Wawakunataqa Diosmantan yachachina

ACADEMIA Sueca de Derechos del Niño nisqan huk huñunakuyta aparichirqan 2008 watapi, 9 p’unchay diciembre killapi, chaypin rimarqanku wawakunaq Diosmanta yachanankupaq derechonmanta. Chaypin yanapakurqanku wakin umallikuna: Iglesia de Suecia nisqamanta, cristiano nisqa religionkunamanta, hinallataq islam, movimiento humanista nisqakunamantapas.

Hukninmi nirqan: “Bibliaq willakuyninkunaqa ancha allinpunin wawakunaq iñiyninpaq”, nispa. ¿Imaynatan chay willakuykuna wawakunata yanapanman?

Chay umallin nillantaq: “Bibliaq yachachikuyninkunaqa wawakunatan yanapan imaynachus kananku, imatachus ruwananku chaykunapi yuyaymananankupaq. Bibliapin willashan Adán Evamanta, Caín Abelmanta, David Goliatmanta, Jesusmanta, impuesto cobraq Zaqueomanta, kaqninkuna tukuq waynamanta, allin samaritano runamantawan; chay willakuykunan wawakunataqa yachachinman ama traicionakuq, cheqnikuq, suwakuq, millaykuna ruwaq kanankupaq, aswanmi pampachakuq, allipunakuq, munakuq, khuyapayakuq kanankupaq”, nispa.

Ancha allinpunin Biblia leeyqa. Ichaqa, ¿atinkumanchu wawakuna kikillankumanta “yuyaymanaspa” Bibliaq nisqanta entiendeyta?

¿Ima ninmi Biblia chaymanta? Bibliaq nisqanman hinaqa kurak runakunapas yanapanatan necesitanku Diospa Simin Qelqakunata entiendenankupaq. Huk kutinmi Etiopía llaqtayoq runa sapallan leeshasqa profeta Isaiaspa qelqasqan profeciata, ichaqa manan entienderqanchu, chayraykun Felipeq yanapayninta kusisqa aceptarqan (Hech. 8:26-40). Kunanpas chay runa hinan llapanchispas necesitanchis pipas Diospa Siminta entiendechiwananchista, astawanraqqa wayna-sipaskuna.

Biblian nin: “Loqhe-kayqa [mana yuyayniyoq-kayqa] waynaq sonqonpin saphichakun”, nispa (Pro. 22:15). Chayraykun wawakunataqa yanapana Dios iñiyninkupi wiñarinankupaq, yachachinataq imayna kawsanankupaq. Chhaynaqa, ¿pikunan astawan yanapananku? Tayta-mamakunan yanapananku. Chaypaqmi yanapachikunkuman Diospa Simin Qelqawan llaqtanpiwan. Arí, wawakunamanqa qonankupunin chhayna yanapaykunata. Chaymi huch’uychankumantapacha yachachinanku Bibliamanta chhaynapi Diospi iñinankupaq. Chhaynapin allin yuyayniyoq runakuna kanqaku, hinaspa “allinkaqta mana allinkaqta reparayta” atinqaku (Heb. 5:14).