Sasachakuykunapin tukuy sonqowan Jehová Diospi confiarqayku

Khaynatan willakun Ada Dello Stritto

Sutiymi Joel. Kunallanmi tukurqoni sapa p’unchay t’aqwinapaq huknin textota cuadernoyman qelqayta. 36 watayoqña kani chaypas, iskay horapin chayta ruwarqani. Mamitayña willasunkichis imaraykus chaymanta.

QOSAYWAN kuskan bautizakurqayku 1968 watapi, paypa sutinmi Luigi. Davidwan Marcwanmi wawaykuqa karqan, chay qhepamantaq karqan Joel sutiyoq wawayku, payqa hospitalpin nacerqan manaraq isqon killamanta, 1973 watapi, Belgicaq Binche llaqtanpi (Bruselas llaqtamanta 60 kilometroq uranpi). Manan iskay kilollatapaschu llasarqan, chayraykun hospital-llapi saqemurqani astawan yapananpaq.

Joelqa kaqllan kasharqan askha semanakuna qhepatapas, chaymi wawakunamanta yachaq doctorman aparqayku. Allinta qhawarqospataq llakisqa niwarqanku: “Kay wawaykiqa manan allinchu nacekusqa”, nispa. Manan ima niytapas atirqaykuchu, wawaykuqa manan allinchu kasharqan. Doctortaq qosayta huk ladoman waqyaspa willarqan: “Wawaykiqa manan umanpi normalchachu kashan, síndrome de Down nisqawanmi kashan”, nispa.

Chayta yachaspaykun sinchita llakikurqayku, chaymi huk doctormanñataq aparqayku. Payqa yaqa huk hora hinan wawaykuta qhawarqan mana imata rimarispa, ñoqaykupaqqa mana tukurikuqmi chayqa karqan. Chaymantataq sumaq simiwan niwarqanku: “Wawaykichisqa necesitanqan yanapanaykichista, ichaqa kusisqan kawsanqa payta munakusqaykichisrayku”, nispa. Chayta uyarispaymi oqllaykurqani wawachayta, wasiykumantaq hampurqayku. Payqa yaqa iskay killachayoqñan kasharqan.

Huñunakuypas predicacionpas kallpachawarqankun

Qhepamanmi yachallarqaykutaq sonqochan mana allinchu kasqanta, raquitismo onqoyniyoq kasqantawan. Sonqochanmi nishu hatun kaspa pulmonninkunata ñit’iq, chayraykun ratulla onqoq imamantapas. Tawa killachayoq kashaspa bronconeumoniawan onqoqtinmi hospitalman aparqayku, chaypin sapaqchallapi hap’irqanku. Maytan llakikurqayku ñak’arisqanta rikuspa. Marq’arikuspa munakuytan munarqayku, ichaqa manan llamiykachiwallarqankupaschu  chunka semana. Qosaywan kuskan mana imatapas ruwayta atispayku wawaykuta qhawallaq kayku Jehová Diosmanta mañakuspa.

Llakikuyllapiña kasharqayku chaypas, huñunakuymanqa rillaqpunin kayku wawaykunawan kuska, Davidqa soqta watayoqñan karqan, Marctaq kinsa watayoqña. Chaypin cristianomasiykunawan kaspa repararqayku Diospa yanapayninta. Chaypiqa Jehová Diosmanpas llakikuyniykuta saqeshaykuman hinan sientekurqayku, chaymi thak karqaykupas (Sal. 55:22). Joelta cuidad enfermerakunapas cuentatan qokurqanku chay huñunakuykuna thak-kay qowasqankuta.

Jehová Diosmantapas mañakuqmi kani predicaq rinaypaq kallpata qowananpaq. Wasiypi waqaspa kashanaymantaqa, wasimasiykunamanmi willaq kani Diosqa onqoykunata chinkachinanmanta, imaynatan chay suyakuy kallpachawan chaymantawan. Sapa kutin predicaq lloqsispaymi repararqani Jehová Diosqa rogakusqayta uyarisqanta.

“¡Mana creenapaqmá kayqa!”

Chunka semana suyasqayku tukuqtintaq wawaykuta wasiykuman kusisqa apakampurqayku. Ichaqa paqaristillanmi llakipi tarikullarqaykutaq. Wawaykun qonqaylla astawanraq onqollarqantaq, chaymi hospitalman wakmanta apuraylla aparqayku. Chaypin doctorkuna niwarqanku: “Joelqa soqta killa hinallatañachá kawsanqa”, nispa. Iskay killa qhepataqa chhaynaman hinan kasharqan, nishu onqosqapunin wawayqa kasharqan. Joelpa kasqan cuartomanta lloqsispan doctorqa ñoqaykuwan tiyaykuspa niwarqanku: “Manan imatapas wawaykipaq ruwayta atiykuñachu; khaynapi tarikushaqtinqa Jehová Diosllan yanapayta atinman”, nispa.

