Qharikuna, espirituq munasqanta tarpuychis, serviychistaq hukkunata
Qharikuna, espirituq munasqanta tarpuychis, serviychistaq hukkunata
“Santo Espirituq munasqanta tarpuqmi ichaqa, Santo Espiritumanta wiñay kawsayta cosechanqa.” (GÁL. 6:8.)
1, 2. ¿Imaynatan hunt’akushan Mateo 9:37, 38 textoq nisqan? ¿Iman necesitakushan congregacionkunapi?
JESUSMI nirqan: “Cosechanaqa askhapunin, llank’aqkunataq ichaqa pisilla. Chayrayku, chakrayoqta valekuychis cosechanman llank’aqkunata kachamunanpaq”, nispa (Mat. 9:37, 38). Jesuspa chhayna nisqanqa kay tiempopin Jehová Diospa yanapayninwan astawan hunt’akushan. Chaymi 2009 watapi 2.031 congregacionkuna yapakurqan, kunanqa 105.298 congregacionkunañan pachantinpi kashan. Sapa p’unchaytaq 757 runakuna bautizakurqanku.
2 Askhataq Jehová Diospa ovejankuna yapakamushan chayqa, astawanmi necesitakushan yachachiqkunata michiqkunatapas (Efe. 4:11). Jehová Diosqa ñawpa tiempomantapachan allin michiqkunata churarqan ovejankunata qhawanankupaq, chaytaqa ruwallanqapunin. Miqueas 5:5 textopi profeciaq nisqanman hina, tukukuy p’unchaykunapin Diospa llaqtanpi kanan karqan ‘qanchis kamachikuqkuna’, ‘pusaq umalli runakunapas’ otaq Diospa ovejankunata pusanankupaq allin preparasqa runakuna.
3. ¿Iman ‘santo espirituq munasqanta tarpuy’?
3 ¿Bautizasqañachu kashanki? Chhaynaqa, ¿iman yanapasunkiman Diospa llaqtanpi astawan llank’anaykipaq? ‘Santo espirituq munasqanta tarpuymi’ yanapasunki, chayqa Diospa espiritunwan pusachikuspa imatapas ruwaymi (Gál. 6:8). Kallpachakunaykin ‘aychaykiq millay munasqankunata’ ama ruwanaykipaq, chaypaqqa manan qhapaq kaykunata maskhaypichu nitaq kusirikuykunallapichu purinayki, chaykunaqa hark’asunkimanmi Diospaq astawan llank’anaykipaq. Llapa cristianokunaña ‘espirituq munasqanman’ hina tarpunanchis chaypas, qharikunan astawanqa chaypaq kallpachakunanku, chhaynapi astawan yanapakunankupaq. Kay estudiopiqa qharikunatan kallpachakushan siervo ministerial otaq umalli kanankupaq. Chayrayku Bautizasqa qharikunata kallpachaykiku Diosmanta mañakuspa allinta kay estudiota t’aqwirinaykichispaq.
Hukkuna serviy munasqaykita rikuchiy
4, 5. a) ¿Imapaqmi bautizasqa qharikuna kallpachakunanku? b) ¿Imaynatan rikuchinkuman astawan llank’ay munasqankuta?
4 Manan mayqen cristianopas mana kallpachakuspaqa umalli kanmanchu. Chay ‘allin llank’ayman’ aypananpaqqa anchatan kallpachakunan (1 Tim. 3:1). Tukuy sonqomantan iñiqmasinkunata yanapanan (leey Isaías 32:1, 2). Ichaqa manan allinninpi yuyaykuspachu chaytaqa ruwanan.
5 Pipas umalli otaq siervo ministerial kayta munaqqa, imaynachus umallikuna kananmanta Bibliaq nisqantan hunt’anan (1 Tim. 3:1-10, 12, 13; Tito 1:5-9). Chaymi llapa cristianokuna tapukunanku: “¿Sapa kutillachu predicacionman lloqsishani, yanapashanichu iñiqmasiykunatapas lloqsinankupaq? ¿Qhawarishanichu hukkunaq allinninta, kallpachanichu pisipaqtinkupas? ¿Estudiashanichu Bibliata? ¿Kallpachakunichu huñunakuykunapi allinta comentanaypaq? ¿Kusisqachu umallikunaq kamachiwasqankuta hunt’ani?” nispa (2 Tim. 4:5). Chay tapuykunan reparachisunkichis imaynachus kashasqaykichista.
