Wayna-sipaskunata yanapaq libro

REY Salomonmi kinsa waranqa wata ñawpaqta nirqan: “Wayna-sipasllaraq kashaspa Kamaqniykimanta yuyarikuy”, nispa (Ecl. 12:1). Chayta wayna-sipaskuna hunt’anankupaqmi 2008 watapi “Diospa espiritunwan yanapachikusun” nisqa huñunakuypi chaskikurqanku Los jóvenes preguntan (volumen 2) nisqa librota.

Libroq tapanpin rikhurin Umalli T’aqaq cartan, chaypin nin: “Jehová Diosmantan mañakuyku kay libro qan hina wayna-sipaskunata yanapananpaq sasachakuykunapi, tentacionkunapi, ima decidisqaykichispipas Jehová Diospa munasqanman hina ruwanaykichispaq”, nispa.

Llapa cristiano tayta-mamakunan munanku Jehová Diospa munasqanman hina wawanku uywayta (Efe. 6:4). Ichaqa wayna-sipasyasqankuman hinan askha wawakuna astawan yanapanata necesitanku. ¿Imaynatan tayta-mamakuna yanapankuman chay librowan? Chaymantan qatiqninpi yachasunchis.

▪ Kikiykichispa kachun libroykichis hinaspa allinta reqsiychis. Manan leeyllachu leena, aswanmi allinta entiendenanchis ima nisqanta. Chay libroqa manan yachachinchu imas allin imataq mana allin chayllatachu, yachachillantaqmi ‘allinkaqta mana allinkaqta reparaytapas’ (Heb. 5:14). Hinallataqmi yachachin imaynatas allin ruwaypi qaqata sayankuman chayta. 15 capitulopin Bibliaq nisqanman hina yachachikushan imaynatas wayna-sipaskuna tapuqninkunaman ‘allinta kutichinkuman’ chayta (Col. 4:6). Chhaynapin mana: “Manan chayta ruwaymanchu”, nispallachu ninqaku imatapas niqtinku.

▪ Qelqanapaq, tapuykuna kutichinapaq partekuna. Wayna-sipaskunapaqña chay partekuna ruwakurqan chaypas, qankunapaqpas, tayta-mamakuna, allinmi kanman  chaykunapi qelqay. * 16 paginapin iskay tapuykuna kashan wayna-sipaskuna parejapi lloqsinankumanta. Yuyariychis wawaykiq edadninpi kashaspayki sientesqaykichista, hinaspa anotaychis imatas kutichiwaqchis karqan chay tiempopi chayta. Chaymantataq tapukuychis: “¿Kaqllatachu kunan piensashani chaymanta? ¿Imatan yachachiwarqan imapas pasasqaykuna? ¿Imaynatan wawayman chaykunata yachachiyman?” nispa.

▪ Ama leeychischu wawaykichiskunaq qelqasqanta. Chay libroq tapusqan partekunaqa ancha allinpunin wayna-sipaskunaq sonqonpi kasqanta yachanapaq, chaypin paykuna qelqanku imachus piensasqankuta, ichaqa manan chaykunata leenaykichischu. 3 paginapin tayta-mamakunata nishan: “Sichus munankichis wawaykichiskunaq piensasqankuta libropi qelqanankuta chayqa, mana leepunaykichispaqmi prometekunaykichis. Chhayna kaqtinqa yaqapaschá paykuna kikinku willasunkichisman imatas qelqarqanku chayta”, nispa. Chhaynaqa wawaykichispa sonqonpi imachus kasqantan yachanaykichis, manan libropi ima qelqasqankutachu.

Familiantinmi estudiawaqchis

Los jóvenes preguntan volumen 2 nisqa libroqa allinpunin kanqa Familiantin Diosta Yupaychana Ch’isinta estudianapaq. Chaypiqa manan kanchu sapanka parrafopaq tapuykuna, chaymi tayta-mamakunaña decidinanku imaynatachus estudianankupaq.

Wakin tayta-mamakunaqa wawankuwan kuskan demostracionkunata ruwanku 132, 133 paginakunapi willakusqanman hina. Chaypin kan iskay tapuykuna. Ñawpaqkaq tapuywanmi wawaykichiskuna reparanqaku imachus paykunapaq huk tentación kanman chayta. Iskaykaq tapuywantaq reparanqaku maypichus chay rikhurisqanta. Chaymantataq wawaykichiswan kuska qhawariwaqchis iman pasanman compañeronkunata kasuqtin, otaq mana kasuqtin, chay qhepamantaq wawaykichista niwaqchis pantachiy munaq compañeronkunapaq kinsa kutichiykunata preparananpaq. Chaymantapas yanapallawaqchistaqmi hukniraymanta paykuna kikinkumanta kutichinankupaq. Chhaynapin paykuna mana manchakuspa chayman hina kutichinqaku (Sal. 119:46).

Allin rimanakuy kananpaq

Chay libron wayna-sipaskunata yanapanqa mana manchakuspa parlanankupaq. 63, 64 paginakunapi hinallataq 189 paginapipas, allintan willakushan imaynatas mana  p’enqakuspa wakin temakunamanta rimawaqchis chayta. 13 watayoq sipaschan nin: “Chay libroqa anchatapunin yanapawarqan tayta-mamayman ima munasqayta ruwasqaytapas willanaypaq”, nispa.

