Qaqata iñiyniykipi sayay onqosqa familiaykita cuidashaspayki

SANTUSA sutiyoq cristianaq wasanpi tumorta tarispankun yacharqanku cancer onqoyniyoq kasqanta. * José sutiyoq qosanmi khaynata willakun: “Ñawpaqtaqa tumornintan operarqanku, chaymantataq radioterapia, quimioterapia nisqawan hampirqanku. Chay tratamientokunawanmi nishuta kallpan pisiyarqan, chaymi ñak’ayta kuyurirqan”, nispa.

¡Maytachá Joseqa llakikurqan esposanta chay millay onqoywan ñak’ariqta rikuspa! Yaqapaschá familiaykimanta pipas chhayna onqoywan otaq yuyaqña kaspa ñak’arishan (Ecl. 12:1-7). Chhayna kaqtinqa, cuidakunaykin onqosqata yanapanaykipaqqa. Iñiyniykipipas qaqatan sayanayki, mana chayqa pisipawaqmi, onqowaq iman familiaykitapas manañan yanapayta atiwaqchu. ¿Imaynatan onqosqa familiaykita otaq yuyaq tayta-mamaykita cuidaspa hunt’awaq congregacionpi ruwanaykikunatapas? ¿Imaynatan iñiqmasikuna yanapakunkuman?

¿Imaynatan iskayninta hunt’awaq?

Mana onqospalla iñiyninchispipas mana pisipaspalla onqosqakunata cuidanapaqqa tiemponchistan t’aqananchis, manataq huk ruwayllaman qokuspa nishuta sayk’unachu. Proverbios 11:2 textoq nisqan hina, ‘k’umuykukuq’ runakunaqa yachankun mana tukuy imatapas ruway atisqankuta. Chayrayku mana nishuta sayk’unanchispaqqa allinta qhawarinanchis imakuna ruwasqanchista.

Joseqa chaytan ruwarqan. Familianta uywananpaqmi llank’anan karqan, chaymantapas Irlanda congregacionpin umallikunaq llank’ayninpi yanapaq umalli  karqan, hinallataq superintendente de servicio. Yanapakurqantaq Comité de Enlace con los Hospitales nisqapipas. Paymi nin: “Esposayqa manan hayk’aqpas niwaqchu: ‘Nishu ruwanayoq kasqaykiraykun mana allintachu cuidawashanki’, nispa; ñoqan ichaqa reparakurqani nishu ruwanayoq kasqayta. Chaymi Diosmanta anchata mañakuspa decidikurqani amaña coordinador kanaypaq. Umallilla kaqtiyqa manañan nishu ruwanayoqchu karqani, astawanmi tiempoy karqan esposayta sumaqta atiendenaypaq”, nispa.

Santusaq huk chhikanta qhaliyapusqan qhepamantaq iskayninku qhawarirqanku imapi yanapakunankupaq. Chaymi Joseqa esposanpa yanapayninwan congregacionpi saqepusqan ruwaykunapi hukmanta llank’ayta qallarirqan. Paymi nin: “Onqospaqa manan ima munasqaykitapas llapanta ruwayta atiwaqchu. Anchatan Jehová Diosta agradecekuni yanapayninmanta, hinallataq esposaytapas, manaña qhalichu kashan chaypas, mana rimapakuspan yanapawan”, nispa.

Kunanqa rimasunchis congregacionkunata watukuq Juan sutiyoq cristianomanta, esposan Mariamantawan, paykunan  yuyaq tayta-mamankuta cuidanankurayku imachus munasqankuta saqepurqanku. Marian nin: “Qosaywanmi misionero kayta munarqayku, ichaqa payqa sapan wawataq karqan chayqa, tayta-mamanmi necesitarqan cuidanaykuta. Chaymi Irlandapi qhepakurqayku paykunata cuidanaykupaq. Chhaynapin wañupunankama taytanta qhawarqayku hospitalpi kashaqtin. Kunanqa rimashallaykun suegraywan imaynapi tarikushasqanta yachanaykupaq, makillataq kashayku yanapanaykupaq. Iñiqmasikunan anchata yanapawarqanku, chaymi congregacionkunata watukushallayku”, nispa.