Joelpa kasqanmanmi kutirqani. Sayk’usqaña llakisqaña kasharqani chaypas, ladollanpiñan qhepakurqani. Qosayqa iskaynin wawaykunata wasiypitaq cuidanan karqan chayqa, askha iñiqmasiy ñañaykunan turnanakuqku ñoqawan kanankupaq. Chaymantataq huk semana qhepallata wawaypa sonqon sayarqapurqan. Enfermerakunan p’itamurqankuraq imallatapas ruwanankupaq, ichaqa manan atirqankuchu. Chay qhepallamanmi hukninkaq enfermera llakisqa niwarqan: “Wañurqakapunmi”, nispa. Hinan mana imanakuyta atispa waqayta qallarirqani. Chay cuartomanta apuraylla lloqsimuspaymi Diosmanta mañakuyta munarqani, ichaqa manan imatapas niyta atirqanichu sinchi nanaypi tarikusqayrayku. Chunka phisqayoq minutollamantan huk enfermera lloqsimuspa niwarqan: “¡Alliyanpushanmi!” nispa. Makiymanta hap’iykuspataq: “Hamuy qhawamunaykipaq”, niwarqan. Kutirqoqtiymi sonqochanqa wakmanta phatatatashasqa. Hospitalpin llapanku willanakuyta qallarirqanku chaymanta. Chaymi doctorkuna enfermerakuna ima hamurqanku qhawaq, hinan admirasqa nirqanku: “¡Mana creenapaqmá kayqa!” nispa.

Tawa watachanpi puriyta qallarin

Wawallaraq Joel kashaqtinmi doctorqa niwallaqkupuni: “Joelqa munakunatan necesitan”, nispa. Jehová Diosqa munakuywanmi yanapawarqanku, astawanqa Joel nacesqanmantapacha. Chhayna munakuywanmi ñoqaykuñataq  cuidanayku karqan wawaykuta. Llapanpitaq yanapanata necesitaq chayqa, askhatan payrayku ruwaq kayku.

Qanchis watankamaqa Joelqa nishutan onqoq octubre-marzo killakuna ukhupi qasay tiempo kasqanrayku, chaymi sapa kutilla hospitalman apaq kayku. Iskaynin wawqenkunapaqpas tukuy atisqaytan tiempota horqoq kani paykunatapas yanapanaypaq. Paykunapas yanapaqkun wawqechankutaqa. Doctorkunaña nirqanku: “Joelqa manan hayk’aqpas puriyta atinqachu”, nispa chaypas, huk p’unchaymi Joelta tawa watachayoq kashaqtin Marc kallpacharqan “qanqa atinkin, mamitanchis yachachun atisqaykita”, nispa. Chaymi rikushaqtiy puriyta atipakamurqan. Chayqa kusichiwarqankun, Jehová Diosmanpas anchatan agradecekurqayku. Pisi-pisimantaña imatapas ruwayta atirqan chaypas, kallpacharqaykun “allinmi chay ruwasqaykiqa”, nispa.

Yachachisqaykuqa sonqonmanmi chayarqan

Huñunakuyman rispaykuqa atikuqtinqa Joeltapas apaqmi kayku. Onqoylitaq karqan chayqa, mana imawanpas contagiakunanpaqmi tanqakachana cunachanpi apaq kayku plasticowan tapasqata. Chhaynaña kaqtinpas allintan huñunakuykunapi uyarikuq.

Cristianomasiykunan kallpachawarqanku, yanapawarqankutaq tukuy atisqankupi. Huk iñiqmasiykun yuyarichiwallaqkupuni Isaías 59:1 textoq nisqanta, chaypin nin: “Manan Señor Diospa atiyninqa pisiyarqonchu, payqa qespichinqapunin. Manan Señor Diosqa roqt’uyarqonpaschu, payqa uyarinqapunin”, nispa. Chayqa kallpachawarqankun Jehová Diospi astawan confianaykupaq.

Joeltaqa yachachiqpunin kayku Jehová Dios serviyta kawsayninpi aswan allinpaq qhawarinanta. Imay ratupas Diosmantaqa rimapayallaqpunin kayku. Munarqaykun Taytanta hina qhawarinanta munakunantapas. Jehová Diosmantapas mañakuqmi kayku yachachisqaykupi yanapawanankupaq.

