Ama llakichisunchu Diospa santo espiritunta

“Amataq Diospa Santo Espiritunta llakichiychischu, Santo Espirituwanmi qankunaqa sellosqa kashankichis.” (EFE. 4:30.)

1. ¿Imatan millonninpi runakuna ruwashanchis? ¿Imaynatan kawsananchis?

KAY sasachakuy tiempopiqa millonninpi runakunan Jesuspa yanapayninwan Jehová Diosman asuykushanchis (Juan 6:44). Chaypaqqa Diosmanmi qokurqanchis, sapa p’unchaytaq chayman hina kawsananchis. Chaymi santo espirituwan pusachikushanallanchis sutinpi bautizakusqanchisrayku (Mat. 28:19).

2. ¿Ima tapuykunatan kutichisunchis?

² ‘Santo espirituq munasqanta tarpuqkunaqa’ llapanchismi kasukushanchis “mosoq runawan p’achallikuychis”, nisqa yuyaychayta (Gál. 6:8; Efe. 4:17-24). Ichaqa kasukunallanchistaqmi apóstol Pabloq huk yuyaychayninkunata, santo espirituta ama llakichiychischu nisqantapas (leey Efesios 4:25-32). Astawan t’aqwirisun apostolpa nisqanta. ¿Imatan nisharqan ama “Diospa Santo  Espiritunta llakichiychischu” nisqanwan? ¿Imaynatan huk cristiano llakichinman santo espirituta? ¿Imatan ruwasunman ama llakichinapaq?

¿Imatan Pablo nisharqan?

3. ¿Ima ninantan nishan Efesios 4:30 texto?

³ Ñawpaqta qhawarisun Efesios 4:30 textoq nisqanta, chaypin nin: “Amataq Diospa Santo Espiritunta llakichiychischu, Santo Espirituwanmi qankunaqa sellosqa kashankichis qespichisqa kanaykichis p’unchaypaq”, nispa. Pablon munasqa wawqe-panankunaman chhaynata yuyaycharqan Dioswan allinpi kayninkuta cuidanankupaq. Paykunatan yuyarichirqan: “[Espirituwanmi] qankunaqa sellosqa kashankichis qespichisqa kanaykichis p’unchaypaq”, nispa. Chay espiritun paykunapaqqa sello hina karqan, kunanpas chhaynallataqmi kashan. Chay selloqa hanaq pachapaq akllasqa cristianokunapaqmi “señal” hina qhepa tiempoman imachus paykunapaq ‘kananta rikuchinanpaq’ (2 Cor. 1:22). Chay sellon rikuchin Diospaqña kasqankuta, hanaq pachapi wiñay kawsay chaskinankutapas. Chay sellasqakunaqa 144.000 runakunan kanku (Apo. 7:2-4).

4. ¿Imaraykun kallpachakunanchis Diospa espiritunta ama llakichinanchispaq?

⁴ Huk cristianochus santo espirituta llakichinman chayqa, manañan chaskinmanchu yanapayninta. Chaytan rikuchin Davidpa qelqasqan, paymi Betsabewan huchallikusqan qhepaman pesapakuspa khaynata Diosta rogakurqan: “Ama qayllaykimanta wikch’uwaychu, ama Santo Espirituykita qechukapuwaychu”, nispa (Sal. 51:11). Akllasqa cristianokunaqa wañunankukaman ‘hunt’aq’ kananku, “mana hayk’aq tukukuq” kawsayta hanaq pachapi chaskinankupaq (Apo. 2:10; 1 Cor. 15:53). Kay pachapi tiyanankupaq suyakuyniyoq cristianokunapas wiñay kawsayta chaskinankupaqqa iñinankun Cristoq sacrificionpi, Diospaqpas hunt’aq kananku. Chaypaqpas necesitankun santo espirituq yanapayninta (Juan 3:36; Rom. 5:8; 6:23). Chhaynaqa llapanchismi kallpachakunanchis espirituta ama llakichinanchispaq.

¿Imaynatan santo espirituta llakichisunman?

5, 6. ¿Imaynatan llakichisunman Diospa espiritunta?

⁵ ¿Imatan ruwasunman santo espirituta ama llakichinapaq? ‘Santo espirituq munasqanman hinan kawsananchis’, chhaynapin mana atipachikusunchu aychanchispa munasqanwan (Gál. 5:16, 25, 26). Ichaqa, Bibliaq nisqanta mana kasukuspa chhikallantapas waqllipusunman chayqa, llakichisunmanmi santo espirituta.

