Wayna-sipas, tukuy sonqowan Jehová Diosta serviy

“Wayna-sipasllaraq kashaspa Kamaqniykimanta yuyarikuy.” (ECL. 12:1.)

1. ¿Ima invitaciontan chaskirqanku Israelpi wawakuna?

YAQA 3.500 watañan karun Diospa profetan Moisés Israelpi sacerdotekunaman umalliqkunamanpas kay kamachikuy qosqanmanta, nirqanmi: “Llapan qharikunata, warmikunata, wawakunata, [...] huñunkichis, kamachikuy simi leesqata uyarinankupaq. Ahinapin Diosniykichis Señor Dios manchakuyta yachanqaku, tukuy kay kamachikuy simikunatapas makilla hunt’anqaku”, nispa (Deu. 31:12). Chay texton willawanchis mana kuraqkunallachu Diosta yupaychanankuta. Wawakunapas wayna-sipaskunapas Jehová Diostaqa uyarinankun, yachachisqanman hinataq kawsananku.

2. ¿Imaynatan Jehová Dios rikuchirqan qallariy siglopi kawsaq wayna-sipaskunapi interesakusqanta?

² Qallariy siglopipas Jehová Diosqa rikuchishallarqanmi llaqtanpi kaq wayna-sipaskunapi interesakusqanta. Chaymi apóstol Pabloman yuyaycharqan congregacionkunaman qelqasqan wakin cartakunapi paykunaq kamachikuykunata qelqananpaq (leeychis Efesios 6:1; Colosenses 3:20). Chay yuyaychaykunata uyarikuqkunaqa hanaq pachapi Yayankutan tukuy sonqomanta munakurqanku, bendicionnintapas chaskirqanku.

3. ¿Imaynatan askha wayna-sipaskuna rikuchinku Dios serviy munasqankuta?

³ Kunanri, ¿Dios invitashanchu wayna-sipaskunata llaqtanwan kuska yupaychanankupaq? Arí. Kusikunapaqmi askha wayna-sipaskunata huñunakuykunapi rikuyqa. Kasukushankun apóstol Pabloq kay nisqanta: “Hukkuna hukkunawan kallpachanakusunchis aswanta munanakunanchispaq, allin ruwaykunatapas ruwananchispaq. Ama huñunakuyninchista saqesunchu, imaynan wakinkuna saqenku hinataqa, aswanpas astawanraq kallpachanakusun, Señorpa kutimunan p’unchay qayllaykamushasqanta yachashaspanchisqa” (Heb. 10:24, 25). Chaymantapas, wakinqa ñan Reinomanta allin willakuykunata predicashankuña tayta mamankuwan kuska (Mat. 24:14). Sapa watanmi pachantinpi askha wayna-sipaskuna Jehová Dios munakusqankuta rikuchinku bautizakuspa, paytan servinku Cristoq qatikuqninkuna hina, chhaynapitaq chaskinku askha bendicionkunata (Mat. 16:24; Mar. 10:29).

Chaskikullayña invitacionta

4. ¿Hayk’a watayoqmi kanayki Diosta servinaykipaq?

⁴ ¿Hayk’a watayoqmi kanayki Diosta servinaykipaq? Manan Biblia willanchu, ichaqa ninmi: “Wayna-sipasllaraq kashaspa Kamaqniykimanta yuyarikuy”, nispa (Ecl. 12:1). Chayqa ama yuyaykuychu: “Wawaraqmi kani Diosta servinaypaqqa”, nispa. Hayk’a wataykipiña kashanki chaypas invitaykikun kunanmantapacha Diosta servinaykipaq.

5. ¿Imatan askha tayta-mamakuna ruwarqanku wawankuta espiritualpi yanapanankupaq?

 ⁵ Askha wayna-sipaskunan espiritualpi yanapayta chaskirqanku tayta-mamankumanta, wakintaq huknillanmanta, chaymi rikch’akunku Timoteoman. Paytaqa maman Eunice, abuelan Loida paykunallan wawa kasqanmantapacha yachachirqanku Diospa siminmanta (2 Tim. 3:14, 15). Chhaynatachá qantapas tayta-mamayki yanapashasunki: Bibliata estudiaspa, kuska Diosmanta mañakuspa, huñunakuykunaman, hatun huñunakuykunamanpas apasuspayki, kuska predicaspa ima. Chhaynapin hunt’ashanku Jehová Diosmanta kamachikuy chaskisqankuta. Diospa munayninta ruwanaykipaq yachachinasuykikuta. ¿Reparankichu tayta-mamayki munakusqasuykita, qanpi interesakusqankutapas? (Pro. 23:22.)

