¿Taytanchista hinachu Diosta qhawarinchis?

HUK kutinmi Jesusta huknin discipulon nirqan: “Señorníy, yachachiwayku mañakuyta”, nispa. Paytaq nirqan: “Mañakuspaykichisqa kay hinatan ninkichis: ‘Yayayku, sutiyki yupaychasqa kachun’”, nispa (Luc. 11:1, 2). Jesusqa yachachinmanmi karqan: ‘Tukuy-atiyniyoq Diosniyku’, ‘Yachachiqniyku’, ‘Kamaqniyku’, ‘wiñay-wiñay Reyniyku’, nispa mañakunankupaq (Gén. 49:25; Isa. 30:20; 40:28; 1 Tim. 1:17). Ichaqa “Yayayku” otaq “Taytayku”, nispa mañakunankupaqmi yachachirqan. Yaqapaschá chayta nirqan Ancha Atiyniyoq Diosman munakuq taytaman hina asuykunanchispaq, imaynan huk wawapas taytanman asuykun hinata.

Wakinpaqmi ichaqa sasa taytankuta hina Diosta qhawariy. Paulina sutiyoq cristianamanta yachasunchis, * paymi nin: “Taytayqa manan hayk’aqpas munakuywanqa tratawaqchu, chaymi, unay wataña bautizasqa karqani chaypas, ñoqapaqqa sasa karqan Jehová Diosmanta: ‘Taytáy’, nispa mañakuy”, nispa.

Kay sasa tiempokunapiqa askha runakunan manaña ‘munakunkuchu’ wawankuta (2 Tim. 3:1, 3). Chaychá askha runakuna Paulina hina sientekunku. Ichaqa kanmi askha razonkuna Jehová Diosta Taytanchista hina qhawarinapaqqa, chaykunamantan qatiqninpi yachasun.

Jehová Diosqa Uywawaqninchismi

Jehová Diosta Taytanchista hina qhawarinapaqqa allintaraqmi payta reqsina. ¿Imaynatan payta reqsisunman? Jesuspa yachachisqanpi yuyaymanaspan. Paymi nirqan: “Manan pipas Churitaqa reqsinchu, aswanpas Yayallan, manataq pipas Yayataqa reqsinchu, aswanpas Churillan, pimanchus Churiqa reqsichiyta munan chayllapiwanmi Yayataqa reqsin”, nispa (Mat. 11:27). Chhaynaqa, ¿imakunatan Jesús yachachirqan Taytanmanta?

Yachachirqanmi Jehová Dios kawsay Qoq kasqanta, chaymi nirqan: “Paymi kawsachiwan”, nispa (Juan 6:57). Ñoqanchistapas Diosmi kawsachiwanchis (Sal. 36:9; Hech. 17:28). Payqa munakuwaspanchismi kawsayta qowarqanchis, chaymi ñoqanchispas payta munakunanchis.

Ancha hatun munakuynintan rikuchiwanchis Churinta kay pachaman kachamuspan chhaynapi huchamanta kacharichiwananchispaq. Chayraykun huchasapaña kashaspapas paywan amigontin kasunman (Rom. 5:12; 1 Juan 4:9, 10). Hinaspapas Taytanchisqa hunt’anpunin promesankunata, chayraykun confianchis Diosta munakuqkunapas kasukuqkunapas hamuq tiempopi “Diospa wawankunawan kuska kacharichisqa hatunchayninpi” kananchista (Rom. 8:21).

Jehová Diosqa munakuyninta rikuchiwallanchistaq sapa p’unchay lliwpaq ‘Intinta lloqsichimuspa’ (Mat. 5:45). ¿Mañakunchischu Inti lloqsichimunanpaq? Manan riki. Chaywanpas qowanchismi Intiq k’anchayninta, chhaynapi kawsananchispaq kusikunanchispaqpas. Chaymantapas Taytanchisqa mana mich’akuspan qowanchis llapa necesitasqanchista, payqa manaraq mañakushaqtinchismi yachanña imas chaykuna kasqanta. Chhaynaqa, kamasqanta allinta qhawarispan yuyaymanananchis hanaq pacha Taytanchisqa ancha munakuq kasqanta (Mat. 6:8, 26).

Munakuq Taytanchisqa cuidawanchismi

Jehová Diosmi Profeta Isaiaswan llaqtanman willachirqan: “Orqokunapas kuyurinmanmi,  moqokunapas thunikunmanmi, qantan ichaqa munakushallasqaykipuni, sumaq kawsanaykipaq rimanakusqaytapas hunt’ashallasaqmi [...]. Khuyakuqniyki Señor Diosmi chayta nin”, nispa (Isa. 54:10). Chaypi nisqan hina, Diosqa munakuywanmi cuidan serviqninkunata, chaytaqa allintan Jesús yacharqan, chaymi qatikuqninkunapaq khaynata mañakurqan: “Paykunan [...] kay pachapiraq kanqaku, ñoqaqa qanmanmi hampushaniña. Ch’uya Yayáy, [...] qan kikiyki atiyniykiwan paykunata waqaychay”, nispa (Juan 17:11, 14). Chayraykun Jehová Diosqa llapa cristianokunata sumaqta cuidashan.

Diosqa Satanaspa makinmanta librawananchispaqmi espiritual mikhuyta qowanchis ‘allin yuyayniyoq hunt’aq kamachinwan’ (Mat. 24:45). Sichus chay espiritual mikhunawan yanapachikusun chayqa, faciltan “Diospa qosqan llapallan tupapakuna p’achawan” churakuyta atisun. Chay p’achamanta hukninmi iñiyninchis, chayqa ‘hark’apakuna escudo hinan’, “chaywanmi saqraq llapa rawrashaq wach’isqankunatapas thasnuyta ati[sunchis]” (Efe. 6:11, 16). Arí, iñiymi hark’awasun millay ruwaykunamanta, chhaynapitaq rikusunchis Taytanchispa cuidawasqanchista.