⁶ Sapa kutilla santo espirituq pusawasqanchista mana kasukusunmanchu chayqa, llakichisunmanmi; hinallataq chay espíritu qoq Diostapas. ¿Imatan ruwasunman espirituwan pusachikushanallapaq? Chaypaq Efesios 4:25-32 textota t’aqwisun.

¿Imakunatan ruwananchis espirituta ama llakichinapaq?

7, 8. ¿Imaraykun cheqaqkaqllata rimananchis?

⁷ Cheqaqkaqllatapuni rimasun. Efesios 4:25 textopin Pablo nirqan: “Amaña llullakuychisñachu, aswanpas sapankaykichis runamasiykichiswan cheqaqkaqta rimaychis, huk cuerpoq miembronkunalla kasqanchisrayku”, nispa. ‘Huk cuerpoq miembronkuna’ hinataq hukllachasqa kashanchis chayqa, manan hayk’aqpas iñiqmasinchiskunataqa mana kaqta rimaspa pantasqata yuyaykachinanchischu, chay ruwayqa llullakuymi kanman. Pipas chay ruwayta mana saqenmanchu chayqa, manañan Diospa amigonchu kapunman (leey Proverbios 3:32).

⁸ Mana allinkaqta ruwaypas, rimaypas t’aqanachiwanchismi. Chaymi Daniel hina kananchis, payqa chanin ruwaqmi karqan, manan imallapipas pantasqanta tarirqankuchu (Dan. 6:4). Pabloq nisqan hina, akllasqa cristianokunaqa ‘Cristoq cuerpon’ kasqankuraykun llapanku huk cuerpoq miembronkuna  kanku, chayraykun Jesuspa wawqenkunaqa hukllachasqa kananku (Efe. 4:11, 12). Kay pachapi wiñay kawsayta suyakuq cristianokunapas Diospa llaqtan huk nisqalla kananpaqqa cheqaqkaqtapunin rimananku.

9. ¿Imaraykun kasukunanchis Efesios 4:26, 27 textoq nisqanta?

⁹ Saqraq contranpi qaqata sayasun Diosmanta ama karunchawananchispaq (Sant. 4:7). Santo espiritun yanapawasun Saqraq contranpi qaqata sayananchispaq. Huk ruwaymi kanman nishu phiñakuywan mana atipachikuy. Pablon nirqan: “Phiñakunkichischus chayqa, ama huchallikuychischu, ama p’unchay ch’isiyaqqa phiñasqa kaychischu, amapuni imaynallamantapas saqraq huchallichinasuykichistaqa munaychischu”, nispa (Efe. 4:26, 27). Phiñakunapaq hinaña kanman chaypas, chay raton sonqollapi Diosmanta mañakuna. Chhaynapin sonqonchis tiyaykunqa, manataq ima ruwasqanchiswanpas santo espirituta llakichisunchu (Pro. 17:27). Phiñasqalla kasunman chayqa, Satanasmi huchallichiwasunman (Sal. 37:8, 9). Chaymantapas Saqraq contranpi qaqata sayanapaqqa Jesuspa nisqanta kasukuspan usqhaylla allipunakapunanchis (Mat. 5:23, 24; 18:15-17).

10, 11. ¿Imaraykun mana suwakunanchischu?

¹⁰ Ama suwakuqqa kasunchu. Pablon nirqan: “Suwakuqqa amaña suwakuchunñachu, aswanpas llank’achun, allinkunata makinwan ruwaspa, pisichikuqkunaman imallatapas qoykunanpaq”, nispa (Efe. 4:28). Suwakuspaqa Diospa ‘sutintan sarunchasunman’ (Pro. 30:7-9). Wakcha kaspapas manan suwakunachu. Diostapas runamasinkutapas munakuqkunaqa allintan chayta entiendenku (Mar. 12:28-31).

¹¹ Pabloqa ama suwakuychischu niwasqanchis qhepamanmi, niwallanchistaq ima ruwananchista. Santo espirituq munasqanman hina kawsaspaqa, tukuy atisqanchistan llank’asun familianchista uywananchispaq, atikuqtinqa ‘pisichikuqkunamanpas imallatapas qoykusunmanmi’ (1 Tim. 5:8). Manan Judas hinachu kananchis, payqa wakchakunata yanapanankupaq Jesuspa, apostolkunaq qolqe huñusqankutan suwakurqan (Juan 12:4-6). Chay millay runaqa manan santo espirituwan pusachikurqanchu. Espirituwan pusachikuqkunan ichaqa apóstol Pablo hina ‘tukuy imaymanapi allintapuni purinchis’ (Heb. 13:18). Chhaynapin mana llakichinchischu Diospa espiritunta.