¿Imaynatan hukkuna yanapakunkuman?

Yuyaq viudakunata imaynata iñiqmasikuna yanapanankumantan Pablo nirqan: “Pipas ayllunta mana yuyarinchu, aswantaqa familianta mana uywanchu chayqa, cheqaq iñiymantan t’aqakapun, mana iñiyniyoq runamantapas aswan millayraqmi kapun”, nispa. Chaywanmi apostolqa rikuchisharqan cristianokuna yuyaq tayta-mamankuta abuelonkutapas necesitasqankupi yanapananku kasqanta, “Diospas chaytapunin munan” (1 Tim. 5:4, 8). Ichaqa wakin iñiqmasikunapas yanapakunankun.

Suecia suyupi tiyaq warmi-qhari Hugomanta Victoriamantawan rimasunchis. Hugon nin: “Nishutan llakikurqayku esposay cancerniyoq kasqanta yachaspayku. Victoriaqa qhalillapunin karqan. Kunanmi ichaqa sapa p’unchay hospitalta rinayku karqan tratamiento chaskinanpaq. Chay hampikuna chaskisqanmi kallpanta pisiyachirqan. Chaymi wasillapi qhepakurqan ñoqataq atienderqani”, nispa. ¿Imaynatan paykunata yanaparqanku iñiqmasikuna?

Umallikunan yanaparqanku huñunakuykunapi yachachiykunata telefonopi uyarinankupaq. Iñiqmasikunapas watukurqankun, telefonopi waqyarqanku, cartakunata ima apachirqanku. Hugo nillantaq: “Repararqaykun Jehová Diospa, iñiqmasikunaq yanapayninta. Mana paykunaq yanapayninwanqa iñiyniykun pisipanman karqan. Victoriaqa qhaliyapunmi, chaymi huñunakuykunaman rishaykuña”, nispa. Onqosqakunata yuyaq wawqe-panakunatapas yanapaqqa Bibliaq nisqan hinan tukuy tiempo munakuq amigo, ‘wawqe hina khuyapayakuqtaq’ (Pro. 17:17).

Jehová Diosqa allinta qhawarin ruwasqaykita

Onqosqata atiendey sasa kaqtinpas kusikusunmanmi. Rey Davidmi nirqan: “Kusisamiyoqmi pisi kallpayoq wakchata yuyarikuqqa”, nispa. Pisi kallpayoqkunaqa kallankumantaqmi nishu onqosqakuna (Sal. 41:1).

¿Kusikunkumanchu onqosqata atiendespanku? Arí, Proverbios 19:17 texton nin: “Wakcha runaman manuyqa Señor Diosman manuymi, Señor Diosmi manusqantaqa kutichipunqa”, nispa. Diosqa anchatan interesakun onqosqa serviqninkunapi, paykuna cuidaqkunatataq yanapan. Davidmi khaynata takirqan: “Señor Diosmi payta [onqosqata] kallpachanqa nanaywan puñunapi kashaqtin”, nispa (Sal. 41:3). Onqosqata cuidaq sasachakuypi tarikunqa chaypas Jehová Diosmi paytaqa yanapanqapuni.

¡Maytan kusikunchis onqosqa familianchiskunata cuidasqanchismanta Jehová Dios chayta allinpaq qhawarisqanmanta! Sasaña chay ruway kanman chaypas, Biblian niwanchis: “Chay hina sacrificiokunawanmi Diosqa kusikun”, nispa (Heb. 13:16).

[Uranpi willakuy]

[18 paginapi fotokuna]

Iñiyniykipi qaqata sayay hukkunaq yanapaynintataq chaskiy