Santo espirituwanmi Diospa munaynin hunt’akun

“Rimasqay simiyqa [...] kamachisqayta llapantapuni huntanqa.” (ISA. 55:11.)

1. ¿Imapin viajanankupaq alistakuq runakunaq yuyaykusqanku hukniray?

KAYPI yuyaykuy: iskay carroyoq runakunan huk llaqtaman viajanankupaq alistakushanku. Hukqa may ñanninta viajanapaqmi planeashan. Hukninpas allintan yachan mayman chayananta, ichaqa preparasqan kashan imapas ñanpi sucedeqtin huk ñanninkunata rinanpaq. Chay runakunaqa sapankan huknirayta yuyaykushanku. Hukninqa huk ñannillanta viajaypin yuyaykun. Huknintaq maynintaña rispapas llaqtaman chayananpi.

2, 3. a) ¿Iman ñawpaqpi Diospa munaynin karqan, imaynatan allicharqan Adán Evaq huchallikusqanta? b) Imaraykun Diospa munayninmanta yachaspa chayman hina kawsananchis?

² Munayninta Dios ruwananpaqqa manan planeanchu, aswanpas ruwananpaq decidisqan otaq munaynin pisi-pisimanta hunt’akunanpin yuyaykun (Efe. 3:11). Chay munayninmi ñawpaqpi karqan Hallp’a paraisoman tukunan, hinaspa chaypi runakuna wiñaypaq kusisqa kawsanan (Gén. 1:28). Adan Eva huchallikuqtinkun ichaqa imakunatachus necesitakusqanta ruwarqan munayninta hunt’akunanpaq (leey Génesis 3:15). Willarqanmi warmi otaq hanaq pachapi llaqtan ‘mirayta’ paqarichimunanmanta. Chay Churin huchaman apaq Satanasta ñut’unman, hinaspa allichanman lliw mana allinkuna paqarichisqanta (Heb. 2:14; 1 Juan 3:8).

³ Manan ima atiypas hanaq pachapipas kay pachapipas hark’anmanchu munaynin  hunt’akunantaqa (Isa. 46:9-11). Ruwananpaq decidisqanqa ‘hunt’akunqapunin’ (Isa. 55:10, 11). ¿Imarayku? Atiyninyoq kallpa santo espiritun hunt’achinqa. Hamuq tiempopi kawsayninchisqa Diospa munaynin hunt’akunanmantataq dependen chayqa, allinninchispaqmi chaymanta yachay chayman hina kawsaypas. Chaymantapas, sichus yachasun ñawpaqpi, kunan, hamuqpipas Diospa munaynin hunt’akunanpaq espíritu imayna yanapasqanta chayqa, iñiyninchistan kallpachasun.

Ñawpaqpi santo espirituq ruwasqan

4. ¿Imaynatan Jehová munayninta willarqan?

⁴ Ñawpaq tiempopiqa pisi-pisimantan Dios munayninta willarqan, qallariypiqa manan yachakurqanchu pichus prometesqa Miray kasqanta (1 Cor. 2:7). Chaytaqa iskay waranqa wata qhepamanñan willarqan. Abranmanmi huk promesata ruwarqan, chayqa qhepamanmi hunt’akunman (leeychis Génesis 12:7; 26:4,5). Chay promesanpin “mirayniykiwan” nirqan, chaypin yachakurqan huk runa kasqanta, Abrahampa familianmanta hamunantapas. Diospa willasqantaqa allintachá Satanasqa uyarisharqan, hinaspa tukuy atisqanta ruwarqan Abrahanmanta miray hamunanta hark’ananpaq otaq mirayninta chinkachinanpaq, chhaynapi mana Diospa munaynin hunt’akunanpaq. Chay ruwaytaqa manan imaraykupas atinmanchu karqan, Diospa kallpanmi hark’anman. ¿Imaynata?

5, 6. ¿Imaynatan Jehová espiritunwan pakaykurqan Miraypa wakin ñawpa taytankunata?