¿Imakunatawanmi ruwasunman?

12, 13. a) Efesios 4:29 textoq nisqanman hina, ¿imayna rimaytan mana rimananchischu? b) ¿Imaynan rimakuyninchis kanan?

¹² Allinta yuyaykuspa rimasun. Pablon nirqan: “Ama millay qhelli simikunata  rimaychischu, aswanpas allin kaqkunallatapuni rimaychis uyariqkunaq wiñanankupaq necesitasqanman hina, chaymi paykunapaq saminchay kanqa”, nispa (Efe. 4:29). Chaypipas Pabloqa niwallanchistaqmi ima ruwananchista. Espirituq kallpachasqanmi rimananchis uyariwaqninchiskunaq allinninpi yuyaykuspa. Manataqmi hayk’aqpas ‘millay qhelli simikunataqa rimananchischu’. Griego rimaymanta t’ikrasqa “qhelli” nisqataqa ismusqa frutata, asnarishaq aychata, challwatawan ninankupaqmi rimaqku. Imaynan ismusqa otaq qhelli mikhuyta millakunchis, chhaynatan cheqnikunanchis Jehová Diospa qhawarisqan mana allin rimaykunatapas.

¹³ Rimakuyninchisqa sumaqpunin kanan, “kachiwan kachichasqa hina” (Col. 3:8-10; 4:6). “Allin kaqkunallatapuni” rimasun chayqa, uyariwaqninchis runakunan reparanqaku misk’i simi kasqanchista, chhaynapin paykunata yanapasun. Salmo takita qelqaq hinan kananchis, paymi khaynata takirqan: “Señor Diosníy, hatun Qaqaymi, qespichiqniymi kanki, simi rimarisqaykunapas yuyaykusqaykunapas sonqoykipaq hinapuni kachun”, nispa (Sal. 19:14).

14. Efesios 4:30, 31 textoq nisqanman hina, ¿imakunatan mana ruwananchischu?

¹⁴ Ñoqanchismanta chinkachisun haya sonqo-kayta, k’arak phiñakuyta, tukuy mana allin ruwaykunatapas. Diospa espiritunta ama llakichinankupaq yuyaychasqan qhepamanmi, iñiqmasinkunata Pablo nirqan: “Tukuy haya sonqo-kay, phiñapayay, k’arak phiñakuy, qaparkachay, tumpay, tukuy mana allin ruwaykunapas qankunamanta chinkachun”, nispa (Efe. 4:30, 31). Huchayoq runa kasqanchisraykun allinta qhawarikunanchis yuyaykusqanchista ruwasqanchistapas. ‘Haya sonqochus, k’arak phiñakuqchus kasunman chayqa, santo espiritutan llakichisunman. Phiñachiwaqninchiskunata mana pampachaspa phiñasqalla kasunman otaq mana allipunakapuyta munasunmanchu chaypas, llakichisunmanmi. Sapa kutilla Bibliaq yuyaychasqanta mana kasukusunmanchu chayqa, sonqonchismi rumiyapunman, chhaynapitaq santo espíritu contra huchallikusunman, chayqa manapunin allinninchispaqchu kanman.

15. ¿Imatan ruwananchis pipas phiñachiwaqtinchis?

¹⁵ Sumaq sonqo, khuyapayakuq, pampachakuqtaq kasun. Pablon yuyaycharqan: “Sumaq sonqo kaychis, khuyapayanakuq, pampachaykunakuq, imaynan Diospas Cristopi qankunata pampacharqasunkichis ahinata”, nispa (Efe. 4:32). Sonqonchistaña k’iriwasunman chaypas, pampachananchismi imaynan Diospas pampachan hinata (Luc. 11:4). ¿Imatan ruwawaq pipas qanmanta mana allinta rimaqtin? Yaqapaschá paywan rimawaq allipunakapunaykichispaq, “pampachaykuway” nisunkiman chayri, ¿pampachanallaykichu? Manan. Levítico 19:18 textoq nisqantawanmi ruwanayki, chaypin nin: “Aman vengakunkichu, amallataq llaqta-masiykikunapaqpas phiñakushallankichu, aswanpas qan kikiykita hinan runa-masiykitaqa  munakunki. Ñoqaqa Señor Diosmi kani”, nispa.