6. ¿Imatawanmi ruwana siervo ministerial otaq umalli kanapaq?
6 ¿Imatawanmi cristianokuna ruwananku congregacionpi astawan llank’anankupaq? ‘Espirituwanmi sonqonkupi atiywan kallpachasqa’ kananku (Efe. 3:16). Manan pipas allin qhawarisqa kananpaqchu siervo ministerial otaq umalli kaytaqa munanan. Chaymanqa aypanku Dioswan allinpi kaqkunallan, chaymi huk sumaq llank’ayta hina qhawarinanku. Ichaqa, ¿imatan ruwananku iñiypi wiñanankupaq? ‘Espirituq munasqanman hinan kawsananku’, ruruntapas kawsayninkupi ruruchinanku (Gál. 5:16, 22, 23). Umalli kanankupaq hina kawsaspankun, yuyaychaykunatapas uyarikuspankun ‘iñiypi wiñasqankuta lliwman sut’ita rikuchinqaku’ (1 Tim. 4:15).
Hukkunaq allinnintaraq maskhay
7. ¿Imaynatan iñiqmasikunata servina?
7 Iñiqmasikunata servinapaqqa paykunaq allinnintaraqmi maskhana. Umallikunaqa Diospa ovejankunata michiqmi kanku, chaymi kallpachakunku paykunata sasachakuyninkupi yanapanankupaq. Diospa ovejankunata michispa imayna sientekusqanmantan apóstol Pablo Corinto llaqtayoq cristianokunaman nirqan: “Sinchi llakisqan sonqoypi mayta waqaspan qelqamurqaykichis, ichaqa manan llakichinaypaqchu, aswanpas anchatapuni qankunata munakusqayta yachanaykichispaqmi”, nispa (2 Cor. 2:4). Pabloqa tukuy sonqomantan iñiqmasinkunata yanaparqan.
8, 9. ¿Pikunan ñawpaq tiempopi hukkunaq allinnintaraq maskharqanku?
8 Umallikunaqa ñawpaq tiempomantapacharaqmi hukkunaq allinninta maskharqanku. Noeqa manan hayk’aqpas familianta nirqanchu: “Arcata ruwayta tukuspaykichisñan waqyamuwankichis”, nispa. Moisespas manan Israel runakunata nirqanchu: “Qankunaña imaynatapas Puka Qochaman chayaychis, chaypiña tupasunchis”, nispa. Josuepas manan nirqanchu: “Jericó llaqtaq perqankuna thunikuqtinña waqyamuwankichis”, nispa. Nitaq Isaiaspas huk profetata rikuchispachu Diosta nirqan: “Paytayá kachay”, nispa (Isa. 6:8).
9 Criston astawanqa espirituq munasqanman hina kawsarqan, payqa kusikuywanmi Taytanta kasukurqan runakunata huchamanta kacharichinanpaq kamachiqtin (Juan 3:16). Chhaynaqa, ¿manachu imayna kawsasqanchiswan Cristota agradecekunanchis munakuyninmanta sacrificakusqanmantapas? Huk umallin nirqan: “Jesuspa Pedrota: ‘Ovejachaykunata michipuway’, nisqanqa sonqoyman chayaqmi karqan, chaymi yanapawarqan iñiqmasiykunata allinta qhawarinaypaq. Unay watakuna umalli kasqaypin yachani hukkunata sumaqta paylapayay, sumaq sonqowan tratay anchata kallpachasqanta. ¡Maytan kusikuni Diospa ovejankunata michispay!” nispa (Juan 21:16).
10. ¿Iman cristianokunata kallpachan Jesús hina iñiqmasinkunata servinankupaq?
10 Bautizasqa qhariqa Jesús hinan iñiqmasinkunata tratanan, paymi nirqan: “Ñoqan samachisqaykichis”, nispa (Mat. 11:28). Cristianotaqa Diospi iñisqanmi, iñiqmasinkunata munakusqanmi kallpachan Diospa ovejankunata michinanpaq. Manataqmi nishu sasa llank’ayta hinachu qhawarin. Ichaqa, ¿iman yanapanman congregacionpi umalli kanankupaq mana kallpachakuqkunata?
Kallpachakuy hukkunata servinaykipaq
11. ¿Iman kallpachawasun hukkunata servinanchispaq?