⁵ Diosqa espiritunwanmi Miraypa ñawpa taytankunata pakaykurqan. Abrahamtan nirqan (chay pachaqa sutin Abrán karqan): “Ñoqan waqaychaqniyki kani”, nispa (Gén. 15:1). Chaytaqa manan yanqallatachu rimasharqan. Yuyarisunchis 1919 watapi manaraq Jesús hamushaqtin ima sucedesqanta. Abraham esposan Sarawan Gerar llaqtaman tiyaq riqtinkun chaypi rey Abimélec Sarata warminpaq hap’ikapuyta munarqan, casada kasqanta mana yachaspa. ¿Satanaspa trampanchu kanman karqan chhaynapi mana Abrahanmanta miray hamunanpaq? Bibliaqa manan chaymanta willanchu, ichaqa willanmi chay mana sucedenanpaq Dios ima ruwasqanmanta, mosqoyninpin reyman willarqan mana tupayunanpaq (Gén. 20:1-18).

⁶ Diosqa manan chay kutillapichu Abrahamta familiantawan peligromanta pakaykurqan (Gén. 12:14-20; 14:13-20; 26:26-29). Chayraykun salmistaqa nirqan: “Señor Diosqa manan piqpa sarunchanantapas munarqanchu, paykunaraykun reykunatapas anyarqan: Akllakusqaykunataqa aman llamiykunkichischu, profetaykunataqa aman imanankichispaschu”, nispa (Sal. 105:14, 15).

7. ¿Imaynatan Jehová Dios pakaykurqan Israel llaqtata?

⁷ Jehová Diosqa espiritunwanmi pakaykullarqantaq Israel llaqtata, chaypin nacenan karqan prometesqa Miray. Ñawpaqtaqa Kamachikuy Simitan churarqan, ahinapi cheqaq yupaychay mana chinkananpaq, hinallataq espiritualpi, kawsayninkupi, cuerponkupipas limpio kanankupaq (Éxo. 31:18; 2 Cor. 3:3). Juezkunaq tiemponpiqa espirituntan runakunaman qomurqan Isrelta enemigonkunamanta qespichinankupaq (Jue. 3:9, 10). Prometesqa principal miray Jesuspa nacenankamaqa pachak watakunan pasarqan. Diosqa espirituntan utilizarqan Mesiasmanta profeciakunapi rikhuriq Jerusalén, Belén, templo huk llaqtakunapas nacesqan tiempopi kashananpaqraq.

8. ¿Imaynatan santo espíritu Cristota yanaparqan kawsayninpi Dios serviyninpipas?

⁸ Santo espiritun Cristota yanaparqan kawsayninpi Dios serviyninpipas. Ñawpaqtaqa,  virgen Mariaq wiksanpin paqarichirqan mana huchayoq wawata, chayqa admirakunapaqmi (Luc. 1:26-31, 34, 35). Chaymantapas hark’arqanmi wawa kashaqtin manaraq tiempopi wañunanta (Mat. 2:7, 8, 12, 13). Qhepamantaq, Jesús 30 watayoq kashaqtin santo espirituwan akllasqa karqan, chhaynapin nombrasqa karqan Davidpa trononta chaskinanpaq Reinonmanta predicananpaqpas (Luc. 1:32, 33; 4:16-21). Chay espirituwanmi onqosqakunata qhaliyachirqan, mikhunata askhaman tukuchirqan, wañusqakunatapas kawsarichirqan. Chaykuna ruwasqanpin yachanchis gobiernonpi sumaq bendicionkuna chaskinanchista.

9, 10. a) ¿Imakunan rikuchiwanchis qallariypi Jesuspa qatikuqninkuna santo espirituyoq kasqankuta? b) ¿Ima cambion qallariy siglopi karqan ahinapi Diospa munaynin hunt’akunanpaq?