6. a) Salmo 110:3 textoq nisqan hina, ¿imayna serviymi Diosta kusichin? b) ¿Imamantan qatimuq parrafokunapi yachasun?

⁶ Ichaqa, wiñasqaykiman hinan Jehová Dios munan Timoteo hina qan kikiykimanta Diospa ‘munaynin allin, sumaq, hunt’asqapuni’ kasqanta yachanaykita (Rom. 12:2). Chaymi Diospaq llank’ayniykita ruwanki tukuy sonqomanta, manataq tayta-mamaykiq qhawarinallanpaqchu. Sichus qanllamanta Diosta servinki chayqa sonqontan kusichinki (Sal. 110:3, NM). Ichaqa munankipunichá Diospa kamachikuyninkuna kasukuyta. ¿Imaynatan chay munasqaykita wiñachiwaq? Sapallayki Bibliata estudiaspa, Diosmanta mañakuspa, paypa allin qhawarinanpaq hina kawsaspa ima. Sapanka yanapaymanta yachasun.

Jehová Diosta reqsiy amigontaq kay

7. a) ¿Imaynapin yachanchis Jesús Bibliata allin estudiaq kasqanta? b) ¿Pikunan yanaparqanku?

⁷ Jehová Diosta serviy munayniykiqa sapa p’unchay Bibliata leeqtiykin yapakunqa, chaymi espiritualpi mana yarqasqachu kanki, yachankitaq ancha valorniyoq yachachikuykunata (Mat. 5:3). Chhaynapin Jesusta qatikunki. Paytaqa 12 watanpi kashaqtinmi, tayta maman tarisqaku ‘Kamachikuy Simita yachachiqkuna chawpipi tiyashaqta, [...] paykunatan uyarisharqan tapushasqan ima’ (Luc. 2:44-46). Kay texton willawanchis Jesusqa wawaña kaspapas Bibliamanta yachaytapuni munasqanta, allin entiendesqantapas. ¿Iman yanaparqan? Maman María, adoptivo papan Josewanmi wawa kasqanmantapacha Diosmanta yachachirqanku (Mat. 1:18-20; Luc. 2:41, 51).

8. a) ¿Hayk’aqmi tayta-mamakuna wawankuman Bibliamanta yachachinanku? b) Chay ruway ancha allin kasqanmanta huk experienciata willay.

⁸ Kunanpas, Diospaq sonqo tayta-mamakunaqa nacesqanmantapachan wawankuman Bibliamanta yachachinku (Deu. 6:6-9). Chaytan ruwarqan Rubi sutiyoq cristiana phiwi wawan Josephwan. Wawacha kasqanmantapachan sapa p’unchay Bibliamanta willakuq librota leepurqan. Wiñasqanman hinataq umallanmanta textokunata yachananpaq yanaparqan. Chay ruwasqan, ¿yanaparqanchu Josephta? Arí, rimay yachay qallarisqanmanta pisi tiempollamanmi atirqanña umallanmanta Bibliapi askha willakuykuna willayta. Phisqa watanpitaq Bibliamanta Allin Yachachiq Kanapaq Escuelapi discurso qoyta qallarirqan.

9. ¿Imaraykun ancha allinpuni Bibliata leey, chaypi yuyaymanaypas?

⁹ Espiritualpi wiñanaykipaqqa sapa p’unchaymi Bibliata leeynayki, manataq hayk’aqpas saqenaykichu (Sal. 71:17). ¿Imaynatan yanapasunki espiritualpi ñawparinaykipaq? Aswan allintan Jehová Diosta reqsinki, Jesús mañakuyninpi Taytanta nisqan hina, nirqanmi: “Chay wiñay kawsayqa kaymi: Qan sapallayki cheqaq Dios kasqaykita, kachamusqayki Jesucristotawan reqsinankupaq”, nispa (Juan 17:3). Astawan  Diosta reqsinki chayqa, aswan cheqaqmi qanpaq kanqa, astawantaq munakunki (Heb. 11:27). Chaymi sapa kuti Bibliata leespa Diosta astawan reqsinayki. Tapukuwaqmi: “¿Imatan kay texto yachachiwan Dios imayna kasqanmanta? ¿Imaynapin yachani Dios munakuwasqanta, ñoqapi interesakusqantapas?” nispa. Chay tapuykunapi yuyaymananki chayqa, entiendenkin Dios imayna sientekusqanta, ima yuyaykusqanta ima ruwanaykita munasqantapas (leey Proverbios 2:1-5). Timoteo hinan ‘iñisqaykipi qaqata sayanki’, ahinapin mana iskayankichu Bibliapi yachasqaykimanta, Jehová Diostataq tukuy sonqoykimanta serviyta munanki (2 Tim. 3:14).