Chay libropi sapanka capituloq tukukuyninpi rikhurin “Y tú, ¿qué piensas?” nisqa recuadro, chayqa manan estudiasqanchista repasanallapaqchu, familiawan kuska parlarinapaqwanmi. Chaymantapas kallantaqmi “¡Manos a la obra!” nisqa parte, chaykunapin wayna-sipaskuna anotankuman yachasqankuman hina imatachus ruwanankuta. Chay parteq tukuyninpitaq kashan: “¿Qué quiero preguntarle a mi padre o a mi madre sobre este tema?” nisqa tapuy, chaymi wayna-sipasta yanapanqa pikunan allin consejokunata qonkuman chayta reparanankupaq.

¡Sonqonkuman chayaychis!

Tayta-mamakuna, chay libron yanapasunkichis wawaykichiskunaq sonqonman chayanaykichispaq. Chaypaq qhawarisunchis imaynatas huk taytata chay libro yanaparqan ususinwan sumaqta rimanankupaq chayta.

Paymi nin: “Rebekah ususiywanmi askha sumaq cheqaskunata reqsiyku, chaykunamanqa chakipi, bicicletapi otaq carropipas rishallaykun. Chaykunapi kashaqtiykun payqa mana manchakuspa ñoqawan riman.

“Ñawpaqtaqa Umalli T’aqaq cartanta leerqayku, chaymantapas ‘Estimados padres’ nisqatawan. Ñoqaqa munarqanipunin ususiy chay libronpi ima piensasqanta anotananpaq, ichaqa 3 paginapi nisqan hina manan leenaychu karqan chay anotakusqanta.

“Hinaspapas paytan akllachirqani ima capitulokunatan leeykuman chayta. Chayraykun payqa akllarqan ‘¿Tienen algo de malo los videojuegos?’ nisqa temata. Manan hayk’aqpas chay temata akllananpaqqa piensarqanichu, ichaqa chay qhepamanñan entienderqani. Compañeronkunas nishuta huk videojuego nisqawan pukllaqku, chay pukllaypiqa qhelli simikunatas rimaqku, millaytataqsi maqanakunku. Manan hayk’aqpas chhayna pukllaykuna kananpaqqa piensasqanichu. Chaykunataqa willawan ‘¡Manos a la obra!’ (pág. 251) nisqa temaman chayaqtiykuñan. Chay teman paytaqa yanaparqan imaynatas kutichinman sichus compañeronkuna ‘ñoqaykuwan pukllay’ niqtinku.

“Chay librotaqa parlariq hinallan estudiayku, leenaykupaqpas turnanakuykun, recuadrokunamanta dibujokunamantapas rimaytan munan. Llapantan willawan libronpi imakuna anotasqanmantapas. Ñoqan willani waynallaraq kashaqtiy imaynachus kawsay kasqanta, paytaqmi willawan kay tiempopi wayna-sipaskuna imayna kasqankumanta. Ususiyqa sumaqtan willawan imachus piensasqanta”, nispa.

Tayta-mamakuna, maytachá qankunaqa kusikurqankichis chay librota chaskispa. Kallpachakuychis chaywan yanapachikunaykichispaq. Umalli T’aqaqa maytan munan chay librowan familiaykiwan kuska yanapachikunaykichispaq. Chay libroqa maytachá llapanchista yanapawasun, astawanqa wayna-sipaskunata, ‘santo espirituq munasqanman hina kawsashanallapaq’ (Gál. 5:16).

[Uranpi willakuy]

[30 paginapi recuadro]

Wakin wayna-sipaskunaq willakusqan

“Chay librotaqa tukuy yuyaywanmi leenanchis, qelqananchistaq chaypi. Imachus pasasqasuykita qelqanaykipaq hinan, chaymi yanapasunki allinta yuyaymanaspa allin ñanninta purinaykipaq”, nispan nin Nicola.

“Sapa kutinmi hukkuna niwanku ‘ñachu novioyki kanña’, nispa. Ichaqa chay temamanta libroq yachachisqanta estudiaspaymi entienderqani manaraq chaypaq hinachu kasqayta”, nispan nin Katrina.

“‘¿Estás pensando en bautizarte’ nisqa recuadron yanapawarqan chaypi allinta piensanaypaq. Hinallataq yanapawarqan allintachus Bibliata estudiashani, Diosmantapas mañakushani chayta qhawarikunaypaq”, nispan nin Ashley.

“Tayta-mamayqa cristianon kanku, chaymi huch’uychaymantapacha Jehová Diosmanta allinta yachachiwarqanku. Chaywanpas kay libron astawanqa yanapawarqan allinta piensaykuspa imatapas ruwanaypaq. Chaymi kunanqa mana manchakuspa paykunaman willakuni imaynachus sientekusqaymanta”, nispan nin Zamira.

[31 paginapi foto]

Tayta-mamakuna, kallpachakuychis chay librota reqsinaykichispaq

[32 paginapi foto]

Tayta-mamakuna, wawaykichispa sonqonman chayaychis