11 ¿Hatun llank’aykunata mana hunt’ayta atinaykipaq hinachu sientekunki? Chay hina kaqtinqa, Diosmanta santo espiritunta mañakuy, chhayna sientekusqaykita atipanaykipaq (Luc. 11:13). Espiritualpi ñawparinanchispaqqa Jehová Diosmi santo espiritunwan kallpachawanchis payta yupaychananchispaq (Fili. 2:13; Isa. 12:2). Chayraykun mañakunanchispuni espiritunta, chhaynapin kallpachawasun iñiqmasinchiskunata servinanchispaq (leey Salmo 25:4, 5).
12. ¿Imaynatan yachayta tarisunman iñiqmasikunata servinapaq?
12 Wakin iñiqmasikunaqa sasapaqmi qhawarinku hukkuna serviyta, Diospa ovejankunata sasachakuyninkupi yanapayta mana atinankupaq hina yuyaykusqankurayku. Otaq chay llank’ayta aparinankupaq mana yachayniyoqpaq hina qhawarikusqankurayku. Chhayna kaqtinqa, Bibliata, qelqanchiskunata estudiaspan astawan yachayta tarinkuman. Chaymi tapukunanku: “¿Sapa p’unchaychu Bibliata estudiashani, mañakunichu Diosmantapas yachayta?” nispa. Santiagon nirqan: “Mayqenniykichispas pisi yachayniyoq kashan chayqa, mana phiñarispa lliwman askhatapuni qoq Diosmanta mañakuchun, hinan Diosqa payman yachayta qonqa”, nispa (Sant. 1:5). ¿Confiankichu Diospi yachayta qonasuykipaq? Salomón mañakuqtinpas Diosqa qorqanmi “allin yachayta allin yuyaytawan”, chhaynapin juzgayta atirqan mana allinkaqmanta allinkaqta reparaspa (1 Rey. 3:7-14). Manaña Salomonman hinachu yachayta qonqa chaypas, Jehová Diosqa qonqapunin yachayta ovejankunata michiqkunaman (Pro. 2:6).
13, 14. a) ¿Imapin Cristoq munakuynin Pablota yanaparqan? b) ¿Imaynatan ñoqanchista yanapawananchis ‘Cristoq munakuynin’?
13 Jehová Dioswan, Jesuswan ñoqanchisrayku ruwasqankupi yuyaymanaymi kallpachawallasuntaq hukkunata servinanchispaq. T’aqwisunchis 2 Corintios 5:14, 15 (leey) textoq nisqanta. ¿Imaynapin ‘Cristoq munakuynin kawsayninchispi anchata kallpachawanchis’? Jesusqa ancha munakuyniyoq kasqanraykun Taytanta kasukurqan, hinaspa ñoqanchisrayku wañurqan, chay ruwasqanmi kallpachawanchis anchata agradecekunanchispaq, munakuyninman hina kawsananchispaqpas. Pablotapas Cristoq munakuyninmi yanaparqan ama imatapas paypi yuyaykuspalla ruwananpaq, kallpacharqantaq Diosta, runamasinkunata serviypi tukuy yuyayninta churananpaq.
14 Cristo runakunata munakusqanpi yuyaymanaymi kallpachawanchis agradecido kananchispaq. Entiendenchismi ‘aychanchispa millay munasqallanta tarpuy’ otaq munasqallanchista maskhay mana allinchu kasqanta. Chaymi kallpachakunchis Diospa kamachiwasqanchis llank’ayta ñawpaqman churananchispaq. Munakuq kasqanchisraykun iñiqmasinchiskunata kamachin hina serviyta munanchis (leey Gálatas 5:13). Paykunaq kamachin hina qhawarikuspaqa sumaq sonqowanpunin tratasun, manataqmi paykunamanta millaytachu rimasun, nitaq huchachasunchu; chay ruwaykunaqa Satanaspa mast’arisqanmi (Apo. 12:10).
¿Imaynatan familia yanapakunman?
15, 16. ¿Imaynatan huk cristianota familian yanapanman siervo ministerial otaq umalli kananpaq?
15 Huk cristiano allinña kashan siervo ministerial otaq umalli kananpaq chayqa, qhawarikunmi esposan, wawankunapas iñiyninkupi imayna kashasqankuta. Chaymantan kanqa nombrasqa otaq mana nombrasqa kanan. Chaymi familianqa tukuy atisqanta yanapanan siervo ministerial otaq umalli kananpaq (leey 1 Timoteo 3:4, 5, 12, Edición 1988).