Mañakuymi Dios munakuyniykita yapanqa

10, 11. ¿Imaynatan mañakuy Dios serviy munasqaykita yapanqa?

¹⁰ Mañakuymi yanapallasunkitaq Jehová Dios serviy munasqaykita yapanaykipaq. Salmo 65:2 nin: “Qanqa mañakusqatan uyarinki, llapa runan hamusunkiku”, nispa. Israel Diospa llaqtanña kapuqtimi, huk llaqtamanta runakunapas Jerusalenpi temploman riyta atirqanku Jehová Diosta valekunankupaq (1 Rey. 8:41, 42). Diosqa prometenmi lliw pay kasukuqkunata uyarinanpaq (Pro. 15:8). Ama qonqaychu, “llapa runan” nisqa simiqa qanmantawanmi rimashan.

¹¹ Yachasqanchis hina, allin amigokunaqa rimashallankun. May allinmi amigonchiswan kusikuyninchismanta, llakikuyninchismanta, imapas yuyaykusqanchismanta rimayqa. Chay hinatan Jehová Diospas paywan rimanaykita munan (Fili. 4:6, 7). Imayna sientekusqaykimanta rimay Dioswan, imaynan taytaykiwanpas, mamaykiwanpas, amigoykiwanpas rimawaq hinata. Ichaqa imayna mañakusqaykin rikuchinqa Jehová Diospaq imayna sientekusqaykita. Dioswan amigontin kaspaqa astawanmi rimayta munanki.

12. a) ¿Imataq sonqomanta mañakuy? b) ¿Imaynapin yachanki Dios sispallaykipi kasqanta?

¹² Ichaqa yuyariy manan mañakuyllachu mañakuna. Aswanpas Diosman willay imayna sientekusqaykita, pay munakusqaykita, tukuy sonqomanta respetasqaykita, paypi confiasqaykita ima. Mañakusqaykita imayna kutichisqanta rikuspan yachanki ‘Señor Diosqa llapa waqyakuqninkunaq sispallanpi kasqanta’ (Sal. 145:18). Arí, Diosqa sispallaykipin kashan yanapasunkin Saqraq trampankunata atipanaykipaq, imatapas allin yuyaywan ruwanaykipaq (leey Santiago 4:7, 8).

13. a) ¿Imaynatan huk sipasta kallpacharqan Dioswan amigontin kasqan? b) ¿Imaynatan Dioswan amigontin kasqayki yanapasunki compañeroykikunaq mat’ipayasqanta atipanaykipaq?

¹³ Yachasunchis Cherie sipasta Jehová Dioswan amigontin kasqan kallpachasqanmanta. Payqa askha premiokunatan chaskirqan allin estudiante kasqanmanta, deporte nisqapipas allin pukllaq kasqanmanta,  chayraykun universidadpi estudiananpaq becata munachisqaku. Cherie yuyarin: “Compañeroykuna, pukllanaypaq yachachiwaqniy profesorkunapas chaskinaypaqmi mat’ipayawarqanku”, nispa. Ichaqa repararqanmi chayta chaskispaqa estudiananpaq, pukllaykunapaq preparakunapaqpas yaqa llapa tiemponta qonanta Diospaqtaq pisillaña kananta. ¿Imatan ruwarqan? Paymi nin: “Jehová Diosmanta mañakusqay qhepamanmi mana chay becata chaskirqanichu, hinaspa precursora regular kapurqani”, nispa. Phisqa wata qhepamantaq nirqan: “Manan pesapakunichu, decidisqayqa Jehová Diostan kusichirqan chaymi ñoqapas kusikuni. Diospa Reinonta ñawpaqman churanki chayqa, ima necesitasqaykipas kallanqan”, nispa (Mat. 6:33).

Diospaq hina kawsasqaykin rikuchin “ch’uya sonqo kasqaykita”

14. ¿Imatan Diosman rikuchinki ch’uya kawsasqaykiwan?