Kallpachakushallasun allinkaqta ruwanapaq

16. ¿Imatan ruwasunman Diospa espiritunta ama llakichinapaq? Ejemplota willay.

¹⁶ Mana allin ruwaykunamanqa urmallasunmantaqmi sapallanchis kashaspa. Millay takikunatapaschá uyarishasunman. Yaqapaschá huk cristiano sapa kutilla chayta ruwashan, ichaqa conciencian reparachin ‘allin yuyayniyoq hunt’aq kamachiq’ apachimusqan qelqakunapi Bibliaq yuyaychasqanta mana kasukushasqanta (Mat. 24:45). Chaymi Diosmanta mañakun, yuyarintaq Efesios 4:30 textoq nisqanta. Santo espirituta mana llakichiyta munaspan, manaña munapunñachu chay millay takikuna uyariyta. Jehová Diosqa allinpaqmi qhawarinqa chay ruwasqanmanta. Llapanchispas chhaynatan ruwananchis Diospa espiritunta ama llakichinanchispaq.

17. Manachus cuidakusunman, mañakusunman chayqa, ¿imamanmi urmasunman?

¹⁷ Manachus cuidakusun, mañakusun chayqa, qhelli kaqkunata ruwaspan Diospa espiritunta llakichisunman. Jehová Diosqa santo espiritunwanmi munayninta ruwan, chayraykun santo espirituta llakichiyqa Jehová Diosta llakichiy hina kanman, chay ruwaytaqa manapunin hayk’aqpas munasunmanchu (Efe. 4:30). Qallariy siglopin religionpi umallikuna Jesusta nirqanku Satanaspa atiyninwan milagrokuna ruwasqanta (leey Marcos 3:22-30). Chay nisqankuwanmi ‘santo espíritu contra mana allinta rimasharqanku’, chayqa mana pampachanapaq huchan karqan. ¡Amapuni hayk’aqpas chaytaqa ruwasunchu!

18. ¿Imaynapin yachasunman santo espíritu contra mana huchallikusqanchista?

¹⁸ Manataq munanchischu mana pampachana huchaman urmayta chayqa, yuyarinanchispunin santo espirituta ama llakichiychischu nispa Pabloq yuyaychasqanta. ¿Huchallikurqanchisña chayri? Sichus huchanchismanta pesapakunchisña, umallikunaq yanapaynintapas maskhanchisña chayqa, ñan Jehová Dios pampachawanchisña, manataq Diospa espiritun contrachu huchallikurqanchis. Chaymantapas Diosmi yanapawasun ama ima ruwasqanchiswanpas espiritunta llakichinanchispaq.

19, 20. a) ¿Imakunatan mana ruwananchischu? b) ¿Imapaqmi kallpachakunanchis?

¹⁹ Diosqa espiritunwanmi kallpachawanchis llaqtanpi munanakuspa kusikuywan huk nisqalla kawsananchispaq (Sal. 133:1-3). Espirituta mana llakichinapaqqa manan umallikunamanta mana allinta rimashanachu, paykunaqa chay espirituq churasqanmi kanku (Hech. 20:28; Jud. 8, NM). Aswanmi kallpachakunanchis llapa iñiqmasinchiskunawan respetanakuspa huk nisqalla kawsanapaq. Manan akllasqanchis iñiqmasikunallawanchu huñukunanchis. Pablon nirqan: “Wawqe-panaykuna, Señorninchis Jesucristoq sutinpin valekuykichis, llapallaykichis ch’ulla yuyaylla kanaykichispaq. Ama qankunapura t’aqanakuychischu, aswanpas huk-nisqalla, huk yuyaynillayoq, huk sonqollayoq kawsaychis”, nispa (1 Cor. 1:10).

²⁰ Jehová Diosmi yanapawasun espiritunta mana llakichinanchispaq. Ñoqanchispas kallpachakunanchismi chaypaqqa. Chaymi Diosmanta mañakushanallanchis kallpanta, ‘santo espirituq munasqanman hinataq tarpushanallanchis’; chhaynapin pusachikushallasun kunanpas wiñaypaqpas.

¿Imanispan kutichiwaq?

• ¿Iman santo espirituta llakichiy?

• ¿Imaynatan llakichisunman Diospa espiritunta?

• ¿Imakunatan mana ruwananchischu santo espirituta mana llakichinapaq?

[Tapuykuna]

[30 paginapi foto]

Phiñachinakuspaqa usqhaylla allipunakapusun

[31 paginapi dibujo]

¿Mayqenkaq fruta hinan rimasqayki kashan?