¿Uyarikunchischu Dios tapuwaqtinchis?

BIBLIAPIN kan sonqota kuyurichinapaq hina askha tapuykuna. Kikin Jehová Diosmi chhaynata tapun yachachinanpaq. Paymi Cainta tapuspa yachachirqan ama cheqnipakuq kananpaq (Gén. 4:6, 7). Huk kutinmi Jehová Diosqa profeta Isaiasta tapurqan: “¿Pitataq kachasaq? ¿Pitaq ñoqanchismanta willaq rinqa?” nispa, hinaqtinmi payqa nirqan: “Ñoqan kaypi kashani, ñoqata kachaway”, nispa (Isa. 6:8).

Allin Yachachikuq Jesuspas allinta tapuspan runakunata yachachiq. Evangelio qelqakunapin iskay pachak pusaq chunka más tapukuyninkuna kashan. Mayninpiqa contranpi kaqkunata upallachinanpaqmi tapuq, ichaqa astawanqa tapurqan runakunaq sonqonman chayananpaqmi, imaynatachus Diosta servisharqanku chayta reparachinanpaqwan (Mat. 22:41-46; Juan 14:9, 10). Apóstol Pablopas chhaynatan runakunata tapuq sonqonkuta kuyurichinanpaq, paymi qelqarqan Bibliapi 14 cartakunata (Rom. 10:13-15). Roma llaqtapi kaq cristianokunaman qelqasqanpin askha tapuyninkunata tarinchis. Chhaynapin payqa cristianokunata yanaparqan ‘¡Diospa qhapaq-kayninta, yachayninta, yuyaynintapas!’ allinta reqsinankupaq (Rom. 11:33).

Mayninpiqa tapunchis imatapas kutichiwanallanchispaqmi, mayninpin ichaqa tapunchis allinta yuyaymanachinanchispaq. Chhayna yuyaymanachiq tapuykunataqa askhatan tarinchis Evangelio qelqakunapi. Huk kutinmi Jesusqa yachachisqankunata nirqan: “Cuidakuychis, waqaychakuychis fariseokunaq qonchunmanta Herodespa qonchunmantawan”, nispa (Mar. 8:15; Mat. 16:12). Paykunataq mana entienderqankuchu chay runakunaq iskay uya kasqankumanta, llulla yachachikuyninkunamantawan rimashasqanta, chaymi ninakurqanku: “Mana t’antanchis kaqtinmi chaytaqa niwanchis”, nispa. Jesustaq chayta yachaspa tapurqan: “¿Imanaqtintaq ninakushankichis: Manan t’antanchis kanchu, nispa? ¿Manachu reparankichis, manachu entiendenkichispas? ¿Rumiyasqachu sonqoykichis kashan? ¿Ñawiyoq kashaspachu mana rikunkichis, ninriyoq kashaspachu mana uyarinkichis? [...] ¿Manaraqchu entiendenkichis?” nispa. Chhaynatan tapurqan paykunata yuyaymanachispa entiendechinanpaq (Mar. 8:16-21).

“Tapusqaykunata kutichiway”

Job sutiyoq runata anyananpaqmi Jehová Diosqa imaymanata tapurqan, chaywanmi Jobta entiendechirqan runaqa Diospa qayllanpiqa mana imapaschu kasqanta (Job 38-41 capitulokuna). Diosmi tapurqan: “Kay pachata kamashaqtiy, ¿maypitaq kasharqanki?” nispa. Chhaynata tapuspaqa manachus hina suyasharqanchu Jobpa kutichinantaqa, aswanmi sonqonman chayaspa allinta yuyaymanachiyta munarqan. Chaymi Jobqa nirqan: ‘¿Ima niymanñataq ñoqari? Aswanpas ch’inllaña kakusaq’, nispa (Job 38:4; 40:4). Payqa entienderqanmi imaraykus Dios chhaynata tapusqanta, chaymi reqsikurqan pantaq kasqanta. Chhaynapin yacharqan huch’uyyaykukuq kayta, cambiarqantaqmi imayna piensasqantapas.