Jesús kay pachapi kashaspa imaymana ruwasqanpin rikullanchistaq hanaq pacha Taytanchis ancha munakuq kasqanta. Marcos 10:13-16 nisqaman hina, Jesusmi qatikuqninkunaman nirqan: “Wawakunaqa hinalla ñoqaman hamuchunku”, nispa. Maytachá chay wawakunaqa kusikurqanku Jesús paykunata marq’arikuspa ‘Diosmi sumaqta qhawarisunchis’ niqtin. Chhaynallataqmi Jehová Diospas makinta mast’arispa runakunata suyashan. Jesusqa Taytan hinapunin, chaymi nirqan: “Ñoqata rikuwaqqa Yayatan rikun”, nispa (Juan 14:9).

Imaynan pukyumanta unuqa mana p’itiyta phullpumun, chhaynan Jehová Diospa munakuyninpas mana tukukuq. Chaymi tukuy necesitasqanchista qowanchis, sumaqta cuidawanchis, munantaqmi payman asuykunanchistapas (Sant. 4:8). Chhayna munakuq Taytaqa manan kanchu.

Allinninchispaqmi hanaq pacha Taytanchispi confiayqa

Munakuq Jehová Taytanchisman hap’ipakusun chayqa, allinninchispaqmi kanqa (Pro. 3:5, 6). Chhaynallataqmi karqan Jesuspaqpas. Chaymi qatikuqninkunata nirqan: “Manan sapallaychu kashani, aswanpas kachamuwaqniy Yayaypiwanmi”, nispa (Juan 8:16). Payqa manan hayk’aqpas Taytanpa yanapayninmanta iskayrayarqanchu. Bautizakushaspan Jesusqa uyarirqan Taytanpa: “Kaymi munakusqay Churiy, paymi anchata kusichiwan”, nispa nisqanta (Mat. 3:15-17). Chaymi Jesusqa wañuy patapiña kashaspapas Taytanta nirqan: “Yayáy, makiykimanmi espirituyta hap’ichiyki”, nispa (Luc. 23:46). Chhayna sasachakuypiña tarikurqan chaypas, qaqatan Taytanman hap’ipakurqan.

Chhaynallataqmi ñoqanchispas Diosman hap’ipakunanchis. Chhaynapin mana imamantapas manchakusunchu (Sal. 118:6). Paulina iñiqmasinchismi mana pitapas yanapaqninta hina qhawariqchu sasachakuypi tarikuspa. Ichaqa allintan estudiarqan Jesuspa imakuna ruwasqanta, Taytanman k’askakusqanmanta ima. Chhaynapin payqa yacharqan Jehová Dios huk munakuq Tayta kasqanta, chaymi paypi confiarqan. Kunanqa thakpin kusisqa kawsan, manataqmi imamantapas manchakunñachu.

Jehová Diosta munakuq Taytata hina qhawariyqa yanapawallasuntaqmi allin yuyaywan kawsananchispaq, “runaq qayllanpi payta alabananchispaqpas” (Mat. 11:25, NM; Juan 5:19). Imaynan huk wawapas taytanta munakuspa kasukun, chhaynan ñoqanchispas kananchis. Jesuspas anchatan munakurqan hanaq pacha Taytanta, chaymi nirqan: “Ñoqaqa paypa sonqonman chayaqtapunin ruwani”, nispa (Juan 8:29).

“Paña makiykimantan hap’ishayki”

Hanaq pachapi kaq Taytanchisqa “huk kallpachaqta” kachamuwarqanchis, chaymi santo espíritu. Jesuspa nisqan hina, santo espiritun ‘tukuy cheqaqkaqta yachachiwasunchis’ (Juan 14:15-17; 16:12, 13). Yanapawasuntaq Taytanchista  allinta reqsinanchispaq, hinallataq sonqonchismanta ‘pukarakunata thuninapaqpas’, chaykunaqa pantasqa yuyaykuyninchiskunan. Chhaynapin ‘tukuy yuyayninchistapas atipaspa Cristoman kasuchisunchis’ (2 Cor. 10:4, 5). Chhaynaqa mana iskayrayaspan Diospa espiritunta mañakunanchis. Jesusmi nirqan: “Hanaq pachapi kaq Yayaykichisqa mañakuqninkunaman[mi] Santo Espiritunta qonqa”, nispa (Luc. 11:13). Mañakunallanchistaqmi santo espiritunta payman astawan k’askakunapaq.

Wawakunaqa manan imatapas manchakunkuchu taytankuq makinmanta hap’ipakuspa purispankuqa. Ñoqanchispaqpas kaqllataqmi kanqa: manan manchakusunchu Jehová Diosta Taytanchista hina qhawarisun chayqa. Paymi prometewanchis: “Ñoqaqa Diosniyki Señor Diosmi kani, paña makiykimantan hap’ishayki, ñoqan niyki: Ama manchakuychu, ñoqan yanapasqayki”, nispa (Isa. 41:13). Chaypi nisqan hina, wiñaypaqmi Diosman hap’ipasqa purisunman. ¡Ima munaymi chayqa kanman! (Miq. 6:8.) Sichus munakuq Taytanchispa munayninta ruwashallasun chayqa, paymi munakuwasun, kusichiwasun, sumaqtataq cuidawasun.

[Uranpi willakuy]