16 Jehová Diosqa kusikunmi llapa familia yanapakuqtin (Efe. 3:14, 15, NM). Umallikunaqa manan iñiqmasikunallatachu yanapananku, ‘wasinpi kaqkunatapas allintan’ yanapananku. Chaymi kallpachakunanku Familiantin Diosta Yupaychana Ch’isinta sapa semana aparinankupaq. Chaymantapas, sapa kutinmi kuska predicaq lloqsinanku. Familianpas kallpachakunanmi payta yanapanankupaq.
Kallpachakuy wakmanta siervo ministerial otaq umalli kanaykipaq
17, 18. a) ¿Imatan ruwanan siervo ministerial otaq umalli kayta saqepuq cristiano? b) Imakunata ruwaymi yanapanqa mana pisipananpaq?
17 Yaqapaschá siervo ministerial otaq umalli karqanki, kunantaq manaña. Chaywanpas munakushallankin Jehová Diostaqa, paypas munakusunkin (1 Ped. 5:6,7). Ichaqa nirqasunkikupaschá imapi allinyanaykita. Chay hina kaqtinqa, kallpachakunaykin pantasqaykikunata reparaspa Diospa yanapayninwan allinyanaykipaq. Ama phiñakuywanqa atipachikuychu. Aswanpas yachayniyoq kay, allin kaqkunapitaq yuyaykuy. Huk cristianon unay watakuna umalli kasqanta saqepuspa, qhepaman imachus ruwasqanmanta khaynata willakun: “Decidikurqanin umalli kasqay tiempopi hina huñunakuykunaman rishanallaypaq, predicashanallaypaq, Bibliatapas leeshanallaypaq, chaytataqmi ruwarqani. Huk watamanta otaq iskay watamanta hina wakmanta umalli kanaypaq yuyaykurqani chaypas, qanchis watamanta hinan karqani, chaymi yacharqani pacienciayoq kayta. Chaykamaqa wakin iñiqmasikunan anchata yanapawarqanku, paykunan niwarqanku ama pisipaspa kallpachakushanallaypaq”, nispa.
18 Chhaynapi tarikushanki chayqa, ama pisipaychu. Yuyaykuy imaynata Jehová Dios bendecishan predicacionniykita, familiaykitapas chaypi. Yanapay familiaykita iñiyninkupi qaqa sayanankupaq, onqosqakunata watukuy, iñiyninkupi pisipashaqkunatapas kallpachay. Amapuni saqeychu allin willakuykuna predicayta, Testigon hina Diosta hatunchaytapas (Sal. 145:1, 2; Isa. 43:10-12). *
Allinta qhawarikuy
19, 20. a) ¿Imapaqmi kallpachakushan llapa bautizasqa qharikunata? b) ¿Imamantan qatimuq estudiopi yachasun?
19 Kunanmi astawanraq necesitakushan siervo ministerialkunata umallikunatapas. Chaymi bautizasqa qharikunata kallpachaykiku imaynapi tarikusqaykichista allinta qhawarikunaykichispaq, kayta tapukunaykichispaqpas: “¿Iman hark’ashawan siervo ministerial otaq umalli kanaypaq?” nispa. Chaypaqqa Diospa espirituntan mañakunaykichis, chhaynapi allin yuyaywan qhawarikunaykichispaq.
20 Congregacionpi umallikunaq llank’asqanqa llapa iñiqmasikunaq allinninpaqmi. Kay estudiopi yachasqanchis hina, runamasinchista sumaq sonqowan yanapaspaqa kusikunchismi, chayta ruwaspaqa santo espirituq munasqantan tarpushanchis. Ichaqa cuidakunanchismi santo espirituta ama hayk’aqpas llakichinanchispaq. Qatimuq estudiopin yachasunchis chaymanta.
[Uranpi willakuy]
¿Imaynatan kutichiwaq?
• ¿Imatan yachanchis Miqueas 5:5 textoq nisqanmanta?
• ¿Imaynatan hukkunaq allinnintaraq maskhasunman?
• ¿Imakunata ruwaymi kallpachawasun iñiqmasinchiskunata servinapaq?
• ¿Imaraykun familiaq yanapakuynin importante huk cristiano siervo ministerial otaq umalli kananpaq?
[Tapuykuna]
[25 paginapi fotokuna]
¿Imaynatan rikuchiwaq hukkuna serviy munasqaykita?