⁹ 33 wata Pentecostés fiestamantapachan espiritunwan Abrahampa qhepa kaq mirayninta akllarqan, paykunamanta askhan mana Abrahampa familianmantachu karqanku (Rom. 8:15-17; Gál. 3:29). Espíritu paykunapi kasqantan rikukurqan tukuy sonqo predicasqankupi milagrokuna ruwasqankupipas (Hech. 1:8; 2:1-4; 1 Cor. 12:7-11). Espirituwan milagrokuna ruwasqankun rikuchirqan hukniraymanta Dios munaynin hunt’ananta. Jehová Diospa kamachisqanman hinan unay watakunaña Jerusalén templopi Diosta yupaychasqaku, ichaqa chaypa rantintan churarqan akllasqa cristianokunata, chhaynapi munaynin hunt’akunapaq.

¹⁰ Rikusqanchis hina, Diosqa imaymanatan espiritunwan ruwarqan. Siervonkunata pakaykurqan, milagrokunata ruwachirqan, akllarqan ima, ahinapi munaynin hunt’akunanpaq. ¿Imanisunmantaq kay tiempomantari? ¿Imaynatan espiritunwan munayninta hunt’an? Chaykunata yachayqa allinpunin espirituwan pusachikunanchis kasqanrayku. Chayrayku qhawarisunchis imaynata tawa formamanta espiritunta utilizashasqanta.

Kay tiempopi santo espirituq ruwasqan

11. ¿Imakunan rikuchin Diospa llaqtanpi limpio kawsanapaq espirituq yanapasqanta? ¿Imaynantan rikuchinchis espirituwan pusachikushasqanchista?

¹¹ Ñawpaqtaqa, santo espiritun cheqaq cristianokunata yanapan ch’uyata kawsanankupaq. Diospa yuyaykusqan huntakuqtinqa munayninman hina Diosta serviqkunaq allininpaqmi kanqa, chayraykun ch’uya kawsayniyoq kananku (leey 1 Corintios 6:9-11). Manaraq cheqaq kaqmanta yachashaspaqa askhan qhelli huchapi purirqanku, wasanchaq karqanku qharipura puñuqpas. Wakintaq millay munayninkuwan aysachikuqku (Sant. 1:14, 15). Ichaqa Diosta kusichinankupaqmi kawsayninkuta cambiarqanku, chayraykun “huchamanta mayllisqaña” karqanku. ¿Ima kallpawanmi millay munapayaykunata atiparqanku? ‘Diosninchispa espiritunpa atiyninwan.’ (1 Cor. 6:11.) Tukuy tiempo limpio kaspan rikuchinku kawsanyninkupi yanapaq kallpata hina qhawarisqankuta.

12. a) Ezequielpa rikusqanman hina, ¿imaynatan Jehová llaqtanta pusan? b) ¿Imaynatan rikuchinchis espirituwan pusachikushasqanchista?

¹² Iskaypi, Jehová Diosqa espiritunwanmi may munasqanmanpas pusan hanaq pachapi hinallataq kay Hallp’api kaq llaqtanta. Ezequielpa rikusqan rikhuriypin, Diospa munayninta hunt’ananpaq altonta phawaq carretawan, hanaq pachapi Diospa llaqtanta rikch’anachikun. ¿Imaq yanapayninwanmi chay carreta may ladomanpas rin? Diospa kallpan santo espirituwanmi (Eze. 1:20, 21). Espiritun pusallantaq Hallp’api kaq llaqtantapas. Chayrayku, chay llaqtaq tukuy kamachiwasqanchista kasukuspaqa hanaq pachapi llaqtanwan kuska  ñawpashanchis, espiritunwantaq pusachikushanchis (Heb. 13:17).

13, 14. a) ¿Pikunamantan Jesús rimarqan “kay tiempo runakuna” nispa? b) Espirituq sut’inchasqan yachachikuykunamanta huk ejemplota willay (qhaway recuadrota “¿Entiendenchischu chayllarq sut’inchakuq yachachikuykunata?”).

