. Yaqapaschá huk hermanowan huk hermanawan sapallanku wasipi kashankuman wakinkuna lloqsiqtinku. Chayqa huk tentacionmi kanman. Kaqllataqmi kanman iskay munanakuq solterokuna huk wasillapi tiyaqtinkupas. Allin reparaq cristianokunaqa manan chhayna tentacionkunamanqa churakunkuchu.

Chaymantapas manan allinchu kanman t’aqanasqa warmi-qhari kaq wasillapi tiyanankuqa. Costumbrasqataq kashanku warmi-qhari puñuyman chayqa, yapamantapaschá chayman urmankuman (Pro. 22:3).

Cristianokunaqa qhawarinallankutaq wasimasikuna ima nisqankuta. Hinaña huk cristiano allinpaq qhawarinman kaq wasillapi hukkunawan tiyayta chaypas, kanmanpaschá millay rimaykuna wasimasinkunamanta. Chayqa manan allinchu kanman; manan munanchischu ruwasqanchiswan Jehová Diospa sutin qhellichaytaqa. Aswanmi munanchis Pabloq consejon hap’ikuyta, paymi nirqan: “Ama misk’achiychischu judío runakunatapas, mana judío runakunatapas, Diospa iglesiantapas [iñiq t’aqantapas]. Ñoqapas lliw runatan tukuy imaymanapi kusichiytapuni munani, manan ñoqaq allinnillaytachu maskhani, aswanpas askhaq allinnintan maskhani, paykuna qespichisqa kanankupaq”, nispa (1 Cor. 10:32, 33).

Mayninqa sasapaschá kanman Diospa kamachikusqanman hina ima ruwaypas. Chhayna kaqtinpas cristianokunaqa ‘imachus Señorpa sonqonta kusichiq kaqtan ruwananchis’. Manan ima millay ruwaypas kananchu kawsasqanchispi (Efe. 5:5, 10). Chaymi Diospa yanapayninta mañakunanku, ima atisqankutataq ruwananku mana allinkunamanta pakakunankupaq, ahinapin Jehová Diospa sutinta mana qhellichanqakuchu.