Leeqkunaq tapukusqan

¿Imaraykun Jehová Dios Aaronta mana wañuchirqanchu qori torillo ruwasqanmanta?

Jehová Diosmi kamachikurqan: “Aman ima idolotapas ruwakunkichu”, nispa. Ichaqa Éxodo 32 capitulopi nisqan hina Aaronmi qori torillota ruwaspa chay kamachikuyta p’akisqa (Éxo. 20:3-5). Chayraykun “Señor Diosqa Aarón contra sinchita phiñakuspa wañuchiyta munarqan” (Deu. 9:19, 20). Moisesmi ichaqa wawqenpaq Diosmanta mañakurqan. Santiago 5:16 textopin nin: “Chanin runaq tukuy sonqowan Diosmanta mañakusqanqa ancha atiyniyoqmi”, nispa. ¿Hunt’akurqanchu Santiagoq nisqan chay kutipi? Arí, Jehová Diosqa manan Aaronta wañuchirqanchu Moisespa rogakusqanrayku. Ichaqa manan chayraykullachu mana wañuchirqan.

Aaronqa Dios sonqo runañan karqan manaraq chay qori torillota ruwashaspa. Jehová Diosmi Moisesta wawqen Aarontawan Faraonman rinankupaq kamachirqan, Egiptomanta Israel llaqtanta horqomunankupaq, chaypiqa Aaronmi rimaysinan karqan (Éxo. 4:10-16). Iskayninkun Diosta kasukuspanku Faraonpa qayllanman yapa-yapamanta haykurqanku, rumi sonqo faraontaq mana allintachu paykunata tratarqan. Chhaynaqa Egipto suyumanta lloqsimuspaqa rikuchirqanñan Aaronqa Dios sonqo kasqanta (Éxo. 4:21).

¿Imaraykun Aarón chay qori torillota ruwarqan? “Moisesmi orqomanta mana usqhaytachu uraykamurqan, chaymi runakunaqa Aaronman muyuykuspa nirqanku: Sayariy, pusawaqniyku dioskunata ruwapuwayku [...], nispa.” Aaronqa sinchita mat’ipayasqankuraykun qori torillota ruwarqan (Éxo. 32:1-6). Aaronpa qhepaman ruwasqanmi rikuchin chay ídolo yupaychasqankuta cheqnikusqanta, chay torillotaqa mana munaspan ruwarqan. Jehová Dios ídolo yupaychaqkunata wañuchinankupaq kamachiqtinmi, llapan Leví runakuna Aaronpas kasukurqanku. Chay p’unchaypiqa kinsa waranqa israelitakunatan wañuchirqanku (Éxo. 32:25-29).

“Paqarisnintaq Moisesqa llaqtata nirqan: Anchatapunin qankunaqa huchallikurqankichis [...], nispa.” (Éxo. 32:30.) Chhaynaqa manan Aaronllachu huchayoq karqan. Jehová Diosqa llaqtatapas Aarontapas khuyapayarqanmi.

Chay sucedesqan qhepamanmi Jehová Dios Moisesta kamachirqan: “Aarontan ch’uya p’achawan p’achachinki, hinaspan payta hawiykunki, chay hinatan ñoqapaq t’aqapuwanki sacerdotey kananpaq”, nispa (Éxo. 40:12, 13). Jehová Diosqa yacharqanmi Aarón Dios sonqo kasqanta, manataq idolokuna yupaychaqchu kasqanta, chaymi payta pampacharqan.