¹³ Kinsapi, santo espiritun pisi-pisimanta sut’inchan Bibliapi yachachikuykunata (Pro. 4:18). Pachak wata masñan “Allin yuyayniyoq hunt’aq kamachi” kay revistapi Bibliaq yachachikuyninkunata pisi-pisimanta willamushanku (Mat. 24:45). Ejemplopaq, qhawarisunchis “kay tiempo runakuna” nispa Jesús rimasqanmanta (leey Mateo 24:32-34 *). ¿Pikunamantan rimasharqan? Ñawpaqpin lloqsimurqan: “¿Imatan yachanki Cristo runakunawanña mana rikuylla kashasqanmanta?”, nisqa estudio. Chaypi willasqanman hina, Jesusqa manan millay runakunamantachu rimasharqan aswanpas qatikuqninkunamantan, paykunan qhepallaman santo espirituta chaskinanku karqan. * Qallariy siglopi kay tiempopipas profecía hunt’akuqtinqa, akllasqa qatikuqninkunallan reparananku karqan Cristoq presencian tiempopiña kashasqankuta, entiendenankutaq karqan Cristo “qayllallapiña kashasqanta”.

¹⁴ ¿Ima ninantaq chaykunari? Manaña yachakunchu Jesuspa nisqan “kay tiempo runakuna” hayk’a tiempo kasqanta chaypas, kaytan yuyarinanchis: “kay tiempo runakuna” nisqa rimayqa, hayk’a edadniyoqña kaqtinkupas huk tiempopi kawsaq runakunamantan rimashan. Chay tiempoqa manan nishu unaytachu duran tukupunmi (Éxo. 1:6, NM). Chhaynaqa, ¿imaynatan entiendenanchis “kay tiempo runakuna” nispa Jesús rimasqanta? 1914 watapi Jesuspa presencian qallariqtin, Hallp’api kashaq akllasqa cristianokuna manaraq wañupushaqtinkun huk akllasqakunapas nacenkuman, paykunan rikunkuman manchay ñak’ariy qallarisqanta. Karqanmi chay tiempo runakunaq qallariynin kanqataqmi tukukuyninpas. Kay millay pacha tukunanpaq profeciakunaq hunt’akusqanmi rikuchin manchay ñak’ariy qayllallapiña kashasqanta. Kunanqa makilla kashananchis tiempon usqhayllan llankananchis (Mar.  13:37). Chayta ruwaspaqa, Bibliapi yachachikuykuna sut’inchakusqanman hina entiendesqanchistan rikuchisun, espirituwan pusachikusqanchistapas.

15. ¿Imaynapin yachanchis predicananchispaq espíritu kallpa qowasqanchista?

¹⁵ Tawapi, santo espiritun kallpata qon predicanapaq (Hech. 1:8). Mana chhayna kaqtin, ¿atikunmanchu karqan pachantinman allin willakuykuna apayta? Kikinchispi yuyaykusun. Yachapaschá manchapakuq kanchis otaq mana atinanchispaq yuyaykunchis, hinaspa hayk’aqllapas nirqanchis: “Manan ñoqaqa atiymanchu wasin-wasin predicaytaqa”, nispa. Ichaqa tukuy sonqowanmi kunanqa chay llank’ayta aparishanchis. * Askha testigokunan mana pisipaspa predicarqanku, hark’akuykunaña qatiykachaykunaña kaqtinpas. Santo espiritullan kallpata qon chay sasachakuykunata atipanapaq, ahinapi kallpallanchiswan mana atinanchis ruwaykunata ruwananchispaq (Miq. 3:8; Mat. 17:20). Chayrayku tukuy atisqanchista predicaspaqa espirituwan pusachikushanchis.

Hamuqpi santo espirituq ruwanan

16. ¿Imaraykun seguro kashanchis manchay ñak’ariy tiempopi Jehová pakaykuwananchismanta?