“Chanin” runaña karqan chaypas, Jobqa mana allinta piensaykuspan pantasqata rimasqa, chaymi Eliuqa anyasqa “mana huchayoqman tukuspa Diosta huchachasqanmanta”  (Job 1:8; 32:2; 33:8-12). Chaymantataq Jehová Diosqa manchay wayra chawpimanta Jobta rimapayarqan: “¿Pin qan kanki allin yuyaykusqaykunamanta iskayrayanaykipaq, yanqa rimaykunata thawtispayki? Kunan atispaqa allin qhari kasqaykita rikuchiway, tapusqaykunata kutichiway”, nispa (Job 38:1-3). Chhaynata Dios tapuqtinmi Jobqa entienderqan Dioslla mana tukukuq yachayniyoqpas atiyniyoqpas kasqanta, chayqa sut’itan rikukun tukuy ima kamasqakunapipas. Hinan Jobqa manaña iskayrayarqanchu Jehová Diospa chanin kasqanmanta. Ancha Hatun Diospa tapusqanta uyariyqa manchakunapaq hinachá karqan Jobpaqqa.

Uyarikusun Jehová Dios tapuwaqtinchis

Allinninchispaqpunin kanman Bibliapi kaq tapuykunapi yuyaymanayqa. Chay tapuykunaqa ancha allinpunin. Arí, “Diospa siminqa kawsaqmi, atiyniyoqmi, [...] sonqopi yuyaykusqakunatapas lliwtapunin sut’inchan” (Heb. 4:12). Chhaynaqa, Bibliapi kaq tapuykunata leeshaspaqa ñoqanchistapas tapuwashasunman hinatan leenanchis (Rom. 15:4). Qatiqninpi yachasunchis wakin tapuykunamanta.

“Kay pachantin Juezqa, ¿manachu ruwawaq chaninkaqta?” (Gén. 18:25.) Chhaynatan Abraham tapurqan Jehová Diosta: “Sodoma Gomorra llaqtakunatan ch’usaqyachisaq”, niqtin. Paypaqqa Diosqa manapunin chaninkunata mana chaninkunatawan kuskataqa wañuchinmanchu. Chaywanmi yachanchis Diospi anchata confiasqanta.

Ñoqanchispas Abraham hinan tukuy sonqonchiswan Jehová Diospi confiananchis, manataqmi llakikushananchischu: “¿Pikunapunin kawsarinqaku? ¿Armagedonpiri pikunapunitaq wañunqaku?” nispaqa. Abraham hinan yachanchis Diosqa sumaq sonqo, chanin, khuyapayakuq kasqanta, chaymi mana imamantapas manchakunanchischu iskayrayananchischu, nitaq tiemponchistapas usuchinanchischu chaykunamanta llakikuspa.

“¿Mayqenniykichistaq atinman llakikushaspa, sayayninman huk chhikallantawanpas yapaykukuyta?” (Mat. 6:27.) Chhaynatan Jesús tapurqan askha runakunata, chaypin yachachisqankunapas kasharqan. Chhaynata tapuspan paykunata kallpacharqan Taytanku Jehová Diospi confianankupaq. Kay tiempopi kawsay sasaña kaqtinpas, manan sinchitaqa imamantapas llakikunanchischu. Maytaña llakikusunman chaypas, manan  chaywanchu astawanqa kawsasun nitaq aswan allintachu kawsasunpas.

Chhaynaqa, familianchiskunamanta otaq imamantapas sinchita llakikushanchis chayqa, yuyarinanchismi Jesuspa nisqanta. Chhaynapin mana llakikuywan atipachikusunchu, manataqmi pisipasunpaschu. Cristoq nisqan hina, hanaq pacha Yayanchisqa urpikunatapas mikhuchinmi, plantakunatapas p’achachinmi, ¿chaychu mana ñoqanchista cuidawasunman? (Mat. 6:26-34.)

