Respetananchismi kurakkunata

CALIFORNIA llaqtapin kashan huk munay sach’a, chaytan askha fotota horqonku, chay sach’aqa 250 más watayoqñas kanman. Chaymi allin cuidasqa kananpaq cablekunawan watarqanku mana urmananpaq, hinallataq rumiwan cercarqanku. Chay sach’atan sutichanku: “Sapallan Ciprés”, nispa.

Chay sach’an yuyarichiwanchis Diospa llaqtanpi kurak iñiqmasinchiskunata, paykunaqa tukuy sonqowanmi unayña llank’ashanku predicaspa. Profeta Joelmi willarqan tukukuy p’unchaykunapi ‘kurak runakuna’ Diosmanta willanankumanta (Joel 2:28-32; Hech. 2:16-21). Chaytapunin paykunaqa ruwashanku, askha horatan ‘allin willakuykunata’ predicanku (Mat. 24:14). Wakinqa askha watan qatiykachasqa karqanku otaq imaymana sasachakuykunapi tarikurqanku. Huk ciprés sach’allatan unay tiempo kawsasqanrayku sumaqta qhawarinku, cablekunawan rumikunawan ima cuidanku, ¿chaychu mana kurak iñiqmasinchiskunata sumaqta respetananchis tratananchispas?

Jehová Diosmi Israel llaqtata kamachirqan: “Machu runaq ñawpaqenpin sayaykunki, hinaspan payman k’umuykukunki”, nispa (Lev. 19:32). Askha kurak iñiqmasinchiskunan unay watakunaña ‘Diospa ñawpaqenpi’ hunt’aq sonqo karqanku (Miq. 6:8). Tukuy tiempopitaq Bibliaq nisqanta kasukurqanku, chaymi nisunman: “Soqoyoq kayqa umatan munaychan”, nispa (Pro. 16:31).

 Apóstol Pablon Timoteota nirqan: “Kurak runataqa ama phiñarikuychu, aswanpas taytaykita hina yuyaychaykuy [...], kurak warmikunatapas mamaykita hina rikuy”, nispa (1 Tim. 5:1, 2). Chayta ruwaspan Timoteoqa ‘machu runaq ñawpaqenpi sayaykunman’. Jehová Diosqa munanmi kurakkunawan respetowan rimananchista.

Romanos 12:10 texton nin: “Respetanakuspa hukkuna hukkunawan aswan allinpaq qhawanakuychis”, nispa. Chay kamachikuyta kasukunapaqqa llapanchismi kurak iñiqmasinchiskunata respetowan tratananchis, astawanqa umallikunan chayta ruwananku.

Chay kamachikuytaqa kurak runakunaq familianmi astawanqa kasukunanku, paykunan atiendenanku tayta-mamankuta abuelonkutapas. Runakunaqa imaymanatataq ruwanku Sapallan Ciprés sach’ata cuidanankupaq chayqa, ñoqanchisqa astawanraqmi kallpachakunanchis tayta-mamanchista abuelonchiskunatapas sumaqta tratananchispaq. Chaytan ruwasunman imakuna yuyaykusqankuta uyarispa, manataq munasqanchisman hinallachu ruwaspa (Pro. 23:22; 1 Tim. 5:4).

Jehová Diosqa anchatan valoran kurak serviqninkunata, chaymi mana hayk’aqpas saqerparinqachu (Sal. 71:18). Paykunamanqa kallpatan qon hunt’aq sonqowan servishanallankupaq. Ñoqanchispas paykunataqa yanapananchismi respetananchistaq.

[7 paginapi fotokuna]

Imaynan Sapallan Ciprés sach’ata sumaqta cuidanku, chhaynatan kurakkunatapas respetananchis sumaqtataq tratananchis

[Fotota horqorqan]

American Spirit Images/​age fotostock