Waynayamushaspaqa rimallaqpunin Bibliaq yachachikuyninkunamanta, chayqa anchatan kusichiwarqanku. Huk kutinmi 14 watayoq kashaspa operachikusqan qhepaman tapuwarqan: “Mamitáy, ¿doctorman saqeymanchu Vivir para siempre nisqa librota?” nispa. Chayqa anchatan kusichiwarqan. Wataq pasasqanman hinan wakmanta operachikunallantaq karqan, manan yachakurqanchu kawsananpas wañunanpas. Ichaqa manaraq operachikushaspan doctorman saqerqan huk cartata ñoqaykuq yanapayniykuwan qelqasqanta, chaypin nirqan yawarwan ama churachikunanpaq. Hinan doctorqa tapurqan: “¿Qanmantapunichu mana yawarta churachikuyta munanki?” nispa. Paytaq mana iskayrayaspa kutichirqan: “Arí, doctor”, nispa. Chay nisqanwanmi anchata kusikurqayku, chaypin rikurqayku Diospi confiasqanta. Hinaspapas kusikurqaykun hospitalpi llank’aqkuna nisqaykuman hina wawaykuta operasqankumanta.

 Iñiyninpi wiñarisqan

Joelqa 17 watayoq kashaspan bautizakurqan. Manan chaytaqa qonqasaqkuchu. Diospaq llank’ayninpas munakuyninpas manan chiriyanchu, chaywanmi anchata kusikuyku. Payqa piwan rimaspapas ninmi: “Diosta serviymi aswan allin ñoqapaqqa”, nispa.

Chay watakunapiñan ñak’ayta yacharqan leeytapas qelqaytapas. Sapa palabrata qelqayta tukuspan, huch’uyllaña karqan chaypas kusikuq. Chaymantapachan sapa p’unchay leen Diospa Siminta sapa p’unchay t’aqwisun, nisqa folletota. Chaymantataq mayta kallpachakuspa cuadernonman copian. Askhañan chhayna qelqasqankunaqa kashan.

Huñunakuymanqa tempranotapunin chayayku Joel kallpachawasqankurayku, chhaynapin payqa llapan chayamuqkunata napaykun. Chaymantapas payqa kusikunmi tapuykunata kutichispa demostracionkunata ruwaspapas. Microfonotapas haywanmi comentanankupaq, huk ruwaykunapipas yanapakunmi. Qhali kashan chayqa sapa semanan ñoqaykuwan kuska predicacionmanpas rin. 2007 watapin yanapakuq wawqe (siervo ministerial) nombrasqa karqan. Waqarqaykuraqmi kusikuymanta Jehová Dios chay qosqanmanta.

Jehová Diosqa yanapawashallarqankun

1999 watapin huk hatun sasachakuypi kallarqaykutaq. Mana allin manejaq chofermi carroykuman chocamuspa qosayta nishuta k’irirqan. Chayraykun huknin chakinta wit’upurqanku, wasa tullunmantapas askha kutitan operarqanku. Jehová Diosmantan mañakullarqaykutaq, hinan kallpata qowarqanku aguantanaykupaq (Isa. 12:2). Qosayña mana qhali runa hinachu ruwayta atirqan chaypas, manan pisiparqaykuchu. Manañan llank’ayta atipurqanñachu, ichaqa aswan tiempon Joelwan kuska karqan, ñoqataq astawan predicaq lloqsiq kani. Chaywanpas qosayqa aswan allintan yanapawanku Diosta servinaykupaq, iñiq t’aqa ukhupipas umallikunaq llank’ayninpi yanapaq umallin kashan (coordinador).

Chhayna sasachakuypi tarikusqaykuraykun askha tiempo kuskalla kashayku. Kallpachakuykutaq atisqaykuman hinalla kawsanaykupaq. Pisi kallpayaykuchus chayqa, Jehová Diosmanmi willayku imayna sientekusqaykuta. Nishutaqa llakichiwallankutaq Davidpa, Marcpa Diosmanta karunchakapusqanku. Wiñaspanku wasimanta ripuspankun pisi-pisimanta Diospa llaqtanmanta karunchakapurqanku. Suyashaykuraqmi hayk’aqllapas kutimpunankuta (Luc. 15:17-24).

Jehová Diosqa yanapawarqankupunin tukuy ima ruwasqaykupipas, yacharqaykutaqmi sasachakuypi kaspa paypi confiayta. Anchatan kallpachawanku Isaías 41:13 textoq nisqanpas, chaypin nin: “Ñoqaqa Diosniyki Señor Diosmi kani, paña makiykimantan hap’ishayki, ñoqan niyki: Ama manchakuychu, ñoqan yanapasqayki”, nispa. Payqa yanapawashankupunin makiykumantapas pusawashankuman hina, chaywanmi anchata kusikuyku. Cheqaqtapunin niykuman, sasachakuypi kaspan astawan Jehová Diospi confiarqayku.

[16, 17 paginakunapi fotokuna]

Joel mamitanwan

[18 paginapi foto]

Joel tayta-mamanwan

[19 paginapi foto]

Joel huñunakuyman chayamuqkunata napaykushan