“Ninata oqllaykukuqqa, ¿manachu p’achanta ruphachikunman?” (Pro. 6:27.) Chhaynatan huk tayta churinta yachachirqan wasanchay huchamanta karunchakunanpaq. Chay taytaq yachachikuyninkunatan tarinchis Proverbios qelqapi isqon ñawpaq capitulokunapi (Pro. 6:29). Sichus hayk’aqllapas qhelli hucha ruwayta munapayashasunman otaq mana casarakuyta munashaspa piqpa sonqontapas suwayta munashasunman otaq ima tentacionpas kawasunman chayqa, yuyarinanchismi chay taytaq tapukusqanta. Chayqa kay hinatan nillanmantaq: “Imatachus runaqa tarpunqa chayllatataqmi cosechanqapas”, nispa (Gál. 6:7).

“¿Pitaq qanqa kanki hukpa kamachinta huchachanaykipaqri?” (Rom. 14:4.) Chhaynatan apóstol Pablo nirqan Roma llaqtapi kaq cristianokunaman. Chay tiempopi wakin cristianokunaqa mana allinpaqmi qhawariqku wak llaqtayoq cristianokunaq imayna kawsasqanta, contrankupitaq rimaqkupas. Chaymi apóstol Pabloqa paykunata yuyarichirqan munakuywan chaskinakunankupaq, Jehová Dioslla Juez kasqanta yuyarispa.

Kay tiempopipas askha iñiqmasinchiskunan wak llaqtayoq kaspa huk costumbrekunayoq kanku. Jehová Diosqa chaskinmi paykunatapas, chaymi kallpachakunanchis paykunawan sumaqta kawsananchispaq, manataq huchachashananchischu concienciankuman hina imatapas ruwaqtinkuqa, aswanmi yuyarinanchis Pabloq nisqanta.

Bibliapi tapuykunan yanapawasun Diosta reqsinanchispaq

Kaypi rikusqanchis hina, Bibliapi tapuykunaqa yanapawanchismi imayna kasqanchista purisqanchista qhawarikunanchispaq. Chaypaqmi ñawpaqta yachananchis pin tapusqanta, piman tapusqanta, imapaq tapusqantawan. Chaykunatan yachananchis Bibliapi ima tapuytapas tarispaqa (qhawariy 14 paginapi recuadrota).

Chhaynaqa, kallpachakusun Bibliapi kaq tapuykunapi yuyaymanananchispaq, chhaynapin Jehová Diospa munasqanman hina yuyaykusunpas ruwasunpas. Diospa tapukusqanta uyarispanmi Jobqa nirqan: “Kunankaman uyarispallaraq reqsirqayki, kunanmi ichaqa ñawiykunawanpuni rikuyki”, nispa (Job 42:5). Chaytaqa nirqan aswan allinta Diosta reqsisqanraykun, arí, rikushanmanpas hinan Diostaqa reqsirqorqan. Santiagopas nirqanmi: “Diosman asuykuychis, hinan payqa asuykamusunkichis”, nispa (Sant. 4:8). Sichus Diospa Simin Qelqawan yanapachikusun chayqa, rikushasunmanpas hinan Diosta reqsisunchis.

[14 paginapi recuadro]

Kay tapuykunan yanapawasunman Jehová Diospa munasqanman hina imatapas ruwananchispaq

▪ “¿Imantintaq Señor Diosta yupaychaqri asuykusaq?” (Miq. 6:6.)

▪ “Ñawita ruwaq Diosqa, ¿manachu rikunqa?” (Sal. 94:9.)

▪ “¿Rikurqankichu yachaysapaman tukuq runata?” (Pro. 26:12.)

▪ “¿Allinchu qanpaq kay phiñakusqayki?” (Jon. 4:4.)

▪ “Huk runachus kay pachantinpi lliw kaqkunata paylla hap’ikapunman kawsaynintataq chinkachikapunman chayqa, ¿ima allintaq paypaq kanqa?” (Mat. 16:26.)

▪ “¿Pitaq Cristoq munakuyninmantaqa t’aqawasunman?” (Rom. 8:35.)

▪ “¿Imatataq Diosmantaqa mana chaskirqankichu?” (1 Cor. 4:7.)

▪ “¿Manachu yachankichis kay pacha kaqkunaman k’askakuqqa Diospa awqan kasqanta?” (Sant. 4:4.)

[15 paginapi dibujo]

¿Imatan Job yacharqan Jehová Diospa tapusqanmanta?