¹⁴ Chaymantapas Jehová Dios serviy munasqaykitaqa rikuchillankitaqmi allinta comportakuspa. Diosqa bendecinmi ch’uya sonqowan serviq wayna-sipaskunataqa (leey Salmo 24:3-5). Samuelmanta yachasun, payqa manan Elí sacerdoteq millay wawankuna hinachu karqan. Elipa wawankuna qhelli hucha ruwayman qokushanankukaman, “Samuel waynaqa Señor Diospa qayllanpi wiñasharqan, runakunaqpas allinpaq hap’isqan” (1 Sam. 2:26). Rikusqanchis hina, ch’uya kawsasqanqa manan qonqasqachu karqan.

15. ¿Iman kallpachasunki ch’uyata kawsanaykipaq?

¹⁵ Pabloq willasqan hinan kay p’unchaypi runakunaqa kanku: “Kikillanpaq munaqkuna, hatunchakuqkuna, tayta-mamankuta mana kasuqkuna, mana reqsikuqkuna, millay yana alma runakuna, paypayman tukuqkuna, Dios munakunankutaqa aycha kusichiyllapi puriyta munaqkuna” (2 Tim. 3:1-5). Wayna-sipas, sasan chhayna tiempopi ch’uya kawsayqa. Ichaqa sapa kuti huk tentacionta atipaspaqa, Jehová Dioslla Kamachiqniyki kasqantan rikuchishanki (Job 2:3, 4). Chaymantapas, kusikunkin kay sumaq invitación chaskisqaykimanta: “Churilláy, yachayniyoq kay, hinaspa sonqoyta kusirichiway, chaymi k’amiwaqniyman kutichisaq” (Pro. 27:11). Manan chayllachu. Jehová Diospas allintan qhawarisunki, hinaspa astawan kallpachakunki servishanallaykipaq.

16. ¿Imaynatan huk sipas cristiana Jehová Diospa sonqonta kusichirqan?

¹⁶ Sipas kashaspan Carol kasukurqanpuni conciencianpa nisqanta, respetarqantaq Bibliapi kamachikuykunata. Estudiaq masinkunaqa repararqankun chayta, wakinña burlakurqanku colegiopi patriotismo ceremoniakunapi, huk costumbrekunapipas mana participasqanrayku chaypas. Willaqmi imarayku mana chaykuna ruwasqanta. Unay watakuna qhepamanmi huk compañeran cartata qelqamusqa, chaypin nimusqa: “Unayñan munarqani qanwan rimayta, agradecekunaypaq. Ñoqaqa manan qonqanichu imayna kasqaykita, fiestakunamanta imayna yuyaykusqaykita valorwan defiendesqaykitapas. Qanmi karqanki ñawpaq testigo reqsisqay”, nispa. Carolpa ruwasqanmantan  admirakusqa, chaymi Biblia estudiayta qallarisqa. Bautizakusqanmantaqa tawa chunka wata qhepamanñan chay cartata qelqasqa. Sichus Carol hina valorwan iñiyniykita defiendenki chayqa, yaqapaschá Diospaq sonqo runakuna Biblia estudiayta qallarinqaku.

Jehová Diosta hatunchaq wayna-sipaskuna

17, 18. a) ¿Imanisunmanmi congregacionpi wayna-sipaskunamanta? b) ¿Ima suyakuymi kan Diosta serviq wayna-sipaskunapaq?

¹⁷ Kusikunapaqmi waranqanpi wayna-sipaskuna Diosta servishanku tukuy sonqomanta. ¿Iman yanapan chayta ruwashanallankupaq? Bibliata sapa p’unchay leey, Diosmanta mañakuy, Jehová Diospa qhawarinanpaq hina kawsay. Chay wayna-sipaskunaqa kusichinkun tayta-mamankuta iñiqmasinkutapas (Pro. 23:24, 25).

¹⁸ Hunt’aq sonqo wayna-sipaskunaqa, ancha askha runakunawan kuskan haykunqaku Diospa prometesqan mosoq pachaman (Rev. 7:9, 14). Chaypin askha bendicionkunata chaskinqaku, Jehová Diostan sapa p’unchay astawan reqsinqaku, wiñaypaqtaq hatunchanqaku (Sal. 148:12, 13).

¿Kutichiwaqchu?

• Diospa llaqtanpi, ¿ima ruwaypin wayna sipaskuna yanapakunkuman?

• ¿Imaraykun ancha allinpuni Bibliata leespa chaypi yuyaymanay?

• ¿Imaynatan mañakuy yanapawanchis Diospa qayllanpi kanapaq?

• ¿Imaraykun allinpuni wayna-sipaskunaq ch’uya kawsayninku?

[Tapuykuna]

[5 paginapi foto]

¿Sapa p’unchaychu Bibliata leenki?