¹⁶ Qhepamanqa, imaymanatan Jehová Dios espiritunwan ruwanqa munayninta hunt’ananpaq. Ñawpaqtaqa llaqtantan pakaykunqa. Yachasqanchis hina, ñawpaqpin payqa espiritunta utilizarqan wakin serviqninkunata Israel llaqtanta ima pakaykunanpaq. Chayraykun seguro kashanchis manchay ñak’ariy tiempopi llaqtanta pakaykunanpaq hukmanta utilizananpi. Manan yuyaykushananchischu imaynatachus chay punchay pakaykuwasun chaytaqa. Chay tiempopiqa manan mancharikusunchu. Manan qonqasunchu Jehová Diosta munakusqanchisrayku paymanta espiritunmantapas mana imapas t’aqawananchista (2 Cró. 16:9; Sal. 139:7-12).

17. ¿Imapaqmi Jehová espiritunta utilizanqa mosoq pachapi?

¹⁷ ¿Imapaqmi Jehová kallpanta utilizanqa mosoq pachapi? Hukkninpi, chay tiempopi kicharikuq mosoq librokunata ruwakunanpaq (Rev. 20:12). ¿Iman chay librokunapi kanqa? Waranqa Wata Gobiernopi kaq kamachikuykunan. Maytan munanchis chaykunata t’aqwinapaq p’unchay chayamunanta, paraisopi sumaq bendicionkuna chaskiytapas. Manan yuyaykullasunmanpaschu chay tiempopi kawsay imayna kananta. Diosqa Hallp’apaq chaypi tiyaqkunapaqwan munaynintan santo espiritunwan hunt’anqa.

18. ¿Imatan lliwpas ruwananchis?

¹⁸ Manan qonqananchischu, Diospa munaynin hunt’akunanpaqqa universontinpi atiyniyoq kallpa santo espiritun garantizan. Ruwananpaq Jehová Diospa decidisqanpitaq ñoqanchispas tarikunchis chayqa, santo espiritunta mañakusun hinaspa chaywan pusachikun (Luc. 11:13). Chhaynapin Paraisopi wiñay kawsayman aypasun, chaytapunin Diosqa runakunapaq munarqan.

[Uranpi willakuykuna]

¿Imatan yacharqanchis?

• ¿Imaynatan Jehová espiritunta utilizarqan munayninta hunt’ananpaq?

• ¿Imaynatan Jehová espiritunta utilizan kay tiempopi?

• ¿Imaynatan Jehová espiritunwan munayninta hunt’anqa?

[Tapuykuna]

[10 paginapi recuadro]

¿Entiendenchischu chayllaraq sut’inchakuq yachachikuykunata?

Jehová Diosqa sut’inchashallanmi Bibliamanta yachachikuykunata llaqtanpaq. ¿Imakunatan Qhawaq sut’inchamurqan kay qhepa watakunapi?

▪ Ñawpaqpiqa, Mat. 13:33 textopi tarikuq rikch’anachiypi levadura representarqan pantasqa religionkunaq yachachikuyninta. ¿Imaynatan kunan entiendenchis? (15 de julio 2008, 19, 20 paginakuna.)

▪ Ñawpaqpi yacharqanchis hanaq pachapaq cristianokunata akllay 1935 watapi tukupusqanta. ¿Imaynatan kunan entiendenchis? (15 de enero 2008, 22, 23 paginakuna.)

▪ Ñawpaqpin yacharqanchis mostaza muhu pantasqa religionkuna kasqanta. ¿Imaynatan kunan entiendenchis? (Marcos 4:30-32; 15 de julio 2008, 17, 18 paginakuna.)

▪ ¿Ñawpaqpi yacharqanchis challwa hap’ina llika, cristianon kayku niq religionkuna kasqanta, chaytaq cheqaq cristianokunata falso cristianokunatawan huñusqanta. ¿Imaynatan kunan entiendenchis? (Mateo 13:47-50; 15 de julio 2008, 20, 21 paginakuna.)

▪ Ñawpaqpi yacharqanchis trigomanta chirisuela qoramantawan rikch’anachiypi t’akay predicay kasqanta. ¿Imaynatan kunan entiendenchis? (Mateo 13:24-30; 15 de marzo 2010, 19, 22 paginakuna.)